Lukas 22
22
Cob Thiajcoj Nrhab Keb Ntez Yexus
1Thaws yiad txug lus sijhiad ua Kebcai Noj Ncuab tsi xyia Xaas kwg hu ua Kebcai Hlaa Dhaw. 2Cob thiaj qhai cob pobthiaj has cob xisfws kwg qha Vaajtswb txuj Kebcai ntshai cob pejxeed, yog ni qhais cud txiad nrhab keb yiad ntez Yexus tuasyws coj muz tua.
Yudas Ntxeeb Sas tu Yexus
3Xataas tshoob Yudas Ixakali-us tuz kwg yog is tug qhai kawd os tug thwjtid sas. 4Yudas has tu cob thiaj qhai cob pobthiaj, has cob thiaj tusrog kwg zub lus Tuadtseb has tas, niz yiad coj cud muz ntez Yexus nyaab. 5Cud zoo sas has txaws sas yiad muas nyaj tu Yudas. 6Yudas pud zoo ni cud has, niz txiad nrhab sijhiad coj cud muz ntez Yexus thaws tsi muaj neeg pud.
Npaaj Pluag Mo Ua Kebcai Hlaa Dhaw
7Thaws txug hnoos kwg ua Kebcai Noj Ncuab Tsi Xyia Xaas kwg yog hnoos kwg cud tua minyuas yaaj noj ua Kebcai Hlaa Dhaw. 8Yexus txis Petus has Yawhaas, has qha tu ostug has tas, “Mej ca ni muz npaaj pluag mo ua Kebcai Hlaa Dhaw tu pes noj.”
9Ostug noog Yexus has tas, “Koj xaab kuas pes muz npaaj tu qhob twg?”
10Yexus tes has tas, “Thaws mej muz txug hub lus nroog, yiad muaj is tug yiag kwb is lus hus dej luz ntsis mej. Mej ca ni rias niz qaas muz hub tseb 11has has tu tuz tswb tseb tas, ‘Tuz Tswb has tas, koj yiad muas chaab twg tu kud has kud cob thwjtid noj pluag mo ua Kebcai Hlaa Dhaw?’ 12Tuz tswb tseb yiad coj mej muz qha is chaab kaab kaab kwg nyos txheej saw has ted muaj rooj muaj toz txhij liad tu mej, mej ca ni npaaj txhua yaad tu qhob qhai.”
13Ostug txiad muz has pud muaj txhua yaad rias ni Yexus has, has ostug npaaj pluag mo ua Kebcai Hlaa Dhaw tu qhob qhai.
Tuz Tswb Rooj Mo
14Thaws txug sijhiad noj mo liad, Yexus has Yexus cob tidthiaj luz nyos qhais rooj mo. 15Yexus has tu cud tas, “Kud xaab nrug mej noj pluag mo ua Kebcai Hlaa Dhaw na, ua ntej kwg kud rawg keb tsidtxod! 16Kud qha tu mej has tas, ‘Txij na muz kud yiad tsi noj ni na muz txug hnoos kwg pluag mo ua Kebcai Hlaa Dhaw tab nyos hub Vaajtswb lus Teschias.’ ”
17Yexus muas khos ciab txib hmaas luz ua Vaajtswb tsawg has has tas, “Mej ca ni txais lus khos na muz haws. 18Kud qha tu mej has tas, txij na muz kud yiad tsi haws cob ciab txib hmaas na muz txug hnoos kwg Vaajtswb lus Teschias luz.”
19Yexus muas is lus ncuab luz ua Vaajtswb tsawg, niz muas nkais fais tu cud has has tas, “Qhai na yog kud lus ceb kwg kud muas pus tu mej. Mej ua ni na, mej has ncu ntsoob kud.” 20Thaws cud noj mo taaz, Yexus muas is khos ciab txib hmaas luz ua is yaad nkaws ni qhai, niz has tas, “Lus khos na yog Vaajtswb txujlug cog tseg tshas kwg muaj kud cob ntshaab#22.20 Tej phaw qus tsi muaj Yexus cob luz kwg has tas, na yog kud lus ceb, hub nqai 19 has taaznrhiab nqai 20. ntwz luz ua lus hodthiaj nas tu liad.
21“Tadsis mej nuad, tuz kwg ntxeeb sas tu kud, niz nrug kud nyos qhais rooj na ntag! 22Neeg Leej Tus yeej yiad tuag rias ni Vaajtswb npaaj tseg liad, tadsis tuz kwg ntxeeb sas tu Neeg Leej Tus, niz yiad rawg keb puadtsuaj!”
23Ces cob tidthiaj txiad sis noog has tas, pes tug twg yog tuz yiad ua ni qhai?
