2 An Tasalonika 2
2
Ka v'dumu
1C el a̱n kona̱m no, hyaarene. Da̱n tanin vaakam Kan buu cinna Ye̱so Ka̱risti, a kargau cinna baa ru nu, 2an lag la na hevksa alla na gela̱msa no da. Ai to̱n i a̱n c'ya̱a̱taya̱a̱, s'lalka-lalka alla a̱n k'vaa ka̱n na zein az c ge̱na̱vko no da. Na̱m'Ze az hweda̱n vaakam Kan Go̱mca̱n Kooye̱ baask a̱d ceka, az da̱ to̱o̱k ta̱m da.
3An lag la noc palk no da cakk. Rema̱n hweda̱n lo a da̱n can a za na baak a ela̱vso A'Sil da. Na ruta̱ ta̱m kan ha̱lca̱n giira Na'Sila̱. Kan Sila baasin a gigk az tu wa̱a̱ d'kala. 4Tu ela̱vso A'Sila̱. U guba̱sa̱ ta̱m hid ru. U ze az u hatk rina̱n nan po̱g A'Sila̱ alla rina̱n nan ema c'hwiipsa̱ kwe̱, a̱n k'gwin. Tu uv a̱nmin buuk Na'Sil u soota, u ze az i unwa a̱n rein A'Sila̱.#2:4 Go̱t ta̱m: Dan 11:36; Izi 28:2.
5A̱n ta bakasa ha̱n ho az am latin baa no, a̱m ve̱ce̱ke̱ no da̱n rihica̱ ha̱n da? 6A̱n napk la rina̱n holin o u'noka a̱nta̱ma̱, i bat nan ruta̱ o a̱n daava̱n i hwentaine. 7Rema̱n we̱sma̱n de̱la̱m c'ela̱vso ma̱n lain a'ze̱se̱, a̱m baask a̱m takka a'yomko. Kan reina̱n holma̱n yomka we̱sma̱ ne a̱nta̱ma̱, tu ryaa hwic a̱n hola̱m ma̱, i caa daava̱n nan o̱mt o. 8I a̱n daava̱n lo kaa a̱n kan ela̱vsoc Na'Sil tu ruta̱. Un Kanubu Ye̱so tu hwaa a̱n e̱nma̱n nwa̱a̱'a ru. U ne̱kt ta̱m o a̱n we̱sma̱n gwinka̱n vaakam ru.#2:8 Go̱t ta̱m: Isa 11:4.
9Nokam kan ela̱vsoc Na'Sil ti kwesa walgc A̱krimu. Tu kwesa kooye̱ goon mala̱mca, a c'saa na, a rihica̱n sipa̱m na'nwa̱a̱n ca̱ c'ko̱lo̱. 10A ta̱m kooye̱ goon rihic naak ca ca̱n-ca̱n palk an reina̱n hora̱mca̱d na'wa̱a̱. Ta wa̱a̱ rema̱n a ha̱lk kabma̱n ga̱uma̱n ta̱m gwa̱a̱ be̱ na̱. 11Rema̱n taanlo, Sila ta cuuls na̱ hwe̱di bat ta kab c'ko̱lo̱. 12Na gedata kaa koowe̱ un ha̱lin m'ga̱u lalko, a un rein ta̱m a̱n he̱nma̱n ke̱mda̱n emma̱n rihic naake.
Es na s'naa s'ila̱
13Hyaaren an Kan Go̱mca̱n Kooye̱ rein tu to̱no̱. I ge̱be̱ske̱ kooye̱ daava c bo̱m A'Sil rem no. Rema̱n lanma̱ d'takbo, Sila dagk no a̱n e̱te̱ na kumma̱ d'gwa̱a̱ma̱. Rema̱n yomka Hora̱md Na'Sil da̱n rein da̱n ho̱l na rihica̱ d'rebo, ai retin na batk d'ba̱t baa m'ga̱u. 14Sila po̱gk no a̱n kum d'gwa̱a̱m baan kasi lalkuna̱n c bisiin no. Rema̱n a̱n kumt u'yob baan gwink Kan buu cinna Ye̱so Ka̱risti. 15Rema̱n taanlo, hyaarene, es na s'naa s'ila̱. A̱n bo̱p ta̱m rihica̱ c la̱a̱sa̱in no, a̱n vatu na'nwa̱a̱ alla a̱n taka̱llaca̱ c ge̱nvoin no.
16C konk Kan buu cinna Ye̱so Ka̱risti, a A'Sil Ceta cinna na, an to̱nin na, a ne̱e̱ na we̱sa̱m c'de̱b d'kal-d'kala. A de̱l ta̱m na a̱n saka̱m nu'con a̱n rihic kasi rema̱n pusu na̱. 17A setasa de̱bc no, a swidi ta̱m no m'we̱s a̱n vatt rihic kasi, a̱n em ta̱m ca̱.
Currently Selected:
2 An Tasalonika 2: driNT
Highlight
Copy
Compare
Share
Want to have your highlights saved across all your devices? Sign up or sign in
© Wycliffe Bible Translators, Inc. and © The Nigeria Bible Translation Trust 2019