Ma-thi-ơ 26

Gruk pađik pađwa, gruk mưtai thong gruk diup vơk anưd Pô Yê-su

(26:1 – 28:20)

Anngak pamưtai Pô Yê-su

(Mag 14:1-2; Lu-ka 22:1-2; Yâng 11:47-53)

1Hadei di tuk bican dôm panôic nan bloh, Pô Yê-su đôm thong dôm anưk xêh laic: 2“Khol hư thau dok dwa harei tra mưng tal Rija Gan Tapa, thong Anưk Mưnuix mưca gok jao piêh ciup pang đin ngok gai gan gak.”

3Tuk nan, dôm gru mưliêng prong thong dôm ginôr taha dalam bôl bhap nhom vơk pak mưdhir gru mưliêng glong yatha angan nạn Kai-phe, 4piêh mưthong biai anngak mưk thong pamưtai Pô Yê-su. 5Yau nan min khol nhu đôm: “Ukhin tabiak tangin dalam gôn rija, ô mưca ngak karen karang dalam bôl bhap.”

Pô Yê-su bihu luk mưnhưk pak Ƀêt-tha-ni

(Mag 14:3-9; Yâng 12:1-8)

6Tuk Pô Yê-su dok dalam thang Si-môn, tha urang khalong pak palei Ƀêt-tha-ni, 7#Lu 7:37,38.hu tha urang kamei ba tha kalok mưng mưtei padang mưnhưk hangau xiêt jiên mưrai jek Bhô bloh tuh di akok Bhô dalam tuk Bhô krưh dok di paban ƀang. 8Dôm anưk xêh ƀôh yau nan yơ dangih thong đôm laic: “Habar phak palah yau nan? 9Kaywa hu mưda pablei mưnhưk ni mưk tha thanôn jiên prong, ba pajup ka urang kathot.” 10Min Pô Yê-su thau kabha ni yơ bican thong dôm anưk xêh: “Habar khol hư ngak mưduh urang kamei nan? Urang ni krung hu klan tha bruk siam ka Ita. 11Kaywa khol hư takung hu mưnuix kathot dok yơng drei, min ôh njaup tuk halei lijang hu Ita ô. 12Tuk tuh mưnhưk di rup pabhap Ita, urang kamei nan krung hu thrap gap bruk dar ramik Ita. 13Biak jơh, Ita đôm thong khol hư, graup nưrah pathar pathar libik halei Khao Siam ni bihu rao lang yơ bruk urang kamei ni krung hu ngak mưca bihu bau tal piêh xanưng hadar muk.”

Yu-đa Ic-ka-ri-ôt lambil Pô Yê-su

(Mag 14:10-11; Lu-ka 22:3-6)

14Tuk nan, tha urang dalam tha pluh dwa anưk xêh, angan nạn Yu-đa Ic-ka-ri-ôt, mưrai gōk dôm gru mưliêng prong 15thong đôm laic: “Mưyah dahlak mưk jao Mưnuix ka dôm ong, mưca dôm ong biyar ka dahlak hadôm?” Khol nhu biyar ka nhu klau pluh pariak jiên. 16Mưng tuk nan Yu-đa dwah barat piêh lambil Bhô.

Pô Yê-su ƀang Rija Gan Tapa thong dôm anưk xêh

(Mag 14:12-21; Lu-ka 22:7-13, 21-23; Yâng 13:21-30)

17Kal nan, dalam harei ya tha anưd Rija Tapei Kun, dôm anưk xêh mưrai tom Pô Yê-su thong pathau laic: “Gru ưng ƀang Rija Gan Tapa pak halei piêh ka khol dahlak thrap gap?” 18Bhô thuuk: “Xang tamư dhan, mưrai tom tha urang dêh thong đôm thong urang ar nạn: ‘Gru pađar: Tuk vag Ita jek thi tal, Ita thong dôm anưk xêh mưca tamưbha Rija Gan Tapa pak thang hư.’” 19Dôm anưk xêh ngak njaup yau panôic Pô Yê-su krung hu kakei bloh thrap gap Rija Gan Tapa.

