Lu-ka 14

Brah tơmbah bnih lhuut. – Kne teq u baak krich chhak n'hai l'ut l'ok

1Di nar sa-'bat, Brah Jê-sus mưt nhi mbu bnih liêu troong tênh thap Pha-ri-si jah sôông sa; bu nday chmlam tênh miat Pang. 2Plah nei, di mat Pang geh mbu bnih pơrtanh lhuut. 3Brah Jê-sus lah n'hai bơl yau rpach u bnih Pha-ri-si laah: “Knông nar sa-'bat, geh kươt ch'bap tơmbah tanh lah 'bưn?” 4Dôh bu kot iat rngơt leq. Pang kơldơk bnih pơrtanh, tơmbah ja nei aan siq. 5Pang lah n'hai bu: “'Bơơn knông bơl 'bei geh koon paich laa pi gôw a klam tơrbang knông nar sa-'bat baah 'bưn kơndaal têêk u kơh laang?”#Mat 12:11. 6Bu 'bưn geh ơh kươt.

7Tơt sau bơl bnih kươt siêr kot sach ktôk peh lư, Pang chhuôr aan bu di pn'geh ruk: 8“Tơt bu nday siêr 'bei han joq sa kliêr, khơơm gôq ktôk prêh đat, ach laah knông bơl bnach kươt siêr geh 'bơơn đing huôih 'bei. 9Yau nnơơm sa a kươi lôh mor teq u 'bei: ‘Phrui teq ktôk aan bnih au gôq,’ khal nei 'bei a kươi prêêng mat đươm phrui du gôq u ktôk ptut. 10Dôh tơt 'bei kươt siêr, phrui gôq ktôk ptut, jah tơt yau nnơơm sa lôh mor n'hai 'bei: ‘Gnasaal ơi, dan siêr gôq lơ ktôk prêh huôih’ nei 'bei a kươi kươt đing di mat bơl bnih pôl bliêng n'hai nơơm bơn. 11Đươm 'bơơn lơơk chhak nơơm a kươi dol krich, nha 'bơơn krich chhak nơơm u teh a kươi kươt lơơk prêh.”#Mat 23:12; Lu 18:14.

12Pang kot lah n'hai bnih siêr Pang nha laah: “Khal êch 'bei ddôk sôông nar tam paich sôông mau, khơơm siêr gnasaal, oh bi, phung mbaang paich gơna poh khunh geh, ach bu kot siêr kươi baah kah 'bun smlaang aan 'bei. 13Dôh tơt 'bei ddôk sa, phrui siêr bơl bnih l'ơơi pngot, khuynh, chook trei, tiah mat 14nei 'bei a kươi kươt smlaang, đươm bu 'bưn geh kah 'bun smlaang aan 'bei kươt; tơt nar bnih sêch song rêh kươi, 'bei a kươi kươt soong 'bun smlaang.”

Pn'geh teq u waal sa ttih

(Ma-thi-ơ 22:1-10)

15Mbu bnih gôq pôl bliêng n'hai Brah Jê-sus ttang pal ntil au, nei mor n'hai Pang: “Smlaang aan bnih êch kươt sa nom knông nggoor Brah Ưn!” 16Dôh Pang ơh: “Geh di mbu riêp sa tih, siêr ơk bnih han sa. 17Tơt bêl sa, bu maanh dêch han lah n'hai bơl bnih kươt siêr laah: ‘Phrui han, ơp ntil ja riêp leq hơơi.’ 18Dôh jôm bôôk kot dan ch'bap 'bưn han. Bnih daak bôôk lah: ‘Hei geh pook di tup pưng srei, a yơơt han mơq. Hei dan ch'bap 'bưn han.’ 19Bnih nday lah: ‘Hei pook pram ndrôp gôw a yơơt han mơq. Hei dan ch'bap 'bưn han.’ 20Bnih nday dơq lah: ‘Hei mhei kliêr sai, nei mơ, hei 'bưn geh han kươt.’ 21Dêch plơq siq tơmbơh kaar nei aan nnơơm nơơm bu. Nnơơm hao nuih, maanh dêch: ‘Phrui han gway teq a gaaih troong đôôn u pal troong ryeh knông poh nei liêu bơl bnih pngot l'ơơi, khuynh, tiah u chook trei mưt u đau.’ 22Dêch kươi mor: ‘Ơi nnơơm, ntil nnơơm kne, hei ja lơh hơơi, dôh nha ơơm rhơi ktôk.’ 23Nnơơm nhi kươi maanh dêch: ‘Phrui sot a gaaih troong u han rgoq pndaai bôôk siêr bu nday mưt aan bêêng nhi hei. 24Đươm hei lah bơl 'bei, knông bơl bnih ja kươt siêr bôôk daak nei, a kươi 'bưn geh di mbu 'bơơn kươt liêp griêng sa hei ri.’”

Ntil phrui geh lơh jơrnơ Brah Jê-sus

(Ma-thi-ơ 10:37,38)

25Geh phung raih ơk han pôl n'hai Brah Jê-sus; Pang wih kươi lah n'hai bu: 26“Mơq 'bơơn lôh tênh Hei baah 'bưn kiêr mei bươp, koon sai, oh bi, mei ruh nơơm bơn, u đươm baak rêh bơn nha nei 'bưn geh lơh jơrnơ Hei.#Mat 10:37. 27'Bơơn 'bưn tung chhư rglaang nơơm baah tênh Hei, kot 'bưn kươt lơh jơrnơ Hei ơơm.#Mat 10:38; 16:24; Mak 8:34; Lu 9:23.

28'Bơơn knông bơl 'bei êch sun di naam prêh baah noor leq 'bưn gôq kơrnơp wait jah gưt nơơm bơn na geh sơp prak lơh luôih bu pan? 29Mơq 'bưn, tơt ja sun pndơih hơơi baah khah 'bưn lơh luôih kươt nei jôm bnih sau, a kươi gươm sơch 30u mor laah: ‘Bnih au lap kaar sun moon khah 'bưn geh lơh sơp kươt!’ 31Paich laa geh snđach êch ta lơh n'hai snđach nday, baah noor leq 'bưn gôq u teh pơrgênh mơq nơơm bu liêu jmơt ban lênh awap twal moh snđach tôw teq u baar jơt ban lênh pan? 32Mơq 'bưn moh twal, tơt snđach tôw nha a ngngai nei bu maanh ndraanh han dan kơrkham. 33Bei nei, mơq 'bơơn knông bơl 'bei 'bưn teq jôm baak nơơm geh, nei 'bưn geh lơh kươt jơrnơ Hei.

34Boh ơơm laa klanh, dôh mơq boh saap ttiat nei lơh bei êch ttiat kươi kươt? 35Boh nei 'bưn kươt nhôq jah brơh pưng srei paich wat phơng, bu nday phrui jang teq u gaaih. 'Bơơn geh tôr jah iat, phrui iat chmlam!”

Currently Selected:

Lu-ka 14: SBL2024

Highlight

Copy