Kênh Kaar 7
7
Baak chhuôr Ê-tiên ri
1Yau thwaai ttơơm ôp Ê-tiên: “Geh dip bei nei 'bưn?” 2Ê-tiên ơh: “Ơi bơl bi, bơl bươp, dan phrui iat hei mor! Brah Ưn chring chraang ja lôh sot n'hai yau yi bơl bơn laa Ap-ra-ham khal bu nha gôq tu Mê-sô-pô-ta-mi, di mat gôq rêh ơơm tu Cha-ran, 3u lah laah: ‘Phrui sot rlach ktôk lgơơch u phung mbaang koon ri baah han tơt kwaal teh Hei a kươi chong aan.’ 4Bei nei, bu sot rlach kwaal Kanh-đê u gôq rêh ơơm tu Cha-ran. Di kươi bươp bu leq n'hơm, Brah Ưn tak lơh bu ntưr a ktôk nei rlach kwaal pa bơl g'bei au na a au. 5Pang 'bưn ươn bu griêng mlơ ơơn knông kwaal au, paich di chn'am steh luum paang jơng kot 'bưn, dôh Pang pơn aan bu u mbaang bu piit hin kwaal steh au, paich khal au bu ndah geh koon. 6Brah Ưn aan gưt laah mbaang bu a kươi laa raih daak agaih ktôk steh bnach, bu nday a kươi nhôp bu lơh koon dêch u pơm pnđeh peh pnđơơt bu knông puôn riêng snam. 7Brah Ưn lah: ‘Dôh Hei a kươi pơrkat raih bal ja nhôp bu lơh koon dêch; ja nei, bu a kươi sot rlach u tư wơơl Hei tu ktôk au.’ 8Brah Ưn ươn bu pơrnơn rlach ryơơng kat pêêk. Bei nei, tơt Ap-ra-ham ja lgơơch mlơm koon klau laa I-sak nei kat pêêk aan koon knông nar ttal phaam. I-sak kat pêêk aan Ja-kôp u Ja-kôp kot lơh bei nei aan jmơt baar yau yi.
9Bơl yau yi skiêr u Jô-sep, mơ tach bu teq u Ai-kap; dôh Brah Ưn gôq pôl n'hai bu. 10Pang đoh jraih bu rlach jôm r'baak, ươn bu brêêng smlaang u baak jhai rpech bôôk mat Pha-ra-ôn, snđach Ai-kap; snđach ptop bu lơh bnih liêu troong Ai-kap u leq mbaang snđach. 11Khal au, geh jơl pngot nh'hit lôh tơt knông leq nggoor Ai-kap u Ka-na-an, laa di r'baak ttih tak lơh aan bơl yau yi bơl bơn ri 'bưn wơng kươt griêng sa. 12Tơt Ja-kôp ttang a Ai-kap geh ba, bu maanh bơl yau yi bơl bơn han u nei wưt daak bôôk. 13Lôh wưt baar, Jô-sep mhei tơrsau oh bi gưt teq u nơơm; đươm nei, Pha-ra-ôn kot gưt nhi nak Jô-sep nha. 14Jô-sep maanh wơơt Ja-kôp laa bươp nơơm u leq di nhi, dang leq laa poh jơt pram du. 15Bei nei, Ja-kôp jưr Ai-kap ja nei chhưt tu nei, bơl raanh puich bơl bơn kot bei nei; 16tting tau bu kươt liêu siq Si-chem, u rôôp knông kmôôch pa Ap-ra-ham ja teq prak pook bơl koon klau Hê-mô a Si-chem ri.
17Tơt êch dơơh jơrnơl Brah Ưn lơh dip plak baak pơn n'hai Ap-ra-ham, raih bal bơl bơn ri a Ai-kap ndih rơq ơk huôih, 18aan tơt jơl geh mbu snđach nday hao ngguôl kan bôôk Ai-kap u 'bưn gưt tơt Jô-sep. 19Snđach au jmlôm ap koon chhau bơl bơn u pnđeh pnđơơt bơl yau yi bơl bơn, chhôq bôôk bu phrui jang teq bơl koon ksei, 'bưn aan bu rêh. 20Laap tơt jơl nei, Môi-se lgơơch, rom klanh ngech jhai di mat Brah Ưn u kươt siêm tu nhi nơơm knông pei khay. 21Tơt Môi-se dol liêu han teq nei kươt koon ur Pha-ra-ôn pơih lơh koon u siêm chiêm bei koon sơng nơơm. 22Môi-se kươt riên leq sêch baak jhai rpech bnih Ai-kap ri; bu geh kmlang knông leq baak mor dang kaar lơh.