20Tal xup, Bhô dok ƀang thong tha pluh dwa [anưk xêh].#26:20 [anưk xêh]: Dalam tha thanôn blah vak tangin ôh hu dôm akhar ni. 21Tuk ƀang, Bhô bican: “Biak jơh, Ita đôm thong khol hư, tha urang dalam khol hư mưca lambil Ita.” 22Dôm anưk xêh biak rau ri thong dak mưng yāup urang tanhi: “Pathau Pô, hu njaup dahlak lei?” 23Bhô thuuk: “Urang halei tut tangin tamư pariêng thong Ita, mưca lambil Ita. 24Mưca Anưk Mưnuix nao yau kabha krung hu vak ka Bhô; min lihin din ka ra lambil Anưk Mưnuix! Dak nhu jôi mưnưk tabiak dok hơl!” 25Yu-đa Ic-ka-ri-ôt, ra lambil Bhô tanhi: “Pathau Gru, hu njaup dahlak lei?” Bhô thuuk: “Êng hư krung hu đôm yau nan.”

Pô Yê-su padang Rija Vār Ƀang Likam

(Mag 14:22-26; Lu-ka 22:14-20; I Kô-rir-tô 11:23-25)

26Tuk krưh dok ƀang, Pô Yê-su mưk tapei, đwa karun, thong pek tabiak yêr ka dôm anưk xêh bloh bican: “Xang mưk, ƀang mek! Sani nạn rup pabhap Ita.” 27Bhô glaic mưk panhin, đwa karun, bloh yêr ka dôm anưk xêh thong đôm: “Abih khol hư, xang mưnhum mek! 28Kaywa sani nạn darah Ita, darah jan ji krung hu tuh tabiak ka ralô urang bihu ampun glaic. 29Ita đôm thong khol hư, mưca Ita ôh mưnhum ia nho ni vơk, ka tal harei mưca Ita mưthong khol hư mưnhum ia nho birau dalam dit biya Amư Ita.”

Pô Yê-su brei thau dahlau Phi-e-rơ kamlah di Bhô

(Mag 14:26-31; Lu-ka 22:31-34; Yâng 13:36-38)

30Hadei di tuk doh nưbi doh, Pô Yê-su thong dôm anưk xêh tabiak nao, tagôk cơk Ô-liu. 31Tuk nan, Pô Yê-su đôm thong khol nhu laic: “Mưlam ni abih khol hư mưca hanek jalơh kaywa di Ita, yau hu vak laic:

‘Mưca Ita tong mưnuix glang,

Thong pabo dalam tapôr mưca cah côt.’

32 # Mat 28:16. Min hadei di tuk Ita diup vơk, mưca Ita mưrai nưgar Ga-li-lê dahlau di khol hư.” 33Phi-e-rơ pathau: “Kanê abih jang hanek jalơh kaywa di Gru yau halei nao, mưca dahlak ôh tuk halei hanek jalơh.” 34Pô Yê-su thuuk laic: “Biak jơh, Ita đôm thong hư: Êng mưlam ni, dahlau tuk mưnuk kanjot mưca hư kamlah di Ita klau ƀang.” 35Phi-e-rơ pathau: “Kanê xang mưtai thong Gru, mưca dahlak ôh kamlah di Gru ô.” Abih anưk xêh jang đôm yau nan.

Pô Yê-su lang kar dalam bơn Ghêt-sê-ma-nê

(Mag 14:32-42; Lu-ka 22:39-46)

