ରୁମିୟ 9
9
ମୁଲାପେନୁ ଆଚି କିଆନ୍ନି ଦାଲ୍ଲା
1ନାନୁ ଇଦା କ୍ରିସ୍ଟ ନକେସି ନିଜ୍ଜାନେଃଏ ୱେସ୍ପିଞ୍ଜା । ନାନୁ କଲ ୱେସ୍ପେହେଲ୍ଲାଦାଃଏନୁ, ପିର୍ନି ଡିଙ୍ଗାଟି ନା ନେହି ପୁନ୍ବା ଏଲୁଟି ସାକି ହିଞ୍ଜା ଜେ, 2ଦିନାଙ୍ଗେଃଏ ନା ହଡାଙ୍ଗ୍ତାୱା ଗାପ୍ଚି ଦୁଃକ ଅଟେ ବିହା ଆଇନେ । 3ଇନାକି ଏମ୍ବେନାରି ନା ଇସ୍ରାଏଲ ଦାଲ୍ଲା, ଏହେଙ୍ଗିସି ନା ଆମ୍ୱେସାଙ୍ଗା ବାଗାଟି ନାନୁ ନିଜେ କ୍ରିସ୍ଟଟିଆଟି ଆଙ୍ଗେ ମାଞ୍ଜାନ୍ ୱ୍ଲିପା ପାଁନ୍ବନ୍ ବାଗା ଇଚ୍ଚା କିଅନ୍ ମୁଃଇମା । 4ଏୱାରି ତ ଇସ୍ରାଏଲ ଦାଲ୍ଲା; ଏୱାରି ମୁଲାପେନୁତି ଆଚି ପାଁଣ୍ଡାନ୍ନି ବଦାଙ୍ଗ୍; ଏୱାରିକି ମୁଲାପେନୁ ତା ଗଉରବ ପକ୍ତେଞ୍ଜି, ଚୁକ୍ତିଙ୍ଗ୍, ମସାତି ହାଜୁ, ଗାଡ଼ିହେରୁ ଅଟେ ଦିବ୍ବା କୁଲା ହାବେ ଏୱାର୍ତାଦି; 5ଜୁଜୁଆକେଙ୍ଗ୍ ଅବ୍ରାହାମ, ଇସାକ ଅଟେ ଜାକୁବ ୱାଡ଼େ ତା ଦାଲ୍ଲା, କୁଇ ଗାଣ୍ଡି ଆହାନ୍ କ୍ରିସ୍ଟ ୱାଡ଼େ ଏୱାର୍ତାୱାଟି ନିଜ୍ଜାନେଃଏ ପ୍ଲିଆନ୍ନେଞ୍ଜି, ହାବେ ଆକୁଡ଼୍ କିନ୍ନି ଏ ମୁଲାପେନୁ କାଲେଙ୍ଗ୍କାଲା ଟିକ୍ନା ଜୁଙ୍ଗନ୍ ପାଁନାକାଞ୍ଜି, ଆମେନ୍ ।
6ମତ୍ର ମୁଲାପେନୁତି ବାକ୍ୟ ଲେର୍ ଆଃଆତେ, ଏଦି ଆଃଏ । ଇନାକି ଏମ୍ବେନାରି ଇସ୍ରାଏଲ ପୁଣ୍ଡିତାୱା ପ୍ଲିଆନ୍ନେରି, ଏୱାର୍ ଜେ ହାବେତାରି ଇସ୍ରାଏଲ ଦାଲ୍ଲା, 7କି ଏୱାରି ଅବ୍ରାହାମତି ପୁଣ୍ଡି ଇଞ୍ଜାନ୍ ତା ବଦାଙ୍ଗ ଆନେରି, ଏଦି ଆଃଏ; ମତ୍ର “ଇସାକ ଟିଆଟି ମି ପୁଣ୍ଡି ପଙ୍ଗିନେ” 8ଏମ୍ବାତି ଅର୍ତ ଆଇନେ ଇଦି, ଗାଣ୍ଡିଟି ପ୍ଲିଆନ୍ନି ବଦାଙ୍ଗ୍ ଜେ, ମୁଲାପେନୁତି ବଦାଙ୍ଗ୍, ଏଦି ଆଃଏ, ମତ୍ର ଏମ୍ୱେନାରି ମୁଲାପେନୁତି ଦିବ୍ବା ତାୱାଟି ପ୍ଲିଆନ୍ନି ବଦାଙ୍ଗ୍ ଅବ୍ରାହାମତି ନିଜ୍ଜା ପୁଣ୍ଡିହିରୁ ଇଞ୍ଜାନ୍ ଲେକା ଆଇନ୍ନେରି । 9ଇନାକି ଇହିଙ୍ଗିସି ମୁଲାପେନୁ ଦିବ୍ବା କିଆଚ୍ଚେଞ୍ଜି, ୱାଇନି ଅଁଣ୍ଡୁ ନାନୁ ଇ ତୁକାତାୱା ୱାନାୱିଃଆ ସାରା ରଃଅଞ୍ଜି ମ୍ରିଃଏଞ୍ଜିକି ପାଁନେ ।
