Dôm Bruk Ngak 13

II. Khao Siam bihu lang pahơh ka dôm mưnuix Bôl-Lingiu

(13:1 – 28:31)

Phao-lô thong Ƀa-na-ƀa bihu pachai nao

1Dalam Nhom Nưbi tak An-ti-ôt hu dôm pakat hôr thong gru pato: Ƀa-na-ƀa, Si-mê-ôn iêu nạn Ni-yê, Lu-si-ut mưnuix Si-ren, Ma-na-hem nạn adei rong patao Hê-rôt#13:1 patao Hê-rôt: Sani nạn Hê-rôt An-ti-pa, pakrang nưgar Ga-li-lê., thong Sau-lơ. 2Dok krưh tuk khol nhu bhuktik Pô thong ikak tian ơk yơ Pô Nưbi Ginrơh bican: “Xang cek karei Ƀa-na-ƀa thong Sau-lơ ka gruk hit Ita krung hu iêu khol nhu.” 3Hadei di tuk ikak tian ơk thong lang kar, khol nhu cek tangin ngok dwa urang bloh pachai nao.

Phao-lô thong Ƀa-na-ƀa tak ƀôn palao Sip – Sê-yut Phao-lut dial Pô Yê-su

4Bihu Pô Nưbi Ginrơh pachai nao, dwa ong trun Sê-lơ-xi, bloh mưng nan đik gilai mưrai tak ƀôn palao Sip. 5Mưrai Sa-la-min, dwa urang pablo Panôic Pô Lingik dalam dôm thang nhom bôl Yo Thaic; lijang hu Yâng dai ngak. 6Tuk nao graup ƀôn palao ka tal Pa-phô, tak ni khol nhu gōk tha badut nạn ra hôr baniai mưnuix Yo Thaic angan Ƀa-Yê-su; 7urang ni krưh dok thong kwan pakrang nưgar Sê-yut Phao-lut, nạn tha urang jag karag. Kwan pakrang nưgar pađar daa Ƀa-na-ƀa thong Sau-lơ mưrai, kaywa ong ưng pang Panôic Pô Lingik. 8Min badut nan, angan Hi-lap nạn Ê-li-ma, pagan gađi dwa ong, dwah abih ganap ghak drưh kwan pakrang nưgar dial Pô Yê-su. 9Kal nan, Sau-lơ lijang iêu nạn Phao-lô, bihu bak lamak Pô Nưbi Ginrơh, mong tapak tamư di ban badut nan bloh đôm: 10“Hư nạn anưk bik Abilêh, ra thutruh abih kabha kahanôt, bak lor kator thong xag mưjưy! Hư kưk joh ve jalan tapak anưd Pô Lingik hamiêt habar? 11Mưni, urak ni tangin Pô dan dun hư; mưca hư gok tagloh, ôh ƀôh ia harei dalam tha tuk vag.” Binhêt, gruk tagloh taglit, xup palup jrang ngok Ê-li-ma, nhu nao rapơk, dwah mưnuix tho tangin dui drei nao. 12Kwan pakrang nưgar ƀôh apakar mưjiơng tabiak yơ dial, kaywa ong plơng kadơng ka gađi adat Pô.

