Rô-ma 11
11
Chưt l'ưt lmư Brah Ưn ri teq u raih I-sra-ên
1Bei nei hei dan ôp, Brah Ưn geh teq lơi raih Pang 'bưn? 'Bưn geh bei nei! Đươm nơơm hei laa bnih I-sra-ên, mbaang Ap-ra-ham, lah puich Bên-ja-min.#Phil 3:5. 2Brah Ưn 'bưn geh teq lơi raih Pang laa raih pa Pang ja gưt noor. Oh bi geh gưt Sm'bưt Brah 'bian teq u baak Ê-li ja ta poich raih I-sra-ên bôôk mat Brah Ưn bei êch 'bưn? 3“Brah ơi, bu ja lưm bơl grnưt noor Ay, lơh rlơm bliêng r'bưn Ay; dơơn nha mbu êêng koon, u bu kot wơng koon jah lưm.” 4Dôh Brah Ưn ơh kươi aan bu bei êch? “Hei ja ơn aan Hei poh ban bnih klau 'bưn geh smbah di mat wêêng Ba-anh.” 5Nar au kot bei nei, geh di ndêq nha ngroh kươi kươt sach sal đươm brêêng smlaang. 6Dôh mơq đươm brêêng smlaang nei 'bưn chkhôm tơt kaar lơh hôm; mơq 'bưn, brêêng smlaang 'bưn nh'ơơm laa brêêng smlaang.
7Bei nei a hay? Raih I-sra-ên ja 'bưn pơơn kươt ntil nơơm wơng joi. pal bnih kươt sach nei ja pơơn kươt, dôh nak nh'ơơm kơơi nei but kraam chưt, 8bei geh baak 'bian laah:
“Brah Ưn ja aan bu di chưt nuih a rơơi,
Mat tiah, tôr têch, aan tơt nar au.”
9Đa-wit nha mor:
“Ndưng aan bliêng nhêt bu ri but drơrnơng dak u moong rang,
Tmau dơrwap jơng u baak kah rmal aan bu;
10Kmbưng ơơn mat bu dol tiah jah 'bưn sau kươt,
U buq bu gei kun ku yoot!”
Baak đoh kwaai lôh n'hai raih agaih
11Bei nei hei dan ôp, geh lah raih I-sra-ên ja dơrwap jơng lơh aan phrui a kơq 'bưn? 'Bưn geh bei nei! Dôh đươm baak lơh dôih bu ri pa baak đoh kwaai ja lôh u raih agaih jah lơh bu ta tuul. 12Mơq baak lơh dôih bu ri ja lơh khunh aan swich teh, u mơq baak 'bưn jn'ah bu ri ja lơh khunh aan raih agaih nei baak bêêng bơm bu ri a kươi dươn khunh huôih gưt pal êch!
13Hei mor n'hai oh bi laa bơl raih agaih: Pal êch hei nha lơh jơt jơng aan raih agaih, hei a kươi nha lơh rwaah aang kaar nơơm 14jah pơrlay nuih ta tuul raih bal hei ri, u đoh kươt m'baak bnih knông bu. 15Đươm mơq kaar bu dol dhot teq ja liêu kơơi baak ta krôih aan leq swich teh, nei kaar bu kươt wơơt drơơ 'bưn geh laa baak rêh lôh a ktôk chhưt laang?
