Marcos 14
14
Atoni aꞌnaet in namin lalan he nhuuk Usif Jesus nok aꞌkoloꞌ
(Mateus 26:1-5; Lucas 22:1-2; João 11:45-53)
1-2Nane oke te, aꞌnaet akama Judeu sin namin lalan he nhuuk Jesus nok aꞌkoloꞌ. Fun sin he naꞌmate. Mes sin maꞌakool, am nak, “Maut se feꞌ! Hit kaisa tbuub he thuukb Ee feꞌ, fun neno kleij he nhaumaak en. Kalu kahat, atoin amfaut in lof anteop kit.”
Sin naꞌuab on nane, fun natuin ala neno nuub antein, atoni Judeu sin neno kleij es leꞌ sin nteek ee nak, ‘Paskua’ ma nok ‘Fesat neu Paun leꞌ ka nmatao maol asaeb trigu’. Nok neno-neno ꞌnaek nane, sin namnau naan neno unuꞌ, olas sin beꞌi-naꞌi sin mpoi naꞌko pah Mesir.#Ezodu 12:1-27
Bifeel es ntois miin foo meni neu Usif Jesus
(Mateus 26:6-13; João 12:1-8)
3Mbi kuan Betania, nmuiꞌ tuaf es, kana Simão. Unuꞌ, atoni maiꞌniisn ee, fun natuin in nameen bune. Mes neon fauk ii, in meens aa naleko ee.
Olas neno kleij feꞌ ka ntee, Jesus sin nnaon mbukaen mbi Simão in ume. Olas sin mbukaen, nmuiꞌ bifeel es neem naꞌeuk nok Jesus. In nnaaꞌ neik boitl es leꞌ sin nmoeꞌ naꞌko fatu. Miin foo meni nane, in oen aa maꞌosaꞌ ꞌnaek.#14:3 Miin foo meni nane in oosn ii namnees nok tuaf es in noin funan, toon es. Sula Kninoꞌ laes Gregu (Yunani) nak mina nane in oosn ii, ‘denari’ natun teun. Mina nane in kanan, ‘nardos’, leꞌ unuꞌ atoni nmoꞌe neik hau ꞌbaꞌat foo meni. Botil nane, sin ntoi je naꞌko fatu. Botil nane in oosn aa ꞌnaek amsat. Sula Kninoꞌ laes Gregu (Yunani) nak botil nane sin nmoꞌe naꞌko fatu leꞌ in kanan ‘alabastros’. Mlee mbi Lucas 7:37-38 amsat. Oke te, bifeel nane nꞌiup naꞌpeeꞌ botil nane in toben. Ma in ntois miin foo meni nane neu Jesus In aꞌnakan, he njael takaf nak in nabees neu Jesus.
4Mes nmuiꞌ atoni bian leꞌ mbukaen mbi nane msat. Olas sin nail niit bifeel nmoeꞌ on nane te, sin namaun ee. Ma sin naꞌuab lulmuut ne mnak, “Huse! Bifeel saaꞌ ii, es in nꞌoop naleꞌun miin foo mein maꞌupaꞌ nane! 5Naleko nneis, in naꞌsaꞌu miin foo meni nane, he napein loit! Henati loit mfaum in nane, mbait sin neu leꞌ atoni asuusl in! Fun miin foo meni nane in oosn aa namnees on tuaf es in noin funan, toon es.”
6Mes Jesus natae mnak, “Hi kaisa misusap amtein bifeel ii! Mifetin! Au umlilaꞌ, fun in ntois miin foo meni nane neu Au aok. 7Atoni amaꞌmuꞌit sin nok ki neno-neno. Es on nane, hi nabeiꞌ mtulun sin mbi neno-neno msat. Mes ka ꞌloꞌo fa be, Au ka ubua ꞌtein fa ꞌok ki.#Deuteronomio 15:11 8Au ꞌmoink ii ka ꞌloo fa be. Bifeel atois miin foo meni alelo ii, in naloitan nahuun Au aok, namnees on leꞌ in ntao nain fomeni neu Au aok nitun. 9Mail lek-loek! Mbi mee-mee atoni nteek naan Uisneno In Laes Alekot mbi pah-pinan fuun am nateef, ma sin lof nteek naan amsat bifeel ii in maꞌmoꞌen alekot! Ma henati atoni ok-okeꞌ namnaub ee.”
