Galacia 5

Cristo otechtojtomako imak tlanawatili

1Cristo otechtojtomako imak tlanawatílistli. Yika xiyeknemikah, iwa amo xikmokawilikah oksepa manomechijilpi n tlanawátili. 2¡Xikkakikah! Ne Pablo, nomechilia: Tla nomejwah nonmokawiliah manomechsirkunsidarokah, amo okachi nomechpalewis Cristo. 3Oksepa nomechilia, nochi tlakatl akin kimokawilia makisirkunsidarokah moneki kichiwas nochi tlan kijtoa n tlanawatílistli. 4Nomejwah akimeh nonkinekih manomechitakah kemi non yolchipawakeh por nonkitlakitah n tlanawatílistli, yononmoixkoyantijkeh de Cristo, iwa ayakmó nonkateh itech ikualtilis Dios. 5Tejwah tikmatokeh n Espíritu techpalewia, iwa tikneltokah Dios techtlapojpolwis por totlaneltokalis. 6Porke tla tikateh iwan Cristo Jesús, amitla ipati tla tisirkunsidaritokeh noso amó. Tlan milák ipati, matikneltokakah Cristo Jesús, iwa ika non tlaneltokálistli matimotlasojtlakah.

7Nomejwah ya kuali ononyayah. ¿Akin onomechtoktih ayakmó xiktlakitakah tlan milák? 8Porke non tlamachtílistli amo walewatok itech neká akin onoméchnotski. 9Kuali xikmatikah: “San ika achitsi levadura kisamawa nochi n textli.” 10Ne nomechneltoka mach nonkikawaskeh tlan nonkineltokah itech Cristo. Pero Dios kitlaijyowiltis neká akin nomechkuatlapololtijtinemi, maya san akin yetos.

11Nokniwah, tla ne ok niktemachtijtinemiskia n sirkunsisión, n judíojteh amo nechtotojtokaskiah, porke tla ijkó yetoskia, amo kimpajsoloskia tlan niktemachtia de ikrus n Cristo. 12Pero akimeh nomechchijchikawah ximosirkunsidarokah, ¡niknekiskia yejwah innewiah san semi makimotekilikah intlakayo!

13Nokniwah Dios onoméchnotski para ayakmó xiilpitokah itech non tlanawátili, pero noni amo kijtosneki weletis nonkichiwaskeh nochi tlan amokuali kelewia nomokuerpo. Yej okachi kuali ximosepampapalewikah ika tlasojtlálistli. 14Porke nochi n tlanawatílistli mochiwa sa se tlanawátili: “Xiktlasojtla mokni kemi te monewia timotlasojtla.” 15Pero tla san nomejwah nonmokuah iwa nonmotlawelitah, ximotlachilikah, amo kichiwa san nomejwah nonmotlajtlamiskeh.

Tlan kineki tokuerpo amo ye tlan kineki n Espíritu

16Yika nomechilia: Xikkawilikah manomechyakana n Espíritu, iwa ijkó amo nomechyoltilanas tlan amokuali kelewia nomokuerpo. 17Porke tlan kelewia tokuerpo, kixnamiki tlan kipaktia Iespíritu Dios, iwa n Espíritu kikokolia tlan amokuali kelewia tokuerpo. Ninteh ome mixnamikih, yika amo nonweletih nonkichiwah tlan nonkinekiskiah. 18Tla nomechyakantinemi n Espíritu, ayakmó nomechnawatijtok n tlanawátili.

19Amo owi motah akimeh kichiwah tlan kinyoltilana inkuerpo:

momekatijtinemih,

kichiwah tlan pitsotik,

kichiwah tlan teixpolo,

20kinweyiliah diosmeh non san kinmachijchiwah,

tetlajchiwiah,

tekokoliah,

kichiwah mamokuakualanikah oksikimeh,

chawatih,

kualankamikih,

kichiwah itla san para makinmitakah,

kinxexeloah n tokniwah,

kinmachtiah tlan amo milák,

21xikojmikih,

tlawankeh,

fiero mopaktiah itech ilwimeh,

iwa kinchiwah oksikimeh tlajtlákolteh kemi ninteh.

Ne nomechilia, kemi achto yonomechili, akimeh ijkó kichiwah, mach kalakiskeh ilwikak kan Dios tlanawatijtok.

22Pero ijkuak n Espíritu kiyakana se tlakatl, ye ni tlan kichiwah:

tetlasojtla,

kipia pakílistli,

kipia yolsewílistli,

nochi kixikoa,

kuali tlakatl,

teiknomati,

tlaneltokak,

23yolyamanki,

kuali monawatia.

Akimeh ijkí moyakanah n tlanawatílistli amo weleti kinnawatia. 24Iwa akimeh iaxkawah Cristo, mach ok kimokawiliah makinyoltilana tlan kineki inkuerpo, kemi yaskia yokikrusifikarojkeh tlan amo kuali kelewia inkuerpo. 25Ijkó kiné, tla n Espíritu techmakah tonemilis matikmokawilikah matechyakana n Espíritu.

26Amo matimoweyilikah, nion matimoxijxikokah iwan totlaneltokaikniwah.

Currently Selected:

Galacia 5: npl

Highlight

Compare

Copy