1 An Tasalonika 2
2
Yomka Bulus a̱n Tasalonika
1Hyaarene, a̱n napk az hanm co baa no ta soot ka̱ka̱l da. 2A̱n baask a̱n napk ta̱m az c ryaaka d'kob hwe̱di. Na ryeeska ta̱m co m'e̱n a̱n le̱in Filipi, ai c ceta baa no. Sila se̱e̱tke̱ la co c emk c'a̱ra̱m c bisiki na̱ kasi lalko. Go̱t la ge̱ an ha̱lc co el hwe̱di. 3Rema̱n lalkuna̱n c ne̱in no, za a̱n d'habse alla rem c hitksta̱ no da. Za ta̱m az c la a̱n hob c palk no da.
4Rina̱n c rein la ca̱n ema, ic vat kasi lalkuna̱n Sila dagtin co c vata. Za neta̱n a̱c reina̱n hob c pusa̱sa̱ c'de̱b da. I Sila nan napin de̱bc koowe̱. 5Sila napka. Nwaa ta̱m a̱n napk az ca tak a̱n hwe̱ls no a̱n c'ko̱l alla c yangs s'naa rema̱n hoba̱n rihi da.
6Ca̱ za a̱n hob az neta̱n bo̱m co da. Ca hob neta̱n hyan alla nwaa a̱n bo̱m co da. Ai retin i cwan comta̱nc Ka̱risti, ca̱ ci be̱ d'ke̱e̱ c kwesa no we̱sa̱m c'go̱mo̱. 7Ca em la taanl da. C kalaska la hid co ho̱d akna. C sootk ta̱m baa no tupp ho̱d k'inu baa akna. 8Ai retin c el a̱n to̱na̱m no hwe̱di, i emk co d'ke̱m az za kasi lalk Na'Sil c'taa a̱n ca̱n ve̱ce̱ no da. Ai to̱n i caa co na'wa̱a̱, ca̱n wa̱a̱ rem no. Rem c el a̱n to̱na̱m no hwe̱di d'kala. 9Hyaarene, bakasa na coka̱m co a kobda̱ c ryaine. C emk a'yomk i'hwen a gyop no ac latina̱n bisim no kasi lalk Na'Sila̱. Rema̱n ca to̱n c soot d'to̱o̱s baa no da.
10Nwaananan batin d'ba̱t a̱n kabk kasi lalk Ye̱so, a̱n he̱nke̱. Sila napk ta̱ma̱. Ta̱ma̱ ta̱n la̱a̱ a̱n vat ho̱da̱na̱n c soottin i kasi baa no. C emk a'yomk na̱m'ga̱u. A na kum ta̱m ri d'reb baa co da. 11A̱n napk ta̱m az c go̱tk kooye̱ da̱nv no wa, ho̱da̱na̱n cetok ka̱n go̱tt wa. 12C swidiki no m'we̱se̱. C la̱ta̱ska̱ no c'de̱be̱. C gagska ta̱m no c'de̱b az a̱n em nocurimuca̱n Sila ta to̱no̱. Rema̱n i Silan po̱gin no a̱n kum go̱mc na̱ a gwink na̱-na̱.
13C el ta̱m ca̱n bo̱m A'Sil kooye̱ daava. Rema̱n an kabtin lalks Na'Sil sa̱n hongin baa co, a̱n ta kab sa̱ ho̱da̱n lalks neta̱nrima da. A̱n kabk sa̱ ge̱ ho̱da̱na̱n sa̱ retine. Ke̱ng lalks Na'Sila̱, sa̱n rein ta̱m na'yomk baa no, nwaananan batin d'ba̱t a̱n kabk sa̱. 14Hyaarene, a̱n el ho̱d an gabs Ka̱risti an rein a̱n copun Judiya. An copu no ryeeska no d'kob ho̱da̱na̱n a s'gabnan lo ryaatin d'kob a̱n komc Yahude̱ne̱.
15I Yahude̱ nane an hwain Kanubu Ye̱so Ka̱risti a baranc Na'Sil na̱. A ryeeska ta̱m co d'koba. A za ta pusa̱sa̱ A'Sil c'de̱b da. A ta to̱n ta̱m neta̱nrima da. 16A to̱nk a hol co bisim an zain Yahude̱n da kasi lalko, bat aa kum la d'gwa̱a̱m da. A̱n emma̱n taanlo, a sudk sud c'ko̱to. Sila hwinski la na̱ a̱n d'be̱se̱.
To̱nca̱n havma̱n Tasalonika
17Hyaarene, an na wankstein cinna v'daa ca̱nmi (de̱bc co el la baa no), c to̱nk be̱ hwe̱di az c sud a̱n he̱n no. C gabk ta̱m s'le̱v hwe̱di. I ta ema la da. 18C gosk na̱m'to̱n az c hau baa no. Mi Bulus, a̱m saak hwe̱di az ta̱'m hau. A̱krimu hwe̱e̱kske̱ la me. 19Rema̱n i nwaa a̱n rein sakma̱n cou co. I nwaa a̱n rein za̱ngkta̱c co. I nwaa ta̱m a̱n rein d'zemna da̱n ca̱n kum c emt c'ka̱ndi a̱n hweda̱n Kan buu cinna Ye̱so tu vaakta. 20Ke̱ng i nwaa a̱n rein gwink co a za̱ngkta̱c co no.
Currently Selected:
1 An Tasalonika 2: driNT
Highlight
Copy
Compare
Share
Want to have your highlights saved across all your devices? Sign up or sign in
© Wycliffe Bible Translators, Inc. and © The Nigeria Bible Translation Trust 2019