2 An Tasalonika 1
1
D'Po̱o̱sso̱
1I mi Bulus a̱n Se̱las na Timoti a̱n ge̱nvoin no taka̱llaka̱ hna, nwaa a s'gab an copun Tasalonika. An reina̱n gabs Na'Sil ceta cinna a Kanubu Ye̱so Ka̱risti ni.
2Kab na u'pusu a la̱ta̱m c'de̱b ne̱ lanma̱n baa Na'Sil K'Ceto a Kanubu Ye̱so Ka̱risti ni.
Gedma̱n lalk Ka̱risti
3Hyaarene, i ge̱be̱ske̱ c'bo̱m A'Sil kooye̱ daava rem no. I hwennka ta̱m tan. Rema̱n batma̱n ba̱ta̱d no baa Na'Sil el a̱n ryaaka̱n hwic hwe̱di. Go̱t ta̱m ho̱da̱na̱n a̱n retina̱n to̱na̱m hyannano el ti sud-sud ryaaka̱n hwici. 4I rema̱n taanl a̱c retina̱n c'ka̱ndi a̱n nwaa baa kargac a s'gab kwe̱. I rema̱n gagma̱n de̱bc no a ho̱da̱na̱n ryaatin hwic a̱n bata̱m d'ba̱t baa Na'Sila̱. A̱n el ta̱m a̱n gaga̱m c'de̱b a̱n kooye̱ kobda da̱n rein nu'ryau.
5Rihica̱ ha̱n kwe̱, c kwesaka az gedma̱n lalk Na'Sil i m'ga̱u. Rema̱n taanlo, nan oga̱mse no baa an hwennain a kum go̱mc Na'Sila̱. I rema̱n ca̱nca la a̱n retina̱n ryaaka̱ d'koba. 6A'Sil i ka m'ga̱u. Ta so̱to̱so̱ no. A ryeesa ta̱m an reina̱n o̱so̱so̱m no d'koba. 7A hwerasa ta̱m no nwaananan reina̱n ryaaka̱ d'kob d'kut a cwan na. Ti soot taanl daava̱n Kanubu Ye̱so tu cizta̱ lanm na'con d'kut a comta̱nc run a m'we̱se̱, 8a̱nmin za̱nda̱n hwelana. Tu ven an ta napin A'Sil da a an ha̱lin gabma̱n kasi lalk Kanubu Ye̱so.
9Nan ven na̱ a ryaa kobda̱n wa̱a̱'a d'kala. Nan vog ta̱m na̱ d'kal baa Na'Sil, a baan damran we̱sma̱n gwink na̱-na̱.#1:9 Go̱t ta̱m: Isa 2:10. 10I a̱n hweda̱nda̱n Sila ta hata a kum k'gwin baa neta̱n na̱ an zattin ri d'reb da, an batin ta̱m d'ba̱t baa na̱. Ta sip a'nwa̱a̱ d'kut a nwaa na. Rema̱n a̱n batk d'ba̱t a̱n kabk ba̱sda̱ c bisiin no.
11Rema̱n taanlo, c el a̱n cepkam no kooye̱ daava, az Sila he̱n a̱n hwennka po̱guna̱n a po̱gin no. Az ta̱m rema̱n we̱sa̱m na̱, a de̱l rihic kasi ca̱n walgin a̱n de̱bc no az ta̱n ema, c ema. Az ta̱m rihica̱n a̱n savin c'de̱b a̱n ca̱nca baa Na'Sila̱, Sila ema no ca̱nca. 12C konk A'Sil taanlo bat dind Kanubu Ye̱so da̱n kum k'gwin rem no. Nwaa ta̱m a̱n kum k'gwin rema̱n pusuu Sila cinna a Kanubu Ye̱so Ka̱risti ni.
Currently Selected:
2 An Tasalonika 1: driNT
Highlight
Copy
Compare
Share
Want to have your highlights saved across all your devices? Sign up or sign in
© Wycliffe Bible Translators, Inc. and © The Nigeria Bible Translation Trust 2019