I Kô-rir-tô 4

Pô Yê-su nạn Dê bican inư ralai

1Yau nan, abih drei xang mong khol dahlak yau dôm halun Dê Krist, dôm mưnuix jang glang dôm gruk palih kabal anưd Pô Lingik. 2Kabha mưnuix urang đôk di libik mưnuix jang glang nạn xang đang padul. 3Dok nôk dahlak, kanê gok dei ai ngan pathar pathar mưdhir an halei anưd mưrôxak jamrah yơ lijang ôh samkhan di haget. Dahlak lijang ôh êng jamrah drei. 4Kaywa dahlak ôh ƀôh drei hu haget xwel, min ôh kaywa di nan bloh dahlak bihu mong yau kahanôt. Dê bican inư dahlak êng nạn Pô. 5Yau nan, jôi jamrah kayôn jôi, xang cang Pô mưrai; mưca Bhô ba tabiak di tanrak hadah dôm haget krưh dok bihu pacang padaup dalam bhôlir, thong parang tabiak dôm anngak jarô dalam tian. Tuk nạn yāup urang mưca tôk bihu gruk pôk mưyom mưng Pô Lingik.

Gruk padhag krưh ganan thong aneh drei

6Pathau dei ai, kaywa hu hanim ka dei ai, dahlak krung hu pangak dôm kabha ni ka êng dahlak thong A-pô-lô, piêh dei ai baic di khol dahlak ar anưd kanen: “Jôi gar tabiak truh di panôic krung hu vak”, mưda klah ôh thei ba tian paki pakang bloh grong urang ni mưradhag di urang dêh. 7Kaywa hu thei ƀôh ayut ƀro hơl mưnuix pakan kaic? Hu kabha haget ayut hu bloh ôh ywa tôk mưk kaic? Mưyah ayut krung hu tôk liêng, yơ habar dok mưyeh yau ô ka bhian tôk liêng?

8Dei ai krung hu trei tal pajơ! Dei ai krung hu ginup mưda bloh! Dei ai krung hu ngak patao bloh halei hu hajat tal khol dahlak. Cong habar dei ai ngak patao piêh khol dahlak bihu thubik pakrang thong dei ai! 9Kaywa dahlak xanưng laic, Pô Lingik krung hu padok dôm Xêh Pachai khol dahlak tamư libik biêr nje yatha, yau dôm urang gok an binax, kaywa khol dahlak krung hu gilaic jiơng ngak klao ka dunya, umat thong mưrôxak. 10Khol dahlak nạn dôm ra gila patok kaywa di Dê Krist, dok dei ai bihu jag karag dalam Dê Krist. Khol dahlak kre, dok dei ai kati katang. Dei ai bihu pôkja, dok khol dahlak gok paong. 11Ka tal urak ni, khol dahlak jang ciup ơk lipa, tek tahak, tong poh thong thơk bơk ni dêh. 12#Bruk 18:3.Khol dahlak ngak bruk gleh glar mưng êng dwa gah tangin drei. Tuk gok dhao thah, khol dahlak tadhau phôl; tuk gok gơk tatơk, khol dahlak dadôn; 13tuk gok đôm jhak, khol dahlak dhi dhau thuuk vơk. Ka tal urak ni, khol dahlak gilaic jiơng yau harơk harôm dunya, arô arah anưd mưrôxak.

Tui krơh amư bha nưbi ginrơh

14Dahlak vak dôm kabha ni ôh njaup piêh ngak ka dei ai tachaup ƀok, min piêh adan dei ai yau dôm anưk bik anit puja dahlak. 15Kanê dei ai hu ribau tamưn mưnuix ariêng ba dalam Dê Krist, min dei ai ôh hu ralô amư; kaywa nhơ di Khao Siam, dahlak krung hu pajiơng dei ai tabiak dalam Dê Krist Yê-su. 16#I Kô 11:1; Phil 3:17.Yau nan, dahlak neh adan dei ai: Xang ƀlah di dahlak. 17Ywa nan ka, dahlak krung hu pachai Ti-mô-thê, anưk anit puja thong kloh hatai anưd dahlak dalam Pô mưrai, pahadar vơk ka dei ai jalan ƀāk dahlak dalam Dê Krist Yê-su, yau dahlak jang pato dalam Nhom Nưbi di graup libik.

18Hu hadôm ra ngak paki pakang, kaywa xanưng laic mưca dahlak ôh mưrai tom dei ai. 19Min mưyah Pô ưng yơ ôh dok chôi tra mưca dahlak mưrai tom dei ai; Tuk nan mưca dahlak ô kan ciêt panôic đôm thau anưd dôm ra paki pakang ni, min bih xagta khol nhu gêk. 20Kaywa Dit Biya Pô Lingik ôh ciêt sahadah mưng panôic đôm, min kaywa gon xagta. 21Dei ai ưng kabha haget? Ưng dahlak ba gai drưg mưrai tom dei ai, ngan mưrai tom tiak anit ranam thong mưnơix lidhôr?

Currently Selected:

I Kô-rir-tô 4: CJM2024

Highlight

Copy