23Plah kươt puôn jơt snam, bu ksot rnđêch han nhjook bơl oh bi nơơm laa koon sau I-sra-ên ri. 24Tơt sau di mbu knông bu dol gôq dơq bn'ap, Môi-se koh roong drơh bnih dol jaq lơn klơn bôôk u pơm chhưt bnih Ai-kap nei jah ta taang. 25Bu kơn ơơn oh bi nơơm gưt laah Brah Ưn nhôq ti nơơm đoh jraih bu, dôh bu 'bưn gưt. 26Nar a ôi, tơt bu plah ta pơm tơrnang nơơm nei bu lôh dơơh u ta krôih: ‘Au bơl bi, ja laa oh bi, a hay leet gôq rêh jrơơk tơrnang nơơm bei au?’ 27Bah nha jaq lơn kơh bôôk bnih a gêêng nơơm thoom Môi-se sot u mor: ‘'Bơơn ja ldơk bi lơh bnih kan bôôk u lơh yau pơrkat bơl hei ri? 28Bi kot êch lưm hei bei ja lưm bah Ai-kap nar bnau neh?’ 29Môi-se mhei ttang baak nei tuôt kup u lôh gôq knông kwaal Ma-đi-an. A nei, bu lgơơch kươt baar koon klau.
30Puôn jơt snam kươi, di lênh brah lôh sot n'hai bu knông bôl ôinh ktôk pih look plah sơơr tu trenh sngat bnơm Si-na-i. 31Môi-se sau u êêng aang di mat jat ap êêng nei mơ kơrnan kươi dơơh jah mơq aan srlah huôih nei bu iat baak Brah lah: 32‘Hei laa Brah Ưn yau yi koon ri, Brah Ưn Ap-ra-ham ri, I-sak u Ja-kôp ri.’ Môi-se n'hông n'hing, 'bưn baanh mơq. 33Brah kươi lah: ‘Phrui doh sroom rlach jơng koon đươm ktôk koon plah ta yoong laa steh jrah. 34Hei ja sau srlah jat kro rngiêl raih Hei ri tu Ai-kap u ja iat baak chhôôih bu ri mơ jưr đoh jraih bu. Bei au phrui lôh, Hei a kươi maanh koon lôh Ai-kap.’ 35Nơơm Môi-se au laa bnih bơl bu ja dmôw u mor: ‘'Bơơn ja ldơk bu lơh bnih kan bôôk n'hai yau pơrkat?’, nei au Brah Ưn ja maanh bu lơh bnih liêu troong n'hai nơơm đoh yôôi đươm mbu lênh brah ja lôh sot n'hai bu knông pih look. 36Bu ja liêu bu sot, lơh pal chmlih chmleek, baak êêng aang knông kwaal Ai-kap, lơ Daak Rmưt Pơrhei, u ktôk trenh sngat knông puôn jơt snam. 37Đươm Môi-se au ja mor n'hai koon raih I-sra-ên: ‘Brah Ưn a kươi kn'hao knông rlum raih bal bơl oh bi mbu grnưt noor bei hei.#7:37 bei hei: Paich laabei Pang ja pơrgah hei hao.’ 38Đươm bu laa bnih ja gôq klung phung bơl nei tu ktôk trenh sngat pôl n'hai teq u lênh brah, yaang lah n'hai bu lơ bnơm Si-na-i n'hai bơl yau yi bơl bơn; n'hai bu kot dơơp pơih pal baak rêh jah ndơơp kươi aan bơl bơn. 39Dôh bơl yau yi bơl bơn 'bưn sang iat baak bu, lhiat bu sot u r'bong chưt nơơm teq u Ai-kap. 40Bu maanh A-rôn: ‘Dan phrui lơh bơl wêêng yaang han noor bơl hei đươm teq u đah Môi-se laa bnih ja liêu bơl bơn sot rlach Ai-kap, bơl hei 'bưn gưt ntil ơơn ja lôh tơt aan bu nei hơơi.’ 41Knông pal nar nei, bu mon mlơm spun gôw koon, piyơ thwaai aan pi spun nei u broh s'bai teq u kaar đươm ti nơơm lơh. 42Đươm nei, Brah Ưn ja nggưl mat n'hai bu u ndơơp dook bu smbah pal lênh trôôk a lơ trôôk,#7:42 Asn: rhông rhaang lơ trôôk. bei geh 'bian knông pal sm'bưt grnưt noor laah:
‘Ơi nhi I-sra-ên, geh lah bơl 'bei ja piyơ pai thwaai n'hai griêng mlơ aan Hei
Knông puôn jơt snam gôq ktôk trenh sngat 'bưn?
