Luke 18
18
Ukeh Ŋkpa-Nyiri Ebi-Ukpa
1Ene Jisɔs otu ukeh ɔnɔ mbed izighi. Onyi ɔluŋɔ idikpiek emu sughu emu emebɔŋ agam ovid-evid ini numekpa mba;
2Onyi ɔdɔghɔ emu ogu, “Onji obire-ikpeh ki omu agabak ku uduŋ ki omu numegeteŋe Abazi enɔŋ enji ukpɨno enɔ onwi.
3Onu ogonji ebi-ukpa ki omu agabak ku uduŋ onu; onyi etei aga obine obire-ikpeh, etei-kpe onyi ubɔk ‘Sighi usɔ ma onwi ezughe mi nɔ mi.’
4Ku ndizuk ini, obire-ikpeh onu eeluŋɔ idinwam onyi-ou; onu sughu kpɔ ɔsɔdila, onyi ɔdɔghɔ ku ɔvɔghɔ ogid izighi ogu, ‘Muzughu unu sughu, numa-entɨŋe Abazi, ɔnɔŋ oŋkpono onwi,
5onu sia gu ebi-ukpa omu afina mi uwem eti-etiem, ami ma nne su odo nnɔ onyi ma ezughe izighi, utuk ku onyi ozug aga-onji odi momu odifina mi tutu uluh ɔfɔghɔ mi.’”
6Ndien Ɔfɔŋ Jisɔs ɔdɔghɔ ogu, “Musughunu omu sughu obire-ikpeh numa egenu enininen onwi, onu kre baŋa sonyi ozughu.
7Onogu onwi omu numa evag Abazi okime idinwam onwi, ovu ugre ku akpanikwɔ ku Abazi ma obire nnenen ikpe ɔnɔ enwi omu onyi emek omu ebɔŋ agam enɔ onyi ovid ini? Onyi eedibuk-ɔbuk idinɔ emu ibrɔ-ou.
8Ndɔghɔ evu ku ata akpanikwɔ, Ku Abazi ma awra ozighi unen ɔnɔ enwi izighi ku use numa edibuk-ɔbuk. Onu, kini omi Oyo Onwi ndisɔ idi izɔŋ, mande ŋgid onwi sugi omu mbuɔd-ile ku omi?”
Ukeh Onu Farisi Ma Ɔbɔghɔ-utip
9Onu Jisɔs otu onuŋ ukeh ɔnɔ ima enwi omu egedɔŋɔ ku otu enwi ekpaŋ-utɔŋ enɔ onyi. Enwi omu egeniŋenji evag ku emu eniŋere enim ibed Abazi, ene emu ese ovid enwi ima ogu ku mbio.
10Onyi ɔdɔghɔ, “Enwi iba egeluk ega eziŋi-ɔtɔ tempul idibɔŋ agam inɔ Abazi. Ki ogonu onwi Farisi, onyi ogu ogonu ɔbɔghɔ-utip.
11Onwi Farisi onu alagha ala ɔnɔŋ ɔbɔŋ agam abaŋa ile izighi ogu, ‘Ou, Abazi! Ŋkɔ vi ku onu omi manla su enwi ima ene udiɔk-kpɔ okuh, onnu inɔ-ou, anlagha onnu onwi ŋwo-ou. Ɔnluk ulɔ-ou ɔnnɔŋ anla su nda ɔbɔghɔ-utib omu-ou.
12Ntei utre-ulie use iba ku urue, nnɔ uwiak ki ku utei lughu ku ovid-evid su nji,’
13Onu ɔbɔghɔ-utip onu ala nse-se ayak otu-enwi ku nzughɔre ile ɔnɔŋ egre nu emu ido idigap ibei-ebei onji ise Abazi ku heaven. Onu onyi ɔvuk ubɔk ku onji idiwuɔ mbuŋɔgid. Ɔbɔŋ agam ogu, ‘Mbɔk Abazi, omi nnu ene udiɔk-kpɔ, fei mi iseghe nɔŋ lagha nnɔ mi.’