Judas maꞌakool he naꞌsaꞌu Usif Jesus
(Mateus 26:14-16; Lucas 22:3-6)
10Nalali te, tuaf es naꞌko Jesus In asium-noinaꞌ sin boꞌes am nua nane, in kanan, Judas Iskariote. Ma in mpoi ma nnao naim aꞌnakaf akama Judeu sin, he in naꞌsaꞌu Jesus neu sin. Nnao ntee sin, in natoon in salit. 11Olas sin nneen Judas in molok on nane, sin namliil in. Sin nsuup am nak, “Kalu ho mloem he muꞌsaꞌu Jesus mfeel Ee neu kai, nabeiꞌ hai mbaen ko.” Nalali te, Judas mpoi, ma in nmulai naim lalan he naꞌsosaꞌ Jesus neu sin.
Usif Jesus naah-tolas Paskua nok In asium-noinaꞌ sin
(Mateus 26:17-25; Lucas 22:7-14,21-23; João 13:21-30)
12Oke te, Jesus In asium-noinaꞌ sin neman ntoti mnak, “Amaꞌ! Neno ii, neon Paskua. Ho mloem he hai mnao miloitan bael fesat Paskua meu mee?” Fun neno nane, neon nuni neu atoni Judeu sin neno kleij. Neno nane, sin biasa naktunun paon leꞌ ka matao malo asaet trigu, ma sin nlolon bib-kase msat.
13Nalail, Jesus nleul In asium-noinaꞌ sin tuaf nua mnak, “Hi mnao mihuun ki meu koot. Mbi nae, lof hi miit atoni es naꞌsae neik oel ahuun aan es. Hi mnao mituin ee. 14Kalu in ntaam neu ume mee, hi mnao mituin ee mbi nane. Oke te, hi mitonan uim tuaf nane mak, ‘Amaꞌ! Hai Kulu ntoit baal es, he In nmoeꞌ mnaah-tolas Paskua nok In asium-noinaꞌ sin.’ 15Nalail atoni nane lof nalekan ki keꞌan ꞌnaek es mbi ume ktutaꞌ tuun. In naloitan nalail keꞌan nane be. Ala hi nua ki mnao he miloitan mnahat meu nae.”
16Nalali te, sin nua sin nnaon neu koot. Mbi nae, sin nateef nok aleꞌ kanan saaꞌ-saaꞌ leꞌ Jesus natoon nain neu sin. Ma sin naloitan ok-okeꞌ, henati Jesus sin mnaah-tolas Paskua mbi nane. Oke te, sin nua sin nnaon nfanin noꞌen Jesus sin.
17Olas maans aa he nmouf, Jesus nok In asium-noinaꞌ sin, atoni boꞌes am nua, nnaon mbi nane. 18Nalail sin ntokon mbukaen ok-okeꞌ. Olas sin mbukaen, Jesus namolok mnak, “Mneen, he! Nmuiꞌ tuaf es naꞌko ki, lof es naꞌsaꞌu naneuk Kau neu atoni bian.”#Salmu ini 41:10
19Nneen on nane te, sin neek in ka nalekon fa. Ma sin es-am-es ntoit Jesus mnak, “Atoni leꞌ Amaꞌ mteek leꞌ nane, ka au fa, aiꞌ?”
20Jesus natae mnak, “Atoni leꞌ nalepaꞌ in paon neu faneꞌ ii nok Kau, in leꞌ nane, es naꞌsosaꞌ Kau. 21Mitniin, he! Au, Aan Mansian, musti ꞌmaet on leꞌ sin nluul nalali mbi Uisneno In Sulat. Mes, naat lek-leok! Atoni leꞌ naꞌsosaꞌ Kau naan, lof in nsutai kuun in sanat! Naleko nneis in eenf aa ka nahonis nain se!”
