Kênh Kaar 14

Phao-lô u Ba-na-ba tu I-kô-ni.

1Tu I-kô-ni, Phao-lô u Ba-na-ba mưt pôl nhi pơrgum Jo-thai u chhuôr nti, tak lơh ơk đat bnih Jo-thai u bnih nggoor agaih#14:1 ơk đat bnih Jo-thai u bnih nggoor agaih: Paich laa ơk bnih Jo-thai u bnih Hi-lap. jơ Brah. 2Dôh bơl bnih Jo-thai 'bưn jơ nei nôôl, phơm khih chưt gơrninh bơl bnih nggoor agaih 'bưn geh ta êch n'hai oh bi. 3Paich bei nei, baar jơt jơng gôq kươi nei di nar khay nhjoong, chhuôr nti teq u Brah di ndroong khwaan; Brah nhôq ti bu lơh pal baak êng aang u chmlih chmleek jah tơrsau aan baak preh brêêng smlaang Pang ri. 4Dôh phung raih knông poh ta pơrlang khach: di thap tênh bnih Jo-thai, thap tôw tênh baar jơt jơng. 5Plah nei, bơl bnih nggoor agaih n'hai bnih Jo-thai pôl n'hai bơl nak liêu troong bu ri pơrgênh jmlôm pnđeh pnđơơt u jang tmau baar jơt jơng. 6Kươt ttang baak nei, baar jơt jơng het rlach Lit-trơ u Đet-bơ laa pal poh klung Li-kao-ni u kwaal a gêêng, 7ja nei chhuôr Baak Sroong Klanh tu nei.

Phao-lô u Ba-na-ba tu Lit-trơ

8Tu Lit-trơ geh di mbu dol awiêl baar jơng; bu nei dol chook a bơh sot pul mei, ndah khal êch han kươt. 9Bu nei gôq iat ttang Phao-lô chhuôr. Phao-lô mơq a ngôôn teq u bu u sau bu geh chưt jơrnơ jah kươt tơmbah 10mơ mor tih: “Phrui ta yoong song jơng!” Bu dơk njroh u chwaat han. 11Phung raih sau kaar Phao-lô ja lơh nei troh ttih n'hai baak Li-kao-ni: “Bơl wêêng ja pơih gui bnih sot jưr pôl n'hai bơl bơn!” 12Bu khuôl Ba-na-ba laa wêêng Jơt,#14:12 Jơt: laa brah tih prêh bnih Hi-lap ri. nha Phao-lô laa wêêng Hek-mê#14:12 Hek-mê: laa brah mor, tơmbơh bnih Hi-lap. đươm bu laa bnih chhuôr tơơm. 13Yau thwaai wêêng Jơt ri geh nhi r'bưn a mak gaaih poh liêu gôw kuông u đôm kao lôh a bôôk lpôông, êch ta pôl n'hai phung raih piyơ di thwaai aan bơl jơt jơng. 14Dôh baar jơt jơng laa Ba-na-ba u Phao-lô gưt ntil nei yah ao nơơm, loh mưt klung phung ơk u mor ttih: 15“Ơh oh bi! A hay oh bi leet lơh ntil nei? Bơl hei dơơn lah koon bnih, bei oh bi. Bơl hei chhuôr Baak Sroong Klanh jah oh bi wih kươi bơl wêêng khuich khwait tôw baah plơq siq n'hai Brah Ưn rêh yoot, laa Yaang ja tơmbut trôôk, steh, rmưt rlai, u mrơk 'bơk chhư knông nei. 16Knông pal klap noor, Pang ja aan jôm raih bal han tênh troong gông êêng nơơm bu ri. 17Paich bei nei, Pang lơh ndraanh yoot teq u nơơm bơn na dơng ndroong ươn smlaang klanh, lơh mi a trôôk jưr, ươn khal kach kươt ơk play kao, griêng sa ngroh ngri, tak lơh chưt oh bi bêêng bơm broh s'bai.” 18Ja mor leq baak hơơi, bơl jơt jơng kot phrui rngiêl đat mơ pơrkhaang kươt phung raih piyơ thwaai aan baar du bu.

19Khal au, geh pal du Jo-thai a An-ti-ôt u I-kô-ni lôh nôôl phung raih. Bu jang tmau Phao-lô; kơn ơơn bu u chhưt, mơ têêk bu sot u gaaih poh. 20Dôh tơt bơl jơrnơ plah pơrgum rlum Phao-lô nei bu dơk kah u han mưt u poh. Nar a ôi, Phao-lô han pôl n'hai Ba-na-ba tơt Đet-bơ plơq teq u An-ti-ôt.

Plơq siq An-ti-ôt

21Tơt baar jơt jơng ja chhuôr Baak Sroong Klanh knông poh nei u jơrnơ krik ơk bnih nei plơq siq Lit-trơ, I-kô-ni, u An-ti-ôt. 22Baar du lơh jap chưt bơl jơrnơ, trôih trôl bu prap jap chưt jơrnơ, u maanh laah: “Bơl bơn phrui rlach rloong ơk baak pơr'baak mơ mưt kươt nggoor Brah Ưn.” 23Di kươi maanh top bơl raanh ttơơm knông jôm Phung Jrah, baar jơt jơng r'bon dan, ơt jrơng u ndơơp bơl bnih nei aan Brah laa Yaang bơn jơ. 24Baar jơt jơng chloong rlach Pi-si-đi, tơt Pam-phi-li; 25di kươi ja chhuôr baak preh tu Pet-jê, bu jưr At-ta-li. 26A ktôk nei, baar du jih duuk siq An-ti-ôt, ktôk noor n'au bu kươt ndơơp aan brêêng smlaang Brah Ưn jah lơh kaar brnơ bu mhei lơh sơp.

27Tơt lôh ktôk, Phao-lô u Ba-na-ba pơrgum Phung Jrah, chhuôr kươi jôm kaar baah Brah Ưn ja lơh rlach bơl bu, u kaar Pang ja pơơk lpôông chưt jơrnơ aan bơl bnih nggoor agaih. 28Baar du gôq kươi nei di nar khay jook n'hai bơl bơl jơrnơ.

Currently Selected:

Kênh Kaar 14: SBL2024

Highlight

Copy