Mothi 13
13
Hachua kaisani naisrwng
(Mark 4:1-9; Luk 8:4-8)
1O salw Jisu nokni akhogwi twithu kandao thangwi achukkha. 2Bini orw iswk jora borog thumjakha, Bw odayw tongmaya jar haba ongwi kwrwngsa rungw kagwi ma achukkha, tei jotho borogrok twithu kandao bachagwi tongkha. 3Aiphuo bw kokdumani bisingtwi kabangma kothoynw lagwi phwrwngni nangkha. Bw sakha, "Hachua kaisa bwchwlwi khibini thangkha.
4Bwchlwi khibiphini kisa bwchlwi lama kandao kalaikha arw toksarok phaywi obwnw chagwi pairwkha. 5Tei kisa bwchlwi orw thangwi kalaikha jedayw ha bisingw holong tong. Orw ha kabang kwrwi thani o bwchlwi dodogwi darokkha, 6matwr sal kahalai obw khamprogwi paikha tei biyarum gam khaywi sokjiya thani obw thwywi thangkha. 7Tei kisasa bwchwlwi orw thangwi kalaikha jedayw ha bisingw busu yarum tong. Obwbai o busu bwlwng twrwi o bwchwlwini achainai bwchwlwi phang roknw sinwi tonkha. 8Tei kisacha bwchwlwi ha gamw kalaikha thani bwbwbo rasa duna, bwbwbo dokchi duna tei bwbwbo thamchi duna mwi achaikha."
9Kokdumani paithakgw Jisu sakha, "Jeni khananai khunjur tong bw khanathwk"
Jisu sakha bw tamani phwrwngni bagwi naisrwng sa
(Mark 4:10-12; Luk 8:9,10)
10Jerw sagrirok Jisuni dayw phaywi swngkha, "Nwng tani kokdumani bisingtwi phwrwngdok?"
11Jisu boknw sakha, "Twmwi hinba chukha auarni huijak kokroknw bijinai mwk nokhnwse rwjak, matwr boknw rwjiya, 12twmwi hinba jeni dayw tong bwnw arw rwnw, tei obwbai bini arw kabang ongnw. Matwr jeni kwrwi bini dayw jeswk tong obwnwbw bini daini swywi lanw. 13Aithani boknw Ang kokdumani bisingtwi khalaywi phwrwngw, twmwi hinba bok nungwibw nungya, khanagwibw khanaya arw bijiywibw bijiya. 14Arw bokni kothoyw Jisayoni i kokmai sohkdok ongdok:
'Bok khanagwi tongnw matwr mwngsabw bijigalak, Bok nungnw matwr mwngsabw sigalak. 15Imwtwi jar borogrokni kha karak arw khunjur phwngjagwi paijak, tei bok bokni mokolbw phwngwi tonjak, jate bok bokni mokolbai nungyatwi tei bokni khunjurbai khanayatwi arw bokni khabai bijiyatwi, twmwi hinba bok kha phirokni naiya tei Angbai hamrw janibw naiya.
16"Matwr nokh hamsajak, twmwi hinba nokhni mokol nungw tei khunjur khanagw. 17Ang nokhnw kwbwi sadok, nokh jebw jebw nungdok obwnw kodur diyari tei raidia borogrok naini muchugwibw nungjiya, tei nokh jebw jebw khanadok obwnw bok khanani muchugwibw khanajiya.