43Nei baah bơl 'bei kươi krôông krêêng spun wêêng Mo-lok ri,
U smanh wêêng Rom-phan ri,
Nei laa bơl pi spun baah bơl 'bei lơh sot jah chuh.
Đươm bei nei, Hei a kươi kot nhrơm bơl 'bei rlach mak tôw Ba-bi-lôn.’
44Yau yi bơl bơn ja geh Naam Ndraanh Pơrnơn knông trenh sngat, bei Brah ja maanh aan Môi-se phrui lơh dip tênh spêêr baah bu ja sau. 45Yau yi bơl bơn ja dơơp pơih nhi r'bưn ttưr nei u pôl n'hai Jô-suê liêu bu mưt kwaal bu ja piit pơih pal raih ri baah Brah Ưn ja prơh rlach bu. Nhi r'bưn ttưr nei nh'ơơm aan tơt klap Đa-wit, 46bnih kươt 'bun di mat Brah Ưn, u bu dan wơng di ktôk gôq aan Brah Ưn Ja-kôp ri.#7:46 Brah Ưn Ja-kôp ri. Knông m'baak pai 'bian ti laa nhi Ja-kôp ri. 47Kơi nei, snđach Sa-lô-môn sun aan Brah di mlơm nhi. 48Dôh Yaang Prêh Huôih 'bưn gôq knông nhi đươm ti bu nday lơh, bei grnưt noor ja mor:
49‘Brah lah: Trôôk lah gơrnôq Hei,
U steh laa knơơl jơng Hei.
Nhi êch bơl 'bei a kươi ldơk aan Hei,
Ktôk êch laa ktôk aan Hei rlu rlơk?
50'Bưn geh ti Hei ja tơmbut jôm griêng au laang?’
51Ơi bơl bnih kraam kôw, chưt u tôr ndah kươt kat pêêk tôw! Bơl g'bei ta wal kươi Brah Wêêng nggan. Yau yi bơl g'bei bei êch nei bơl g'bei kot bei nei! 52Geh grnưt noor êch baah yau yi bơl g'bei 'bưn nhôp kơt? Bu nha lưm bơl bnih mor grnưt noor teq u baak lôh tơt Yaang ri Sêch Song, laa Yaang baah bei au bơl g'bei ja ndun kơrlap u lưm teq. 53Bơl g'bei ja pơih ch'bap tơmbơh đươm bơl lênh brah, dôh kươi 'bưn prap ơn ch'bap nei!”
Ê-tiên chhưt đươm baak jơ
54Bu iat pal baak nei hao nuih knông chưt u kap chhêk n'hai Ê-tiên. 55Dôh Ê-tiên, kươt bêêng 'bơm Brah Wêêng, mơq ndưng hao trôôk, sau chring chraang Brah Ưn ri u Brah Jê-sus ta yoong mak ma Brah Ưn. 56Bu mor: “Tôw, hei sau pal lơyaang trôôk a pơơk u Koon Bnih ta yoong mak ma Brah Ưn.” 57Khal au, bu troh ttih, kơl bach tôr u ta pôl loh mưt nhôp Ê-tiên 58têêk sot a gaaih poh, ja nei jang tmau bu. Bơl bnih ndraanh pơih ao khôw nơơm dơih ktôk jơng di mbu dơlu chhak laa Sau-lơ. 59Tơt bu plah jang tmau nei Ê-tiên r'bon dan laah: “Smbah Brah laa Brah Jê-sus, dan wơơt pơih wêêng yaang koon.” 60Ja nei bu kơltut u teh, khuôl ttih: “Brah ơi, dan khơơm kaap dôih au aan bu!” Mhei dưt baak nei bu bêch.
Currently Selected:
Kênh Kaar 7: SBL2024
Highlight
Share
Copy
Want to have your highlights saved across all your devices? Sign up or sign in
© 2024 Bible Society Vietnam. All rights reserved.
