Marcos 16

Usif Jesus nmoni nfain!

(Mateus 28:1-8; Lucas 24:1-12; João 20:1-10)

1Mbi in nmeu-nokaꞌ, neon neeꞌ, atoni Judeu sin neon onen. Olas maans aa nmouf, nalali te, bi Maria naꞌko kuan Madala, bi Maria bian antein (naꞌ Tiago in enaf), ma nok bi Salome, sin nnaon nsosan miin foo meni, he nmeu-nokaꞌ te, sin he nnaon npoip neu Jesus In aon nitun natuin atoni Judeu sin nonot. 2Mbi neno ꞌnaek, fe fafai anaꞌ, sin teun sin nnaon neu bool fatu nitu nane. 3-4Mbi lalan in aꞌtnanan, sin namoolk in mnak, “Anei! Sikau es lof nahuil naꞌaib kit fatu ꞌnaek mbi bool fatu in enoꞌ nane? Namneo, hit teun kit ii tahuil fatu ka tabeiꞌ fa, fun fatu nane ꞌnaek anneis!”

Mes olas sin ntenuk nae, sin niit fatu nane nahuil on ee. 5Oke te, sin ntaam onuk bool fatu nane. Ma sin naskeek ma namtaun, fun sin niit liꞌaan mone meseꞌ ntook mbi sin banaapk in aꞌneꞌu. In natai sabaul muit oe meꞌu. 6Ma liꞌaan mone nane, natoon sin mnak, “Hi kais mimtau! Au uhiin ki hi eim he maim Jesus, atoni Nazaré, leꞌ sin naꞌmaet Ee mbi hau nehe. In ka es fa ije be, fun In nmoni nfani ee. Eim, hi mail kim bale leꞌ sin natupaꞌ Jesus In aon nitun. Luumn ee! 7Hi mfain sabake nai! Mnao mitonan sin Pedro mak, Jesus nmoni nfani ee. In nnao nahunu ee, es Galilea. Lof sin naꞌeuk nok Usif Jesus mbi nae, on leꞌ unuꞌ In natonan nain neu sin. Hi mfain nai!”#Mateus 26:32; Marcos 14:28

8Olas bifeel in niit bale nane luman, sin naskeken ma namtaun. Oke te, sin naen anpoin. Ma sin naen anfain sabake-sabakeꞌ neu ume. Sin ka natonan fa neu es-am-es mbi lalan, fun sin namtaun nneis.

Usif Jesus naꞌeuk nok bi Maria naꞌko kuan Madala#16:9 Lulat lasi Gregu leꞌ ahun-hunut ma leꞌ naleko nneis, naꞌtuuꞌb on es elaꞌ 8. Naꞌ Marcos in tonas namsoup be neik lasi nonoꞌ nua. Es amnanu (Marcos 16:9-20), ma esa naꞌpaal (Marcos 16:9-10).

(Mateus 28:9-10; João 20:11-18)

9Neno ꞌnaek nok-nok anaꞌ, Usif Jesus nalileꞌ nahuun In human neu bi Maria naꞌko kuan Madala, leꞌ unuꞌ Usif Jesus nliuꞌ napoin pah-tuaf hiut naꞌko heꞌ. 10In nail nalail Usif Jesus, ma in nnao nfain he natoon atoni ok-okeꞌ leꞌ unuꞌ natuin Jesus. Sin fe nabuab ok nok neek susal, ma nok sin nkaen namnau Jesus In aꞌmaten. 11Oke te, Maria natonan neu sin mnak, “Anasaaꞌ te hi neekm in fe msusal? Mileko hi neekm in nai, fun Usif Jesus nmoni nfani ee! Alelo, au uꞌeku mbi nae!”

Mes sin ok-okeꞌ natae mnak, “Huus! Ho muꞌmoel aah!”

