Rut 2
2
Rut botu agar no Boas
1Dia Belem dia atmoas boten sia no sanu dia, galan Boas. Ua hei sabar no Elimeleke, Noemi non lain nee mate kahi sai. Bebei atmoas romo sian lisan dia nua la, pere Noemi non saban.
2Dia haran sia, Rut, hine Moabe, la dia Noemi ori tugu, “Amaa! Au bele la asi lara ori gana trigu ain resin nee komoku dia atmoas servisu nua non mogon, ga sei? [Pita Maromak non lei hakerek tbe, posi atmoas sanu bain romo tau ta sua.]#Graan relijiaun romo sian lei 19:9-10; Dale hali kona la tau seba nisi moas 24:19; Graan relijiaun romo sian lei 25:5-6 Isi tau be'e dia atmoas sia tino huar laran mloin mai au. Bele ka tain?”
Noemi tami tbe, “Mloin, nua ina' la ini.”
3No Rut la dia asi laran sia gana trigu ain atmoas romo servisu nua posi bali. Irap asi lara nua Boas non. Boas hei sabar no Elimeleke, Rut non ambanin nee mate kahi sai.
4Baipila Rut gana bali trigu ain resin, ne asi ubun, Boas, mai rasa aldeia Belem no mana'a atmoas romo serbisu nua tbe, “Saloom! NAI Maromak tau mloin la imi!”
Romo tami tbe, “Saloom! NAI Maromak tino non huar laran mloin la ita!”
5Baipila Boas la na'e Rut gana bali trigu ain, Boas tugu la non mandoor tbe, “Hine sae heun ua nee la nua, non saban ta basia?”
6Mandoor nua tbe, “Hine nua atmoas Moabe, nee henisi hali luluan no tumhine Noemi rasa rae Moabe. 7Peku matabuson ua mai tugu dia au tbe, ‘Xefi! Au bele la bebei dia ita boten non atmoas serbisu gana trigu ain resin nee manahu dia romo sian mogon?’ No au tami tbe, ‘Mloin!’ No ua serbisu makaas los pese matabuson tee agora nogo. Ua so pres bisa naa dia uma laleo nua la.”
8No Boas dale no Rut tbe, “Mana! Ita atmoas matar heun, nisi rega tau mloin mai au isi.Ita gana trigu ain resin dia nogo naa, srei muda la atmoas selo non asi lara. Mloin lau tai sogon rasa anami'in hine romo nee tau serbisu dia au dia nogo. 9Nae tau mloin romo lobu trigu ain dia naba, no baipila romo la dia hatin nua, ita la gana resin dia romo sian mogon. Au habu kahi mane romo nee dia nogo para srei kaka ita. No isi ita merekat, la enu bia dia romo sian botir nee romo tau bia dia nua.”
10Rega kahi nua, Rut riktuu no me'u tee dia rae. No ua to'u, “Obrigadu, senhor! Mais au e to'u sanu sia. Karik senhor tara sai, au laos atmoas rasa rae nogo. Pita basia senhor tau matan mai au, no tino huar laran mloin mai au?”
11Boas tami, “Loos. Au tara kahi sai, pita atmoas romo dia nogo dale mai au tbe ita tino itan huar laran mloin la on inbanin baipila on lain mate kahi sai. Romo mos dale ita mos posi bali on inar no amar no on rae moas hatin, ori mai dia atmoas selo non teten, maski tai tara romo.
12Nisi au pege la NAI,
para ami atmoas Israel non NAI Maromak,
selo on huar laran mloin almamu!
Au pege la Ua nee bensaun opan la ita,
pita ita tino on huar laran mloin la tumhine Noemi.
NAI taa kuidadu ita dia nogo.
pita ita ele seber la Ua,
pere manu anan romo huni dia manu inan non lilapan mlehugan.”
13No Rut tami, “Senhor! Maski au laos itan atmoas serbisu, pita senhor tau magun aun huar laran, no tino mos itan huar laran mloin mai au.”
14Baipila romo pres e aa, Boas to'u la Rut, “Mai aa luluan no ami dia nogo na! Huat paun nogo, no ita karak remi dia tua mos.” No Rut la muru besik dia atmoas serbisu romo. Bebei mai Boas nee trigo huan segan la Rut. Rut aa tee beso, no hei dia resin.
15-16Baipila Rut hali la asi laran ori gana trigu ain resin nee atmoas serbisu romo posi bali, Boas to'u la non atmoas serbisu romo tbe, “Rega tau mlo-mloi! Srei kaka Rut. Posi Rut gana trigu ain dia naba na. Ua gana besik trigu ain ne hutun romo nua mos, tai dia sanu sia. Au tai sakan, imi sai trigu ain serin nee imi hutu kahi sai nua, posi bali la dia Rut gana. Srei sakan ua, no srei tau aen ua.”
17Rut serbisu dia asi laran haran teman. Baipila lelo e manahu sai, ua para trigu ain ori sai non huan rasa non ain, no trigu huan dia lo'at sia benu.#2:17 Liar-hu’un Ebreu hakerek tbe, lo'at sia, eyfah sia. Eyfah sia, aben dia kilo 12. 18No Rut ori trigu huan dia loaat nua hali la aldeia Belem, no tino non honun no non serbisu nua la non inbanin. No ua mos sai aa non resin rasa aa lelo banas non nua nee la dia non inbanin.
19No Noemi tugu la Rut, “Peku o gana trigu ain nogo rasa dia raba? O serbisu rasa basia non asi lara? NAI Maromak nee bensaun la atmoas nee tau mloin dia o dia haran sia nogo.”
Rut tami, “Amaa, asi ubun nua galan Boas.”
20Noemi to'u la dia non uma ubun, “NAI Maromak nee bensaun la Boas. Pita NAI Maromak tai mligu tino non huar laran mloin la itabua nee moas bali, no mos la itan lair romo nee mate kahi sai. Au to'u la o, Boas nua itan sabar besikan. Boas ta ‘dia direitu e selo tau tura’.” [Nua to'u tbe, Boas ta dia direitu e kaben no o, ori nee anar no ubur la on lain nee mate kahi sai.]#Graan relijiaun romo sian lei 25:25
21Rut hine Moabe nua tami, “Amaa, peku Boas mos to'u mai au, ‘Buso mai hali. O bele gana trigu ain besik aun atmoas serbisu romo nogo tee lobu trigu ain kahi.’”
22Noemi tami hali, “Bele na! Nogo sinal mloin. O bele serbisu no non atmoas hine romo te lobu trigu ain kahi. Dia atmoas selo non asi lara atmoas bele kaka o. Mais dia Boas non asi laran o hatin mloin.”
23Nua kahi Rut gana trigu ain nee resin dia Boas non asi lara besik dia hine romo serbisu tee dia lobu trigu ain no pule sele ain-mlarun kahi. No pesa nogo, Rut peni rae-agi no non inbanin.
Currently Selected:
Rut 2: BKMK
Highlight
Share
Copy
Want to have your highlights saved across all your devices? Sign up or sign in
Wycliffe Timor-Leste © 2025 Wycliffe Bible Translators Inc