Kênh Kaar 8

Sau-lơ nhôp kơt Phung Jrah

1Sau-lơ rgoh teq u kaar Ê-tiên dol lưm. Knông nar nei, Phung Jrah a Jê-ru-sa-lem a chuôp baak nhôp kơt bơm yoh; dơơn bơl jơt jơng, leq sêch jơrnơ kot dol tơrlêêng knông pal kwaal Ju-đê u Sa-ma-ri. 2Bơl bnih jơ đing rôôp tơơp Ê-tiên u nhim ngliêng bu ơk đat. 3Dôh Sau-lơ lơh ap Phung Jrah, raan mưt jum nhi nhôp leq di klau dang dơur teq u khaam.#Kênh 22:4-5; 26:9-11.

Baak Sroong Klanh kươt chhuôr a Sa-ma-ri. – Trong pol Si-môn

4Bei nei, bơl bnih dol tơrlêêng han a ktôk au tơt ktôk nday tơmbơh chhuôr Baak Sroong Klanh. 5Phi-lip han jưr poh Sa-ma-ri chhuôr Yaang Krist aan phung raih a nei. 6Phung raih iat bu chhuôr u sau pal chmlih chmleek bu lơh nei chưt mlơm chmlam iat bu; 7đươm geh pal wêêng 'bưn jrah khuôl m'ơh baak baah sot rlach ơk bnih dol rup; ơk bnih awiêl u chook kot kươt tơmbah. 8Nei mơ, knông poh bêêng bơm broh s'bai.

9Khal au, knông poh nei geh di mbu chhak Si-môn, noor n'au bơ kaar r'bian ap, aan êêng nơơm laa bnih ttih đat, lơh aan raih Sa-ma-ri êêng aang. 10Jôm bnih a drêên tơt raanh kot iat baak bu, mor laah: “Bnih au laa dang kmheng Brah Ưn ri, khuôl laa R'bon R'bian.” 11Bơl nei iat baak bu đươm n'au 'bau bu nei pơih r'bian ap lơh aan bu êêng aang. 12Dôh tơt bu ja jơ Phi-lip, bnih chhuôr Baak Sroong Klanh teq u nggoor Brah Ưn u saak Brah Jê-sus Krist aan bu, nei leq klau dang dơur kot pơih bap-tem. 13Nơơm Si-môn kot jơ; di kươi pơih bap-tem, bu gôq broih n'hai Phi-lip. Sau pal chmlih chmleek u baak êng aang ttih kươt lơh tênh, bu êêng aang đat.

14Bơl jơt jơng a Jê-ru-sa-lem ttang baak phung raih Sa-ma-ri ja chơp wơơt baak jơ Brah Ưn maanh drơh Phi-e-rơ u Jang lôh u bu. 15Baar du tơt ktôk, r'bon dan aan bơl bnih au jah bu dơơp pơih Brah Wêêng. 16Đươm Brah Wêêng ndah jưr lơ 'bơơn ơơm, bu dơơn tơmoh chhak Brah laa Brah Jê-sus pơih bap-tem ei. 17Phi-e-rơ u Jang dơih ti lơ bu, bu dơơp pơih drơh Brah Wêêng. 18Tơt sau bơl jơt jơng dơih ti nei Brah Wêêng kươt ươn jưr, Si-môn pơih prak kaih piyơ drơh aan baar jơt jơng, u mor: 19“Dan kot aan hei ch'bap kmheng nei, jah hei dơih ti lơ 'bơơn nei bnih nei dơơp pơih Brah Wêêng.” 20Dôh Phi-e-rơ ơh baak laah: “Prak kaih bi ri kot saap luôch n'hai bi, đươm kơn ơơn awap pơih prak kaih pook kươt baak ươn Brah Ưn ri! 21Bi 'bưn kươt joq dơơn paich ta toon knông kaar au laang, đươm chưt bi 'bưn song chưt di mat Brah Ưn. 22Bei nei, phrui teq lơi dôih kaar ap bi ri u r'bon dan n'hai Brah, jah sroong ơq Pang a kươi ta krôih gơrninh nei knông chưt bi. 23Đươm hei sau bi nha gôq knông klơơm mat tang u knông kơt kkôn dôih ap.” 24Si-môn ơh: “Dan phrui r'bon Brah aan hei, jah hei 'bưn ayơơt ntil bơl ay lah nei.”

