Lukas 9

Yexus Txis Kawd Os tus Thwjtid Muz Qha Txuj Moo Zoo

1Yexus hu niz kawd os tug thwjtid luz, niz pus fwjchid tu cud liab taw daas has khu taw mos zoo. 2Tod qaas qhai, niz txis cud muz qha zaaj kwg has txug Vaajtswb lus Teschias has khu tej neeg kwg muaj mos. 3Yexus has tu cud tas, “Thaws mej muz, mej tsi xod nqaa is yaad daastsi muz, txiad yog tuz paas nreg, hnaas thoospuas, zaws mo, nyaj has rig tsho hlub los tsi xod nqaa ni. 4Txhua lus tseb kwg txaistoz mej, mej ca ni nyos muz txug thaws kwg mej tiad muz. 5Yog mej muz txug qhob twg, yog tsi muaj tuz twg hu mej muz su hub cud tej tseb, mej ca ni tiad hub lus nroog qhai muz, has nchus tej hmoob aab kwg lu mej kuatia, mej ua ni qhai kuas cud paws has tas cud muaj txid.”

6Cob thwjtid txiad muz tu txhua lus zoz, cud qha Txuj Moo Zoo has khu tej neeg muaj mos kwg nyos txhua qhob zoo hubtsig.

Helawj Ntxhub Sas

7Helawj tuz kwg ua nud kaab lus xeeb Kalilais, thaws niz hnob tej kwg Yexus ua qhai, niz ntxhub sas heeb; tu qhob muaj neeg has tas, Yawhaas tuz kwg muas neeg ua kebcai raws dej siab hub qhob tuag rob qaas luz liad, 8Muaj qeetuz has tas, yog Eliyas rob qaas luz tshwd tu tuadtxhij pud, has muaj qeetuz has tas, yog is tug ceb Vaajtswb luz txheej thaws siab rob qaas luz. 9Helawj has tas, “Kud ted muas Yawhaas txab caajdlaas liad; tuz kwg kud hnob moo na ho yog tuz twg?” Helawj hajyaad xaab pud Yexus heeb.

Yexus Muas Mo tu Tsis Txhas Tuz Noj

10Thaws cob tidthiaj rob qaas luz, cud qha txhua yaad kwg cud muz ua liad tu Yexus noog. Yexus coj cob tidthiaj muz tu is caag, muz tu tid lus nroog hu ua Npexaidas. 11Thaws cob neeg hnob has tas Yexus has niz cob thwjtid muz tu tid liad. Cud txiad rias Yexus qaas muz. Yexus zoo sas toz txais cud tuadtxhij, has qha zaaj kwg has txug Vaajtswb lus Teschias tu cud, has niz khu tuadtxhij kwg cheedtsud zoo mos hubtsig.

12Thaws hnoos yiad poos qho, kawd os tug thwjtid luz has tu Yexus has tas, “Koj ca ni kuas tuadtxhij muz nrhab zaws mo noj, has chia pw hub tej zoz has tej tes kwg nyos isncid ze qhai na, tu qhob qhai na nyos kes nroog.”

13Tadsis Yexus has tu cob thwjtid has tas, “Mej ca ni nrhab tu cud noj.”

Cob thwjtid tes has tas, “Pes tsuas muaj tsis lus ncuab has os tug ntsez nyaz. Koj xaab kuas pes muz yiad mo luz tu tuadtxhij noj los?” 14(Cob yiag kwg nyos qhais muaj kwblaad ni tsis txhas tuz.)

Yexus has tu niz cob thwjtid has tas, “Mej kuas tuadtxhij luz nyos ua tej paas, is paas twg tsis cawg tuz.”

15Cob thwjtid kuas tuadtxhij nyos rias ni Yexus has. 16Yexus muas tsis lus ncuab has os tug ntsez luz, niz tsaa qhobmuag nuad saw ntuj, has ua Vaajtswb tsawg, niz muas cob ncuab has os tug ntsez nkais ceb tu cob thwjtid coj muz fais tu tuadtxhij. 17Txhua tuz puabtsig taw noj tsaw hubtsig. Cob thwjtid muz saw tej kwg tuadtxhij noj tsi taaz taw kawd os tias.

Petus Has Tas Yexus Yog tuz Mexiyas

18Muaj is zag thaws Yexus tuas tug taastod thob Vaajtswb, niz cob thwjtid luz cuag niz. Yexus noog cud has tas, “Tej neeg tuadtxhij has tas kud yog tuz twg?”

19Cob thwjtid tes has tas, “Muaj qeetuz has tas koj yog Yawhaas tuz kwg muas neeg ua kebcai raws dej; muaj qeetuz has tas koj yog Eliyas, has muaj qeetuz has tas koj yog is tug qhai cob ceb Vaajtswb luz txheej thaws siab rob qaas luz.”

20Yexus noog cob thwjtid has tas, “Mej ne, mej tsua has tas kud yog tuz twg?”

Petus tes has tas, “Koj yog tuz Mexiyas kwg Vaajtswb txis luz.”

