Ma-thi-ơ 21

Pô Yê-su tamư dhan Yê-ru-sa-lem

(Mag 1:1-11; Lu-ka 19:28-40; Yâng 12:12-19)

1Tuk Pô Yê-su thong dôm anưk xêh jek tal dhan Yê-ru-sa-lem, tuk tamư palei Ƀêt-pha-yê, ganak cơk Ô-liu, Bhô pađar dwa anưk xêh nao, 2thong kakei laic: “Xang nao tamư palei jom, mưca khol hư gōk vêt tha atheh mrek inư dok ikak, ganak nan hu tha atheh mrek dam. Xang taleh talei bloh dui abih dwa mai ka Ita. 3Mưyah thei đôm haget, khol hư xang thuuk laic: ‘Pô#21:3 Pô: Ngan nạn Pô tapôr nhu. hajat tal tapôr nhu’ mưca urang nan brei dui atheh mrek nao vêt.” 4Bruk ni mưjiơng tabiak piêh thit panôic hôr đôm laic:

5“Xang đôm thong anưk kamei Si-ôn laic:

Dêh, patao hư mưrai tom hư,

Dhi dhau, đik atheh mrek,

Thong đik ngok atheh mrek dam, nạn anưk atheh mrek inư.”

6Dwa anưk xêh tamư palei thong ngak njaup yau panôic Pô Yê-su krung hu kakei. 7Khol nhu dui atheh mrek inư thong atheh mrek dam mai, lang ao drei di ngok kaing nhu, bloh Bhô đik tagôk. 8Biak ralô urang dalam bôl bhap lang ao drei di ngok jalan, tha thanôn pakan koh dhān phun thong prai ngok jalan. 9Tapôr mưnuix, urang nao dahlau, ra nao hadei jang ahei:

“Hô-sa-na Anưk patao Đa-vit!

Đang pôk mưyom Dê nưmax angan Pô bloh mưrai!

Hô-sa-na ngok libik glong yatha!”

10Tuk Bhô tamư dhan Yê-ru-sa-lem, abih bal jang chu chao, đôm laic: “Urang ni nạn thei?” 11Tapôr mưnuix thuuk: “Sani nạn Dê hôr Yê-su, dok pak Na-xa-ret bha nưgar Ga-li-lê.”

Pô Yê-su pagah hacih Huji

(Mag 11:15-19; Lu-ka 19:45-48; Yâng 2:13-22)

12Pô Yê-su tamư Huji#21:12 Huji: Dalam tha thanôn blah vak tangin nạn Huji anưd Pô Lingik. tiaup abih ra blei talei tak nan, blơk paban dôm ra xalih jiên thong kik dôm urang pablei katrau. 13Bhô bican thong khol nhu: “Hu panôic vak:

‘Thang Ita mưca bihu iêu nạn thang lang kar’,

Min khol hư xalih libik nan jiơng gôk poh blah.”

14Dôm urang tagloh thong joh mưrai tom Bhô dalam Huji jang bihu Bhô pajru dhit. 15Dôm gru mưliêng prong thong dôm gru pato adat biak dangih tuk ƀôh dôm bruk crih Bhô ngak, thong hamit dôm anưk rineh prêu tagôk dalam Huji: “Hô-sa-na Anưk patao Đa-vit.” 16Thong đôm thong Bhô laic: “Gru hu hamit dôm anưk rineh ni đôm haget lei?” Pô Yê-su thuuk: “Hu, yau nan khol hư ôh bhian pôic panôic ni:

‘Pô krung bihu pôk mưyom mưng pabah kamar xit thong anưk rineh dok mum’ ô habar?”

17Bloh Bhô niga khol nhu tabiak truh di dhan, tal palei Ƀêt-tha-ni thong padei mưlam tak nan.

Kadha baic mưng phun hara

(Mag 11:12-14, 20-24)

18Hadah harei hadei, tuk gilaic vơk dhan yơ Bhô lipa tian. 19Ƀôh tha phun hara gah jalan, Bhô mưrai jek min ôh ƀôh haget pakan tak bikan hala. Bhô đôm thong phun hara: “Mưca hư ôh tuk halei tabiak boh vơk!” Phun hara binhêt thu binhêt. 20Ƀôh yau nan, dôm anưk xêh biak plơng kadơng đôm laic: “Ngak habar phun hara gilaic thu vêt yau nan?” 21#Mat 17:20; I Kô 13:2.Pô Yê-su thuuk: “Biak jơh, Ita đôm gam khol hư, mưyah khol hư hu sagar thong ôh bik kalman yơ ô kan khol hư ngak bihu kabha Ita krung hu ngak ka phun hara, bloh bahkan bruk pađar cơk ni laic: ‘Xang tơk drei tagôk thong blāk trun tathik’ yơ kabha nan lijang mưca mưjiơng tabiak. 22Dalam tuk lang kar, pathar pathar kabha haget khol hư mưk sagar bloh likau kanư jang mưca tôk bihu abih.”