16Mơq bơrnêh ptơơm kươt piyơ laa jrah nei leq di bơrnun bơrnêh kot jrah; mơq dria laa jrah nei pal bling kot jrah. 17Dôh mơq geh m'baak bling dol kat teq, u ay ơơm laa tơơm ô-liu bri kươt put teq u ktôk pal bling nei jah kươt ta toon jar rêh a dria tơơm ô-liu 18nei khơơm geh ha uôt n'hai pal bling nei. Mơq ay ha uôt nei phrui gênh laah 'bưn geh ay pndol dria, dôh laa dria pndol ay. 19Ay a kươi mor: “Pal bling ja dol kat teq, jah hei kươt put.” 20Dip bei nei. Pal bling nei ja dol kat đươm chưt 'bưn jơ bu ri, nha ay dơơn ta yoong khưng kươt chkhôm chưt jơrnơ. Khơơm nhjơơl, dôh phrui n'hông n'hing. 21Đươm mơq Brah Ưn ja 'bưn khwaich pal bling êêng nei Pan kot 'bưn khwaich ay laang. 22Bei nei phrui mơq gưt baak bnih l'ưt u baak sưrmưn Brah Ưn ri: Sưrmưn teq u pal 'bơơn ja akơq, dôh bnih l'ưt teq n'hai ay, chleeng laa ay ndih ơn nơơm knông baak bnih l'ưt Pang ri; mơq 'bưn, ay a kươi kot dol kat teq. 23Nha n'hai bnih Jo-thai, mơq bu 'bưn a rơơi knông baak 'bưn jơ nei a kươi kot kươt prgap pôl, đươm Brah Ưn geh ch'bap prgap bu kơơi. 24Đươm mơq tênh pêêk pai, ay ơơm laa tơơm ô-liu bri baah kươt kat u prgap pôl tơơm ô-liu klanh, 'bưn geh dip bei êêng ơơm, huôih ơơn bu lah pal bling êêng ơơm kươt prgap u tơơm ô-liu nơơm ri huôih nha.
Raih I-sra-ên a kươi kươt đoh
25Ơi oh bi, hei êch oh bi gưt baak chmlih chmleek au jah oh bi 'bưn aan êêng nơơm lah gưt jhai, nei laa: Di bôh raih I-sra-ên kraam chưt aan tơt khal nak raih agaih mưt sơp. 26Bei nei leq raih I-sra-ên a kươi kươt đoh, bei geh baak 'bian:
“Yaang Đoh Kwaai a kươi lôh a Si-ôn,
Teq lơơi baak 'bưn jơ rlach nhi Ja-kôp;”
27“U au laa pơrnơn Hei ldơk n'hai bu,
Tơt Hei jhut leq dôih 'baap bu.”
28Tênh Baak Sroong Klanh, bu laa bah kmang Brah Ưn ri, ntil nei geh thlay aan oh bi; dôh tênh baak sach sal, bu kươt srlanh chkhôm bơl yau yi nơơm; 29đươm pal baak ươn u baak khuôl duôn Brah Ưn ri 'bưn khal êch tơh gơl. 30Bei oh bi noor tôw 'bưn chôh Brah Ưn, baah bei au kươt gmaak chkhôm baak 'bưn chôh bu ri, 31nei kot bei nei, khal au bu ja 'bưn chôh jah chkhôm baak gmaak tơrsau aan oh bi, bu#11:31 bu: Knông m'baak plơơp 'bian ti laa bêl au bu. kot kươt gmaak. 32Đươm Brah Ưn ja groon jôm bnih knông ktôk 'bưn chôh, jah gmaak jôm bnih.
33Ơi! Baak khunh geh, jhai rpech u gưt jhai Brah Ưn jru gưt pal êch ngan! Baak pơrkat Pang ri lơh bei êch gưt kươt, troong gông Pang lơh bei êch gưt kươt!
34“Đươm 'bơơn gưt kươt gơrninh Brah,
'Bơơn lơh mbơh chau aan Pang?”
35Paich “'bơơn ja aan Brah noor,
Jah kươt Pang plơq kơơi?”
36Đươm pi mrơk kot lôh a Pang, đươm Pang, u wih teq u Pang. Chring chraang pơơn teq u Pang yoot yôw bơm yoh! A-men.#I Kô 8:6.
Currently Selected:
Rô-ma 11: SBL2024
Highlight
Share
Copy
Want to have your highlights saved across all your devices? Sign up or sign in
© 2024 Bible Society Vietnam. All rights reserved.