Usif Jesus natoon nak, paon nok tua min kase nane, on nfani takaf neu In kuun
(Mateus 26:26-30; Lucas 22:14-20; 1 Korintu 11:23-25)
22Olas nane sin feꞌ mbukaen, Jesus nait paon piisꞌ es, ma ntoit sakoit neu Uisneno. Oke te, In nꞌeib paon nane pisaꞌ-pisaꞌ, ma In nfee neu In asium-noinaꞌ sin. Ma In natoon nak, “Paun ii, Au aok. Maiti, ma muah ne nai.”
23Nalali te, In naiti ntein tua min kase kuꞌi es. Ma In ntotin ntein sakoit neu Uisneno. Oke te, In nfee ntein sin tua kase nane, he sin ninun. 24Ma In natoon nak, “Tua min kase ii, Au naaꞌ. In lofa natꞌoop ma nsai henati nsoi atoni amfaut in sin sanat. Ma naaꞌ ii, on leꞌ takaf he namnaub ki nak, saaꞌ leꞌ es Uisneno natoon nalail leꞌ nane, namneo mbool neik naan. Maiti, ma minu nai.#Ezodu 24:8; Jeremias 31:31-34
25Mneen lek-leok feꞌ! Mulai naꞌko mabe ii, Au lof ka ꞌinu ꞌtein fa tua min kase ije be. Kalu Au Ama Uisneno ntokom naplenat, niꞌ Au ꞌinu ꞌtein.”
26Nalail sin nsii siit es he onfani pules ma naꞌnaebaꞌ Uisneno In kanan. Oke te, sin mpoi nok faij, ma nnaon neu ꞌnuꞌaf Oliveira.
Usif Jesus nak nain Pedro lof natoot Ne
(Mateus 26:31-35; Lucas 22:31-34; João 13:36-38)
27Olas sin nnaon, Jesus natoon nain nak, “Oke nfai, lof hi ok-okeꞌ maen misaitan Kau. Fun sin ntui nalali be mbi Uisneno In Sulat nak,
‘Uisneno lofa naꞌmaet atukus,
ma in bib-kase sin lof naen nasiit-bokan.’#Zacarias 13:7
28Namneo Au ꞌmaet. Mes lof kalu Au ꞌmoni ꞌfain, Au ꞌnao uhunun ki ꞌeu profinsia Galilea.”#Mateus 28:16
29Nalail, naꞌ Pedro namolok nak, “Amaꞌ! Maski atoin amfaut in ok-okeꞌ naen nasaitan Ko, mes au lof ka ꞌaen af!”
30Jesus natae mnak, “Pedro! Mutniin, he! Mabe ii, manu feꞌ ka nkokleoꞌ naan hanaꞌ nua, ho lof mutotan Kau haef teun!”
31Mes naꞌ Pedro natae nahelan mnak, “Kah fa, Amaꞌ! Kalu Ho mmaet, au he ꞌmaet utuin Ko msat. Mes au lof ka ꞌaen usaitan Ko fa!”
Ma naꞌ Pedro in aok-biak in, es-esat natae on nane msat.
Usif Jesus nꞌonen mbi poꞌan Getsemani
(Mateus 26:36-46; Lucas 22:39-46)
32Nalali te, Jesus sin nnaon piut mbi poꞌan es mbi ꞌnuꞌaf Oliveira. Poꞌan nane, kanan ‘Getsemani’. Jesus natonan sin mnak, “Hi mtokom mpao Kau meu ii. Au he ꞌnao ꞌonen ꞌeu nae.”
33Ma Jesus noꞌen neik naꞌ Pedro, naꞌ Tiago, ma nok naꞌ João, he nnaon nok Ne. Mulai naꞌko olas nane, In neekn aa nsusal ma ka ntaif. 34In natonan sin mnak, “Au neek ii nsusal on leꞌ he ꞌmaet! Hi mtokom mpao Kau meu ije feꞌ.”