Sis Caab Has Tas Tuz twg Yiad Taw Ua tuz Luj dua ntais
24Cob thwjtid sis caab has tas, “Pes tuz twg yiad taw ua tuz luj dua ntais?” 25Yexus has tu cud tas, “Lwd yaad neeg cob vaajntxwb kwg muaj fwjchid kaab cud tej pejxeed, has tej nudtswb kwg muaj fwjchid hu cud has tas, ‘Cob kwg nuad cob Pejxeed.’ 26Tadsis mej tsi xod ua ni qhai; mej cob yog tuz twg xaab ua tuz hlus, tuz qhai yiadtsud ua is yaad ni yog tuz yaw, has tuz twg yog tuz thiajcoj, tuz qhai yiadtsud ua is yaad ni tuz tusqhe. 27Tuz twg yog tuz luj kua? Tuz kwg nyos tuasyws noj mo lossis tuz tusqhe? Ted yog tuz kwg nyos tuasyws noj mo ntag. Tadsis kud nrug mej nyos, kud ua is yaad ni tuz tusqhe.
28“Txhua lus sijhiad kwg kud rawg keb txodnyed, mej tsi taw tso kud tseg; 29kud Vaid tsaa kud ua tuz muaj fwjchid kaab lus teschias nyaab, kud yiad tsaa mej kuas muaj fwjchid is yaad ni qhai. 30Mej yiad taw nrug kud noj has haws nyos qhais kud lus rooj hub kud lus Teschias, has mej yiad taw nyos saw lus zwdtxwb txabtxid tu kawd os xeed Yixalayees.”
Petus Yiad tsi Leez Paws Yexus
31Yexus has tas, “Ximoos, Ximoos! Koj noog kud has! Vaajtswb ted ca Xataas luz sid mej tuadtxhij sas liad, muas tuz zoo cais tiad qhai tuz phed, is yaad ni tuz yaaj nplej muas vaas ntxuaj cob npluag tiad qhai cob nplej. 32Tadsis Ximoos, kud ted thob Vaajtswb paas koj liad, kuas koj muas sas raws ntseeg. Has thaws koj luz cuag kud, koj yiadtsud txhias koj cob kwbtij zug.”
33Petus tes has tas, “Tuz Tswb, kud txaws sas nrug koj rawg kia tu hub tseb yuajphuas has tuag nrug koj!”
34Yexus has tas, “Petus, kud qha tu koj has tas, hmo na thaws qas tsi taw qua, koj yiad has pes zag has tas, koj tsi paws kud.”
Hnaas Txaj, Hnaas Thoospuas, has Raas Ntaaj
35Ces Yexus noog cud has tas, “Zag taaz luz kud txis mej muz, mej tsi nqaa hnaas nyaj, hnaas thoospuas has khaw, mej puas tu ncua is yaad daastsi?”
Cud tes has tas, “Pes si tu ncua daastsi ni.” 36Yexus has tas, “Tadsis nizna, tuz kwg muaj hnaas nyaj lossis hnaas thoospuas, tuz qhai yiadtsud nqaa muz; tuz kwg tsi muaj ntaaj, niz yiadtsud muas niz lus tsho luj muas has muz yuad is raas ntaaj. 37Kud qha tu mej has tas, Vaajtswb txujlug has tas, ‘Lag suab niz nrug cob neeg muaj txid.’ Lu luz kwg has txug kud qhai yeej yiad tab, tu qhob tej kwg saw has txug kud qhai taastod yiad tab.”
38Cob thwjtid has tas, “Tuz Tswb, koj nuad qhai na! Pes muaj os raas ntaaj!”
Yexus tes has tas, “Tsi xod has ntxib liad!”#22.38 Tsi xod has ntxib liad; lossis yiad ni qhai nyaz taw liad.
Yexus Thob Vaajtswb saw Roos Txibntoo Roj
39Yexus tiad hub lus nroog muz tu pes Roos Txibntoo Roj rias ni niz istxwd muz; has cob thwjtid nrug niz muz. 40Thaws cud muz txug pes, Yexus has tu cud tas, “Mej yiadtsud thob Vaajtswb, keb sid sas has ntxaz tsi taw mej.”
41Yexus txiad ncaid cud muz nrug kes kwblaad ni laid is lus poszes, niz txhud cawg hlo tu qhais is saas poszes has thob Vaajtswb has tas, 42“Vaid, yog koj pud zoo, thob koj muas lus khos na tshed qhai kud muz. Txiad yog nyaab los koj tsi xod ua rias ni kud lus sas nyad, tadsis ua rias ni koj lus sas nyad nyaz.” 43Muaj is tug tidtswb ceestsheej tshwd luz tu Yexus pud has txhias Yexus zug. 44Yexus nyuaj sas kiag nkaws, niz hajyaad sis zug thob Vaajtswb heeb; niz tiad fws zoo ni ntshaab nrug tu hub aab.#22.44 Tej phaw qus tsi muaj nqai 43-44.
45Thaws Yexus thob ni qhai taaz, niz siab muz tu qhais cob thwjtid, has niz pud cud tsawg zawg taaz liad, Tu qhob cud nyuaj sas heeb. 46Yexus has tu cud tas, “Ua nyaab mej yiad tsawg zawg ua luaj? Mej ca ni siab has thob Vaajtswb, keb sid sas has ntxaz tsi taw mej.”
