Kênh Kaar 19

Phao-lô tu Ê-phê-sô

1Jơl knông A-pô-lô a Kô-rinh-tô, nei Phao-lô han troong rluôt klung nggoor, tơt Ê-phê-sô. A mơp m'baak jơrnơ a nei, 2yau ôp bu: “A bơh jơ, oh bi ja dơơp pơih Brah Wêêng hơơi?” Bu ơh: “Bơl hei ndah ơm ttang mor geh Brah Wêêng ơơn laang.” 3Bu leet ôp: “Bei nei oh bi ja pơih bap-tem ơơn?” Bu ơh: “Bap-tem Jang ri.” 4Phao-lô mor: “Jang ja lơh bap-tem teq u baak teq lơi dôih, maanh phung raih phrui jơ Yaang a kươi lôh kươi nơơm, rơih laa jơ Brah Jê-sus.#Mat 3:11; Mak 1:4,7-8; Lu 3:4,16; Ja 1:26-27.” 5Ttang bei nei, bu pơih bap-tem tơmoh chhak Brah laa Brah Jê-sus. 6Tơt Phao-lô dơih ti nei Brah Wêêng jưr lơ bu; bu mor pal til baak êêng u baak grnưt noor. 7Leq dang leq tơmlai jmơt baar du.

8Phao-lô mưt nhi pơrgum, chhuôr kne di ndroong khwaan, ta tau u ndit bnih iat teq u nggoor Brah Ưn rluôt pei khay. 9Dôh geh pal du a rơk, 'bưn sang jơ, kươi nha đam điêl baak jơ Brah di mat phung raih mơ bơl bu rônh kươi rlach bu, liêu bơl jơrnơ sot êêng, u rêêng nar pơrgênh knông nhi riên Ti-ra-nu ri.#19:9 Ti-ra-nu: Knông m'baak plơơp 'bian ti laa Ti-ra-nu a jmơt muôi bêl aang tơt puôn bêl mau. 10Kaar au ndih knông baar snam, lôh moh jôm bnih a A-si-a kot iat baak Brah, leq bnih Jo-thai dang bnih nggoor agaih.#19:10 leq bnih Jo-thai dang bnih nggoor agaih: Paich laaleq bnih Jo-thai dang bnih Hi-lap. 11Brah Ưn nhôq ti Phao-lô lơh pal chmlih chmleek êêng aang, 12lôh aan bu nday pơih kma u ao ryoq bu ja nhôq dơih lơ bơl bnih pơrtanh nei pơrtanh saap 'bat u bơl wêêng chaak ap dol nduul sot rlach bu.

Bơl koon klau Sê-wa ri prơh chaak

13Khal au geh bơl yau chrong pơpool bnih Jo-thai han a ktôk au tơt ktôk tôw, kot tuul pơih saak Brah laa Brah Jê-sus prơh bơl wêêng chaak ap rlach bơl bah dol rup. Bu mor: “Hei tơmoh Brah laa Brah Jê-sus, Yaang baah Phao-lô chhuôr, maanh aan bơl 'bei.” 14Bơl bnih lơh kaar au laa poh koon klau yau thwaai ttơơm Jo-thai ri chhak laa Sê-wa. 15Dôh wêêng chaak ap mor n'hai bu: “Hei gưt Brah Jê-sus u kot gưt srlah Phao-lô dơq, dôh bơl 'bei laa 'bơơn?” 16Bnih dol wêêng chaak ap rup loh teq u bu, pơr chhơm u pơm jn'ah leq bơl lôh moh bu phrui teq nhi tuôt kup, nơơm srôôk srơơi u bêêng lap mhaam. 17Leq sêch bơl bnih a Ê-phê-sô, leq bnih Jo-thai dang bnih Hi-lap gưt kaar ja lôh tơt nei n'hông; saak Brah laa Brah Jê-sus dươn kươt tư đing. 18Ơk bnih ja jơ, tơt teq lơi dôih u tơrsau ngan pal kaar bu ja lơh. 19Geh m'baak bnih noor n'au bơ kaar chrong pơpool liêu sm'bưt sn'aam bu ri chhu bôôk mat jôm bnih. Bu nday rơơp thlay pal sm'bưt nei hao tơt pram jơt ban plơơp kaih. 20Bei nei, chkhôm dang kmheng Brah ri, baak Brah pơrkhơm rơq ran u a kưt kơndang.#19:20 Bei nei... kơndang: Knông m'baak plơơp 'bian ti laa Bei nei, n'hai dang kmheng, baak preh Brah ri khang rơq ran n'hai a kưt kơndang.

