Rô-ma Baak ptơơm bôôk
Baak ptơơm bôôk
Khaak Phao-lô ri piyơ aan bnih jơrnơ tal Rô-ma jah tơmbơh u riap rap aan chak nhjook Phung Jrah tal nei bu ri. Phao-lô êch riap han nhjook jah chhuôr Baak Sroong Klanh tal Rô-ma di rbôông, ja nei chkhôm baak ta jraih bu ri u kươi han Tay Ban Nha. Knông khaak, Phao-lô rơih baak chưt jơrnơ Koon Brah u pơrgap a ngan knông baak rêh bơl bnih jơ khal au. Khaak Rô-ma geh rơih baak sơp leq u baak chhuôr Sroong Klanh bu ri.
Rlach baak chak nhjook bơl koon sơih tal Phung Jrah Rô-ma u mor n'hai bu lah pang r'bon dan brah yoot aan bu, Phao-lô lah tơt ndroong khaak au: “Knông Baak Sroong Klanh au, baak sêch song Brah Ưn ri kươt tơrsau a chưt jơrnơ tơt chưt jơrnơ, bei geh baak 'bian laah: Bnih sêch song u kươi rêh đươm chưt jơrnơ” (1:17).
Ja nei, Phao-lô rơih ntil au tơrsau leq jum bnih, leq bnih Jo-thai kot bei bnih nggoor agaih kot êch kươt chôôl sêch song di mat Brah Ưn, đươm leq sêch koon bnih kot gôq a teh kmheng dôih 'baap ri. Koon bnih kươt chôôl sêch song lah chkhôm chưt jơrnơ lơ Brah Jê-sus Krist. Ndih nha, Phao-lô mơq baak rêh mhei bơl koon sơih ri knông baak ta sruôl n'hai Brah Jê-sus, nei lah play kao a baak ta glơm mhei n'hai Brah Ưn. Bnih jơ Brah geh baak rêh sroong boong u chkhôm Brah Wêêng baah kươt đoh rlach khmheng dôih 'baap u baak chhưt ri. Knông pal tap 5 tơt 8, Phao-lô jmlưm u ntil Ch'bap Brah Ưn ri u dang kmheng Brah Wêêng knông baak rêh koon sơih ri. Ndih tơt, yau jơt jơng rơih baak u ntil lơh bei êch leq bnih Jo-thai dơng raih agaih kot ta dip n'hai riap rap koh kơơl Brah Ưn ri aan koon bnih. Bu krop lah baak teq lơơi Brah Jê-sus bơl Jo-thai ri lah di bôh knông riap rap Brah Ưn êch baah liêu leq koon bnih tơt brêêng sơmlaang Đoh Kơơl Brah Ưn ri knông Brah Đoh Kwaai Jê-sus. Phao-lô kot jơ lah ptut bnih Jo-thai u kươi 'bưn geh teq lơơi Brah Jê-sus hôm. Ptut plơơp khaak Phao-lô ri pn'ak baak rêh bơl Koon Brah ri, đat lah phrui rêh knông baak srlanh ta n'hai, ntil rêh u bơl kan ttih, u baak chưt nuih. Phao-lô ptut plơơp khaak n'hai baak chak nhjook mbu êêng n'hai pơt wơơl Brah Ưn.
Kôq dap
Tơmbơh u ndroong êêng (1:1-17)
Ntil rnđêch u baak đoh kwaai aan koon bnih (1:18 – 3:20)
Ntil baak đoh kwaai Brah Ưn ri (3:21 – 4:25)
Kmlơt rêh mhei knông Yaang Krist (5:1 – 8:39)
Bnih Jo-thai knông riap srap đoh kwaai Brah Ưn ri (9:1 – 11:36)
Kmlơt rêh bnih Koon Brah ri (12:1 – 15:13)
Ptut u baak chah (15:14 – 16:27)
Currently Selected:
Rô-ma Baak ptơơm bôôk: SBL2024
Highlight
Share
Copy
Want to have your highlights saved across all your devices? Sign up or sign in
© 2024 Bible Society Vietnam. All rights reserved.