Dôm Bruk Ngak 3

Mưnuix joh bihu pajru dhit

1Kal nan, Phi-e-rơ thong Yâng tagôk thubik huji dalam vār lang kar klau tuk biêr harei. 2Hu tha urang joh mưng tuk birau mưnưk, yāup harei bihu mưnuix urang ba mai cek tak baƀang huji, iêu nạn Baƀang Mưlang Bimi, piêh likau jiên dôm urang tamư huji. 3Ƀôh Phi-e-rơ thong Yâng thi yam tamư huji, nhu likau di dwa ong dakhah dakhat. 4Phi-e-rơ thong Yâng mong tapak nhu bloh đôm: “Xang mong tapak khol dahlak.” 5Urang nan patom mat mong dwa ong thong pachôm mưca tôk bihu đơ xit haget. 6Min Phi-e-rơ đôm thong nhu: “Dahlak ôh hu mưh pariak haget ô, min kabha dahlak hu yơ dahlak brei ka hư: Nưmax angan Pô Yê-su Krist mưnuix Na-xa-ret, xang tagôk dang bloh yam nao!” 7Phi-e-rơ pan tangin hanuk nhu thong vơh tagôk. Binhêt dwa gah takai thong mưta le nhu gilaic khang kajap. 8Binhêt urang nan plong tagôk bloh yam nao tapak thubik dwa ong tamư huji, thong nao thong plong, thong pôk mưyom Pô Lingik. 9Tuk abih bôl bhap ƀôh urang nan yam nao, thong pôk mưyom Pô Lingik, 10khol nhu krưn hu êng nạn urang krung hu dok tak Baƀang Mưlang Bimi huji piêh likau dakhah dakhat yơ plơng kadơng ka bruk krung hu mưjiơng tabiak ka nhu.

Phi-e-rơ rao lang dalam Huji

11Dalam tuk nhu krưh dok dung mưk Phi-e-rơ thong Yâng, abih bôl bhap mưk ngak plơng kadơng thong hatap mưrai tom khol nhu tak libik iêu nạn caic Sa-lô-môn. 12Ƀôh yau nan, Phi-e-rơ đôm vêt thong bôl bhap: “Bhap paran I-sra-ên lơy, habar dei ai plơng kadơng ka bruk ni? Habar dei ai patom mat mong khol dahlak drơh yau khol dahlak krung hu nhơ di gon xagta hai jalan adat êng drei bloh ngak ka urang ni nao bihu habar? 13Pô Lingik anưd Ap-ra-ham, Pô Lingik I-sag thong Pô Lingik Ya-kôp, Pô Lingik muk kei khol drei krung hu tahamid halun Bhô nạn Pô Yê-su, Dê bloh dei ai krung hu mưk jao thong kamlah klāk di anak Phi-lat, dalam tuk ong nan hu jamal paya palao Bhô. 14#Mat 27:15-23; Mag 15:6-14; Lu 23:13-23; Yâ 19:12-15.Dei ai krung hu kamlah klāk Dê Nưbi thong Dê Kahanôt anưd Pô Lingik bloh gilaic likau palao ka drei tha ra pamưtai mưnuix. 15Dei ai krung hu pamưtai Pô gruk diup, min Pô Lingik krung hu ngak ka Bhô mưng lôg mưtai diup vơk; khol dahlak nạn dôm urang ngak kaxan ka kabha nan. 16Êng sagar dalam angan Bhô krung hu ngak ka urang bloh dei ai ƀôh thong thau ni bihu khang kajap. Êng angan Bhô thong sagar pak Bhô krung hu ngak ka urang ni khang kadang purmưta, yau abih dei ai krung hu ƀôh. 17Dei ai lơy, urak ni dahlak thau dei ai thong dôm urang pan akok dei ai krung hu ngak kabha nạn kaywa ôh dul thau. 18Min Pô Lingik krung hu angui ganap nan piêh ngak thit panôic Bhô krung hu brei thau dahlau tapa caƀôi dalah dôm pakat hôr laic Dê Krist anưd Bhô xang ciup pađik pađwa. 19Ywa nan ka dei ai xang tumal thong gilaic mai tom Pô Lingik piêh danuh glaic drei bihu yah klāk, 20piêh ka dôm bangyau that birau bloh Pô ƀai brei mưca mưrai, thong piêh Bhô pachai Dê Krist nạn Pô Yê-su, Dê krung bihu kamưnrat dahlau, mưrai tom dei ai. 21Dê nan xang bihu khik vơk ngok thôr riga ka tal bangyau rim pakar thulih, yau Pô Lingik krung hu bican tapa caƀôi dôm pakat hôr nưbi mưng kal lak. 22Biak rei, Mô-se hu đôm: ‘Pô nạn Pô Lingik khol hư mưca paƀlong tagôk dalam dei ai khol hư tha Dê hôr yau ita#3:22 yau ita: Ngan nạn yau Bhô krung hu brôk ita tagôk. thong khol hư xang pang tui abih kabha Bhô bican. 23Mưyah thei ôh pang Dê hôr nan mưca gok tiaup tabiak truh di bôl bhap.’ 24Abih hôr, mưng Sa-mu-ên ka tal dôm pakat patui, tuk đôm pakat hôr lijang rao pahơh dôm harei ni. 25Dei ai nạn anưk taco anưd dôm pakat hôr thong anưd jan ji Pô Lingik krung hu padang thong muk kei khol drei tuk Bhô bican thong Ap-ra-ham: ‘Abih paran ngok tanưh mưca nhơ talei pajeh hư bloh bihu phôl.’ 26Pô Lingik krung hu brôk tagôk Halun Bhô thong pachai mưrai tom dei ai dahlau yatha, piêh brei phôl ka dei ai mưng ganap ngak ka yāup urang dalam dei ai niga klāk jalan ƀāk xag mưjưy drei.”

Currently Selected:

Dôm Bruk Ngak 3: CJM2024

Highlight

Copy