II Kô-rir-tô 3

Rapajan anưd jan ji birau thong rapajan anưd Jan Ji Yao tik

1Hu njaup khol dahlak gilaic raup êng papôk drei lei? Ngan yau tha thanôn urang pakan, khol dahlak hajat hu harak paha xakrưn thong dei ai, ngan harak dei ai paha xakrưn ka khol dahlak kaic? 2Êng dei ai nạn harak paha xakrưn anưd khol dahlak, bihu vak dalam tian khol dahlak, bihu abih drei thau thong pôic. 3Biak jalang jalôi dei ai nạn harak Dê Krist, bihu vak kaywa rapajan khol dahlak, ôh njaup vak mưng mưg min mưng Nưbi Ginrơh Pô Lingik bhian diup; ôh njaup vak ngok dôm loh patau min mưng ngok dôm loh tian anưk mưnuix.

4Nhơ di Dê Krist, khol dahlak dial kajap yau nan jom thong Pô Lingik. 5Ôh njaup khol dahlak hu bijag piêh xanưng laic drei hu mưda ngak bihu haget, min bijag khol drei mưrai mưng Pô Lingik. 6Êng Bhô krung hu ƀai brei ka khol dahlak xagta ragxa jan ji birau, ôh njaup jan ji mưng akhar vak,#3:6 jan ji mưng akhar vak: Đôm xam hakum jakar Mô-se. min nạn jan ji dalam Pô Nưbi Ginrơh, kaywa boh akhar ba mưrai gruk mưtai, min Pô Nưbi Ginrơh ƀai brei gruk diup.

7Mưyah rapajan ba tal gruk mưtai, bihu ratak akhar ngok dôm loh patau bloh dok mưrai dalam xêh mưlang, ngak ka anưk bôl I-sra-ên ôh mưda mong ƀok Mô-se bihu, kaywa tanrak ginuh di ƀok ong, kanê ginuh tapa drah, 8yơ rapajan Pô Nưbi Ginrơh gilaic ôh mưrai dalam xêh mưlang ƀlwak nôk hơl ô? 9Kaywa mưyah rapajan ba mưrai gruk padok an bloh dok bihu xêh mưlang, yơ rapajan ba mưrai gruk kahanôt gilaic bik xêh mưlang hơl thau kađơ! 10Biak rei, dalam atabha ni, kabha krung hu bhian bihu xêh mưlang mưca ôh dok xêh mưlang haget vơk di anak gruk xêh mưlang tapa ƀlwak ni. 11Mưyah kabha drah tapa dok bihu xêh mưlang, yơ kabha dok kađong hamiêt gilaic bik bihu xêh mưlang hơl thau kađơ!

Thubai lidu mưom ngok Jan Ji Yao tik

12Kaywa hu gruk pachôm yau nan, yơ khol dahlak biak khang hatai, 13Ôh drơh yau Mô-se, mưk thubai pacang ƀok drei klah di anưk bôl I-sra-ên ôh ƀôh gruk patek anưd ginuh drah bôi. 14Min tian khol nhu jang khang kưg, kaywa ka tal harei ni, tuk khol nhu pôic Jan Ji Yao tik, blah thubai lidu nan jang ô ka ramik truh di khol nhu, kaywa ciêt dalam Dê Krist, blah thubai lidu nan mưng bihu ramik nao. 15Biak rei, ka tal harei ni, yāup tuk pang pôic tapuk Mô-se yơ blah thubai lidu gilaic tulam tian khol nhu. 16Min tuk tha urang gilaic vơk thong Pô, yơ blah thubai lidu nan bihu ramik nao. 17Pô nạn Pô Nưbi Ginrơh, libik halei hu Pô Nưbi Ginrơh anưd Pô, libik nan hu salalah. 18Abih khol drei jang lôi ƀok mưlun piêh mong puja xêh mưlang Pô, bihu xalih karei gilaic jiơng drơh yau binguk thek Bhô, mưng xêh mưlang tal xêh mưlang; kaywa kabha ni mưrai mưng Pô nạn Pô Nưbi Ginrơh.

Currently Selected:

II Kô-rir-tô 3: CJM2024

Highlight

Copy