Yexus Has Txug Niz Keb Tuag

21Yexus txwb cob thwjtid tiab tiab has tas, “Mej tsi xod qha zaaj na tu tuz twg ni.” 22Has niz has ntxib tu cud tas, “Neeg Leej Tus yiad rawg keb tsidtxod ntaw yaad, has cob txwjlawg, cob thiaj qhai cob pobthiaj has cob xisfws kwg qha Vaajtswb txuj Kebcai, yiad tsi leez yuab niz. Cud yiad muas niz tua laidtaa, tadsis tod qaas qhai pes hnoos niz yiad siab hub qhob tuag rob qaas luz.”

23Has Yexus has tu cud tas, “Yog tuz twg xaab nrug kud muz, tuz qhai yiadtsud tso niz tuz kheej tseg, has naj hnoos kwb niz tuz ntoo khawslig nrug kud muz. 24Tu qhob tuz kwg khubxid niz txujsa, tuz qhai yiad tsi taw txujsa, tadsis tuz kwg tsi khubxid niz txujsa, vid niz ntseeg kud, tuz qhai yiad taw txujsa. 25Yog tuz twg taw is puas tsaab yaad hub ntajtes na luz ua niz tus, tadsis niz txujsa tu liad, tej qhai yiad muaj nqaid daastsi tu niz! 26Yog tuz twg thwstxaaj qha kud lus npe has kud tej luz, thaws Neeg Leej Tus tuz kwg muaj leej Vaid tuz tshwjchid kwg ci ntsaa as nrug cob tidtswb diashub luz saw ntuj luz, kud yiad thwstxaaj leez has tas, tuz qhai yog kud ni. 27Kud qha tsees tu mej has tas, cob neeg kwg nyos qhais na, muaj qeetuz yiad tsi taw tuag ua ntej cud pud Vaajtswb lus Teschias.”

Yexus Lus Ceb Hlub

28Yig hnoos tod qaas kwg Yexus qha tej qhai taaz, Yexus coj Petus, Yawhaas has Yakawnpaws nrug niz muz thob Vaajtswb pes roos. 29Thaws Yexus taastod thob Vaajtswb, Yexus lus ntsejmuag txiad hlub hlo, has niz ceb rig tsho ci ntsaa as dias pawg. 30Taadsij qhai muaj os tug yiag luz nrug Yexus thaad. Os tus qhai yog Mawxes has Eliyas. 31Ostug muaj tshwjchid ci ntsaa as has ostug nrug Yexus thaad txug tez hujlwd kwg Vaajtswb kuas Yexus ua, has yiad tab tu thaws Yexus tuag tu hub lus nroog Yeluxalees. 32Petus has Petus os tug phoojywz tsawg zawg heeb, tadsis cud tsid dheeb luz, cud pud Yexus tuz tshwjchid ci ntsaa as has muaj ostug yiag nrug Yexus siab qhai. 33Thaws os tug yiag qhai ncaid Yexus muz liad, Petus has tu Yexus has tas, “Tuz Tswb, pes tuaj nyos qhais na zoo heeb ni! Pes yiad ua pes lus tseb pheessuab, is lus tu koj, is lus tu Mawxes, has is lus tu Eliyas.” (Petus tsi paws xyob ua nyaab Petus has ni qhai.)

34Thaws Petus tseed taastod has ni qhai, txiad muaj is twb fuas luz rooz cud, cob thwjtid ntshai heeb ni. 35Has muaj is lus suas has hub twb fuas tuaj has tas, “Tuz na yog kud leej Tus kwg kud xaib ca liad, mej yiadtsud noog niz luz!”

36Thaws lus suas qhai has xaws liad, cud pud Yexus tuas tug nyos qhais nyaz. Pes tus thwjtid npug tej kwg cud pud qhai, tsi qha tu tuz twg paws ni.

Yexus Khu leej Tus Kwg Rawg Daag

37Hnoos tod qaas thaws Yexus has niz pes tug thwjtid nqaiz pes roos luz, muaj neeg coos coos tuaj cuag Yexus. 38Muaj is tug yiag hub paas neeg qhai hu Yexus nrob nrob has tas, “Xisfws! Kud thob koj paas kud tuz tu, kud muaj tuas leej tus na nyaz! 39Niz rawg daas. Thaws daas nkaas tu hub niz, taadsij qhai niz qw nrob nrob has fuad is thaaj, ua tu niz npuag ncawj tiad pliaz. Daas pheej tsidtxod niz has tsi yeed tiad hub kud tuz tu muz ni! 40Kud thob koj cob thwjtid liab daag tiad, tadsis cud liab tsi taw.”

41Yexus tes has tas, “Cob neeg tsi ntseeg has tsi ncaaj! Kud tseed yiad nrug mej nyos nteb nyaab? Has kud yiad ua sas nteb tu mej muz txug thaws twg?” Yexus has tu tuz yiag qhai has tas, “Ca ni coj koj tuz tu luz qhai na.”