10ଆଟେ ୱାର୍ରି ଏଦି ଆଃଏ, ମତ୍ର ରିବିକା ୱାଡ଼େ ମା ଜୁଜୁଆକେଞ୍ଜି ଇସାକ ଇନ୍ଦେଟ୍ ଟୁଟୁ ମାଚ୍ଚେ, 11ଏଚ୍ଚିକିଃଆ ବଦାଙ୍ଗ୍ ପ୍ଲିଆହେଃଲ୍ଲାତେରି, ଆଟେ ନେହାଦ୍ କି ଡ଼ଃଆନାଦା ଇନ୍ନା କିଆହେଃଲ୍ଲାତେରି, ଏଚିତୁକାତାୱା ଏୱାର୍ତି କାମାତାୱାଟି ଆଃଏ, ମତ୍ର ମୁଲାପେନୁତି ଆଚି କିଅନ୍ତି ଜୁଜନା ଇନିସ୍ ରଞ୍ଜାନ୍ ବାସାଆନେ, 12ଇଦାବାଗା ଇ କାତା ତାଙ୍ଗେ ୱେସ୍ପା ଆଚ୍ଚେ, ଗାମିନାଞ୍ଜି ହିତାନାଞ୍ଜିତି କାମ୍ୱାରେଏଞ୍ଜି ଆନେଞ୍ଜି । 13ଇନିସ୍କି ଦର୍ମପୁତିତାୱା ୱ୍ରିଗାଆନ୍ନେ, “ଜାକୁବନିକି ନାନୁ ଜେଡା କିତେଃଏ, ମତ୍ର ଏସନିକି ସ୍ରିଞ୍ଜିତେଃଏ ।”
14ଏହେଙ୍ଗ୍ ଆତେସି ମାରୁ ଇନ୍ନା ୱେସ୍ନା ? ମୁଲାପେନୁ ଇନ୍ନା ଅନିୟେଗାଟାଞ୍ଜି ? ଏଦି ଏଚ୍ଚେକ୍ ଆଃଆକାଦି । 15ଇନାକି ମୁଲାପେନୁ ମସାନିକି ୱେସ୍ପିନ୍ନେଞ୍ଜି, ଇନ୍ଦାର୍ କୁଃଏଟି ନା ଅନୁଗ୍ରହ ମାନ୍ନେ, ଏୱାଞ୍ଜିକି ନାନୁ ଅନୁଗ୍ରହ କିଃଇ, ଆଟେ ଇନ୍ଦାର୍ କୁଃଏଟି ନା ପାପୁଅଲ୍ପନ୍ ମାନ୍ନେ, ଏୱାଞ୍ଜିକି ନାନୁ ପାପୁଅଲିଃଇ । 16ଏଦାକି, ଏମ୍ୱେନାଞ୍ଜି ଇଚ୍ଚା କିନ୍ନେଞ୍ଜି କି ସେସ୍ଟା କିନ୍ନେଞ୍ଜି, ଏୱାଞ୍ଜ୍ତାୱାଟି ଇଦି ଆଃଏ, ମତ୍ର ଏଦି ପାପୁଅଲ୍ପନ୍ତି ମୁଲାପେନୁଟି ଆଇନେ । 17ଇନାକି ଦର୍ମପୁତିତାୱା ଇଦି ୱ୍ରିଗାଆନ୍ନେ, ମୁଲାପେନୁ ପାର ରାଜେଞ୍ଜିକି ୱେସ୍ପିନ୍ନେଞ୍ଜି, ନାନୁ ଇନିସ୍ ନି ପାଟ୍ଟି ନା ବଲ ତସିଃଇ, ଆଟେ ଇନିସ୍ ପୁର୍ତିତାୱା ହାବେ ନା ପାରୁ ପକିଃଇ, ଏଦାବାଗା ନାନୁ ନିଙ୍ଗେ ଗାମି କିଆତେଏ । 18ଏଦାକି ମୁଲାପେନୁ ଇନ୍ଦାରିକି ଇଚ୍ଚା କିନ୍ନେଞ୍ଜି, ଏୱାଞ୍ଜିକି ପାପୁଅଲ୍ପିନେଞ୍ଜି, ଆଟେ ଇନ୍ଦାରିକି ଇଚ୍ଚା କିନ୍ନେଞ୍ଜି, ଏୱାଞ୍ଜିକି ହିଟ୍ଟାଗାଟାଞ୍ଜି କିନ୍ନେଞ୍ଜି ।
