Kênh Kaar 3

Bnih chook kươt tơmbah. Baak chhuôr Phi-e-rơ ri

1Khal au, Phi-e-rơ u Jang han hao nhi r'bưn lap jơl r'bon dan pei bêl mau.#3:1 S'bt: bêl ttal sưn, awap laa bêl klap sưn. 2Geh di mbu chook mhei sot pul mei, rêêng nar kươt bu nday liêu lôh dơih tu lpôông nhi r'bưn, chôôl laa Lpôông Klanh, jah dan prak bơl bnih mưt nhi r'bưn. 3Sau Phi-e-rơ u Jang êch dơơh chwaat mưt u nhi r'bưn, bu nei dan baar du tak ươn. 4Phi-e-rơ u Jang mơq song teq u bu ja nei mor: “Phrui mơq teq u bơl hei.” 5Bu lngeh lngôôn mơq baar du n'hai ndưng a kươi pơih kươt ndêq pi ơơn. 6Dôh Phi-e-rơ mor n'hai bu: “Hei 'bưn geh kaih maih ơơn laang, dôh ntil hei geh nei hei aan 'bei: Tơmoh chhak Brah Jê-sus Krist bnih Na-sa-ret, phrui ta yoong u chwaat han!” 7Phi-e-rơ dơp ti ma bu u kơldơk. Kơndaal baar paang jơng u koon kanh bu but kraam ngan. 8Bu jroh drơh, ta yoong song u han chwaat pôl baar du mưt u nhi r'bưn, đah han đah njroh, đah pơt wơơl Brah Ưn. 9Tơt leq sêch phung raih sau bu han chwaat u pơt wơơl Brah Ưn, 10bơl bu grnưt bu nei laa bnih ja gôq tu Lpôông Klanh nhi r'bưn ri jah dan tak ươn nei êêng aang u nglêk nglak teq u kaar ja lôh tơt aan bu.

11Knông plah bu nei dơp Phi-e-rơ u Jang, leq sêch phung raih kot êêng aang n'hai rnhum rnhei lôh u bu tu ktôk chôôl laa lwaang nteer Sa-lô-môn. 12Sau bei nei, Phi-e-rơ mor drơh n'hai phung raih: “Ơi raih bal I-sra-ên, a hay oh bi êêng aang teq u kaar au? A hay oh bi mơq ngôôn bơl hei bei bơl hei ja chkhôm dang kmheng paich chưt ndap êêng nơơm ri baah tak lơh bnih au han kươt? 13Brah Ưn Ap-ra-ham ri, Brah Ưn I-sak ri u Brah Ưn Ja-kôp ri, Brah Ưn yau yi bơl bơn ri ja tư wơơl dêch Pang laa Brah Jê-sus, Yaang baah oh bi ja nhôp ndơơp u dhot lơơi bôôk mat Phi-lat jơl knông bu nei geh rnđêch krôih Pang. 14Oh bi ja dhot lơơi Yaang Jrah u Yaang Sêch Song baah leet dan krôih aan nơơm di mbu bah lưm bnih.#Mat 27:15-23; Mak 15:6-14; Lu 23:13-23; Ja 19:12-15. 15Oh bi ja lưm Brah baak rêh ri, dôh Brah Ưn ja tak lơh Pang a ktôk chhưt rêh kươi; bơl hei laa bơl bnih ndraanh aan ntil nei. 16Đươm chưt jơrnơ knông saak Pang ja lơh aan bnih baah oh bi sau u gưt au kươt jap kơndang. Đươm saak Pang u chưt jơrnơ ktôk Pang ja tak lơh bnih au sơp kmlang bei leq sêch oh bi ja sau. 17Ơi oh bi, bei au na hei gưt oh bi u bơl bnih liêu troong oh bi ri ja lơh ntil nei đươm khwaq gưt jhai. 18Dôh Brah Ưn ja nhôq ndroong nei jah lơh dip plak baak Pang ja tơmbơh noor rlach wiêm baak bơl grnưt noor laah Yaang Krist Pang ri phrui dol ji kôr. 19Bei nei, oh bi phrui teq lơi dôih u plơq siq n'hai Brah Ưn jah dôih 'baap nơơm kươt jhut rao, 20jah aan pal jơrnơl mhei Brah ươn a kươi lôh, u jah Pang maanh Yaang Krist, nei laa Brah Jê-sus, Yaang ja kươt chong chôôl noor, lôh u oh bi. 21Yaang nei phrui kươt prap kươi lơ trôôk aan lôh jơrnơl mrơk 'bơk chhư kah kơơt, bei Brah Ưn ja lah rlach wiêm bơl grnưt noor jrah a khal hư. 22A ngan bei nei, Môi-se geh mor: ‘Brah laa Brah Ưn bơl 'bei a kươi kn'hao knông oh bi bơl 'bei di mbu Yaang grnưt noor bei hei#3:22 bei hei: Paich laabei Pang ja kn'hao hei. u bơl 'bei phrui iat baak jôm ntil Pang lah maanh. 23Mơq 'bơơn 'bưn iat Yaang grnưt noor nei a kươi dol nduul rlach phung raih.’ 24Leq sêch bơl grnưt noor, a Sa-mu-ên aan tơt bơl bu dah gêêng, tơt mor grnưt noor kot chhuôr pal nar au. 25Oh bi laa koon sau bơl grnưt noor ri u pơrnơn Brah Ưn ri ja pơn n'hai bơl yau yi bơl bơn tơt Pang lah n'hai Ap-ra-ham: ‘Jôm raih bal a swich teh a kươi chkhôm mbaang 'bei baah kươt smlaang.’ 26Brah Ưn ja khuôl Dêch Pang hao u maanh Pang lôh u oh bi noor leq, jah ươn smlaang aan oh bi dơng ndroong tak lơh jôm bnih knông oh bi teq lơơi troong gông đơơk đaak nơơm ri.”

Currently Selected:

Kênh Kaar 3: SBL2024

Highlight

Copy