14Nzughu nnɔ evu ku akpanikwɔ ŋgu, kini omu enwi iba onu enyɔŋ uvɔk, onu ɔbɔghɔ-utip onu ku Abazi odigid su enininen onwi oke onwi Farisi ogu. Sia Abazi ma ɔzughɔre ovid enwi omu egid ile emu okpɨnokpɨno, onyi ma ɔnɔŋ okpɨno ovid enwi omu ezughɔre ile emu.”
Jisɔs Ɔdiɔŋ Ndiyoŋ Eyo-Ntighitek
15Use ki, ndizuk ima onji eyo etaŋ eyo-ntighitek emu ezɔk Jisɔs ede odu emu ubɔk ɔnɔŋ ɔdiɔŋ emu. Onu kini omu mbed izighi egid-en, emu ezughe enɔ emu egu emu etaŋ eyo emu enyɔŋ.
16Onu Jisɔs ɔdɔghɔ emu etaŋ eyo-ntighitek onu ezɔk emu. Onyi ɔdɔghɔ mbed izighi ogu, “Esa eyo-ntighitek eyak edi ebɨne mi, egukpan emu-ou; ku onu utɔ enwi emu ezughɔre ile su eyontighitek-emedide uduŋ ufɔŋ Abazi inji.
17Ku akpanikwɔ, ku ami ndɔghɔ evu ŋgu, onogu onwi sugi numa edibɔghɔ Ugra Abazi su uyo-etɔ emene, onyi edikɨme idinu onwi izighi ku uduŋ ufɔŋ Abazi-ou.”
Sughu Okime Ine Idinji Nzi-nzi Uwem
(Mattiu 19:16-22; Mark 10:17-22)
18Onji ede-odighi Jew ki omu obid Jisɔs, “Edighe Ekpiek-kpɔ, ovu onu eneninen onwi, su ndine nzi ndenji nzi-nzi uwem?”
19Jisɔs ɔbrɔ onyi ogu, “Nzi ku ovu ogid ededɔghɔ ku omi nnu eneninen onwi? Onwi sugi eenu eneninen ku efei ayak Abazi-ou.
20Ovu avak ima ewɔu Abazi: ‘Ku uluk ulɔ, ku uwuh onwi sugi-ou, ku uyip inɔ, kutei nteise nzɔu ubaŋa enwi-ou. Nɔ usɔ ma uga ukpono.’”
21Onu onyi ɔdɔghɔ Jisɔs ogu, “Omi ŋgunim ovid-evid ima kpɔ omu tɔŋɔ ku uyo-uyo omi.”
22Onu kini Jisɔs egei-en, Onyi ɔdɔghɔ onyi ogu, “Ozughu onji kpɔ ki omu ɔzughɔ omu anazu ovu ene. Nyie ovid-evid su ovu onji nɔŋ gei ɔkuk onu nɔ ima ufei, ene Abazi ma ɔnɔ vi utib ma unji ku heaven; kini omu ene zon, kɔŋ mi, dinu mbed omi.”
23Onu kini ededighi Jew omu egei su Jisɔs ozughu, onyi ɔvughɔ eke-kem, sia ku onyi ogonji mkpɔ eke-kem.
Ku Ubɔk Abazi Ovid-Evid Kpɔ Onu Omimi
(Mattiu 19:23-30; Mark 10:23-31)
24Jisɔs ogid ulagha sughu onwi onu ɔvughɔ, Onyi ɔdɔghɔ enwi omu egebino non, “Onu ata otu ile kpɔ onwi omu onji-kpɔ idiluk uduŋ ugra Abazi!
25Agap onu omi-ile kpɔ ɔnɔ anaŋ-ubei-mbio idifei ku unwaŋ abiabɨn oke onwi unji idiluk uduŋ ugra Abazi.”
26Ku ini otu-enwi egei-ememu ebid onyi, “Niŋionwi ndien okɨme idifɔghɔ?”
27Onu Jisɔs ɔbrɔ emu, “Abazi okime idine ŋkpɔ omu enwi numa ekime idine.”
28Ene Peter ɔdɔghɔ Jisɔs ogu, “Tuei ku enyin igiza ovid kpɔ omu iginji iyak idigɔŋ vi idinu mbed ovu.”