25Di kươi ja lơh ndraanh u chhuôr baak jơ Brah, Phi-e-rơ u Jang plơq siq Jê-ru-sa-lem, đah han đah tơmbơh chhuôr Baak Sroong Klanh knông poh dêq bnih Sa-ma-ri ri.

Tông kriêu Ê-thi-ô-pi plơq kươi baak jơ.

26Khal au, geh di mbu lênh Brah ri lah n'hai Phi-lip: “Phrui ta yoong han teq u mak ma nar nhơp,#8:26 han teq u mak ma nar nhơp: Paich laa han mưt klung nar tam. tênh troong a Jê-ru-sa-lem jưr Ga-sa. Troong nei sngat.” 27Bu ta yoong u han. Tôw, geh di mbu tông kriêu Ê-thi-ô-pi, lơh kơrnan ttih Kan-đak ri, dơur snđach nggoor Ê-thi-ô-pi, kan krai leq nơm griêng yau ur snđach ri. Bu ja lôh Jê-ru-sa-lem jah tư wơơl; 28u tơt plơq siq, gôq lơ rdeh seh, chôôl sm'bưt grnưt noor Ê-sai. 29Brah Wêêng lah n'hai Phi-lip: “Phrui han dơơh u tênh baan rdeh nei.” 30Phi-lip ta prang tơt, iat bu nei plah chôôl sm'bưt grnưt noor Ê-sai nei mor laah: “Bu gưt baak nơơm plah chôôl nei 'bưn?” 31Tông kriêu ơh baak: “Mơq 'bưn geh 'bơơn liêu troong, lơh 'bei êch hei gưt kươt?” Ja nei bu siêr Phi-lip hao rdeh gôq n'hai nơơm. 32Tap Sm'bưt Brah bu plah chôôl bei au:

“Bnih ja dol têêk han bei bưr lôh pơsaar jah lơh pai,

Bei koon bưr ơt rngơt di mat bah grach snook, Bnih 'bưn dơơn pơơk wiêm.

33Jơl knông Bnih dol đam điêl, song klanh ja dol hin kươt.

'Bơơn awap mor tơt mbaang Bnih?

Đươm baak rêh Bnih ja dol prap rlach steh hơơi.”

34Tông kriêu mor n'hai Phi-lip: “Dan ôp bu, grnưt noor ja mor baak au jah chong teq u 'bơơn? Teq u nơơm bơn na lah teq u bnih nday?” 35Phi-lip pơơk wiêm drơh, lap a ktôk Sm'bưt Brah nei baah chhuôr Baak Sroong Klanh teq u Brah Jê-sus aan bu. 36Tơt baar du plah han, a mơp ktôk geh daak, tông kriêu mor: “Au, daak au, geh ntil ơơn pơrkhaang hei pơih bap-tem pan?” 37[Phi-lip mor: “Mơq bu leq chưt jơ, ntil nei awap kươt.” Tông kriêu ơh: “Hei jơ Brah Jê-sus Krist laa Koon Brah Ưn.”]#8:37 Knông m'baak plơơp 'bian ti 'bưn geh ndroong 37. 38Bu maanh srung rdeh lơơi, ja nei leq baar du kot jưr u daak, u Phi-lip lơh bap-tem aan tông kriêu. 39Tơt hao rlach daak, Brah Wêêng Brah ri liêu Phi-lip han; tông kriêu 'bưn sau bu hôm, u khang broh s'bai ndih rơn han. 40Bnih nday sau Phi-lip a poh A-sôt; lơ troong han tơt Sê-sa-rê, bu chhuôr Baak Sroong Klanh aan leq sêch pal poh nơơm ja yeh rloot.

Currently Selected:

Kênh Kaar 8: SBL2024

Highlight

Copy