Yâng 20

Pô Yê-su diup vơk

(Ma-thi-ơ 28:1-8; Mag 16:1-8; Lu-ka 24:1-12)

1Gôk pagê harei ya tha dalam akok karaup, tuk lingik dok xup, Ma-ri Ma-đơ-len mưrai tanum, ƀôh can patau krung bihu pađôn truh di tanum. 2Yau nan, muk đôic mưrai tom Si-môn Phi-e-rơ thong anưk xêh dêh, nạn mưnuix Pô Yê-su anit ranam bloh đôm: “Mưnuix urang krung hu pađôn Pô truh di tanum, khol dahlak ôh thau khol nhu cek Bhô pak halei?”

3Phi-e-rơ thong anưk xêh dêh yam tabiak, nao tal tanum. 4Bih dwa đôic thubik, min anưk xêh dêh đôic xamar hơl Phi-e-rơ thong tal tanum dahlau. 5Ong kuk trun mong tamư, ƀôh khan bai paangui đih tak nan, min ôh tamư. 6Si-môn Phi-e-rơ tui mưrai, yam tamư tanum, ƀôh khan bai paangui dok tak nan, 7dok xiêup pabang akok Pô Yê-su yơ ôh dok harung thong khan bai, min tapok vơk cek karei tha libik. 8Tuk nạn anưk xêh dêh krung hu mưrai tanum dahlau, lijang yam tamư, ƀôh thong dial. 9Min khol nhu jang ô ka thau panôic Agal Nưbi vak laic Bhô xang mưng lôg mưtai diup vơk. 10Bloh dôm anưk xêh gilaic mai thang.

Pô Yê-su bhat tabiak thong Ma-ri Ma-đơ-len

(Ma-thi-ơ 28:9-10; Mag 16:9-11)

11Ma-ri dang hia gah lingiu tanum. Muk gam hia gam kuk trun mong tamư tanum, 12ƀôh dwa umat cuk ao ƀông dok tak libik krung hu cek atau Pô Yê-su, tha pakat dok gah akok, tha pakat dok gah takai. 13Dwa umat tanhi: “Mưni muk, habar muk hia?” Ma-ri thuuk: “Kaywa mưnuix urang krung hu pađôn Pô dahlak nao bloh, dahlak ôh thau khol nhu cek Bhô pak halei!” 14Birau đôm bloh, muk gaic mai, ƀôh Pô Yê-su krưh dang, min muk ôh thau nan nạn Pô Yê-su. 15Pô Yê-su tanhi muk: “Mưni muk, habar muk hia? Muk dwah thei?” Muk xanưng laic nan nạn mưnuix ngak bơn, nan ka đôm: “Ong lơy, mưyah ong krung hu pađôn Bhô nao, likau đôm ka dahlak thau ong krung hu cek Bhô pak halei piêh mưca dahlak mưrai mưk mai vơk.” 16Pô Yê-su iêu: “Ma-ri!” Muk gaic mai angui xap Hê-ƀrơ pathau laic: “Ra-ƀu-ni!” (ar nạn Gru). 17Pô Yê-su đôm: “Jôi pan khik Ita, kaywa Ita ô ka tagôk thong Amư! Min xang mưrai tom dei ai Ita, đôm thong khol nhu laic: Ita krưh dok tagôk tom Amư Ita thong Amư khol hư, thong Pô Lingik Ita thong Pô Lingik khol hư.” 18Ma-ri Ma-đơ-len nao akhan ka dôm anưk xêh laic muk krung hu ƀôh Pô, thong Bhô krung hu đôm ka muk dôm kabha ni.

Pô Yê-su bhat tabiak thong dôm anưk xêh

(Ma-thi-ơ 26:16-20; Mag 16:14-18; Lu-ka 24:36-49)

19Bia harei nan, harei ya tha dalam akok karaup, baƀang libik dôm anưk xêh dok jang karơk kaywa hôic di dôm urang Yo Thaic. Pô Yê-su mưrai dang krưh khol nhu bloh đôm: “Thug siam ka khol hư!” 20Đôm bloh, Bhô brei ka khol nhu iơk tangin thong rathuk drei. Tuk ƀôh Pô, dôm anưk xêh biak bui ôn. 21Bhô gilaic đôm thong khol nhu: “Thug siam ka khol hư! Yau Amư krung hu pachai Ita yau halei Ita lijang pachai khol hư yau nan.” 22Đôm bloh, Bhô jrok yava ngok khol nhu bloh đôm: “Xang tôk mưk Pô Nưbi Ginrơh. 23#Mat 16:19; Mat 18:18.Mưyah khol hư ampun glaic ka thei yơ glaic urang nan mưca bihu ampun; mưyah khol hư khik vơk glaic thei yơ glaic urang nan mưca gok khik vơk.”

Pô Yê-su thong Thô-ma

24Tuk Pô Yê-su mưrai yơ Thô-ma iêu nạn Đi-đim, tha dalam tha pluh dwa Xêh Pachai, ôh hu dok tak nan thong khol nhu. 25Dôm anưk xêh pakan đôm thong nhu: “Khol dahlak krung hu ƀôh Pô.” Min Thô-ma thuuk: “Mưyah dahlak ôh ƀôh nưm đin di palāk tangin Bhô, mưyah dahlak ôh cek inư tangin dahlak tamư libik nưm đin, thong ôh cek palāk tangin dahlak tamư rathuk Bhô yơ mưca dahlak ôh dial.” 26Dalipan harei hadei, dôm anưk xêh gilaic nhom dalam thang, Thô-ma lijang hu dok tak nan thong khol nhu. Kanê dôm baƀang jang karơk, Pô Yê-su mưrai dang krưh khol nhu thong đôm: “Thug siam ka khol hư!” 27Bloh Bhô pađar Thô-ma: “Xang cek inư tangin hư tamư tak ni, thong iơk palāk tangin Ita. Xang cek palāk tangin hư tamư di rathuk Ita. Jôi ôh dial, min xang dial!” 28Thô-ma pathau laic: “Kakuh Pô dahlak, thong Pô Lingik dahlak!” 29Pô Yê-su đôm: “Hu njaup kaywa ƀôh Ita nan ka hư dial njaup lei? Phôl ka dôm urang ôh ƀôh bloh dial!”

Tanap anưd tapuk ni

30Pô Yê-su dok ngak ralô nưm crih pakan di anak dôm anưk xêh bloh ôh vak dalam tapuk ni. 31Min dôm bruk ni bihu vak piêh ka dei ai dial#20:31 dial: Dalam tha thanôn blah vak tangin nạn kakal dial. laic Pô Yê-su nạn Dê Krist, Anưk Pô Lingik, thong piêh tuk dei ai dial yơ nhơ di angan Bhô bloh bihu gruk diup.

Currently Selected:

Yâng 20: CJM2024

Highlight

Copy