Dôm Bruk Ngak 26

Phao-lô di anak Ag-grip-pa

1Kal nạn patao Ag-grip-pa đôm thong Phao-lô: “Xaai bihu idin đôm piêh êng payah padah.” Phao-lô yêr tangin tabiak, payah padah ka drei yau ni: 2“Pathau patao Ag-grip-pa, harei ni dahlak twah lap bihu êng payah padah di anak patao ka abih kabha mưnuix Yo Thaic yak bak dahlak; 3kaywa patao kateh thau pajip abih adat caƀat lijang yau dôm masalah kamlah cah anưd bôl Yo Thaic. Yau nan, likau di patao xang mưrat pang dahlak. 4Abih bôl Yo Thaic jang thau ka ganap dok dang dahlak mưng tuk dok rineh, dalam paran dahlak thong tak Yê-ru-sa-lem. 5#Bruk 23:6; Phil 3:5.Mưyah khol nhu thudia ngak kaxan ka kabha ni yơ mưng livik khol nhu libeh di thau dahlak krung hu dok dang tui kavôm Pha-ri-si, nạn kavôm thur yatha dalam agama Yo Thaic khol dahlak. 6Urak ni dahlak dang tak ni gok pachang bican nạn kaywa pachôm di panôic he anưd Pô Lingik brei ka muk kei khol dahlak. 7Kaywa di gruk pachôm nan bloh tha pluh dwa mông khol dahlak mưk tian tatang tiak bhuktik Pô Lingik harei mưlam. Pathau patao, lijang kaywa di gruk pachôm nan bloh dahlak gok mưnuix Yo Thaic palek palam. 8Ywa haget dôm rakaya tak ni ôh mưda dial laic Pô Lingik ngak ka mưnuix mưtai diup vơk?

9 # Bruk 8:3; Bruk 22:4,5. Biak rei, êng dahlak dahlau dêh krung hu xanưng laic xang dwah abih ganap piêh pagan gađi angan Pô Yê-su mưnuix Na-xa-ret. 10Dahlak krung hu ngak yau nan tak Yê-ru-sa-lem: Danưng di aco gon anưd dôm gru mưliêng prong, dahlak ô kan buh danuh ralô xêh nưbi, bloh tuk khol nhu gok padok an binax, dahlak lijang buh patik bak yom gêk. 11Dahlak bhian nao graup dôm thang nhom piêh dan dun khol nhu thong ep tatơk khol nhu kamlah klāk sagar; dahlak dangih thangak nao tal dôm dhan mưnuix Bôl-Lingiu piêh mưk karơk khol nhu.

Phao-lô lak vơk kadha ong dial Pô Yê-su

(Dôm Bruk Ngak 9:1-19; 22:6-16)

12Ywa nan ka, dahlak nao tagôk Đa-mac thong aco gon thong panưđar anưd dôm gru mưliêng prong. 13Ngok jalan nao, pathau patao, dalam tuk krưh pađiak, dahlak ƀôh hu tanrak hadah mưng thôr riga tanrak hơl ia harei, pachang tom dar dahlak thong dôm urang nao thubik. 14Tuk abih khol dahlak jalơh trun di haluk, dahlak hamit xap bican thong dahlak mưng xap Hê-ƀrơ laic: ‘Hơic Sau-lơ, Sau-lơ, habar hư phak pabrai Ita? Coh tamư akok halwôk biak kar thi ciup ka hư.’ 15Dahlak thuuk: ‘Pô lơy, Pô nạn thei?’ Pô thuuk: ‘Ita nạn Yê-su bloh hư krưh dok gơk tatơk. 16Min xang bruh tagôk dang, kaywa Ita krung hu bhat tabiak thong hư piêh padang hư ngak halun thong rakaxan ka dôm kabha hư krung hu ƀôh pak Ita,#26:16 kabha hư krung hu ƀôh pak Ita: Dalam tha thanôn blah vak tangin nạn kabha hư krung hu ƀôh. thong ka dôm kabha Ita mưca sahadah ka hư thau. 17Mưca Ita dong paklah hư truh di bôl ni thong dôm mưnuix Bôl-Lingiu nạn libik Ita pachai hư mưrai, 18piêh pơh mưta khol nhu, pađôn khol nhu mưng xup palup tapa hadah hadai, mưng xagti Sa-tan gilaic mai tom Pô Lingik, kaywa sagar di Ita, khol nhu tôk mưk bihu gruk ampun glaic thong liêng nôk ƀang angui thubik thong dôm xêh nưbi.’

