2 An Tasalonika 3
3
Cepka na co
1A̱n d'be̱se̱ hyaarene, cepka na co bat lalks Kan Go̱mca̱n Kooye̱ sa̱n ba̱rg hyatt-hyatte. Sa̱ kum ta̱m u'ke̱be̱, ho̱da̱na̱n s ke̱be̱te̱in baa no. 2Cepk na ta̱m bat Sila ta gwa̱a̱ na baa neta̱n naak a v'dumu. Rema̱n za koowe̱ a̱n batin d'ba̱t baa Na'Sil da.
3Kan Go̱mca̱n Kooye̱ a tu bat no da. Tu swidi no m'we̱se̱. Tu rega̱d ta̱m no baa ka v'dumu. 4C batk d'ba̱t baa Na'Sil az a̱n el a̱n emma̱n rina̱n c zein no, az ta̱m ta̱n ryaa hwic tan.
5Lag Kan Go̱mca̱n Kooye̱ gabt de̱bc no, a̱n to̱n hyannano ho̱da̱na̱n Sila to̱ntin koowe̱. A̱n gag c'de̱b ta̱m ho̱d Ka̱risti.
Koowe̱ bo̱p a'yomko
6Hyaarene, a̱n we̱sma̱n dind Kan Buu cinna Ye̱so Ka̱risti, c zeka no, e̱l na kooye̱ ka s'gab wa un zain tu to̱n a'yomk da. Un ta gabin ta̱m rina̱n c gosin c zeka no da. 7Nwaa a̱n hid no, a̱n napk az i ge̱be̱ske̱ a̱n gabese co. Rema̱n ca em soocda̱n ka̱ka̱l ac latin baa no da. 8Ca ryaa ta̱m ryaakc noc m'ho̱s da. C emk la a'yomk i'hwen a gyop no. C emk ta̱m m'cok rema̱n ca to̱n az c dwiksi noc niima̱n go̱tec co da. 9C emk taanlo, za rema̱n az i ta ge̱be̱se̱ a̱n em go̱tec co da. I a̱n he̱nte, a̱n gabeste ta̱m co. 10Ac latin baa no, c ve̱ce̱ke̱ no az, “Koowe̱ a̱n ha̱lin a'yomko, an ryaaksa la o da.”
11C hongk az ahyan baa no el a̱n soocda̱n ka̱ka̱la̱. A za na'yomk da, a za c'kat da. 12C el a̱n kaaga̱m goon netnan lo. C el ta̱m a̱n zem na̱ a̱n dind Kan buu cinna Ye̱so Ka̱risti, az a la̱ta̱sa̱ hid na̱, a em a'yomk a kumt rina̱n ta ryaaksta hid na̱.
13Nwaa ta̱m hyaarene, an poo la emma̱n rihic kasi da. 14Nap na an ta gabin rina̱n c ge̱nin a̱n taka̱llaka̱ ha̱n da, a̱n e̱l na̱, bat ta hong m'e̱n. 15Puti a tan na, an o̱m la na̱ ho̱d a c'ha̱l da. Kaag na na̱ ho̱da̱n ha̱nano.
D'Po̱o̱sso̱ a s'cepk no
16C konk Kan Go̱mca̱n Kooye̱, go̱m va̱n la̱ta̱sa̱m na c'de̱be̱, u la̱ta̱sa̱ de̱bc no kooye̱ daava, a̱n kooye̱ le̱vka ta̱ma̱. Kan Go̱mca̱n Kooye̱ boro baa no kwe̱.
17I mi Bulus a̱n ge̱nin po̱o̱so̱da̱ ha̱n a̱n koma ri. I taanl a̱m retin ta̱'m em a̱n taka̱llac ri kwe̱, i kwesata az i lanma̱n baa ri.
18Pusuu Kan buu cinna Ye̱so Ka̱risti boro baa no kwe̱.
Currently Selected:
2 An Tasalonika 3: driNT
Highlight
Copy
Compare
Share
Want to have your highlights saved across all your devices? Sign up or sign in
© Wycliffe Bible Translators, Inc. and © The Nigeria Bible Translation Trust 2019