ମୁଲାପେନୁତି ତାର୍ରା ଅଟେ ପାପୁଅଲ୍ପନ୍
19ଏମ୍ବାଟି ମିରୁ ନାଙ୍ଗେ ୱେସ୍ତାଦେରି ଜେ, ଆତେସି ମୁଲାପେନୁ ଇନାକିଅନ୍ ଦୁସ ଆହ୍ପିନ୍ନେଞ୍ଜି ? ଇନାକି ତା ଇଚ୍ଚାତିଦି ଏମ୍ୱେନାଞ୍ଜି ଆଙ୍ଗନ୍ ମୁନେଞ୍ଜି ? 20ମତ୍ର ଏ କୁଏଞ୍ଜ୍ତି, ନିନୁ ଏମ୍ବେନାତି ଜେ ମୁଲାପେନୁନିକି ୱ୍ଡେଚି ୱେଞ୍ଜି ? କ୍ଲେହାଆନ୍ନି କୁଲା କି କ୍ଲେହାନ୍ନାଞ୍ଜିକି ୱେସ୍ନେ, ନାଙ୍ଗେ ଇହିଙ୍ଗିସି ଇନ୍ନା ବାଗା କ୍ଲେହିଦାତି ? 21ଆଟେ ୱିର୍ରା ଟିଆଟି ରଣ୍ଡା କ୍ଲାହି ଗାପ୍ଚି ସନ୍ମାନ୍ ବାଗାଟି ଅଟେ ରଣ୍ଡା କକ୍ଚ୍ଚି ସନ୍ମାନ୍ ବାଗା କ୍ଲେହନ୍ତାଦା କି ୱିର୍ରା କୁଃଏଟି କୁମ୍ବାରେଏଞ୍ଜ୍ତି ହକତ୍ ହେଃଲ୍ଲେ ?
22ଇହିଙ୍ଗିସି ମୁଲାପେନୁ ତା ତାର୍ରା ଅଟେ ବଲ ତସ୍ପନ୍ ବାଗା ଇଚ୍ଚା କିତେସ୍ ୱାଡ଼େ ତା ତାର୍ରାତି କ୍ଲାହିଙ୍ଗ୍ ଆନ୍ ସାମେନେଃଏ ନାହେଡ୍ ଆଅନ୍ ମାଚ୍ଚେସ୍ ୱାଡ଼େ ଏୱାର୍ ବାଗା ଗାପ୍ଚି ସହି ଆନ୍ ଦର୍ଜ୍ୟ ଆହାନ୍ନେଞ୍ଜି । 23ମାରୁ ଜେ କାହେଟେଃଏ କ୍ଲେହାନ୍ନି ମୁଲାପେନୁତି ପାପୁଅଲ୍ଚ୍ଚାନ୍ନି କ୍ଲାହିଙ୍ଗ୍ନାସୁ, ଇଚ୍ଚେସି ମା ତାୱା ତା ମହିମାତି ଦନ ପପ୍କନ୍ ବାଗା କିଆଞ୍ଜାନ୍ନେଞ୍ଜି; ଏହେଙ୍ଗ୍ ଆତେସି ମିରୁ ଇନ୍ନା ୱେସ୍ଦେରି ? 24ଏଦାବାଗା ଏୱାଞ୍ଜି ୱାର୍ରି ଜିହୁଦିଙ୍ଗ୍ ତାୱାଟି ଆଃଏ, ମତ୍ର ଅନଜିହୁଦିଙ୍ଗ୍ ତାୱାଟି ୱାଡ଼େ ମାଙ୍ଗେ ଆର୍ଚାଞ୍ଜାନେଞ୍ଜି, 25ଇନିସ୍କି ଏୱାଞ୍ଜି ହୁସୟ ବାବବାଦିତି ଦର୍ମପୁତିତାୱା ୱାଡ଼େ ୱେସ୍ପିନ୍ନେଞ୍ଜି,
ଏମ୍ବେନାରି ନା ଦାଲ୍ଲା ଆହେଃଲ୍ଲାତେରି,
ଏୱାରିକି ନାନୁ ନା ଦାଲ୍ଲା ଇଞ୍ଜାନ୍ ୱେସିଃଇ;
ଆଟେ ଇନ୍ଦାରିକି ଜେଡା କିଏହେଃଲ୍ଲାତାନ୍ନୁ,
ଏୱାରିକି ନାନୁ ଜେଡା କିଃଇ ।