Hachuani naisrwngni sema
(Mark 4:13-20; Luk 8:11-15)
18"Taboklai nokh hachuani naisrwngni sema khanadi. 19O lama kandani kalaijak bwchlwirok imwtwijar borogrokni kok sajak jebwrok chukhna hani koknw khanagw matwr bijiya aiphuo sotan phaywi bini khagw tisagwi tonnai koknw swywi lagw. 20Tei holong jegao kalaijak bwchwlwi imwtwi jar borogrokni kok sagw, jebwrok chukha auarni kok khanamani loge loge tongthokmabai obwnw goseywi lagw, 21matwr bokni bisingw yarum gam khlaywi achukya thani bok keber kisa jorani bagwi thi tongw. Jephuo o kokni bagwi dugu tei satokma phai aiphuni bok bokni paitokmanw thakrwgw. 22Busu bwlwngw kalainai bwchwlwi imwtwijar borogni kok sagw jebwrok o koknw khanagw matwr nukhungni oanama bai rangirini oanama o koknw sinwi tonw. Aithani odayw mwngsa bathai ongya. 23Jobin gamw kalainai bwchwlwi imwtwijar borogni kok sajak jebwrok o koknw khanagw, bijiyw tei bathaibw rwgw. Bwbwbo ra bang rwgw, bwbwbo dokchi bang rwgw tei bwbwbo thamchi bang rwgw."
Gom bisingw sammasi bophang
24Jerw Bw phwrwngni bagwi arw kwrwngsa naisrwng sakha. Naisrwng ongkha arai: "Chukha auar imwtwijar kaisa borogni kosol jebw bini sakni jobinw gam bwchwlwi salkha. 25Jerw jephuo jotho thugwi pai, aiphuo bini kena phaywi gom bisingw sammasini bwchwlwi kaiywi kalangw. 26Paithagw gom bophang twrwi bathai thaikha aiphuo gom bisingw sammasi bophangbw nungjakha. 27Obwnw nungwi nokni selengrok bokni nuphangnw swngkha, 'Nwng tama gam bwchwlwi kaijiya? Hai bwrwni sammasi bophang phaika?'
28"Bw boknw sakha, 'Kena kaisa imwnw khalaikha.'
"Selengrok bwnw swngkha, 'Hai chwng tama obwroknw phwywi kokholni?'
29"Bw sakha, 'Whoi, sammasi bophangrok phwini thangwi nokh gom bophangrok phwinw. 30Thaichwlwi ranai jo jora obwroknw baksa khalaywi kani rwgara. Ang thaichwlwi ranairoknw sanw bok sakang sammasi bophangroknw sokni bagwi bonda bonda khalaywi khanaitwi, tei jerw ani mai golao gom thumwi tonnaitwi.'"
Hwirw bwchwlwi tei chothani naisrwng
(Mark 4:30-34; Luk 13:18-21)
31Jisu boknw arw kwrwngsa naisrwng sakha. Obw ongkha arai: Chukha auar ongkha hwirw bwchwlwi kolsani kosol jebw borog kaisa lagwi bini sakni jobinw kaikha. 32Imw kwbwise jotho bwchwlwini bisingw obw gira, matwr bophangni kosol twrwi kakhalai obw kothe thaimarini naikhalai iswk jora gara ongw toksa tokmilirok obwni bedek boprao bothol lagw."
33Bw boknw arw kwrwngsa naisrwng sakha. Naisrwng ongkha arai: "Chukha auar ongkha chothani kosol. Birok kaisa obwnw ser chichar auan guriyw bulkha. Jebwni bagwi jotho auan guri kutugwi kaha."
34Jisu naisrwngni bisingtwi borogroknw imwroknw phwrwngkha. Bw naisrwngni bader boknw mwngsase phwrwngya. 35Diyarini bisingtwi sajaknai ikok sohknaitwi Imw ongkha:
Ang boknw naisrwngni bisingtwi phwrwngnw,
Hayung chengmanaini jimin jeba jeba huiywi tongjak, obwnw sanai.
Sammasini naisrwngni sema
36Jerw Jisu borogroknw yakarwi nogw hapkha. Aiphuo Bini sagrirok Bwnw swngkha, "Jobinni o sammasini naisrwngnw chwnw bijirwgwi rwdi."