35-36Nalali te, In nnao naskout nana kleꞌo, ma In nliꞌtuu ma nabees he nꞌonen mnak, “Ama amanekat! Kalu Amaꞌ Ho mloem, Au kaisa ꞌsutai lais maꞌneꞌat tala ꞌmaet on leꞌ ii. Au uhiin ulalie ꞌak, ka nmuiꞌ fa saaꞌ-saaꞌ leꞌ Ama ka nabeiꞌ he nmoꞌe. Kalu nabeiꞌ, Amaꞌ mait main leꞌ lais sutais ii mpoi-laakn ee nakloꞌo naꞌko Kau. Mes kais natuin Au ꞌlomik, mes natuin ahaa Ama Ho lomim.”
37Oke te, In nfain nnao neu In asium-noinaꞌ sin teun, mes sin antuup anfinin. Nalail In mpooꞌ nafeen sin, ma In naꞌuab nok naꞌ Pedro nak, “Huus! Pedro!#14:37 Laes Gregu nluul nak ‘Simão’ mbi ii. Ho mtuup, ka? Au ꞌnao ka ꞌloo fa, mes hi ka mpaant om fa kleꞌo msat! 38Mnoes mumeu ho maatm aa feꞌ. Mfeen ma mpao mok Kau! Hi neekm in namneo he mmoeꞌ alekot, mes hi aom ini es ka maꞌtaniꞌ fa. Naleko nneis, hi mꞌonen, kalu hi mtoom suꞌat, he suꞌat nane kaisa niis ki.”#1 Korintu 10:13
39Nalali te, Jesus nnao nꞌonen haef es antein. In ntoti ntein neu Uisneno, he kais nafeitn Ee he In anloi sutais nane. 40Oke te, In nfain neem neu In asium-noinaꞌ sin, tuaf teun nane. Mes In napein sin ntuup antenin, fun sin npeꞌu ka nputain fa be. Nalail, In mpooꞌ nafenat antein sin, mes sin ka nahinan fa he nataen nak saaꞌ neu Ne.
41Nalali te, Jesus nasaitan antein sin, ma nnao nꞌonen neu haeꞌ tenu. Oke te, In anfain ma In mpooꞌ nafenat antein sin. In nak, “Hi fe mtatuup, ka? Nobah nai! Mfeen nai! Fun tuaf aa leꞌ he naꞌsaꞌu Kaub ii, Aan Mansian ii, npaumaak he neem ne. Olas ii, sin he nhuuk Kau, ma he naꞌnaꞌat Kau neu atoni amaunut sin. 42Mfeen nai! Mfei hi maatm in nai, ma ati mipenam mnao on nae feꞌ! Tuaf leꞌ he naꞌsaꞌu Kau, neem ne. Eim hit tnao taꞌeuk sin!”
Sin nhuuk Usif Jesus
(Mateus 26:47-56; Lucas 22:47-53; João 18:3-12)
43Olas Jesus fe namoolk in on nane te, suk naskeek, Judas neem nok atoin amfaut in. Sin neem neik suin tukaꞌ ma neik in hau tukaꞌ, ma he nhuuk Jesus. Sin nmoeꞌ onuk nane, natuin plenat naꞌko aꞌnaet akama Judeu sin. Sin leꞌ nane: ꞌnakaf-aꞌnakaf akama, kulu-kulu akama, ma nok amnais kuan in. 44Judas natoon nain sin mnak, “Hi mipeen lek-leok, he! Sikau es lof au ꞌneek Ee, nane es hi mhuku! Hi leꞌ mamami Ba, es leꞌ nane!”
45Olas Judas sin ntenuk nane, in nnao piut nnao naꞌeuk nok Jesus. Oke te, in nhosee Ne mnak, “ꞌNaef Kulu!” Ma Judas nhooꞌ nane ma nneek Ee. 46Nalali te, atoin amfaut in neman nhaumaak ee, he nhuuk Jesus.