Panôic lang anưd Phao-lô tak An-ti-ôt nưgar Pi-si-đi

13Phao-lô thong dôm ayut nao thubik mưng Pa-phô đik gilai mưrai Pet-yê dalam nưgar Pam-phi-li. Min Yâng niga khol nhu, gilaic mai Yê-ru-sa-lem. 14Mưng Pet-yê khol nhu kakal nao tal An-ti-ôt nưgar Pi-si-đi. Tal harei Sa-ƀat, khol nhu tamư dok dalam thang nhom. 15Hadei di tuk pôic hakum jakar thong dôm hôr, dôm kar pan akok thang nhom pađar mưnuix đôm thong khol nhu: “Pathau dei ai, mưyah hu panôic halei paxơh bôl bhap, likau xang đôm.” 16Phao-lô tagôk dang yêr tangin tabiak habang bloh đôm: “Pathau bhap paran I-sra-ên thong dôm urang hôic taka di Pô Lingik, likau xang pang: 17Pô Lingik anưd bôl I-sra-ên mưni krung hu rwah muk kei khol drei, ngak ka bôl ni ginup mưda dalam tuk mưdok tak Ai-kâp, bloh Bhô angui tangin gon xagta ba khol nhu tabiak truh nưgar nan; 18dalam nôic pāk pluh thun, Bhô dadôn#13:18 dadôn: Dalam tha thanôn blah vak tangin nạn pathên. khol nhu dalam bhum kamrang; 19hadei di tuk thubang tajuh bôl dalam nưgar Ka-na-an, Bhô brei ka khol nhu ngak pô nưgar nan; 20abih dalam nôic pāk rituh limư pluh thun. Hadei di nan,#13:20 dalam nôic pāk rituh limư pluh thun. Hadei di nan: Dalam tha thanôn blah vak tangin nạn Hadei di nan, dalam nôic pāk rituh limư pluh thun. Bhô padang ka khol nhu dôm kwan pachang bican ka tal rai hôr Sa-mu-ên. 21Kal nan khol nhu likau tha patao, birau mưng Pô Lingik ƀai brei ka Sau-lơ, anưk likei Kic, bha di môn Ƀên-ya-min, pakrang khol nhu dalam pāk pluh thun. 22Bloh Bhô klāk patao nan, padang Đa-vit ngak patao. Bhô ngak kaxan ka ong laic: ‘Ita krung hu dwah ƀôh Đa-vit anưk likei Ye-sê, nạn mưnuix Ita bui tian, mưnuix mưca pangak abih jamal Ita.’ 23Mưng talei pajeh Đa-vit, Pô Lingik krung hu paƀlong tagôk ka I-sra-ên tha Dê Dong Paklah, ar nạn Pô Yê-su yau Bhô krung hu he. 24#Mag 1:4; Lu 3:3.Dahlau di Pô Yê-su mưrai, Yâng krung hu rao lang ƀap-tem ka gruk tumal tal abih bôl I-sra-ên. 25#Yâ 1:20. Mat 3:11; Mag 1:7; Lu 3:16; Yâ 1:27.Tuk thi pathik gruk hit drei, Yâng đôm: ‘Dôm ong xanưng dahlak nạn thei? Dahlak ôh njaup nạn Dê dôm ong xanưng ô, min dêh, hu Dê mưrai hadei di dahlak, dahlak ôh lek thamgôn thwak kalik jwak ka Bhô.’

26Pathau dei ai nạn anưk taco talei pajeh Ap-ra-ham, thong dôm urang hôic taka di Pô Lingik, anga dong paklah ni bihu paywa mưrai ka êng khol drei.#13:26 khol drei: Dalam tha thanôn blah vak tangin nạn dei ai. 27Kaywa bôl bhap thong dôm kar pan akok khol nhu tak Yê-ru-sa-lem ôh krưn thau Pô Yê-su, lijang ôh dul thau dôm panôic hôr bloh mưnuix urang bhian pôic yāup harei Sa-ƀat. Yau nan min, tuk padok an Bhô, khol nhu krung hu ngak ka dôm panôic hôr nan bihu thit. 28#Mat 27:22,23; Mag 15:13,14; Lu 23:21-23; Yâ 19:15.Kanê ôh dwah ƀôh gađi gadha halei piêh padok an binax, khol nhu jang kanư di Phi-lat pamưtai Bhô. 29#Mat 27:57-61; Mag 15:42-47; Lu 23:50-56; Yâ 19:38-42.Tuk khol nhu krung hu ngak thit abih kabha vak ka Bhô bloh yơ patrun Bhô truh di gai gan gak bloh dar dalam tanum. 30Min Pô Lingik krung hu ngak ka Bhô diup vơk mưng lôg mưtai. 31#Bruk 1:3.Dalam ralô harei, Bhô krung hu bhat tabiak ka dôm urang tui Bhô mưng Ga-li-lê tagôk Yê-ru-sa-lem; urak ni khol nhu jang ngak kaxan ka Bhô ka bôl bhap. 32Dok khol dahlak yơ rao pahơh ka dei ai Khao Siam bloh Pô Lingik krung hu he ka muk kei khol drei 33laic Bhô krung hu ngak thit panôic he nan ka khol drei, nạn anưk taco khol nhu, mưng ganap ngak ka Pô Yê-su diup vơk, yau krung hu vak dalam Ariya Likam ya dwa: ‘Anưk nạn anưk Ita, harei ni Ita krung hu pajiơng tabiak Anưk.’ 34Bhô krung hu ngak ka Pô Yê-su diup vơk mưng lôg mưtai, ôh tuk halei gok bhôic rôic, yau panôic Bhô krung hu bican: ‘Mưca Ita ƀai brei ka khol hư hanim siam nưbi thong kardak bloh Ita krung hu he thong Đa-vit.’ 35Ywa nan ka, tha Ariya Likam pakan lijang hu đôm: ‘Pô ôh lôi Dê Nưbi Bhô ƀôh gruk bhôic rôic.’ 36Nan min hadei di tuk ragxa ka kaxat Pô Lingik dalam vagtu drei, patao Đa-vit krung hu tapa urai, bihu dar ganak dôm muk kei drei thong krung hu ƀôh gruk bhôic rôic; 37dok Dê bloh Pô Lingik krung hu ngak ka diup vơk yơ ôh ƀôh gruk bhôic rôic. 38Yau nan, pathau dei ai, xang krưn thau laic nhơ di Dê nan bloh gruk ampun glaic bihu pablo ka dei ai; 39nhơ di Bhô, abih urang dial jang bihu mong yau kahanôt ka abih kabha tui hakum jakar Mô-se ôh mưda mong yau kahanôt bihu. 40Ywa nan ka, xang ajut, jôi lôi tavak kabha dôm pakat hôr krung hu đôm:

