Jang 19

Rwach Phi-lat ri

1Bei au, Phi-lat aan liêu Brah Jê-sus baah pơm sơmboong. 2Bơl lênh taanh di mlơm môôk look, dook lơ bôôk Pang, u dook aan Pang di plơơp ao pơrhei. 3Bu lôh dơơh Pang u mor: “Smbah snđach raih Jo-thai!” Ja nei bu taap pi mat Pang.

4Phi-lat plơq sot di wưt dơq u mor n'hai bơl raih: “Au rê, hei liêu bu nei sot a gaaih aan bơl 'bei, jah bơl 'bei gưt hei 'bưn wơng sau bu nei geh dôih ơơn laang.” 5Bei nei, Brah Jê-sus han sot, bôôk ndau đuôn look, chhak dook ao pơrhei. Phi-lat mor n'hai bu: “Phrui mơq bnih au.” 6Dôh tơt bơl yau thwaai ndap ttơơm u bơl dêch drêên sau Pang nei troh: “Pơng đênh bu lơ tơơm chhư rglaang! Pơng đênh bu lơ tơơm chhư rglaang!” Phi-lat maanh bu: “Bơl 'bei phrui liêu êêng bu nei ơơi baah pơng đênh, đươm hei 'bưn wơng sau bu nei geh dôih ơơn laang.” 7Bơl bnih Jo-thai ơh: “Bơl hei geh ch'bap, lơh tênh ch'bap nei bu phrui chhưt, đươm bu sơm nơơm laa Koon Brah Ưn.”

8Tơt ttang baak au, Phi-lat n'hông dươn nha. 9Bu leet plơq mưt u nhi u mor teq u Brah Jê-sus laah: “'Bei lôh a êch?” Dôh Brah Jê-sus 'bưn ơh. 10Bei nei, Phi-lat mor n'hai Pang: “'Bei 'bưn mor ơơn n'hai hei laang? 'Bei 'bưn gưt laah hei geh ch'bap krôih, kot geh ch'bap pơng đênh 'bei laang?” 11Brah Jê-sus ơh: “Mơq 'bưn geh a trôôk ươn aan nei 'bei 'bưn geh ch'bap ơơn lơ Hei; nei mơ, bah ndơơp Hei aan 'bei dôih nha jjơk huôih.” 12A nei, Phi-lat wơng troong krôih Pang, dôh bơl bnih Jo-thai hao troh: “Mơq kan ttih krôih bnih au nei kan ttih 'bưn geh laa dêch spong Sê-sa ri, đươm paich 'bơơn sơm nơơm laa snđach kot laa bah wal kơơi Sê-sa.”

13Tơt Phi-lat ttang pal baak au nei liêu Brah Jê-sus sot, ja nei gôq teq u ktôk pơrkat, tu ktôk chôôl laa Ktôk Klêt Tmau, baak Hê-bơ-rơ chôôl laa Ga-ba-tha. 14Khal au laa nar Riêp aan ryơơng Chloong Rlach, laap tơmlai nggơl nar tam. Phi-lat mor n'hai pal bnih Jo-thai laah: “Au laa snđach bơl 'bei ri!” 15Bu troh grơơw: “Phrui teq bu ơơi, teq bu ơơi! Pơng đênh bu lơ tơơm chhư rglaang!” Phi-lat lah: “Hei a kươi pơng đênh snđach bơl 'bei lơ tơơm chhư rglaang laang?” Bơl yau thwaai ndap ttơơm ơh: “Bơl hei 'bưn geh snđach nday êêng, dơơn Sê-sa.” 16Phi-lat ndơơp Brah Jê-sus aan bu jah liêu han pơng đênh lơ chhư rglaang.

Bei nei bu têêk Brah Jê-sus han.

Brah Jê-sus dol pơng lơ chhư rglaang

(Ma-thi-ơ 27:32-44; Mak 15:21-32; Lu-ka 23:26-43)

17Brah Jê-sus tung chhư rglaang han tơt di ktôk chôôl laa Bnơm Tting bôôk, tênh baak Hê-bơ-rơ chôôl laa Gô-gô-tha. 18Tu nei, bu pơng đênh Pang. Geh baar du nday kot dol pơng đênh n'hai Pang, di đah mbu bnih, nha Brah Jê-sus a klung. 19Phi-lat kot maanh 'bian di plơơp kơđaar u yôông lơ chhư rglaang. Lơ plơơp kơđaar geh 'bian laah: “JÊ-SUS BNIH NA-SA-RET, SNĐACH RAIH JO-THAI.” 20Đươm ktôk Brah Jê-sus dol pơng đênh gôq dơơh poh, u plơơp kơđaar kươt 'bian dơng baak Hê-bơ-rơ, La-tinh u Hi-lap, mơ geh ơk bnih Jo-thai chôôl. 21Bơl yau thwaai ndap ttơơm bnih Jo-thai ri mor n'hai Phi-lat: “Dan khơơm 'bian: ‘Snđach raih Jo-thai,’ dôh phrui 'bian: ‘Bnih au mor: Hei laa snđach raih Jo-thai.’” 22Phi-lat ơh: “Ntil Hei ja 'bian nei hei ja 'bian hơơi.”