Kênh Kaar 7
7
Baak chhuôr Ê-tiên ri
1Yau thwaai ttơơm ôp Ê-tiên: “Geh dip bei nei 'bưn?” 2Ê-tiên ơh: “Ơi bơl bi, bơl bươp, dan phrui iat hei mor! Brah Ưn chring chraang ja lôh sot n'hai yau yi bơl bơn laa Ap-ra-ham khal bu nha gôq tu Mê-sô-pô-ta-mi, di mat gôq rêh ơơm tu Cha-ran, 3u lah laah: ‘Phrui sot rlach ktôk lgơơch u phung mbaang koon ri baah han tơt kwaal teh Hei a kươi chong aan.’ 4Bei nei, bu sot rlach kwaal Kanh-đê u gôq rêh ơơm tu Cha-ran. Di kươi bươp bu leq n'hơm, Brah Ưn tak lơh bu ntưr a ktôk nei rlach kwaal pa bơl g'bei au na a au. 5Pang 'bưn ươn bu griêng mlơ ơơn knông kwaal au, paich di chn'am steh luum paang jơng kot 'bưn, dôh Pang pơn aan bu u mbaang bu piit hin kwaal steh au, paich khal au bu ndah geh koon. 6Brah Ưn aan gưt laah mbaang bu a kươi laa raih daak agaih ktôk steh bnach, bu nday a kươi nhôp bu lơh koon dêch u pơm pnđeh peh pnđơơt bu knông puôn riêng snam. 7Brah Ưn lah: ‘Dôh Hei a kươi pơrkat raih bal ja nhôp bu lơh koon dêch; ja nei, bu a kươi sot rlach u tư wơơl Hei tu ktôk au.’ 8Brah Ưn ươn bu pơrnơn rlach ryơơng kat pêêk. Bei nei, tơt Ap-ra-ham ja lgơơch mlơm koon klau laa I-sak nei kat pêêk aan koon knông nar ttal phaam. I-sak kat pêêk aan Ja-kôp u Ja-kôp kot lơh bei nei aan jmơt baar yau yi.
9Bơl yau yi skiêr u Jô-sep, mơ tach bu teq u Ai-kap; dôh Brah Ưn gôq pôl n'hai bu. 10Pang đoh jraih bu rlach jôm r'baak, ươn bu brêêng smlaang u baak jhai rpech bôôk mat Pha-ra-ôn, snđach Ai-kap; snđach ptop bu lơh bnih liêu troong Ai-kap u leq mbaang snđach. 11Khal au, geh jơl pngot nh'hit lôh tơt knông leq nggoor Ai-kap u Ka-na-an, laa di r'baak ttih tak lơh aan bơl yau yi bơl bơn ri 'bưn wơng kươt griêng sa. 12Tơt Ja-kôp ttang a Ai-kap geh ba, bu maanh bơl yau yi bơl bơn han u nei wưt daak bôôk. 13Lôh wưt baar, Jô-sep mhei tơrsau oh bi gưt teq u nơơm; đươm nei, Pha-ra-ôn kot gưt nhi nak Jô-sep nha. 14Jô-sep maanh wơơt Ja-kôp laa bươp nơơm u leq di nhi, dang leq laa poh jơt pram du. 15Bei nei, Ja-kôp jưr Ai-kap ja nei chhưt tu nei, bơl raanh puich bơl bơn kot bei nei; 16tting tau bu kươt liêu siq Si-chem, u rôôp knông kmôôch pa Ap-ra-ham ja teq prak pook bơl koon klau Hê-mô a Si-chem ri.
17Tơt êch dơơh jơrnơl Brah Ưn lơh dip plak baak pơn n'hai Ap-ra-ham, raih bal bơl bơn ri a Ai-kap ndih rơq ơk huôih, 18aan tơt jơl geh mbu snđach nday hao ngguôl kan bôôk Ai-kap u 'bưn gưt tơt Jô-sep. 19Snđach au jmlôm ap koon chhau bơl bơn u pnđeh pnđơơt bơl yau yi bơl bơn, chhôq bôôk bu phrui jang teq bơl koon ksei, 'bưn aan bu rêh. 20Laap tơt jơl nei, Môi-se lgơơch, rom klanh ngech jhai di mat Brah Ưn u kươt siêm tu nhi nơơm knông pei khay. 21Tơt Môi-se dol liêu han teq nei kươt koon ur Pha-ra-ôn pơih lơh koon u siêm chiêm bei koon sơng nơơm. 22Môi-se kươt riên leq sêch baak jhai rpech bnih Ai-kap ri; bu geh kmlang knông leq baak mor dang kaar lơh.
