Mothi 11

Jisu Johonni kothoyw kok sakha

(Luk 7:18-35)

1Jisu Bini kai chinwi sagrinw tholmwng rwnai pairwkha. Obwni jerw Bw kami kamio phwrwngni tei pirni bagwi odaini thangkha.

2Alongw tongphini Johon jephuo Mosihoni samungni kok khanakha ephuo bini sagriroknw hogwi swngrw khokha, 3"Jeni phaijanai kok Nwng tama o tekhoknaisa Mosiho? Na chwng arw kaisachwkni bagwi nasingthai?"

4Jisu boknw joba rwkha, "Nokh jeba khanadok tei nungdok obwnw Johonnw thangwi saitangdi, 5kanarok nungdok, lengarok himdok, kuriya kaphajakrok kathar ongdok, nathongrok khanadok, kwthwirok langma philwi mandok tei biyalrokni dayw Kothoma pirjadok. 6Arw Anw lagwi khao je mwngsa thema maya bw hamsa.

Johonni kothoyw Subrai Jisuni kok

7Johonni sagrirok thanglaidok, o joragw Jisu Johonni kothoyw borogroknw sani rumkha, "Nokh haruarw ta naini thankjak? Nobarw naljajak kainchak? 8Obwya halai tamanw naini thangmani? Ri machang chumjak kaisachwknw dwi? Daijwse jebwrok ri machang chum bok bugrani nogwse tongw. 9Obwya halai tamanw naini thangmani? Kaisa diyarinw? Ani kok khanadi, Bw diyarini naikhlaibw gorja. 10Johonse o borog jeni kothoyw elembagw suijak tongw:

Khanadi, 'Ang Nini sakangw Ani koktwinainw hodok.

Bw Nini sakangw thangwi Nini lama jugalnw.'

11"Ani kok khanadi, i hayungw tabok jora jeswk borog achaijak bokni bisingw baptismo rwnai Johonni naikhlai gorja kaisabw kwrwi. Matwr chukha auarni jothoni naikhlai girabw Johonni naikhlai gorja. 12Baptismo rwnai Johonni jorani jimin tabok jora khamreng borogrok chukha auarnw kaphragwi phaidok, arw bok mar khalaywi obwnw swywi ladok. 13Johonni jo jora jotho diyarirok tei Mosini kerong nalwbw kokmuai sagwi klangjak. 14Arw nokh jwtini i koknw paitokni goseo, hai khanadi jeni phaitai kok tong o Eliyo ongkhadwi i Johon. 15Jeni khanani khunjur tong bw khanathwk."

16"I molni borogroknw Ang swrwbai teng suijaknai? Bok imwtwijar cherokrokni kosol je cherokrok hatiyw achugwi tongw arw kothe cherokroknw arai hinwi sagw, 17'Chwng nokhni dayw sumur subkha nokh masaniya, Chwng ramaywi rachapkha, nokh bakha bukhrubliya.' 18Twmwi hinba jephuo Johon phaikha tei okbar tongkha tei uamtwi bwtwi nwngliya, aiphuo borogrok bini mwngwi sakha, 'Bwnw chaya phala rumjak.' 19Arw jephuo Borogni Sajla phaywi nwngkha chakha aiphuo borogrok Bini mwngwi sakha, 'U naikhodi, kaisa chakhok arw chok nwngkarak, ol kholua tei sumsok ganangrokni aphak.' Matwr Bini mwk Bini samungni bisingtwise kwbwi hinwi majri ongw."

Paitokya kamirok tei aulirok

(Luk 10:13-15)

20Je aulirogw Jisu kabang amok chajanaijar samung tangjak, Bw boknw thechara thwngwi sakha, twmwi himba bok bokni kha phirokjiya, 21"Kopalhamya Korasin, kopalhamya Bwitsoda! Ang nokhnw sadok twmwi himba nokhni dayw khalainai amok samungroknw jwtini Sor bai Sidon#11:21 Sor bai Sidon Imwrok ongkha Bejihudirokni auli. aulio khalayw hintilai bok bw aguo sala kanwi thapala phulwi kha phirokkhamu. 22Matwr Ani kok khanadi, nalchirni salw nokhni naikhlai Sor bai Sidonni haba chwrmanai jar ongnw. 23Tei nwng Kophornahum, nwng chukha jora kuchugw kathai himbele? Nwng patakhorw akhorwjanw. Nini dayw khalainai amok samungrok Sodom aulio khalaitilai Sodom tabokbw tikiywi tongkhamw. 24Ani kok khanadi, nalchirni salw Sodomni haba nokhni naywibw chwrmanai jar ongnw."

Jisuni hambai yapharmani surimwng

(Luk 10:21,22)

25Obwni jerw Jisu Sakha, "O Apha chukha tei hayungni Subrai Ang Nwnw hambai rwgw, twmwi hinba imwtwi jar kothoy roknw Nwng mwk ganang bai buju ganang borogrokni daini huywi tonkha matwr cherokni kosol borogrokni dayw saplangkha. 26Owk Apha, imw Nini muchokmwngtwi ongkha.

27Jerw Jisu arwbw borogrokni dayw kok sakha, "Ani Apha jothobw Ani yagw rwjak. Phani bader Sajlanw kaisabw siya tei Sajlani bader Aphanw kaisabw siya, arw Sajla jeni dayw saplangrwni muchok bwse Aphanw siyw.

28"O lengjak tei poja hilikjajak rok, nokh jotho Ani dayw phaidi, Ang nokhnw lenglangma rwnw. 29-30Ani joain nokhni sakagw tisagwi ladi tei Ani daini swrwngdi, twmwi hinba Ani akkwl kurui tei koinene. Obwbai nokh khao lengkhonai mannw, twmwi hinba Ani joain lani kalaisa tei Ani poja heleng.

Currently Selected:

Mothi 11: TPE

Highlight

Copy