I Kô-rir-tô 6

Yak bak di anak dôm mưnuix ôh dial Pô

1Tuk dalam dei ai hu urang ni mưrak thong urang pakan, habar ôh ba mưrai di anak dôm xêh nưbi bloh gilaic khin lôi ka ra ôh dial Pô Yê-su pachang bican? 2Dei ai ôh thau dôm xêh nưbi mưca bican inư dunya ô? Mưyah dunya gok dei ai jamrah yơ habar dei ai gilaic ôh mưda pachang bican dôm bruk kaceg kacog? 3Dei ai ôh thau khol drei mưca pachang bican dôm umat ô habar? Laic haget dôm bruk lôg ni! 4Yau nan min, ywa habar tuk hu dôm masalah di rai gahêh yau nan dei ai gilaic ba mưrai ka dôm urang bloh Nhom Nưbi mong ôh tabiak haget pachang bican. 5Dahlak đôm yau nan piêh ka dei ai tachaup ƀok! Gađi halei dalam dei ai ôh hu tha urang tal jag karag piêh bican krưh dei ai drei ô? 6Min dei ai yak bak gaup, bloh gilaic ba mưrai di anak dôm ra ôh dial! 7Biak rei, ciêt bruk yak bak gaup krung hu nạn tha athu jwak pajơ. Dak laic dei ai halar ciup ôh kahanôt hu hơl ô? Dak ciup gok palwô pagat hu hơl ô? 8Min êng dei ai ôh kahanôt, palwô pagat bloh gilaic dok dang yau nan thong dei ai drei!

9Dei ai ôh thau laic dôm ra tidak adil mưca ôh bihu mưvarih Dit Biya Pô Lingik ô? 10Jôi palwô pagat êng drei. Dôm ra payar, ra xambah hayap yang, ra ƀang glai mưtah, ra likei pablei athar mưnuix, ra tha bangxa mưyut mưyau gaup, ra klek xavah, ra tathrưg lagơh, ra mưbuk, ra hatam xap, ra poh blah, mưca ôh bihu mưvarih Dit Biya Pô Lingik. 11Kal dêh dei ai hu tha dwa urang yau nan. Min dalam angan Pô nạn Pô Yê-su Krist thong dalam Nưbi Ginrơh Pô Lingik khol drei, dei ai krung bihu jamưah, bihu thrah nưbi, thong bihu mong yau kahanôt.

Adan pleh di gruk haruk haram

12 # I Kô 10:23. Dahlak bihu idin ngak abih gruk, min ôh njaup abih gruk jang hu hanim. Dahlak bihu idin ngak abih gruk, min ôh ngak halun kloh ka pathar pathar kabha haget. 13“Kaya ƀang kaywa di tian, tian kaywa di kaya ƀang”, Pô Lingik mưca thubang bih pakar ni thong pakar dêh. Rup pabhap ôh kaywa agam, min kaywa di Pô, thong Pô kaywa di rup pabhap; 14Pô Lingik krung hu ngak ka Pô Yê-su diup vơk, mưca lijang ngak ka khol drei diup vơk kaywa gon xagta Bhô. 15Dei ai ôh thau laic rup pabhap dei ai nan mani Dê Krist ô? Yau nan, dahlak hu khin mưk mani Dê Krist ngak jiơng mani kamei pablei rup lei? Ôh mưda! 16Dei ai ôh thau laic, ra halei pagam thong kamei pablei rup yơ mưca gilaic hajiơng tha rup thong khol nhu ô? Kaywa hu vak laic:

“Dwa urang mưca gilaic hajiơng tha rilo.”

17Dok thei pagam thong Pô yơ mưca gilaic jiơng tha mat xwan thong Bhô.

18Xang pleh di gruk payar. Abih glaic bloh mưnuix urang tanrok jang mưdok di lingiu rup pabhap, min ra hamtok yơ tanrok tal êng rup pabhap drei. 19#I Kô 3:16; II Kô 6:16.Dei ai ôh thau laic rup pabhap dei ai nạn huji Pô Nưbi Ginrơh krưh dok biđang dalam dei ai, Dê bloh Pô Lingik krung hu ƀai brei ka dei ai ô? Dei ai lijang ôh dok bha di êng drei tra, 20Kaywa dei ai krung bihu blei mưng yom biak glong. Yau nan, xang angui rup pabhap dei ai tahamid Pô Lingik.

Currently Selected:

I Kô-rir-tô 6: CJM2024

Highlight

Copy