Usif Jesus nalileꞌ In human neu atoni nua ntein

(Lucas 24:13-35)

12Nalali te, Jesus In asium-noinaꞌ sin, atoni nua, nnaon neu kuan es. Mbi lalan tnanan, Usif Jesus nalileꞌ In human neu sin, ma In nabaij on. Mes neka ntee ꞌloo, sin nahiin Ee. 13Nalali te, nua sin nnaon nfanin, ma natonan sin aok-biak in mnak, “Hoee! Mneen ije feꞌ! Lelo leꞌ ii, hai miꞌeuk mok Usif Jesus mbi lalan!”

Mes sin aok-biak in nataen mnak, “Huus! Hi nua ki kais miꞌmoeb kai on naan!”

Usif Jesus naꞌeuk nok In asium-noinaꞌ sin ok-okeꞌ

(Mateus 28:16-20; Lucas 24:36-49; João 20:19-23; Apostolu sira nia Istoria 1:6-8)

14Oke te, Usif Jesus nalileꞌ In human neu In asium-noinaꞌ sin boꞌes am meseꞌ, olas sin ntoko mnahan. Ma In nabokan sin mnak, “Akoi! Hi neekm in feꞌ namanun on fatu! Atoni natonan nalail ki nak, sin niit Kau neik sin maatk ini, mes hi ka mpalsaif! Hi mak sin naꞌmoen! Olas ii, Au oum aꞌmees. Namneo Au ꞌmaet, mes olas ii, Au ꞌmoni ꞌfani ee! Hi nabeiꞌ mail kim.

15Es on nane te, hi musti mnao mipuun pah-pinan fuun am nateef, he mitoon ma msaksii Au Laes Alekot ii neu atoni ok-okeꞌ.#Apostolu sira nia Istoria 1:8 16Sikau es anpalsai neu Kau, ma maslaniꞌ, lofa Uisneno nfee ne ꞌhonis, he in nabala piut nok Uisneno mbi neno tunan. Mes sikau es ka npalsai neu Kau, lofa Uisneno nfee ne haꞌmuꞌit nabal-baal, ma Uisneno nliuꞌ napoi ne neu moneꞌ. 17Ma sikau es anpalsai neu Kau, sin lofa nmoeꞌ lasi takaf humaꞌ-humaꞌ, henati atoni ok-okeꞌ nahinen mnak, sin abeiꞌk ini neem naꞌko Uisneno. Es on nane te, sin nabeiꞌ sin nliuꞌ pah-tuaf in neik Au kanak. Lof Uisneno nfee sin he namoolk in neik uab bian, leꞌ sin ka nahinen fa. 18Nalali te, kalu sin nhuuk kaunaꞌ leꞌ mabisaꞌ, aiꞌ sin ninun ntoom laso, sin ka nsilakan fa. Kalu sin npooh atoin amenat sin ꞌnaak in, lof sin nalekon.”

Usif Jesus ansae on neno tunan

(Lucas 24:50-53; Apostolu sira nia Istoria 1:9-11)

19Namolok nalail nok In asium-noinaꞌ sin, Uisneno naꞌaitiꞌ nasaeb Usif Jesus on sonaf neno tunan. Mbi nane, In ntook mbi Uisneno In banapan aꞌneꞌu, ma sin nhuuk plenat nabuan.#Apostolu sira nia Istoria 1:9-11

20Nalali te, In asium-noinaꞌ sin nanaoba In aplenat. Sin nnaon neu pah-pah, ma natonan Usif Jesus In Laes Alekot neu atoni ok-okeꞌ. Ma Uisneno nfee sin kuasat, henati sin anmoꞌen lasi mkakat ok-okeꞌ leꞌ Usif Jesus natoon nalail neu sin. Ma nalail, nmuiꞌ atoni namfau leꞌ npalsai neu Usif Jesus, fun sin nahinen nak, Laes Alekot nane, namneo.

Currently Selected:

Marcos 16: BBKN

Highlight

Copy

Compare