41‘Mưni ra kaphôr!

Xang athur mưk thong thrơh lihik mek!#13:41 thrơh lihik mek: Ngan nạn mưtai mek.

Kaywa dalam kal khol hư, mưca Ita ngak tha bruk,

Kanê hu thei lak vơk, khol hư lijang ôh dial!’”

42Tuk Phao-lô thong Ƀa-na-ƀa yam tabiak, khol nhu rok daa dwa ong kakal rao lang thong panôic nan dalam harei Sa-ƀat hadei. 43Tuk vār nhom krung hu luic, ralô urang Yo Thaic thong mưnuix Bôl-Lingiu tui agama Yo Thaic nao tui Phao-lô thong Ƀa-na-ƀa. Dwa ong đôm pôic thong paxơh khol nhu kưk dang kajap dalam karun hanim Pô Lingik.

44Harei Sa-ƀat hadei, mưjek yau abih bôl dalam dhan nhom vơk piêh pang panôic Pô.#13:44 panôic Pô: Dalam tha thanôn blah vak tangin nạn Panôic Pô Lingik. 45Min tuk ƀôh tapôr bôl nan ka dôm urang Yo Thaic ginrak tian jhak hatai, pagan gađi panôic lang anưd Phao-lô thong jhơk jhel ong. 46Min Phao-lô thong Ƀa-na-ƀa khin hatai đôm thong khol nhu: “Hajat xang mưdahlau tathit Panôic Pô Lingik ka dei ai; min kaywa dei ai krung hu kamlah klāk, thong pachang iơk êng drei ôh lek thamgôn tôk gruk diup rit rai, birau mưng urak ni khol dahlak mưng gaic tapa dôm mưnuix Bôl-Lingiu. 47Kaywa Pô hu tathit bican thong khol dahlak:

‘Ita padang hư ngak tanrak hadah ka mưnuix Bôl-Lingiu,

Piêh ka gruk dong paklah tal luic boh tanưh.’”

48Tuk pang panôic ni, dôm mưnuix Bôl-Lingiu bui ôn tahamid panôic Pô; dôm urang krung bihu jarô ka gruk diup rit rai jang dial. 49Panôic Pô thik dar graup nưgar nan. 50Min dôm urang Yo Thaic paxut dôm urang kamei hag takrư agama bha di rakaya thong dôm urang pan akok dalam mưdin, pacuh khol nhu gơk tatơk Phao-lô thong Ƀa-na-ƀa bloh tiaup dwa ong tabiak truh di bhum bhok khol nhu. 51#Mat 10:14; Mag 6:11; Lu 9:5; Lu 10:11.Dwa ong tapơh thun di takai piêh paraduh khol nhu, bloh nao mưrai I-kô-ni. 52Dok dôm anưk xêh yơ bihu bak lamak pakal bui thong Pô Nưbi Ginrơh.

Currently Selected:

Dôm Bruk Ngak 13: CJM2024

Highlight

Copy