36Hadei di nan, Pô Yê-su thong dôm anưk xêh nao tal tha libik iêu nạn Ghêt-sê-ma-nê. Bhô pađar khol nhu: “Xang dok sani, dalam tuk Ita nao lang kar pak dêh.” 37Bloh Bhô ba Phi-e-rơ thong dwa anưk likei Xê-ƀê-đê nao thubik. Bhô raup pađik padrôi thong mưbuk mưbar. 38Bhô laic: “Xwan diup Ita pađik padrôi lô ka tal mưtai; khol hư xang dok pak ni thong pamưdơh thong Ita.” 39Nao atah hơl tha nôic, Bhô grwak ƀok trun thong lang kar: “Amư lơy! Mưyah mưda bihu, likau brei panhin ni niga truh di anưk! Min ôh tui jamal anưk, bloh tui jamal Amư.” 40Bhô gilaic vơk thong dôm anưk xêh thong ƀôh khol nhu dok đih, yơ đôm thong Phi-e-rơ laic: “Khol hư ôh mưdơh thong Ita bihu tha tuk ô? 41Xang pamưdơh thong lang kar piêh khol hư klah di lek tamư gruk palwô ngal. Mat xwan yơ ưng lô, min rilo darah yơ kre.” 42Bhô gilaic nao ƀang ya dwa thong lang kar laic: “Amư lơy! Mưyah panhin ni ôh mưda niga truh bloh anưk xang mưnhum, yơ likau jamal Amư bihu jiơng.” 43Bhô gilaic vơk, ƀôh dôm anưk xêh jang đih, kaywa khol nhu biak lingom. 44Ywa nan ka, Bhô niga anưk xêh nao lang kar ƀang ya klau, thong likau kanư drơh yau ƀang dahlau. 45Bloh Bhô mưrai tom dôm anưk xêh thong đôm thong khol nhu laic: “Khol hư jang dok đih thong lơh padei bihu habar? Mưni, tal tuk pajơ, Anưk Mưnuix thi gok lambil, jao tamư tangin ra hu glaic. 46Xang tagôk dang, khol drei nao mek! Dêh, ra lambil Ita krung hu mưrai.”

Pô Yê-su gok mưk

(Mag 14:43-50; Lu-ka 22:47-53; Yâng 18:3-12)

47Dalam tuk Pô Yê-su krưh đôm, Yu-đa Ic-ka-ri-ôt nạn tha dalam tha pluh dwa anưk xêh, mưrai tom tha tapôr ralô pan padak thong gai drưg bihu dôm gru mưliêng prong thong dôm ginôr taha anưd bôl bhap pachai mưrai. 48Kal nan, ra lambil Bhô krung hu brei ka mưnok nhu tha habang: “Phak dahlak cum thei yơ êng nạn urang nan; xang mưk nhu.” 49Yu-đa mưrai jek Pô Yê-su thong đôm laic: “Xalam Gru!” Bloh cum Bhô. 50Min Pô Yê-su đôm thong nhu laic: “Ayut lơy, ayut jarô ngak haget yơ kưk ngak mek!” Bloh mưnok nhu mưrai mưk Bhô. 51Thong ni, tha dalam dôm urang dok thong Pô Yê-su thwak padak tabiak, tong thong tacoh kleh tangi halun gru mưliêng glong yatha. 52Pô Yê-su đôm thong urang nan laic: “Xang cuk padak tamư harum! Kaywa thei pan padak mưca gok mưtai di padak. 53Hư xanưng laic Ita ôh mưda likau di Amư, bloh mưca Bhô binhêt thurah ka hơl tha pluh dwa kavôm jabôl umat mưrai ka Ita ô habar? 54Mưyah yau nan, panôic Agal Nưbi vak bruk ni xang mưjiơng tabiak, ngak habar panôic nan bihu thit?” 55#Lu 19:47; Lu 21:37.Binhêt tuk nan, Pô Yê-su đôm thong tapôr ralô laic: “Habar khol hư ba padak thong gai drưg mưrai mưk Ita yau mưk tha ban poh blah? Yāup harei Ita dok pato pakai dalam huji, khol hư ôh mưk Ita. 56Min abih kabha ni mưjiơng tabiak piêh panôic dôm pakat hôr dalam Agal Nưbi bihu thit.” Tuk nạn abih anưk xêh jang klāk Bhô đôic daup.

