I Kô-rinh-tô 5

Ryơơng ap đat tu Kô-rinh-tô

1Geh lư laah knông oh bi geh baak kiat mrơơ, di ntil kiat mrơơ lơh aan dơng leq pal bnih nggoor agaih kot 'bưn geh bei nei; đươm geh bnih ja gôq bêch n'hai sai chông bươp nơơm! 2Nei baah oh bi nha uôt nhjơơl! Mơq 'bưn oh bi phrui nhim ngliêng u thot teq bơl lơh ntil nei sot rlach oh bi! 3Đươm hei, chhak paich phơt ngngai, dôh chưt kmlơt nei gôq a nei. Hei ja pnđing bơl lơh ntil nei, bei hei nha geh mat tu nei. 4Tơt oh bi pơrgum kươi, chưt kmlơt hei kot mbeet mbei pôl n'hai dang kmheng Brah bơl bơn ri laa Brah Jê-sus; tơmoh chhak Brah laa Brah Jê-sus, 5Bơl bơn ndơơp bnih bei nei aan Sa-tan khuit khwait pêêk pai jah chưt kmlơt kươt đoh knông nar Brah#5:5 Brah: Knông m'baak plơơp 'bian ti lah Brah Jê-sus. ri.

6Baak n'hih nhjơơl oh bi ri 'bưn geh ơơn jah klanh room laang. Oh bi 'bưn gưt laah di ndêq kenh lơh aan rik bơrnêh laang?#Ga 5:9. 7Phrui lơh jrơh kenh ndơm haanh, jah oh bi awap but bơrnêh mhei 'bưn kenh, bei oh bi a ngan laa nom 'bưn kenh ei. Đươm Yaang Krist, Koon Bưr ryơơng Chloong Rlach bơl bơn ri ja kươt piyơ lơh pai thwaai hôm. 8Bei nei, bơl bơn phrui krơơ ryơơng Chloong Rlach, khơơm nhôq kenh ndơm, laa kenh ring khih u ap than, baah phrui nhôq nom 'bưn kenh baak ngan nguôn ri u soong klanh.

9Knông khaak 'bian aan oh bi, hei ja pn'ak khơơm a mor a chhuôr n'hai bơl bah jrôq jrơm. 10Hei 'bưn geh êch mor tơt bơl bah jrôq jrơm a swich teh au, paich bơl bah m'oh n'haan u ttung chôr, paich bơl bah chuh pơsun, đươm mơq bei nei oh bi phrui teq lơơi swich teh au. 11Dôh ntil hei 'bian aan oh bi laa khơơm a mor a chhuôr n'hai paich bnih êch chôôl êêng laa oh bi baah leet jrôq jrơm, paich m'oh n'haan, paich chuh pơsun, paich raak daai, paich bnhưl bnhoq, paich ttung chôr, kot 'bưn sa pôl n'hai bnih bei nei. 12Hei pơrkat bơl bnih gôq agaih jah lơh ơơn? 'Bưn geh oh bi pơrkat bơl bnih a klung laang? 13Brah Ưn a kươi pơrkat bơl bah a gaaih.

“Phrui thot teq bơl bah ap than sot rlach oh bi.”

Currently Selected:

I Kô-rinh-tô 5: SBL2024

Highlight

Copy