Đê-mê-triu rook pơrsup

21Kơi pal kaar nei, Phao-lô rwach knông chưt#19:21 Phao-lô rwach knông chưt: Paich laaPhao-lô kươt Brah Wêêng têêk liêu. han rlach kwaal Ma-sê-đô-ni-a u kwaal A-chai ja nei tơt Jê-ru-sa-lem. Bu mor: “Di kươi han tơt nei, hei kot phrui lôh nhjook Rô-ma dơq.” 22Bu maanh baar du jraih kaar nơơm ri laa Ti-mô-thê u Ê-rat han noor rlach Ma-sê-đô-ni-a; bu nei gôq a kươi A-si-a di rbôông dơq.

23Laap jơrnơl nei, geh di baak pơrsup ttih lôh tơt troop tơt baak jơ Brah. 24Di mbu rak mon kaih chhak Đê-mê-triu lơh pal ndaai chuh dơur wêêng Đi-anh#19:24 S'bt: Ak-tê-mit: laa dơur wêêng srlanh n'hai klanh sơrnôk bnih Hi-lap ri; bnih Rô-ma chôôl laa Đi-anh. dơng kaih, liêu kơơi ơk lôh lơi aan bơl rak mon ei u ti. 25Bu ta pơrgum bơl bnih rak mon nei n'hai bơl kaar pôl kươi u mor: “Ơi bơl gnasaal, bơl gnasaal gưt bơl bơn kươt sơrnôk laa chkhôm kaar au. 26Bei bơl gnasaal ja sau u ttang, 'bưn dơơn tu Ê-phê-sô baah bei leq A-si-a, bah Phao-lô au ja ndit u lơh aan ơk bnih tơrlêêng. Bu mor laah bơl pi spun đươm ti bnih lơh sot 'bưn dip laa bơl wêêng. 27Bei nei, 'bưn pal kaar tach brôw bơl bơn ri geh a phươp dol saap jơ rap, baah nhi r'bưn dơur wêêng Đi-anh kot dol 'baih rao; ja nei baak m'ơh đat dơur wêêng ri kươt leq A-si-a n'hai leq nggoor teh chuh đing kot a kươi luôch lêêk.” 28Ttang pal baak nei, bu hao nuih, khuôl mơh: “Ttih đat laa dơur wêêng Đi-anh bnih Ê-phê-sô ri!” 29Leq poh kot pơrsup; bu pôl tuôt mưt u nhi tapơt, têêk pôl Gai-ut, A-ri-tak, laa bnih Ma-sê-đô-ni-a, gnasaal pôl n'hai Phao-lô. 30Phao-lô êch han sot di mat phung raih, dôh bơl jơrnơ kaang bu. 31Mbu baar du liêu troong a A-si-a, laa gnasaal bu ri, kot maanh bnih lôh buôi bu khơơm rôôt mưt u nhi tapơt. 32Jơl knông nei, phung ơk ngan laa ta pơrsup: bnih nei hao khuôl bei nei, bah nei hao troh bei nday, đươm ơk nak kot 'bưn gưt a hay nơơm pơrgum a au. 33Bnih Jo-thai thoom yau A-lek-san-đơ sot a bôôk mat u mbu baar du knông phung ơk maanh bu hao mor. A-lek-san-đơ pơih ti wak êch koh roong noor phung raih. 34Dôh mhei gưt sot bu laa bnih Jo-thai nei leq phung raih ta pôl troh ttih knông baar rweh bêl: “Ttih đat laa dơur wêêng Đi-anh bnih Ê-phê-sô ri!” 35Plah nei, yau ndap nduôn poh maanh phung raih iat rngơt u tơmbơh: “Ơi raih bal Ê-phê-sô, 'bơơn kươi 'bưn gưt poh Ê-phê-sô laa bnih kray nhi r'bưn dơur wêêng Đi-anh ri u spun dơur wêêng a trôôk kjưr laang? 36Pal ntil nei 'bưn 'bơơn awap ta dmôw, mơ raih bal phrui ndrach ndrei, khơơm lơh ntil ơơn dil daal. 37Đươm bơl bnih baah raih bal ja jưn lôh u đau 'bưn ttung lmuôich griêng jrah kot 'bưn đam n'hai dơur wêêng bơl bơn. 38Bei nei, mơq Đê-mê-triu u bơl rak mon ei u ti bu nei ri geh êch pnđing 'bơơn nei ja geh bơl ktôk pơrkat dôih u bơl t'ih m'ei, phrui jah bu ta pnđing. 39Nha mơq raih bal rơ maanh kaar ơơn nha nei a kươi kươt ta rưh tu phung kliêu dip ch'bap. 40Đươm ach laah bơl bơn a kươi dol pnđing teq u kaar tameh tawal nar au, u bơl bơn 'bưn kươt wơng rơ kheet êch jah koh roong baak pơrgum krưsik au.” 41Ja mor, bu nduul phung ơk.

Currently Selected:

Kênh Kaar 19: SBL2024

Highlight

Copy