Pô Yê-su di anak Ginum Biai Mưdhir An

(Mag 14:53-65; Lu-ka 22:54-55, 63-71; Yâng 18:13-14, 19-24)

57Dôm ra krung hu mưk Pô Yê-su ba Bhô nao tal thang gru mưliêng glong yatha Kai-phe, libik dôm gru pato adat thong dôm ginôr taha dok nhom. 58Phi-e-rơ nao tui Bhô atah atah, tal ƀlang mưdhir gru mưliêng glong yatha, thong tamư gah dalam dok thong dôm ra khik mong piêh iơk patek yau halei.

59Tuk nan, dôm gru mưliêng prong thong abih Ginum Biai Mưdhir An dwah kaxan lor mưradhag Pô Yê-su piêh hu mưda padok an binax Bhô. 60Min khol nhu ôh dwah bihu kabha haget trah, kanê hu ralô urang dang tabiak ngak kaxan lor. Taluic, hu dwa urang yam tabiak 61#Yâ 2:19.palek palam laic: “Urang ni krung hu đôm: ‘Ita hu mưda yah huji Pô Lingik, bloh darap vơk dalam klau harei.’” 62Gru mưliêng glong yatha dang tagôk thong đôm: “Hư ôh thuuk vơk panôic dôm urang ni palek palam hư ô?” 63Min Pô Yê-su jang gađang krap. Gru mưliêng glong yatha gilaic đôm thong Bhô laic: “Ita kanư hư tacei Pô Lingik bhian diup bloh hapah thong đôm ka khol drei thau, hư hu njaup nạn Dê Krist, Anưk Pô Lingik lei?” 64Pô Yê-su thuuk: “Êng hư krung hu đôm yau nan. Min Ita đôm thong khol hư, hadei ni khol hư mưca ƀôh Anưk Mưnuix dok gah hanuk Dê Gon Xagta thong biđang ngok taginum thôr riga bloh mưrai.” 65Tuk nan, gru mưliêng glong yatha hak ao drei thong đôm: “Nhu krung hu đôm hanoh niêm. Ywa haget khol drei hajat mưnuix ngak kaxan haget vơk? Dôm ong birau pang dôm panôic nhu đôm hanoh niêm. Dôm ong xanưng yau halei?” 66Khol nhu thuuk: “Nhu đang mưtai!” 67Bloh mưnok nhu gahak kacôic di ƀok Bhô, tong Bhô. Tha thanôn ra apah Bhô, 68bloh đôm: “Dê Krist lơy, xang đôm hôr ka khol drei iơk! Thei nạn urang krung hu tong hư nan?”

Phi-e-rơ kamlah Pô Yê-su

(Mag 14:66-72; Lu-ka 22:56-62; Yâng 18:15-18, 25-27)

69Tuk nan, Phi-e-rơ krưh dok di lingiu ƀlang. Tha halun kamei mưrai jek thong đôm: “Ong lijang nạn mưnuix dok thong Yê-su, mưnuix Ga-li-lê.” 70Min Phi-e-rơ kamlah vêt di anak graup urang laic: “Dahlak ôh thau nai đôm haget.” 71Tuk tabiak di caic thang, tha halun kamei pakan ƀôh Phi-e-rơ yơ đôm thong dôm urang dang jek nan laic: “Ong ni dok thong Yê-su mưnuix Na-xa-ret.” 72Min Phi-e-rơ gilaic kamlah thong hapah laic: “Dahlak ôh bik thau urang nan.” 73Tha kal hadei, dôm urang dang jek nan đôm thong Phi-e-rơ laic: “Kardak ong lijang nạn tha urang dalam mưnok nhu, kaywa xap đôm ong krung hu palek palam ong.” 74Min Phi-e-rơ dhao thah bloh hapah: “Dahlak ôh thau urang nan.” Binhêt tuk nan, mưnuk kanjot.

75Phi-e-rơ kanal vơk panôic Pô Yê-su krung hu đôm: “Dahlau tuk mưnuk kanjot, mưca hư kamlah di Ita klau ƀang.” Bloh ong tabiak nao thong hia cok phik plak.

Currently Selected:

Ma-thi-ơ 26: CJM2024

Highlight

Copy