Prerit 14

Ikoniyo aulio

1Jwnwmni kosol Ikoniyo aulio Pol tei Barnoba Jihudirokni thumnogw thangkha. Odayw bok araijati kok sakha je, Jihudi tei Kaitornw lobnai Bejihudi kabangma borog paitokha. 2Matwr je Jihudirok paitokjiya bok Bejihudiroknw phemlogwi bokni khanw paitoai takhukrokni baithe thamchi kuturwgwi tisakha. 3Pol tei Barnoba Ikoniyogw kabangma sal tongkha, tei bok kharagwi Subraini kok sagwi tongkha. Bok Subraini khakhammani kothoyw jebw pirjak o kok je paitok janaijar Subrai obwnw majra khalaini bagwi Pol tei Barnobanw amok amok samung khalaini pharan rwkha. 4Omobai aulini borogrok baknwi ongwi thangka, bagsa Jihudirokni aita arw bagsa pirisai rokni aita thangkha. 5Aiphuo Bejihudi tei Jihudirok bokni ojarokbai baksa thancha ongwi Pol tei Barnobanw satokma tei holong kokni bagwi kokchaplaikha. 6Matwr Pol bai Barnoba obwnw siywi manwi Lukainiya amchoini bisingw Lustra tei Dorbi aulio khalwi thangkha. 7O jotho jegarogw bok Khristoni kothoyw kothoma pirni nangkha.

Lustra tei Dorbi aulio

8Lustra aulio kaisa lenga borog achugwi tongw. Bw achai phangsini lenga tei oaisabw himjiya. 9O borogsa achugwi Polni kok khanadok, aiphuo Pol bini aita thi khalaywi naikhoka tei bw nungkha hamni bagwi borogsani Kaitorni dayw paitokma tongw. 10Pol aiphuo bwnw ringkhogwi sakha, "Nini yathwiyw pharan rwgwi bachadi." Omobai o borogsa bachulugwi himwi bereni rumkha. 11Pol jebw khalaika obwnw nungwi borogrok Lukainiyo kokbai chirigwi sakha, "Matairok borog ongwi chini dayw akhogwi phaikha." 12Borogrok Barnobanw bumung rwkha Jeus tei bok Polni bumung rwkha Hermes, twmwi hinba Pol Barnobani naikhalai kok kabang sajak. 13Jeus mataini nokthar ongkha aulini phatarw matwr aulini haplamni koriyw. O Aulini haplamni koriyo Jeus mataini chontai damararok tei khumtangrok lagwi phaika. Twmwi himba o chontai tei jotho borogrok Pol arw Barnobani dayw sadoan dali rwni naikha. 14Barnoba tei Pol o kok khanagwi sakrokni ri sichiywi khalwi borogrokni dayw thangka tei chirigwi sakha, 15"Aphakrok, nokh tani imwrok khalaidok? Chwngbw nokhni kosol borogse! Chwng nokhni dayw kothoma pirdok, nokh alangka manwi roknw yakarwi arw Kathang Kaitorni dayw philwi phaimanaitwi. Bwse nokha, hayung, dolia tei obwrokni bisingw jebw jebw tong jotho takjak. 16Bw jabiyw jotho dophanw bokni sakni muchumani kosol himrwjak. 17Matwr hekphung Bw jwnwmbiti sakni kothoyw yakumu rwjak. Bw nokha daini oatwi rwgwi tei joni maping thaichlwi rwgwi Bini khairokma nokhnw phunokjak. Bw kabangma chamung jurogwi rwgw tei Bw nokhni khanw tongthokmabai kwplwng khalaiyo." 18Jwtini phwng Pol bai Barnoba i kokroknw sakha, hekphwng bokni dayw sadoan dali rwnai bathakrwni bok akkhuni tukkha. 19Jerw Antiyokhiya tei Ikoniyo daini kaisa kainwi Jihudi phaywi Pol tei Barnobani baithe borogroknw phemlokkha. Aiphuo borogrok Polnw holong kokkha tei bw thwywi paikha hinwi bakha kagwi bwnw aulini phatarw swpreywi tilangkha. 20Matwr jerw Khristo paitoairok bwnw kitingwi thumjalai khalai, jerw bw bachagwi aulio philwi thangka. Jerwni salw bw arw Barnoba Dorbi aulio thangka. 21O aulio bok kothoma pirkha, tei kabangma borog Jisuni sagri ongkha. Obwni jerw bok Lustra, Ikoniyo tei jerw Pisidiya amchoini Antiyokhiyagw philwi thangka. 22Arw bok o aulini sagrirokni paitokmanw bangrwgwi boknw pharan ganang khalaikha tei paitokmao thi khlaywi tongni khabaja rwkha. Bok sakha, "Kaitorni auaro habnai aguo chwng kabangma satokma soithai kalaiyw." 23Bok mothabiti okara chakara roknw samungw chongkha. Arw o ojaroknw surimung tei okbar tongnaini bisingtwi je Subrainw bok paitokkha, o Subraini yagw abwi rwkha.

Siriya hauarni Antiokhiyagw philwi thangmani

24Jerw Pol tei Barnoba Pisidiya amchoini bisingtwi Pamphuliya amchoyo thangkha. 25Bok Porga aulio Kaitorni koktang pirkha, tei obwni jerw bok Ottaliya gatiyw thangka. 26Jerw Ottaliyani rungtorw kagwi Siriya hauarni Antiyokhiyagw philwi phaika. Je samung bok tabok pairwkha o samungni bagwi i Antiokhiyagw Kaitorni khakhammani yagw boknw tisagwi rwjak. 27Antiyokhiyagw suywi mothani jothonw bok kwrwngsa jegao thumkha tei Kaitor bokni bisingtwi jebw khalaijak obwroknw sakha. Kaitor tama khalaywi Bejihudiroknw hamdal khalaywi rwjak jate bok Khristonw paitok mannaitwi obwnwbw sakha. 28Obwni jerw Pol tei Barnoba sagrirokbai baksa odayw kabangma sal tongkha.

Currently Selected:

Prerit 14: TPE

Highlight

Copy