Chibkees 15

Vaajtswb Cogluz tu Anplaas

1Tod qaas qhai Anplaas ua yugtoog has hnob tuz Tswb has tu niz tas, “Anplaas, koj tsi xod ntshai. Kud yiad ua daid hlaw thaib koj has kud yiad muas tej nqai zug kwg zoo heeb tu koj.”

2Tadsis Anplaas tes has tas, “Tuz Tswb kwg kaab is puas tsaab yaad, kud yeej istxwd tsi muaj tus, koj yiad muas nqai zug zoo tu kud ua daastsi? Tuz kwg yiad tuab kud tej qustxeeg qusteg, ces yog Eli-exes kwg yog neeg Damaxes#15.2 kud … Damaxes; phaw Henplais has tsi meej. nkaws nyaz. 3Koj ted tsi pus minyuas tu kud, ntshai yiad kiag kud muas kud tej qustxeeg qusteg tso tu kud is tug tusqhe kwg yug hub kud tseb ua tuz tuab.”

4Ces dhaw qhai luz, niz rob qaas hnob tuz Tswb has tu niz is zag ntxib tas: “Tuz tusqhe Eli-exes yiad tsi taw ua tuz tuab koj tej qustxeeg qusteg, koj tuz tus kwg koj yug ha yog tuz kwg yiad tuab koj tej qustxeeg qusteg.” 5Vaajtswb coj Anplaas tiad muz tu nraw zoob has has tu niz tas, “Koj tsaa qhobmuag nuad saw ntuj has suab cob hnoosqus saw nuad koj suab puas txhas, koj yiad muaj xeesntxwz coos npawd ni tej hnoosqus qhai ntaag.”#Loo 4.18; Hen 11.12

6Anplaas ha ca sas ntsoob tu tuz Tswb tej lug. Vid niz muaj keb ca sas, tuz Tswb ha txaws sas heeb tu niz has suab has tas niz yog is tug neeg ncaajnceeg.#Loo 4.3; Kal 3.6; Yak 2.23

7Ces tuz Tswb has tu niz tas, “Kud yog tuz Tswb kwg coj koj keb tiad hub lus nroog Ules kwg nyos hub teschias Npanpiloos luz, has kud yiad muas lus teschias na pus tu koj ua koj tug muz ni.”

8Tadsis Anplaas noog has tas, “Tuz Tswb kwg kaab is puas tsaab yaad, yiad ua nyaab kud ha paws has tas lus teschias na yog kud tug tag?”

9Tuz Tswb tes has tas, “Koj ca ni coj is tug nyuj, is tug tshis has is tug phia yaaj, mas pes tug tsaj na is tug twg yiadtsud muaj hnoosnyood pes xyoos, is tug nquas dias has is tug nquas nyeg tuaj fij tu kud.” 10Anplaas coj tej tsaj na tuaj tua fij tu Vaajtswb, has muas tej tsaj qhai phua ua os saas, muas is saas tso tu is qho ua os leej sis ncaag zog, tadsis niz tsi phua os tug noog. 11Thaws daab npoj yaa luz tsias tu saw cob nqaj qhai, niz txiad muas tej daab qhai rias yaa hubtsig liad.

12Thaws kwg lus hnoos yiad poos qho, Anplaas txiad tsawg zawg heeb, has muaj is qho tsaws nti luz rooz nkaws niz ua tu niz ntshai heeb ni.#Yawj 4.13,14 13Tuz Tswb has tu niz tas, “Koj tej xeesntxwz yiad muz nrug cob neeg txiab teschias nyos, cud yiad muz ua lag qheb nyos lus teschias qhai has yiad rawg keb quasyuad tsidtxod muz txug plaws puas xyoo.#Tsk 1.1-14; Tez 7.6 14Tadsis kud yiad raw txid tu yaad neeg kwg quasyuad cud ua qheb qhai, has thaws cud tiad hub lus teschias qhai luz, cud yiad coj nyaj txag txhua yaad ntaw heeb nrug cud luz.#Tsk 12.40-41; Tez 7.7 15Tadsis koj yiad ua neej nyos lawz nkooz, kaajsas lug muz txug hnoos tuag, has koj tej xeesntxwz yiad coj koj lus ceb muz loz. 16Tod qaas kwg dhaw plaws tad neeg liad, koj cob xeesntxwz yiad taw rob qaas luz tu qhais na, tu qhob kud yiad tsi liab cob neeg Amawles tiad muz txug thaws cud ua keb phed keb qas kuas txaws kud raw txid tu cud tso.”

17Thaws hnoos poos qho has tsaws ntuj kag liad, taadsid qhai txiad muaj is qhobcug nchu paa awb nas has is teg tsaw cig laad lug tshwd luz phua plhiab ked nruasnraas qhais cob nqaj tsaj qhai muz liad. 18Hnoos qhai tuz Tswb txiad cogluz tseg tu Anplaas has tas, “Kud yiad muas taaznrhiab lus teschias na pus tu koj cob xeesntxwz, txij ntua qhais Izib nridtes luz muz txug ntua tu qhais tuz Dej Efalates, #Tez 7.5 19kua ni qhai, kud tseed muas cob Kenis, cob Kenixis, cob Kamoos, 20cob Hitis, cob Pelixes, cob Lefayees, 21cob Amawles, cob Kana-aas, cob Nkinkasis has cob Yenpus tej teschias pus tu koj cob xeesntxwz hubtsig.”

Currently Selected:

Chibkees 15: CQD2024

Highlight

Copy