42Thaws tuz mitus taastod luz, daas ua tu niz qawg kag tu hub aab, niz fuad is thaaj is thaaj has nti muz nti luz. Yexus txiad liab kuas daas tiad, Yexus khu leej tus qhai, has muas niz rob tu niz vaid. 43Cob neeg kwg pud Vaajtswb lus fwjchid kwg luj kiag nkaws qhai, cud xaab tsi thoos ni.

Yexus Rob Has Txug Niz Keb Tuag

Thaws tuadtxhij tseed pheej xaab tsi thoos tu txhua yaad kwg Yexus ua qhai, Yexus has tu niz cob thwjtid has tas, 44“Mej yiadtsud ncu ntsoob tej kwg kud qha tu mej na! Lag yiad ntez Neeg Leej Tus coj muz tu neeg tsidtxod.” 45Tadsis cob thwjtid tsi totaws lus ntsas luz kwg Yexus has qhai ni. Yexus tsi qha lus ntsas luz tu cud, cud ha tsi paws, has cud ntshai noog Yexus txug zaaj qhai.

Tuz twg Yiad Taw Ua tuz Luj Dua Ntais?

46Cob thwjtid sis caab has tas, tuz twg yiad taw ua tuz luj dua ntais? 47Yexus paws tej kwg cud xaab qhais cud lus sas, niz txiad coj is tug minyuas yaw luz siab qhai niz is saas, 48has niz has tu cud tas, “Tuz kwg leez yuab tuz minyuas yaw na luz qhai kud lus npe, kuj yog niz leez yuab kud; has tuz kwg leez yuab kud, yog niz leez yuab tuz kwg txis kud luz. Tu qhob tuz kwg yaw dua ntais hub mej cob, tuz qhai ha yog tuz kwg luj dua ntais.”

Tuz Kwg tsi Tiadtsaad Mej, tuz qhai Yog Mej Paas

49Yawhaas has tas, “Tuz tswb, pes pud is tug yiag tuab koj lus npe liab daas. Pes txwb tsi pus niz ua ni qhai tu qhob niz tsi yog pes paas.”

50Yexus has tu Yawhaas has cob thwjtid has tas, “Mej tsi xod txwb niz, tu qhob tuz kwg tsi tiadtsaad mej, tuz qhai yog mej paas.”

Cob Xamalis tsi Pus Yexus Muz hub Cud Lus Zoz

51Thaws ze lus sijhiad kwg Vaajtswb yiad coj Yexus muz saw ntuj ceestsheej, Yexus txabtxid sas muz nraaz lus nroog Yeluxalees. 52Yexus txis is cob neeg ua niz ntej muz, cud muz tu hub cob Xamalis is lus zoz, has muz npaaj txhua yaad toz Yexus. 53Tadsis cob neeg Xamalis tsi pus Yexus muz tu hub cud lus zoz, tu qhob cud paws has tas Yexus yiad muz nraaz lus nroog Yeluxalees. 54Thaws Yakawnpaws has Yawhaas kwg yog Yexus os tug thwjtid hnob ni qhai, ostug has tu Yexus has tas, “Tuz Tswb, koj puas kheeb pes hu hluabtiaz poos saw ntuj luz hliab cob neeg qhai kuas puadtsuaj?”#9.54 Tej phaw qus has tas, is yaad ni Eliyas taw ua.

55Yexus tig hlo muz nthe ostug.#9.55 Tej phaw qus has tas, “Mej tsi paws has tas tuz ntsujplig twg; yog tuz kaab mej lus sas; tu qhob Neeg Leej Tus tsi yog luz rhuab neeg txujsa kuas puadtsuaj, tadsis yog luz ciad kuas cud kig.” 56Ces Yexus has cob thwjtid tiad muz kua lwd lus zoz liad.

Tuz Kwg Xaab Nrug Yexus Muz

57Thaws cud taastod tawgkeb muz, muaj is tug yiag has tu Yexus has tas, “Kud yiad nrug koj muz. Txiad yog koj muz qhob twg los kud yiad nrug koj muz.”

58Yexus tes tuz qhai has tas, “Txiad yog hmaa los muaj qhob nkawd, has noog saw ntuj los muaj zez, tadsis Neeg Leej Tus tsi muaj chia pw.”

59Yexus has tu lwd tuz yiag has tas, “Koj ca ni nrug kud muz.”

Tadsis tuz qhai tes has tas, “Tuz Tswb, thob ca kud muz loz kud vaid taws, kud maad ni nrug koj muz.”

60Yexus tes has tas, “Ca cob neeg tuag loz cud tuz tuag. Koj ca ni muz qha zaaj kwg has txug Vaajtswb lus Teschias.”

61Muaj kua is tug yiag has tas, “Tuz Tswb, kud yiad nrug koj muz; tadsis ca kud muz has tu kud tseb neeg paws taws.”

62Yexus has tu tuz qhai tas, “Yog tuz twg taastod tuab khais laij laj, tadsis niz pheej tig nuad rob tod qaas, tuz qhai tsi tsidnyog tu Vaajtswb lus Teschias.”

Currently Selected:

Lukas 9: CQD2024

Highlight

Copy