Kênh Kaar 26

Phao-lô noor snđach Ak-rip-pa

1Khal au snđach Ak-rip-pa maanh Phao-lô: “'Bei kươt ch'bap mor jah koh roong êêng.” Phao-lô lơơk ti sot, koh roong êêng bei au: 2“Mbơh snđach Ak-rip-pa, nar au hei sroong kươt koh roong êêng di mat snđach teq u jôm ntil bnih Jo-thai pnđing kơt hei; 3đươm snđach huôih leq gưt ngan srlah jôm knap ch'bap kot bei pal baak kaar ta tau bnih Jo-thai ri. Bei nei, dan snđach phrui pơrkhom iat hei. 4Jôm bnih Jo-thai kot gưt kmlơt rêh hei ri a bơh nha drêên, gôq lwah raih bal hei u tu Jê-ru-sa-lem. 5Mơq bu snap lơh ndraanh teq u ntil au nei a n'au bu ngroh gưt hei ja rêh tênh thap Pha-ri-si, laa thap pơrjat đat knông baak jơ bơl hei.#Kênh 23:6; Phil 3:5. 6Au hei ta yoong a au jah dol pơrkat laa đươm kơndưng ktôk baak pơn Brah Ưn ri aan yau yi bơl hei. 7Đươm baak kơndưng nei baah jmơt baar puich bơl hei pơih chưt sang rmeh chuh th'bưn Brah Ưn mang nar. Tak mbơh, u kot đươm baak kơndưng nei baah hei dol bnih Jo-thai pnđing. 8A hay bơl gơay a au leet 'bưn geh jơ laah Brah Ưn tak lơh bnih chhưt rêh kươi?

9Ngan bei nei, nơơm hei noor n'au ja gênh laah phrui wơng jôm ndroong jah ta wal saak Jê-sus bnih Na-sa-ret.#Kênh 8:3; 22:4-5. 10Hei ja lơh bei nei tu Jê-ru-sa-lem: Chhing teq u ch'bap kmheng bơl yau thwaai ndap ttơơm ri, hei teq khaam ơk koon jrah, baah tơt bu dol pơrkat lưm chhưt, hei kot teq kơrđaih tak rgoh hih. 11Hei rnđơơih han jôm nhi pơrgum jah phaat bu u chhôq bôôk bu teq lơơi chưt jơrnơ; hei hao nuih lôh moh han tơt pal poh agaih nggoor jah nhôp kơt bu.

12Nei mơ, hei han hao Đa-mach n'hai ch'bap kmheng u rmaanh bơl yau thwaai ndap ttơơm ri. 13Lơ troong han, tak mbơh, lap plah nggơl nar tam, hei sau geh rơn aang a lơ trôôk a tong huôih mat nar, yơr rlum hei u bơl bnih han pôl. 14Tơt leq sêch bơl hei a kơq u teh, hei ttang baak lah n'hai hei dơng baak Hê-bơ-rơ laah: ‘Ơi Sau-lơ, Sau-lơ, a hay 'bei nhôp kơt Hei? Tmau mưt muh pơlaanh nei rngiêl dol aan 'bei ngan.’ 15Hei ơh: ‘Brah ơi, Brah laa 'bơơn?’ Brah ơh: ‘Hei laa Jê-sus pa 'bei plah nhôp kơt. 16Dôh phrui kah kơơt n'hai hao ta yoong, đươm Hei ja lôh sot n'hai 'bei jah ldơk 'bei lơh dêch n'hai bnih ndraanh teq u pal ntil 'bei ja sau ktôk Hei#26:16 ntil 'bei ja sau ktôk Hei: Knông m'baak plơơp 'bian ti laantil ay ja sau., u teq u pal ntil Hei a kươi lôh sot tơrsau aan 'bei gưt. 17Hei a kươi đoh jraih 'bei rlach raih au u bơl bnih nggoor agaih laa ktôk Hei maanh 'bei lôh 18jah pơơk mat bu, ntur bu a mang jơ ngôw rlach book aang, a kmheng Sa-tan ri plơq siq n'hai Brah Ưn; jah aan đươm chưt jơrnơ ktôk Hei, bu pơih kươt baak krôih dôih u a dơơn griêng mlơ pôl n'hai bơl koon sơih.’

19Mbơh snđach Ak-rip-pa, a nei, hei 'bưn baanh ta wal n'hai tơrsau noor a trôôk; 20dôh noor leq, hei chhuôr aan bơl bnih a Đa-mach, ndih tơt tu Jê-ru-sa-lem n'hai leq kwaal Ju-đê, ja nei han tơt bơl bnih nggoor agaih laah phrui teq lơi dôih u plơq siq n'hai Brah Ưn, lơh kaar klanh dip n'hai baak teq lơi dôih.#Kênh 9:20,28,29. 21Đươm rơ kheet nei, bnih Jo-thai ja nhôp hei knông nhi r'bưn u êch lưm hei. 22Dôh hei kươt Brah Ưn kray rak sa aan tơt nar au, u đươm bei nei, hei ta yoong a au lơh ndraanh aan bnih ttih bnih dêq, 'bưn mor ơơn nday huôih laa ntil bơl grnưt noor u Môi-se ja tơmbơh noor phrui lôh tơt: 23nei laa Yaang Krist phrui dol rngiêl, u lah bnih ptơơm rêh kươi a ktôk chhưt, jah chhuôr rơn aang aan raih Jo-thai kot bei bơl bnih nggoor agaih.”#I Kô 15:20.

24Tơt Phao-lô plah koh roong êêng nei Phê-tu mor mơh: “Phao-lô ơi, ay saap gơrninh hơơi! Ay riên ơk ir lôh but wơơng!” 25Dôh Phao-lô ơh: “Mbơh kan ttih Phê-tu, hei 'bưn saap gơrninh laang, dôh hei plah mor pal baak ngan nguôn u rơi đươm. 26Đươm snđach gưt srlah pal ntil au mơ hei baanh khwaan mbơh; đươm hei jơ jap laah 'bưn geh ntil ơơn snđach 'bưn gưt, đươm jôm kaar nei 'bưn lơh knông jơ ngôw laang. 27Mbơh snđach Ak-rip-pa, snđach geh jơ bơl grnưt noor pan? Hei gưt snđach jơ ngan!” 28Snđach Ak-rip-pa mor n'hai Phao-lô: “Khơơm kơn ơơn dơơn knông nar khay gleh baah ay ndit kươt hei but mbu bnih Jơ Brah.” 29Phao-lô mbơh: “Paich nar khay nhjoong paich gleh, hei r'bon dan Brah Ưn laah 'bưn dơơn di mbu snđach baah leq sêch bơl bnih iat hei nar au kot but bei hei, dươn lah chhei chrwak au ei!”

30Khal au snđach, yau tông, yau ur Bê-rê-nit u bơl bnih gôq pôl kot ta yoong. 31Tơt sot du, bu mor tơrnang nơơm: “Bnih au 'bưn lơh ntil ơơn dip jah chhưt paich dip jah teq u khaam ơơm.” 32Snđach Ak-rip-pa mor n'hai Phê-tu: “Mơq bnih au ndah pnđing teq u Sê-sa nei awap krôih kươt.”

Currently Selected:

Kênh Kaar 26: SBL2024

Highlight

Copy