Phao-lô lak vơk dôm bruk anưd ong

19Pathau patao Ag-grip-pa, mưng tuk nan, dahlak ôh khin padhag thong catôi mưng thôr riga; 20#Bruk 9:20,28,29.min dahlau yatha, dahlak rao lang ka dôm urang pak Đa-mac, hadei di nan pak Yê-ru-sa-lem thong abih nưgar Yu-đê, bloh tal mưnuix Bôl-Lingiu laic xang tumal thong gaic mưrai tom Pô Lingik, ngak bruk hit lek thamgôn tui gruk tumal. 21Kaywa di gađi kadha nan, mưnuix Yo Thaic krung hu mưk dahlak dalam huji thong thi pamưtai dahlak. 22Min dahlak bihu Pô Lingik pajiak pajiơng ka tal harei ni, thong kaywa nan, dahlak dang tak ni ngak kaxan ka mưnuix samkhan mưnuix hin hot, ôh đôm haget pakan di kabha dôm pakat hôr thong Mô-se krung hu brei thau dahlau xang mưjiơng tabiak: 23#I Kô 15:20.ar nạn Dê Krist xang ciup pađik pađwa, thong nạn mưnuix tamưrơp diup vơk mưng lôg mưtai, piêh rao pahơh tanrak hadah ka bôl khol drei lijang yau dôm mưnuix Bôl-Lingiu.”

24Tuk Phao-lô krưh payah padah ka drei yơ Phê-tu đôm khang: “Phao-lô lơy, xaai lihik mat pajơ! Xaai baic ralô lô nan ka jiơng hanrôi pajơ!” 25Min Phao-lô thuuk: “Pathau kwan prong Phê-tu, dahlak ôh lihik mat ô, min dahlak dok đôm dôm panôic tapak tape thong jangeh. 26Kaywa patao thau pajip kabha ni nạn ka dahlak khin hatai pathau; kaywa dahlak dial kajap laic ôh hu kabha halei patao ôh thau, kaywa abih bruk nan ôh mưjiơng tabiak dalam bhôlir ô. 27Pathau patao Ag-grip-pa, patao hu dial dôm pakat hôr kaic? Dahlak thau patao hu dial!” 28Patao Ag-grip-pa đôm thong Phao-lô: “Jôi xanưng laic ciêt dalam tuk vag katut bloh xaai pahalar bihu ita gilaic jiơng tha Mưnuix Bha Krist.” 29Phao-lô pathau: “Kanê tuk vag atah hai katut, dahlak likau kanư Pô Lingik laic ô kan tha drei patao bloh abih mưnuix pang dahlak harei ni jang gilaic jiơng yau dahlak, klāk tabiak talei threng ni min!”

30Kal nạn patao, kwan pakrang nưgar, muk Ƀê-rê-nit thong dôm urang dok jang tagôk dang. 31Tuk gilaic mai, khol nhu đôm thong gaup: “Urang ni ôh ngak kabha haget đang mưtai ngan đang mưk karơk trah.” 32Patao Ag-grip-pa đôm thong Phê-tu: “Mưyah urang ni ô ka avo tagôk Sê-sa yơ hu mưda palao.”

Currently Selected:

Dôm Bruk Ngak 26: CJM2024

Highlight

Copy