37Joba rwgwi Jisu sakha, "Gam bwchwlwi kainaisa Bw ongkha Borogni Sajla. 38Jobin ongkha i hayung, tei gam bwchwlwi ongkha chukha auarni borogrok. Sotanni borogrok ongkha o sammasi bophang. 39Sammasi bophangni bwchwlwi kaywi rwnai kena ongkha saitan, tei thaichwlwi ranai jo ongkha paithak jo. Thaichwlwi ranairok ongkha suari. 40Gam thaichwlwi daini sammasi bophangnw juda khalaywi thumwi soknw, thi obwtwijar molni paithak jorabw gam borogrokni daini chaya borogroknw juda khalaywi thumnw. 41Borogni Sajla Bini suari honw. Jebwrok benw sumsok khalairw tei sakrokbw khalayw obwtwijar borogroknw o suarirok baksa khalaywi thumnai tei Borogni Sajlani auar daini kariywi honai. 42Tei chwngsajak hotw tilangwi khibiywi rwnai. Odayw borogrok karablainw tei tentrokmabai buabai bua oalni nangnw. 43O jorago raidiarok bokni chukhani aphani auarw salni kosol por khalaywi nungjaknw. Jeni khananai khunjur tong bw khanathwk.
Huijak ghwn tei gam richakni naisrwng
44Chukha auar jobin bisingw huijak ghwnni kosol. Borog kaisa obwnw rutubwi manwi arwbw huywi tonkha. Obwni jerw bw tongthogwi odaini thangkha tei bini ja tong jotho phalwi o jobinnw paikha.
45"Arwbw, chukha auar hamchuk richak rutubnai swdagor kaisani kosol. 46Kwrwngsa moroknai richak rutubwi manwi bini ja tong jotho phalwi o richaknw paikha.
Swngjak jalni naisrwng
47Chukha auar imwtwijar kwrwngsa gara jalni kosol jebwnw twibomw khibikha tei orw jotho jarni aa rumjakha. 48Jal pwlwng khalai borogrok obwnw swtwnwi tisakha. Jerw bok achugwi aa gamroknw saiywi khoparao tonkha tei chaya roknw khibiywi hokha. 49Paithak molni jogw imwtwijar ongnai. Suarirok phaywi raidia rokni daini kikhriroknw kothe khalainai. 50Arw chwngsajak hot dayw khibiywi rwnai. O jegao borogrok karaplainw tei tentrokmabai buabai bua oalni nangnw."
51Obwni jerw Jisu Bini sagriroknw swngkha, "Nokh imwroknw bijimanjak?" Bok sakha, "Owk, chwng bijijak."
52Aiphuo Jisu boknw sakha, "Chukha auarni kothoyw kerongnal phwrangsa rok ja swrwngmwng manjak bok jotho imwtwijar kaisa nokni nuphangni kosol jebw bini ghwn rangirini katal bai kacham manwi tikhalayw."
Nasarotw Subrai Jisu sak nangjakliya
(Mark 6:1-6)
53Phwrwngni bagwi i kokdumaroknw sagwi paikhai Jisu orwni thangkha. 54Obwni jerw Bw Bini sakni kamiyw thangwi thumnogw borogroknw phwrwngni nangkha. Bini koknw khanagwi borogrok amok chalaywi sakha, "I mwk tei imwtwi jar amok samung tangnai pharan Bw bwrwni mankha? 55Imw tama o bophang sutarni basalaya dwi? Bomani bwmwng tama Moriyomya? Tei Jakob, Josep, Simon bai Jihuda tama Bini takhukrok ya? 56Bini jotho bukhukrok tama chini dayw kwrwi? Halai bwdaini Bw imwroknw mankha?" 57Aithani bok Jisunw yachakliya.
Aiphuo Jisu boknw sakha, "Sakni kami tei sakni nokni bader arw jotho jilagw diyarirok borom manw."
58Borogrokni paitokyani bagwi Bw odayw kabangma amok chanai samung tangliya.
Currently Selected:
Mothi 13: TPE
Highlight
Share
Copy
Want to have your highlights saved across all your devices? Sign up or sign in
©️2025 Bible Students Fellowship of Bangladesh