23Plah kươt puôn jơt snam, bu ksot rnđêch han nhjook bơl oh bi nơơm laa koon sau I-sra-ên ri. 24Tơt sau di mbu knông bu dol gôq dơq bn'ap, Môi-se koh roong drơh bnih dol jaq lơn klơn bôôk u pơm chhưt bnih Ai-kap nei jah ta taang. 25Bu kơn ơơn oh bi nơơm gưt laah Brah Ưn nhôq ti nơơm đoh jraih bu, dôh bu 'bưn gưt. 26Nar a ôi, tơt bu plah ta pơm tơrnang nơơm nei bu lôh dơơh u ta krôih: ‘Au bơl bi, ja laa oh bi, a hay leet gôq rêh jrơơk tơrnang nơơm bei au?’ 27Bah nha jaq lơn kơh bôôk bnih a gêêng nơơm thoom Môi-se sot u mor: ‘'Bơơn ja ldơk bi lơh bnih kan bôôk u lơh yau pơrkat bơl hei ri? 28Bi kot êch lưm hei bei ja lưm bah Ai-kap nar bnau neh?’ 29Môi-se mhei ttang baak nei tuôt kup u lôh gôq knông kwaal Ma-đi-an. A nei, bu lgơơch kươt baar koon klau.
30Puôn jơt snam kươi, di lênh brah lôh sot n'hai bu knông bôl ôinh ktôk pih look plah sơơr tu trenh sngat bnơm Si-na-i. 31Môi-se sau u êêng aang di mat jat ap êêng nei mơ kơrnan kươi dơơh jah mơq aan srlah huôih nei bu iat baak Brah lah: 32‘Hei laa Brah Ưn yau yi koon ri, Brah Ưn Ap-ra-ham ri, I-sak u Ja-kôp ri.’ Môi-se n'hông n'hing, 'bưn baanh mơq. 33Brah kươi lah: ‘Phrui doh sroom rlach jơng koon đươm ktôk koon plah ta yoong laa steh jrah. 34Hei ja sau srlah jat kro rngiêl raih Hei ri tu Ai-kap u ja iat baak chhôôih bu ri mơ jưr đoh jraih bu. Bei au phrui lôh, Hei a kươi maanh koon lôh Ai-kap.’ 35Nơơm Môi-se au laa bnih bơl bu ja dmôw u mor: ‘'Bơơn ja ldơk bu lơh bnih kan bôôk n'hai yau pơrkat?’, nei au Brah Ưn ja maanh bu lơh bnih liêu troong n'hai nơơm đoh yôôi đươm mbu lênh brah ja lôh sot n'hai bu knông pih look. 36Bu ja liêu bu sot, lơh pal chmlih chmleek, baak êêng aang knông kwaal Ai-kap, lơ Daak Rmưt Pơrhei, u ktôk trenh sngat knông puôn jơt snam. 37Đươm Môi-se au ja mor n'hai koon raih I-sra-ên: ‘Brah Ưn a kươi kn'hao knông rlum raih bal bơl oh bi mbu grnưt noor bei hei.#7:37 bei hei: Paich laabei Pang ja pơrgah hei hao.’ 38Đươm bu laa bnih ja gôq klung phung bơl nei tu ktôk trenh sngat pôl n'hai teq u lênh brah, yaang lah n'hai bu lơ bnơm Si-na-i n'hai bơl yau yi bơl bơn; n'hai bu kot dơơp pơih pal baak rêh jah ndơơp kươi aan bơl bơn. 39Dôh bơl yau yi bơl bơn 'bưn sang iat baak bu, lhiat bu sot u r'bong chưt nơơm teq u Ai-kap. 40Bu maanh A-rôn: ‘Dan phrui lơh bơl wêêng yaang han noor bơl hei đươm teq u đah Môi-se laa bnih ja liêu bơl bơn sot rlach Ai-kap, bơl hei 'bưn gưt ntil ơơn ja lôh tơt aan bu nei hơơi.’ 41Knông pal nar nei, bu mon mlơm spun gôw koon, piyơ thwaai aan pi spun nei u broh s'bai teq u kaar đươm ti nơơm lơh. 42Đươm nei, Brah Ưn ja nggưl mat n'hai bu u ndơơp dook bu smbah pal lênh trôôk a lơ trôôk,#7:42 Asn: rhông rhaang lơ trôôk. bei geh 'bian knông pal sm'bưt grnưt noor laah:
‘Ơi nhi I-sra-ên, geh lah bơl 'bei ja piyơ pai thwaai n'hai griêng mlơ aan Hei
Knông puôn jơt snam gôq ktôk trenh sngat 'bưn?