23Tơt ja pơng đênh Brah Jê-sus teq u chhư rglaang hơơi, pal bnih lênh pơih khôw ao Pang ri cheq lơh puôn bôh, di mbu di bôh. Bu kot pơih ao nhjoong Pang ri, dôh ao nhjoong au laa di plơơp knat taanh a trôôk tơt teh, 'bưn geh troong jinh. 24Bei nei, bu ta maanh: “Ap a chhêêk, dôh phrui pool mơq 'bơơn kươt.” Bei nei, ntil au lơh dip plak baak Sm'bưt Brah:

“Bu ta cheq khôw ao Hei ri,

Pool jah pơih ao nhjoong Hei.”

Nei laa kaar bơl lênh ja lơh. 25Ta yoong dơơh chhư rglaang Brah Jê-sus ri geh mei Pang, bi nur mei Pang ri, n'hai Ma-ri sai Kơ-lê-ô-pa u Ma-ri Ma-đơ-len. 26Brah Jê-sus sau mei Pang u jơrnơ Pang srlanh plah ta yoong dơơh nei mor n'hai mei laah: “Ơi mei, nei laa koon ay ri!” 27Ja nei Pang mor n'hai jơrnơ nei: “Au laa mei 'bei ri!” Put bêl nei, jơrnơ au liêu mei siq nhi bơn.

28Ja nei, Brah Jê-sus gưt jôm kaar ja lơh sơp, u jah aan baak Sm'bưt Brah kươt dip plak nei mor: “Hei nh'hiêr.” 29Tu nei, geh di mlơm koq dơơm bêêng daak sraat mơ bu pơih di ndêq kao blaang tơyuk bêêng daak sraat, kơt teq u bling tơơm ndêh, ja nei ndơơp tơt wiêm Brah Jê-sus. 30Tơt ja ôn daak sraat, Brah Jê-sus lah: “Jôm kaar ja lơh sơp!” Ja nei Pang lngek bôôk u teh, kơsot wêêng yaang.

31Nar nei laa nar Riêp, mơ pal bnih Jo-thai n'hông pal kmôôch chhưt nha ơơm dol yôông lơ chhư rglaang knông nar sa-'bat, đươm nar sa-'bat au peh thlay đat. Đươm nei, bu rơ maanh Phi-lat aan pơm a pak tting jjơng pal bnih nei, u kưn jưr u teh. 32Bei nei, pal bnih lênh han tơt nei pơm a pak tting jjơng bnih daak bôôk ri, ja nei tơt bnih tôw, laa bnih pơng đênh pôl n'hai Pang. 33Dôh jơl tơt ktôk Brah Jê-sus, bu sau Pang chhưt 'bat hơơi, mơ 'bưn pơm pak tting jjơng Pang. 34Dôh geh mbu lênh pơih taak tap tal rpaih Pang, mhaam u daak hoor kơndaal. 35Bnih ja sau lơh ndraanh teq u kaar au — baak ndraanh bu ri laa a ngan, u bnih nei gưt nơơm nha mor a ngan — jah oh bi kot jơ.#19:35 jơ: Knông m'baak plơơp 'bian ti laa jơ ndih. 36Pal ntil au lôh tơt jah kươt dip plak baak Sm'bưt Brah: “'Bưn di mlơm tting Pang ri a kươi dol a pak.” 37U top di baak Sm'bưt Brah nday: “Bu a kươi mơq sau bnih bơn ja tap.”

Baak rôôp tơơp Brah Jê-sus

(Ma-thi-ơ 27:57-61; Mak 15:42-47; Lu-ka 23:50-56)

38Ja nei, Jô-sep bnih A-ri-ma-thê, mbu jơrnơ a ruk tênh Brah Jê-sus đươm n'hông bnih Jo-thai, dan Phi-lat aan pơih kmôôch Brah Jê-sus ri. Phi-lat aan ch'bap. Bei nei, bu tơt u pơih kmôôch Pang ri. 39Ni-kô-đem, bnih noor n'au ja lôh n'hai Brah Jê-sus knông mang, kot lôh, liêu pôl di riêng rweh kơrya tang wat n'hai nha đaam.#Ja 3:1-2. 40Bu pơih kmôôch Brah Jê-sus ri u nhôq knat look n'hai kơrya chhơm jah nhop kơơi tênh baak khal ndơm bnih Jo-thai ri rnđơơih lơh. 41Tu ktôk Brah Jê-sus dol pơng đênh geh di tuup mir, u knông tuup mir nei geh di rhuung kmôôch mhei, ndah rôôp 'bơơn. 42Đươm nar nei laa nar bnih Jo-thai Riêp, u rhuung kmôôch nei gôq dơơh, mơ bu rôôp Brah Jê-sus tu nei.

Currently Selected:

Jang 19: SBL2024

Highlight

Copy