26ମୁଲାପେନୁ ଆଟେ ୱେସ୍ପିନ୍ନେଞ୍ଜି, ଆଟେ ଇମ୍ୱିନ୍ ଗର୍ରିତାୱା ମିଙ୍ଗେ ନାନୁ ନା ଦାଲ୍ଲା ଆଃଏ ଇଞ୍ଜାନ୍ ୱେସାଞ୍ଜାତେଃଏ,
ଏ ଗର୍ରିତାୱା ମିରୁ ନିମ୍ବାନ୍ ମାନ୍ନି ମୁଲାପେନୁତି ବଦାଙ୍ଗ୍ ଇଞ୍ଜାନ୍ ପଙ୍ଗିଦେରି ।
27ଆଟେ ଜିସାୟ ବାବବାଦି ଇସ୍ରାଏଲ ଦାଲ୍ଲା କୁଲାଟି ଏଗେଲ୍ ଗଲି ଆନ୍ ୱେସ୍ପିନ୍ନେଞ୍ଜି, ଇସ୍ରାଏଲତି ବଦାଙ୍ଗ୍ ସାମ୍ନ୍ଦେର୍ତି ବାଲୁ ଡେହେଙ୍ଗ୍ ଆତେସ୍ୱାଡ଼େ ୱାର୍ରି କକ୍ଚି ଦାଲ୍ଲା ଜ୍ଡିପା ପାଁନେରି । 28ଇନାକି ପୁର୍ତିତାୱା ଦାର୍ମୁ ତା ୱେସାନ୍ନି ବାକ୍ୟ ଲାକ୍କା କାର୍ବେକ୍ ହାବେ ବିଚାର କିନେଞ୍ଜି । 29ଜିସାୟ ବାବବାଦି କାହେନେଃଏ ୱେସାନ୍ନେଞ୍ଜି, “ହାବେତାୱାଟି ବଲଗାଟି ଦାର୍ମୁ, ଜଦି ମା ପୁଣ୍ଡିହିରୁତିଦି ନିପ୍ଚ୍ଚାନ୍ ମା ବାଗାଟି ଇଟ୍ଟାହେଃଲ୍ଲେଞ୍ଜ୍ମା ଇଚ୍ଚେସି, ମାରୁ ହାଦାଡ଼ି ସଦମ ଅଟେ ଗମରା ଗାଡ଼ାନାଜୁତି ଦାଲ୍ଲା ଡେହେଙ୍ଗ୍ ନାହେଡ୍ ଆନାମା ।”
30ଏହେଙ୍ଗ୍ ଆତେସି ମାରୁ ଇନ୍ନା ୱେସ୍ନା ? ଇମ୍ୱିନ୍ ଅନଜିହୁଦିଙ୍ଗ୍ ଦାର୍ମିକତାତାୱା ତାକେହେଃଲ୍ଲାତେରି, ଏୱାରି ମାଞ୍ଜାଡ଼ିଆଟି ଏ ଦାର୍ମିକତା ପାଁଣ୍ଡାନ୍ନେରି । 31ମତ୍ର ଇସ୍ରାଏଲ ଦାଲ୍ଲା ଏମ୍ୱେନାରିକି ଦାର୍ମିକତା ପାଁନ୍ବନ୍ ବାଗା ଦାର୍ମିକତା ହାଜୁତାୱା ତାକିତେରି, ଏୱାରି ଏ ହାଜୁ ଟିକ୍ନା ଏପନ୍ ମୁଃଆତେରି । 32ଇନ୍ନା ବାଗା ? ଇନାକି ଏୱାରି ମାଞ୍ଜାଡ଼ିଟି ଏଦା ଦାହେଟେଃଏ କାମା ଡ଼ାହି ଦାହ୍ପିଚ୍ଚେରି, ଏୱାରି ଏ ଉବ୍ଗା ୱାଲ୍ଲିତାୱା ଉଗ୍ଦେରି, 33ଇନିସ୍କି ଦର୍ମପୁତିତାୱା ୱ୍ରିଗାଆନ୍ନେ, “ହୁଡ଼ାଟୁ, ମାମୁ ସିୟନତାୱା ରଣ୍ଡା ଉବ୍ଗା ୱାଲ୍ଲି ଅଟେ ଗାଜା ପାଁନ୍ବନ୍ତି ପାଟାୱାଲ୍ଲି ରଞ୍ଜି କିଆନ୍ନାମୁ, ଆଟେ ଏମ୍ୱେନାଞ୍ଜି ତାଙ୍ଗେ ମାଞ୍ଜାଡ଼ି କିନ୍ନେଞ୍ଜି, ଏୱାଞ୍ଜି ଲେଜ୍ଜା ଆଃଏଞ୍ଜି ।”
© 2023 NLCI CC BY-NC-ND 4.0