47Mes Jesus In atoni es, nhous naan in been tukaꞌ, ma nꞌoet nafeek atoni es in luken. Atoin luik apapat nane, akama Judeu sin aꞌnakaf aꞌnaet in ate. 48Nalali te, Jesus namolok nok atoni leꞌ neman he nhuku Ba nak, “On mee? Hi mak Au atoin amaunut Kau, ka? Niꞌ hi eim he mhuuk Kau es hi meik suni ma hau tukaꞌ? 49Neno-neno Au uꞌnoinaꞌ ki mbi Uisneno In Uim Onen Uuf, mes ka nmuiꞌ fa tuaf es he neem nhuuk Kau. Eim amhuuk Kau nai! Fun ije ntui nalali be naꞌko neno unuꞌ, mbi Uisneno In Sulat.”#Lucas 19:47; 21:37
50Jesus In asium-noinaꞌ sin namtaun nmaten. Ma sin naen nasaitn Ee nmees.
51Mbi nane msat, nmuiꞌ atoin muinf es, leꞌ nnao natuin Jesus naꞌko kotin. In ntainuus naan on neik beit tuuk es. Atoin amfaut in he nhuuk neiki msat. 52Mes sin nhuis neiki haa in tainusat nane. Oke te, in naen anfain ao-moons aah, fun in namtau nneis.
Sin nhuuk neik Usif Jesus nnao neu afeek lasi akama
(Mateus 26:57-68; Lucas 22:54-55,63-71; João 18:13-14,19-24)
53Oke te, sin nhuuk neik Jesus nnao neu akama Judeu sin aꞌnakaf aꞌnaet in ume. Mbi nane, atoni aꞌnaet in nabuab ok en. Sin leꞌ nane: ꞌnakaf akama, kulu akama, ma nok amnais kuan in.
54Olas sin nhuuk neik Jesus, naꞌ Pedro naꞌkoloꞌ natuin kotin amsat, ntenuk akama Judeu sin aꞌnakaf aꞌnaet in ume. In ntaam natuin ntee kintal in nanan amsat, ma ntook nabua nok atoni amfaut in nlalan aij mbi nane.
55Mbi ume nanan nane, akama ꞌnakaf sin namolok nok afeek lasi akama sin. Sin ok-okeꞌ namin lais amneot he nasanat Jesus, fun sin nloem he naꞌmaet Jesus. Mes sin ka napein fa saaꞌ-saaꞌ he nasaant Ee. 56Ma sin noꞌen aleꞌ asaksiit henati sin namouf Jesus. Mes sin uaban nasulin es nok es.
57Nmuiꞌ asaksiit in bian, nfeen anhaken he naꞌuab naꞌmoeꞌ mnak, 58“Hai mneen atoni ii namolok mnak, ‘Au lofa uleꞌun ꞌain Uim Onen Uuf, leꞌ atoni nmoꞌe neik sin aꞌniimk in. Mes nfiin naan neno teun, Au uhake ꞌfain Uim Onen nane, ma ka ꞌeik fa mansian in aꞌniman.’ ”#João 2:19 59Mes sin moolk in nasulin es nok es.
60Nalali te, akama Judeu sin aꞌnakaf aꞌnaet nane, nfena nhaek mbi afeek lasi sin maatk in. Ma in ntoit Jesus mnak, “Atoin amfaut in asanat Ko be. Mes anasaaꞌ te Ho muꞌmaits om?”
61Mes Jesus ka namolok naan fa lasi fuaf es. Oke te, akama Judeu sin aꞌnakaf aꞌnaet ntoti nteni mnak, “Ati Ho mutoon feꞌ! Aiꞌ Ho leꞌ ii, maneꞌo-maneꞌo Kristu, Uisneno in Aan Mone leꞌ nleek nani naꞌko neno unuꞌ?”