Ntez Yexus
47Thaws Yexus taastod has ni qhai, muaj is paas neeg coos coos tuaj txug, Yudas kwg yog is tug qhai kawd os tug thwjtid coj cob neeg qhai tuaj. Niz txaab zoz luz yiad hna Yexus. 48Tadsis Yexus has tas, “Yudas, koj yiad hna Neeg Leej Tus qha tu cud ntez niz los?”
49Thaws cob thwjtid kwg nrug Yexus pud has tas yiad muaj xwd, ces cud txiad has tas, “Tuz Tswb, koj puas kheeb pes muas ntaaj tua cud?” 50Cob thwjtid is tug rhu hlo ntaaj luz tuas ntag tu tuz Pobthiaj Hlus is tug qheb saas nploojntseg xis tu nrhiab.
51Tadsis Yexus has tas, “Xod ua ni kod!” Yexus ceb tez muz tuab Tuz qhai lus nploojntseg has khu rob zoo ni qus liad.
52Ces Yexus has tu cob thiaj qhai cob pobthiaj, cob thiaj tusrog kwg zub lus Tuadtseb, has cob txwjlawg kwg tuaj ntez Yexus qhai has tas, “Mej nqaa ntaaj nqaa qws tuaj ntez kud, is yaad ni kud yog tusnyas los? 53Kud ted naj hnoos nrug mej nyos hub lus Tuadtseb, mej has tsi ntez kud? Tadsis nizna ted txug mej lus sijhiad has txuj keb tsaws ntuj lus fwjchid kaab liad.”
Petus tsi Leez Paws Yexus
54Cud ntez Yexus has coj niz muz tu hub tuz Pobthiaj Hlus tseb; Petus rias qaas muz nrug kes kes. 55Muaj neeg rawb is qhobcug tu qhais lus tshaab taj, Petus txiad muz nrug cob neeg qhai nte tiag. 56Muaj is tug ntxhais qheb pud Petus nyos qhais is saas qhobcus, niz nuad ntsoob Petus has has tas, “Tuz yiag na yog is tug kwg nrug Yexus has!”
57Tadsis Petus has tas, “Tuz muad, kud yeej tsi paws tuz qhai ni!”
58Tod qaas qhai isntsis, muaj is tug yiag pud Petus has has tas, “Koj yog cud paas qhai is tug has los sab!”
Tadsis Petus has tas, “Vaid yiz, kud tsi yog!”
59Tod qaas qhai kwblaad ni kwg is teeb tsoos, txiad muaj kua is tug yiag has tu tuadtxhij tas, “Tuz na yeej yog is tug kwg nrug Yexus nyos tag tag ni, tu qhob niz yog is tug neeg Kalilais has!”
60Tadsis Petus tes has tas, “Tijlawg, tej kwg koj has ko kud yeej tsi paws ni!”
Thaws Petus taastod has ni qhai, taadsij qhai qas txiad qua. 61Tuz Tswb tig muz nuad Petus, ces Petus txiad ncu dheeb txug lu luz kwg tuz Tswb has tu niz tas, “Hmo na thaws qas tsi taw qua, koj yiad has pes zag has tas, koj tsi paws kud.” 62Petus tiad muz tusaas nraw has quaj tu sas heeb ni.
Cud Ua Nuad tsi Tawz Yexus
63Cob neeg kwg zub Yexus, ua nuad tsi tawz niz has ntaws niz. 64Cud muas duas luz paab Yexus qhobmuag has noog Yexus has tas, “Koj sid twb nuad yog tuz twg ntaws koj?” 65Has cud thuad Yexus ntaw yaad.
Cob Nudtswb Tawg Yexus Zaaj
66Thaws pud keb liad, cob txwjlawg, cob thiaj qhai cob pobthiaj, has cob xisfws kwg qha Vaajtswb txuj Kebcai tuaj saaslaaj ua ke, has cud kuas coj Yexus tuaj siab taasmeeg cud. 67Cud has tu Yexus has tas, “Koj qha tu pes nuad, koj puas yog tuz Mexiyas?”
Yexus tes has tas, “Txiad yog kud qha mej los mej yiad tsi ntseeg; 68has yog kud noog mej los mej yiad tsi tes kud; 69Tadsis txij na muz Neeg Leej Tus yiad nyos qhais Vaajtswb tuz kwg muaj fwjchid luj kiag nkaws saas xis.”
70Cud tuadtxhij txiad noog has tas, “Koj yog Vaajtswb leej Tus los?”
Yexus tes cud has tas, “Mej has yog liad.”
71Cud has tas, “Tsi taaz pes yiad nrhab tidkhiab ntxib liad! Tu qhob pes ted hnob niz has liad!”
Currently Selected:
Lukas 22: CQD2024
Highlight
Share
Copy
Want to have your highlights saved across all your devices? Sign up or sign in
© 2024 Bible Society Vietnam. All rights reserved.
