Yawhaas 21

Yexus Luz Tshwd tu Xyaa Tuz Thwjtid Pud

1Tod qaas qhai, Yexus rob luz tshwd tu niz cob thwjtid pud nraaz ntug Habtxwb Tinpeli-as; has qhob kwg niz luz tshwd tu cud pud muaj ni na. 2Ximoos Petus, Thaumas (tuz kwg muaj kua is lus npe hu ua Ntxais), Nathana-ees (tuz kwg nyos hub lus zoz Kanas pes xeeb Kalilais), Xenpedais os tug tu, has muaj kua os tug qhai Yexus cob thwjtid tuaj nyos ua ke. 3Ximoos Petus has tu cob thwjtid qhai tas, “Kud yiad muz ntaws ntsez.”

Cud has tu Petus has tas, “Pes yiad nrug koj muz has.” Cud txiad nce tu hub nkoj, hmo qhai cud ntaws ntsez is mos, tadsis tsi taw is tug ntsez ni. 4Thaws pud keb zuas, Yexus luz siab tid ntug dej, tadsis cob thwjtid tsi paws has tas yog Yexus. 5Yexus noog cud has tas, “Cob hluas, mej ntaws tsi taw ntsez ni los?”

Cud tes has tas, “Ntaws tsi taw is tug ni.”

6Yexus has tu cud tas, “Mej ca ni ntaws mej lus vaaz tu qhais lus nkoj saas xis tu hub ha yiad taw ntsez.” Yog ni qhai, cud txiad muas lus vaaz ntaws tu hub has lus vaaz maas taw ntsez ntaw heeb, cud nquz tsi taw lus vaaz luz tu hub nkoj ni.

7Tuz thwjtid kwg Yexus hlus has tu Petus has tas, “Tuz siab tid yog pes tug Tswb ntag los sab!” Thaws Ximoos Petus hnob dheeb has tas pes tug Tswb, Petus txiad muas niz lus tsho nteb luz hnaab (Tu qhob niz muas hle liad) niz txiad dha tu hub habtxwb. 8Cob thwjtid kwg tseed nyos hub lus nkoj, cud nkuad lus nkoj has nquz lus vaaz kwg maas ntsez pub nkaws luz tu qhais ntug dej, tu qhob cud nyos tsi kes qhai ntug dej kwblaad ni tsib cawd dlaaj nyaz. 9Thaws cud muz txug tid ntug liad, cud pud is cus thee cig ntsaa thuab muaj ntsez has ncuab ci nyos saw cus thee qhai. 10Yexus has tu cud tas, “Mej ca ni coj cob ntsez kwg mej qhos ni ntaws taw tuz puab luz qhai na.”

11Ximoos Petus nce tu hub lus nkoj nquz lus vaaz kwg maas taw ntsez pub nkaws qhai luz tu tid ntug, cob ntsez luj kwg cud ntaws taw qhai muaj is puas tsib cawd pes tug, txiad yog maas taw ntsez ntaw npawd ni qhai los lus vaaz tsi ntua is qho ni. 12Yexus has tu cud tas, “Mej ca ni luz noj tshai.” Cob thwjtid tsi muaj is tug muaj cuaskaab noog Yexus has tas, “Koj yog tuz twg?” Tu qhob cud paws has tas niz yog cud tuz Tswb. 13Yog ni qhai, Yexus txiad muz muas ncuab has muas ntsez luz fais tu cud noj.

14Tod qaas kwg Yexus siab hub qhob tuag rob qaas luz liad, niz luz tshwd tu cob thwjtid pud pes zag tu zag na.

Yexus has Petus

15Thaws cud noj tshais taaz liad, Yexus has tu Ximoos Petus has tas, “Ximoos Yawhaas leej tus, koj hlus kud tshaaj cud cob na los?”

Ximoos tes Yexus has tas, “Tuz Tswb, koj yeej paws has tas kud hlus koj.”

Yexus has tu Ximoos has tas, “Koj ca ni yug kud cob minyuas yaaj.” 16Yexus rob has kua zag os has tas, “Ximoos Yawhaas leej tus, koj puas hlus kud?”

Ximoos tes Yexus has tas, “Tuz Tswb, koj yeej paws has tas kud hlus koj.”

Yexus has tu Ximoos has tas, “Koj ca ni yug kud paas yaaj.” 17Yexus rob has kua zag pes has tas, “Ximoos Yawhaas leej tus, koj puas hlus kud?”

Petus mos sas heeb tu qhob Yexus noog Petus pes zag has tas, “Koj puas hlus kud?” Petus txiad has tu Yexus has tas, “Tuz Tswb, koj yeej paws is puas tsaab yaad hubtsig; koj yeej paws has tas kud hlus koj.”

Yexus has tu Petus has tas, “Koj ca ni yug kud paas yaaj. 18Kud qha tsees tu koj has tas, thaws koj tseed hluas koj xaab muz qhob twg, koj ca ni tu ceb zoj zeeg muz nyaz. Tadsis thaws koj lawg liad, koj yiad xyaas tez tu lag khi has lag yiad coj koj muz tu qhob chia kwg koj tsi xaab muz.” 19(Yexus has ni qhai, yog Yexus has tas, Petus yiad tuag nyaab ha ua tu Vaajtswb taw koos meej.) Yexus has tu Petus has tas, “Koj ca ni nrug kud muz.”

Yexus has tuz Thwjtid Kwg Yexus Hlus

20Petus tig luz pud tuz thwjtid kwg Yexus hlus nyos tod ostug qaas; niz yog tuz kwg txaab luz tu qhais Yexus thaws cud noj hmo has noog has tas, “Tuz Tswb, tuz twg yog tuz kwg yiad ntxeeb sas tu koj?” 21Thaws Petus pud tuz thwjtid qhai, Petus noog Yexus has tas, “Tuz Tswb, ua ni tuz yiag na ne, tod qaas na niz yiad zoo nyaab?”

22Yexus tes Petus has tas, “Yog kud ca niz nyos muz txug hnoos kwg kud rob qaas luz, yeej tsi ua nyaab tu koj. Koj ca ni nrug kud muz!”

23Zaaj qhai nrob nchaa muz thoos pliaz tu tej kwbtij tuadtxhij has tas, tuz thwjtid qhai yiad tsi tuag. Tadsis Yexus tsi taw has tas, tuz thwjtid qhai yiad tsi tuag; Yexus has tas, “Yog kud ca niz nyos muz txug hnoos kwg kud rob qaas luz, yeej tsi ua nyaab tu koj?”

24Tuz thwjtid qhai yog tuz kwg ua tidkhiab has tej luz na has muas saw tseg tu hub ntiab; has pes paws has tas tej luz kwg niz has yeej muaj tsees.

Cob Luz Xaws

25Tseed muaj ntaw yaad kwg Yexus taw ua taaz luz liad. Yog yiad muas tej qhai saw tseg hubtsig tu hub ntiab, kud xaab has tas lus ntajtes na yiad tsi muaj chia txaws ntid tej ntiab qhai.

Currently Selected:

Yawhaas 21: CQD2024

Highlight

Copy