29Jisɔs ɔbrɔ onyi, “Nzughu akpan-ikwɔ nnɔ vi, onwi sugi omu agaza ovid-evid kpɔ ayak, ededenu uvɔk izighi, nonu eti ma eke, nonu nyeke, nonu ŋwa, nonu eyo, ayak, ku ntak uduŋ ufɔŋ Abazi,
30ku akpan-ikwɔ onyi ma ɔbɔghɔ ovid kpɔm ku izɔŋ omu ku awak-iwak ini, onyi ŋko ma ɔsɔ ɔbɔghɔ nzi-nzi uwem ku heaven.”
Jisɔs Ɔsɔ Ozughu Abaŋa Ŋkpa Izighi
31Ku ima kpɔ omu ama egefei, Jisɔs ebei mbed izighi lughu-iba awala ayak otu-enwi ogu, Sese, enyin ibag ku odighi idika uduŋ Jeruzelem ulagha-m, ovid-kpɔ omu ima prɔved egewid ebaŋa mi Oyo Onwi tɔŋɔ gu ɔnyiɔŋ odighi ini, oditɨbe nonu.
32Enwi meyak mi edio ima Gentile ku ubɔk, emu ma etɔ mi ndɔk, elagha esuene mi elagha etɔ mi ite, ndien kini emu enmgbmay mi egre, emu ma ewuh mi.
33“Onu ku ɔyɔghɔ use iteh omi ma nzed ku mkpa.”
34Onu ima mbed izighi eegegɔd evag su onyi ozughu onu salanɔ. Emu eegenji mvuvak ebaŋa su onyi ozughu-on su ɔwuɔ-u, sia Abazi ogolib emu mvuvak kpɔ onu onyi ogozughu abaŋa-n su ɔwuɔ.
Jisɔs Ɔgɔk Onwi Nsie
35Ku ekedighi uka Jeruzelem, Jisɔs ma enwi omu egegɔŋ onyi ezaŋa ekpɨne uduŋ Jericho. Onji onwi nsie ki omu egetei ku ndek eke-odighi okpe enwi ŋkpɔ.
36Onu kini onwi nsie onu egei ukpeguŋ otu enwi sughu ezaŋa efei, onyi obid enwi omu ela ekpɨne onyi sotibe.
37Ndizuk enwi onu ebrɔ onyi ogu onwi omu eku Jisɔs omu osi uduŋ Nazared ku azaŋa efei.
38Ku ini omu onyi egei-en onyi ɔkpɔk ogu, “Jisɔs, Oyo onu Ɔfɔŋ David, fei mi isɨghe.”
39Enwi omu egezaŋa ku onji-onji enɔ Jisɔs ekpan onyi, egu “Kap inue”; onu onyi atam-atam ɔkpɔk “Oyo onu Ɔfɔŋ David, fei mi isɨghe!”
40Ku ini Jisɔs egei usi izighi, onyi atuak-ala, ɔnɔŋ ɔnɔ usi ogu ede onyi ezɔk emu. Onu kini onyi azaŋa okpɨne onyi, Jisɔs obid onyi ogu,
41“Nzi ku ovu ɔluŋɔ mi nne nnɔ vi?” Onwi nsie onu ɔbrɔ, “Ɔfɔŋ, mbɔk nne mi nsɔ mmɔ-kpɔ.”
42Ndien Jisɔs ɔdɔghɔ onyi ogu, “Sɔ mmɔ-kpɔ! Sia mbuɔd-ile ovu ku omi ene vi egei ntu-ile.”
43Ku ulagha-ulagha-n, onwi nsie onu ɔmɔ kpɔ, alagha ɔgɔŋ Jisɔs, ku ɔkpɔk ukpeguŋ otro Abazi. Ovid-evid enwi omu egid sotibe-n, egɔŋ ekpɔk ukpeguŋ, etro Abazi.
Currently Selected:
Luke 18: ORX
Highlight
Share
Copy
Want to have your highlights saved across all your devices? Sign up or sign in
Oro Bible by Beyond Translation is licensed under Creative Commons Attribution-ShareAlike 4.0 License.