43Nei baah bơl 'bei kươi krôông krêêng spun wêêng Mo-lok ri,
U smanh wêêng Rom-phan ri,
Nei laa bơl pi spun baah bơl 'bei lơh sot jah chuh.
Đươm bei nei, Hei a kươi kot nhrơm bơl 'bei rlach mak tôw Ba-bi-lôn.’
44Yau yi bơl bơn ja geh Naam Ndraanh Pơrnơn knông trenh sngat, bei Brah ja maanh aan Môi-se phrui lơh dip tênh spêêr baah bu ja sau. 45Yau yi bơl bơn ja dơơp pơih nhi r'bưn ttưr nei u pôl n'hai Jô-suê liêu bu mưt kwaal bu ja piit pơih pal raih ri baah Brah Ưn ja prơh rlach bu. Nhi r'bưn ttưr nei nh'ơơm aan tơt klap Đa-wit, 46bnih kươt 'bun di mat Brah Ưn, u bu dan wơng di ktôk gôq aan Brah Ưn Ja-kôp ri.#7:46 Brah Ưn Ja-kôp ri. Knông m'baak pai 'bian ti laa nhi Ja-kôp ri. 47Kơi nei, snđach Sa-lô-môn sun aan Brah di mlơm nhi. 48Dôh Yaang Prêh Huôih 'bưn gôq knông nhi đươm ti bu nday lơh, bei grnưt noor ja mor:
49‘Brah lah: Trôôk lah gơrnôq Hei,
U steh laa knơơl jơng Hei.
Nhi êch bơl 'bei a kươi ldơk aan Hei,
Ktôk êch laa ktôk aan Hei rlu rlơk?
50'Bưn geh ti Hei ja tơmbut jôm griêng au laang?’
51Ơi bơl bnih kraam kôw, chưt u tôr ndah kươt kat pêêk tôw! Bơl g'bei ta wal kươi Brah Wêêng nggan. Yau yi bơl g'bei bei êch nei bơl g'bei kot bei nei! 52Geh grnưt noor êch baah yau yi bơl g'bei 'bưn nhôp kơt? Bu nha lưm bơl bnih mor grnưt noor teq u baak lôh tơt Yaang ri Sêch Song, laa Yaang baah bei au bơl g'bei ja ndun kơrlap u lưm teq. 53Bơl g'bei ja pơih ch'bap tơmbơh đươm bơl lênh brah, dôh kươi 'bưn prap ơn ch'bap nei!”
Ê-tiên chhưt đươm baak jơ
54Bu iat pal baak nei hao nuih knông chưt u kap chhêk n'hai Ê-tiên. 55Dôh Ê-tiên, kươt bêêng 'bơm Brah Wêêng, mơq ndưng hao trôôk, sau chring chraang Brah Ưn ri u Brah Jê-sus ta yoong mak ma Brah Ưn. 56Bu mor: “Tôw, hei sau pal lơyaang trôôk a pơơk u Koon Bnih ta yoong mak ma Brah Ưn.” 57Khal au, bu troh ttih, kơl bach tôr u ta pôl loh mưt nhôp Ê-tiên 58têêk sot a gaaih poh, ja nei jang tmau bu. Bơl bnih ndraanh pơih ao khôw nơơm dơih ktôk jơng di mbu dơlu chhak laa Sau-lơ. 59Tơt bu plah jang tmau nei Ê-tiên r'bon dan laah: “Smbah Brah laa Brah Jê-sus, dan wơơt pơih wêêng yaang koon.” 60Ja nei bu kơltut u teh, khuôl ttih: “Brah ơi, dan khơơm kaap dôih au aan bu!” Mhei dưt baak nei bu bêch.
Currently Selected:
:
Highlight
Share
Copy
Want to have your highlights saved across all your devices? Sign up or sign in
© 2024 Bible Society Vietnam. All rights reserved.