62Jesus natae mnak, “Namneo. Es leꞌ Au. Lof hi ok-okeꞌ miit Kau, Aan Mansian ii, antook mbi neno tunan, mbi Uisneno Akuasat In banapan aꞌneꞌu. Au ꞌok Ne, lof mhuku plenat mibuaꞌ! Nalali te, niꞌ Au ꞌsaun ꞌoum uꞌko neno tunan, ꞌok habu.”#Daniel 7:13
63Nneen Jesus namolok on nane te, akama Judeu sin aꞌnakaf aꞌnaet natooꞌ, ma mpius naklatiꞌ in sabaul betkoneꞌ. Nalail in ankoaꞌ ma natoon neu afeek lasi sin mnak, “Hit kaisa tpaluu ttein asaksiit nai! 64Hi mneen milail meik hi luikm in, In nmees es naꞌuab kuun on nane, aiꞌ? In es naꞌait In tuan aa kuun he njael Uisneno In Aan Mone. Ije naꞌleꞌuf Uisneno! Tatuin ukan akama, kalu nmuiꞌ atoni es naꞌees on nok Uisneno, atoni nane, musti maꞌmateꞌ! Ma olas ii, hi he mifeek maksaaꞌ?”
Es on nane te, sin ok-okeꞌ nafeke mnak, “Namneo! Atoni ii In nsaan! Es on nane te, In musti mahuku maꞌmateꞌ!”#Levitiku 24:16
65Nalali te, atoni tuaf fauk nnaon mpulan hape neu Jesus. Sin mpuun In maatk ini. Nalail sin antepo. Oke te, sin ntoti nak, “Ati mtaikseel miit ee. Sikau es nteop Ko?” Nalail sin nleul apaot in naꞌko Uim Onen Uuf, he nnaon nok Jesus mpoi. Olas sin nnaon nok Ne, sin npaas Ee haef-haef.
Pedro natotan Usif Jesus haef teun
(Mateus 26:69-75; Lucas 22:56-62; João 18:15-18,25-27)
66-67Mbi olas naan, naꞌ Pedro fe ntook mbi kintal. Oke te, akama Judeu sin aꞌnakaf aꞌnaet in ate bifeel meseꞌ, neem nail naꞌ Pedro nlaal aij mbi nane. In nail nalaloitan in human, oke te, in naꞌuab mnak, “Ho msat lelo mnao ok-okeꞌ mok Jesus, atoni Nazaré, aiꞌ? Hao, aiꞌ?”
68Mes naꞌ Pedro natae mnak, “Kahaf! Anasaaꞌ te ho mtoit kau on naan!? Au ka uhiin ꞌaan fa atoni nane.” Oke te, naꞌ Pedro ampoi ma nhaek mbi enoꞌ. [Nateef nok olas nane, manu kokoleeꞌ.]#14:68 Lulat lasi Gregu bian ka nluul fa laes fuaf in leꞌ ii.
69Nalali te, aet bifeel nane niit antein naꞌ Pedro. Ma in natonan atoin amfaut in mbinuk nane mnak, “In leꞌ ii, atoni es naꞌko Jesus sin!”
70Mes naꞌ Pedro nmatoeꞌ natau noon mnak, “Ho leꞌ ii, aiꞌ muꞌmaunu leuꞌ! Es amtekaꞌ lalaa-fuah! Au ka uhiin ꞌaan fa leꞌ atoni nane!”
Ka ꞌloo fa on nane te, atoni es antein mbi nane, nak antein naꞌ Pedro nak, “Hoi! Ho muꞌmoe mtein feꞌ mak, ho ka mok fa leꞌ atoni nae kin! Hi ok-okeꞌ atoin Galilea ki, aiꞌ?”
71Mes naꞌ Pedro nmatoeꞌ natau noon antein mnak, “Hoi! Au nabei ꞌsuup! Au ka uhiin ankuuk fa leꞌ atoni nane!”
72In naꞌuab on nane te, manu kokoleeꞌ haef nua. Ma naꞌ Pedro namnau niit leꞌ lelo Jesus In uaban nak, “Manu feꞌ ka nkokleoꞌ naan hanaꞌ nua, ho lof mutotan Kau haef teun!”
Naꞌ Pedro namnau niit on nane, ma in nkae nahahuꞌu.
Currently Selected:
Marcos 14: BBKN
Highlight
Copy
Compare
Share
Want to have your highlights saved across all your devices? Sign up or sign in
© 2003, 2015, 2025 Wycliffe Bible Translators Inc
