Rô-ma 13

Jom thong jakar

1Abih drei xang halar tui pakat pan gon; kaywa ôh hu aco gon halei bloh ôh mưrai mưng Pô Lingik; dôm kar pan gon urak ni jang kaywa Pô Lingik kamưnrat. 2Nan yơ thei pagan gađi kar pan gon nạn mưradhag thong panưđar Pô Lingik krung hu padang; thong dôm urang ngak yau nan mưca ba mưk gruk bican inư ka drei. 3Kaywa dôm kar pan gon ôh njaup piêh ka mưnuix siam hôic, min piêh ka mưnuix xag mưjưy hôic. Ayut ưng klah hôic di pakat tho gon kaic? Xang ngak kabha siam mưkrư, bloh mưca ayut bihu pôk mưyom, 4kaywa khol nhu nạn halun Pô Lingik piêh ngak hanim ka ayut. Min mưyah ayut ngak kabha xag mưjưy yơ xang kauk hôic, kaywa khol nhu bak padak; ôh njaup nạn ôh gađi ô; khol nhu nạn halun Pô Lingik piêh pangak gruk dan dun jom thong ra ngak kabha xag mưjưy. 5Nan yơ, xang halar tui kar pan gon, ô kan kaywa hôic gok dan dun min lijang kaywa tung hatai gêk. 6#Mat 22:21; Mag 12:17; Lu 20:25.Lijang kaywa gađi gadha nan ka dei ai hakak jiư, kaywa kar pan gon nạn halun Pô Lingik piêh jari jarô ka bruk ni. 7Xang biyar ka abih drei kabha drei tavak thre; hakak jiư ka ra drei xang hakak; hakak laba ka mưnuix drei xang hakak; hôic ra drei đang hôic; pôkja mưnuix đang pôkja.

Tiak anit ranam ngak bibloh hakum jakar

8Jôi tavak thre di thei kabha haget, klāk tabiak nôk thre anit ranam gaup; kaywa thei anit ranam mưnuix jek taphia drei nạn krung hu ngak bih hakum jakar. 9Kaywa dôm vahi: “Hư jôi tanrok glaic ƀang glai mưtah, jôi pamưtai mưnuix, jôi klek xahwah, jôi tathrưg lagơh” thong pathar pathar vahi halei pakan, jang paharung dalam kanen ni: “Hư xang anit mưnuix jek taphia yau drei.” 10Tiak anit ranam ôh ngak utan mưnuix jek taphia, Ywa nan ka, anit ranam nan ngak tui abih hakum jakar.

Xang pamưdơh

11Xang ngak yau nan, kaywa dei ai thau ka drei krưh dok dalam bangyau halei. Krung hu mưrai tuk dei ai xang mưdơh mong, kaywa urak ni gruk dong paklah krung hu jek thong khol drei hơl di tuk khol drei birau dial. 12Livik krung hu mưlam, harei jek mưrai; nan ka khol drei xang thwak klāk dôm bruk xup palup bloh cuk mưk ao tamai hadah tanrak. 13Xang dok dang ligeh mưkrư, yau nao di krưh harei. Jôi alag tapai, mưbuk, kejam thong bukbar, jāk mưthao thong jhak hatai. 14Min xang cuk mưk Pô nạn Pô Yê-su Krist, jôi dwah ganap ngak thug khak dôm ragơh tathrưg rilo darah.

Currently Selected:

Rô-ma 13: CJM2024

Highlight

Copy