Kênh Kaar 11

Phi-e-rơ plơq siq poh Jê-ru-sa-lem

1Khal nei, bơl jơt jơng u bơl oh bi a Ju-đê ttang baak bnih nggoor agaih kot ja wơơt baak Brah Ưn. 2Tơt Phi-e-rơ hao Jê-ru-sa-lem, bơl jơrnơ dol kat pêêk laah bn'ap bu: 3“Bu ja mưt u nhi bơl bah 'bưn dol kat pêêk u sa pôl n'hai bu!” 4Dôh Phi-e-rơ ptơơm rơih aan bu lneh jôm kaar 5bei au: “Tơt hei plah r'bon dan knông poh Jôp-bê nei ndrot sot wêêng u sau di tơrsau noor: Geh griêng ơơn bei kma ttih kơt puôn đah a trôôk nh'jưr tơt hei. 6Hei chmlam mơq rwach, sau knông nei geh pal pai griêng puôn jơng, pal pai bri, til pai rwin u chum trôôk. 7Hei ttang geh baak lah: ‘Ơi Phi-e-rơ, phrui kah kơơt, lơh pai baah sa.’ 8Hei ơh: ‘Brah ơi, 'bưn geh kươt, đươm ntil ơơn jrơơk jrơơm paich 'bưn jrah jriêp 'bưn khal êch mưt u wiêm koon.’ 9Dôh baak a trôôk lah n'hai hei wưt baar: ‘Khơơm mơq laa jrơơk jrơơm griêng ơơn Brah Ưn ja lơh aan jrah jriêp.’ 10Baak nei lah kươi pei wưt, ja nei leq sêch kot kươt pơrgum hao trôôk. 11Kơndaal khal nei, pei du gôq poh Sê-sa-rê kươt maanh lôh u hei, kot ja lôh nhi bơl hei#11:11 bơl hei: Knông m'baak plơơp 'bian ti laa hei. plah gôq. 12Brah Wêêng maanh hei phrui han n'hai pei du nei, khơơm nggich nggưl ơơn leq. Prau oh bi au kot han pôl n'hai hei, n'hai bơl hei chwaat mưt u nhi Kot-nay. 13Bnih nei krơơ kươi aan bơl hei 'bei êch bu nei ja sau mbu lênh brah ta yoong knông nhi bu u maanh: ‘Phrui maanh bnih lôh poh Jôp-bê siêr Si-môn, kot chôôl laa Phi-e-rơ. 14Bnih nei a kươi mor 'bei pal baak jah chkhôm nei 'bei u leq nhi 'bei a kươi kươt đoh kơơl.’ 15Tơt hei ptơơm mor nei Brah Wêêng jưr lơ bu, kot 'bei ptơơm Pang ja jưr lơ bơl bơn. 16Hei gênh kươi baak Brah ja lah: ‘Jang ja lơh bap-tem dơng daak, dôh bơl koon a kươi kươt bap-tem dơng Brah Wêêng.#Kênh 1:5.’ 17Bei nei, mơq Brah Ưn ja ươn bu n'hai di griêng tkôm bei Pang ja ươn bơl bơn tơt bơl bơn jơ Brah laa Brah Jê-sus Krist, nei hei laa 'bơơn baah baanh pơrkhaang Brah Ưn?” 18Tơt bơl bu ttang pal baak nei rlu laah bn'ap. Bu tư wơơl Brah Ưn lah: “Bei nei, Brah Ưn kot ja ươn baak teq lơi dôih aan bơl bnih nggoor agaih jah bu kươt baak rêh!”

Phung Jrah tu An-ti-ôt

19Khal au, bơl bnih dol trlêêng trlaih đươm baak nhôp kơt lôh tơt a kươi kaar Ê-tiên han tơt Phê-ni-si, gguônh Sip u An-ti-ôt, dôh bu dơơn chhuôr baak preh aan bnih Jo-thai ei.#Kênh 8:1-4. 20Đươm bei nei, mbu baar du knông nak bu poh a gguônh Sip u Si-ren tơt An-ti-ôt kot chhuôr Baak Sroong Klanh aan leq bnih nggoor agaih#11:20 bnih nggoor agaih: Knông m'baak plơơp 'bian ti laa bnih Jo-thai mor baak Hi-lap awap laa bnih mor baak Hi-lap. hih, chhuôr Brah laa Brah Jê-sus aan bu. 21Ti Brah gôq n'hai bu, mơ geh ơk bnih jơ pơih u plơq kươi n'hai Brah. 22Ttang baak nei, Phung Jrah tu Jê-ru-sa-lem maanh Ba-na-ba lôh An-ti-ôt. 23Tơt lôh ktôk u sau brêêng smlaang Brah Ưn nei bu broh s'bai u trôih trôl jôm bnih khang jap chưt tênh Brah; 24đươm Ba-na-ba laa bnih klanh, bêêng bơm Brah Wêêng u chưt jơrnơ. ơk đat bnih jơ tênh Brah. 25Kơi nei, Ba-na-ba han tơt Tat-sơ jah wơng Sau-lơ; 26tơt wơng kươt hôm, bu ndơơp Sau-lơ tơt poh An-ti-ôt. Baar du ta pơrgum n'hai Phung Jrah u kne ơk bnih knông rluôt di snam. Đươm tu An-ti-ôt, bnih nday ptơơm khuôl bơl bơl jơrnơ laa bnih Jơ Brah.

27Knông pal nar nei, geh bơl grnưt noor a Jê-ru-sa-lem jưr An-ti-ôt. 28Di mbu knông nak bu chhak A-ga-but ta yoong đươm Brah Wêêng tơmbơh noor laah a kươi geh jơl pngot nh'hit ttih lôh tơt lơ jôm steh; jơl pngot nh'hit au lôh tơt a teh klap Kơ-lôt.#Kênh 21:10. 29Bơl jơrnơ rwach jôm bnih tênh lpat, piyơ griêng tkôm ta jraih aan bơl oh bi plah rêh tu Ju-đê. 30Bu lơh tênh kaar nei u piyơ griêng tkôm tơt bơl raanh ttơơm rlach ti Ba-na-ba u Sau-lơ.

Currently Selected:

Kênh Kaar 11: SBL2024

Highlight

Copy