Pajoh pakhen ka aco gon Pô Yê-su

(Mag 11:27-33; Lu-ka 20:1-8)

23Pô Yê-su tamư huji; tuk Bhô dok lang pato, dôm gru mưliêng prong thong dôm ginôr taha dalam bôl mưrai pajoh pakhen: “Kaywa aco gon halei ong ngak dôm bruk ni? Gam thei krung hu brei ka ong aco gon nan?” 24Pô Yê-su thuuk: “Ita lijang tanhi khol hư tha kanen, mưyah thuuk bihu, mưca Ita đôm ka khol hư thau Ita ngak dôm bruk ni kaywa aco gon halei. 25Ƀap-tem Yâng mưrai mưng halei? Mưng thôr riga ngan mưng mưrôxak?” Khol nhu xin biak thong gaup: “Mưyah khol drei laic: ‘Mưng thôr riga’ mưca ong nan đôm thong khol drei: ‘Yau nan habar khol hư ôh dial Yâng?’ 26Dok mưyah khol drei đôm: ‘Mưng mưrôxak’ khol drei kađa di bôl bhap, kaywa abih drei jang brei laic Yâng nạn tha pakat hôr.” 27Kaywa yau nan, khol nhu thuuk Pô Yê-su: “Khol dahlak ôh thau.” Bhô đôm thong khol nhu: “Mưca Ita lijang ôh đôm ka khol hư thau kaywa aco gon halei Ita ngak dôm bruk ni.”

Arkatê ka dwa anưk likei

28“Khol hư xanưng yau halei? Tha urang dêh hu dwa anưk likei; ong nan mai đôm thong anưk kacwa: ‘Anưk lơy, harei ni anưk xang nao ngak dalam bơn nho.’ 29Anưk nan thuuk: ‘Dahlak ôh nao,’ min hadei nhu tumal bloh nao. 30Ong mưrai tom urang anưk hadei thong lijang đôm yau nan rei. Urang anưk pathau: ‘Pô, dahlak nao ni,’ min gilaic ôh nao. 31Dalam dwa anưk likei nan, urang halei ngak tui jamal amư?” Khol nhu thuuk: “Urang anưk kacwa.” Pô Yê-su bican thong khol nhu laic: “Biak jơh, Ita đôm thong khol hư, dôm mưnuix ikak jiư thong kamei pablei rup mưca bihu tamư Dit Biya Pô Lingik dahlau khol hư.#21:29-31 Dalam dôm blah vak tangin, hu ralô karei kateh ka kanen kadha danoh dađam thubik thong dôm panôic thuuk dwa urang anưk likei. Ganap xalih tak ni bihu ralô blah xalih angui kaywa kanen kadha hu danoh dađam ligeh akal, thong dôm panôic thuuk dwa urang anưk likei hu ar jalang jalôi. 32#Lu 3:12; Lu 7:29,30.Kaywa Yâng mưrai piêh pato ka khol hư jalan ƀāk kahanôt, min khol hư ôh dial; dok dôm mưnuix mưk jiư thong urang kamei pablei rup krung hu dial Yâng, bahkan tuk khol hư ƀôh yau nan, khol hư jang ôh tumal thong dial ong.”

Arkatê ka dôm urang apah bơn nho

(Mag 12:1-12; Lu-ka 20:9-19)

33“Xang pang tha arkatê pakan. Hu tha urang dêh pala tha bơn nho, paga tom dar, gah dalam coh tha barahum ep alag, darap tha kurasi, thong brei ka dôm ra pala nho apah, bloh nao tapa nưgar pakan. 34Tal bilan apek nho, pô pađar dôm halun mưrai tom dôm ra pala nho piêh mưk nôk laba. 35Min khol nhu mưk dôm halun, tong urang ni, pamưtai urang dêh thong glam patau urang pakan. 36Urang pô gilaic pađar dôm halun pakan, ralô hơl di dahlau, yơ khol nhu jang dok dang thong khol nhu yau nan. 37Taluic, pô pađar êng anưk likei drei mưrai tom khol nhu, kaywa xanưng laic: ‘Mưca khol nhu kađa tagrơk di anưk ita.’ 38Min tuk dôm ra pala nho ƀôh anưk likei nan yơ đôm thong gaup: ‘Sani nạn anưk mưvarih. Mưni, khol drei xang pamưtai nhu mek thong mưblah mưk ƀang angui nhu.’ 39Khol nhu mưk anưk likei nan, parah tabiak di lingiu bơn nho thong pamưtai. 40Yau nan, tuk pô bơn nho mưrai, mưca ong ngak haget di mưnok pala nho nan?” 41Khol nhu thuuk: “Mưca pô pamưtai mưnok xag mưjưy nan tha ganap tala talah, thong brei ka dôm urang pala nho pakan apah, nạn dôm urang mưca hakak laba ka ong njaup mưnik riya.” 42Pô Yê-su bican thong khol nhu: “Khol hư ô ka tuk halei pôic panôic ni dalam Agal Nưbi ô:

‘Boh patau gok ragei darap klāk tabiak,

Krung hu gilaic jiơng patau akiêng thang;

Sani nạn bruk Pô ngak,

Thong nan nạn gruk langka di anak mưta khol drei’?

43Yau nan, Ita đôm thong khol hư, Dit Biya Pô Lingik mưca gok ba truh di khol hư thong ƀai brei ka tha bôl mưca ba athal jiơng mai ka dit biya nan. 44[Urang halei jalơh ngok patau ni mưca gok tabram rong, dok patau nan lek njaup thei yơ mưca grik klik urang nan.”]#21:44 Dalam tha thanôn blah vak tangin ôh hu kanen 44.

45Dôm gru mưliêng prong thong mưnuix Pha-ri-si pang dôm arkatê ni yơ krưn thau Bhô dok đôm ka drei. 46Khol nhu dwah ganap mưk Bhô min gilaic hôic di bôl bhap, kaywa abih drei jang krưn Bhô nạn tha Dê hôr.

Currently Selected:

Ma-thi-ơ 21: CJM2024

Highlight

Copy