ରୁମିୟ 4
4
ମାଞ୍ଜାଡ଼ିତାୱାଟି ଅବ୍ରାହାମ ଦାର୍ମିକ ଆଅନ୍
1ମା ଜୁଜୁଆକେଞ୍ଜି ଅବ୍ରାହାମ ତା କାମାତାୱାଟି ଇନ୍ନା ପାଁଣ୍ଡାନ୍ନେଞ୍ଜି ଇଞ୍ଜାନ୍ ମାରୁ ତା କୁଲାଟି ୱେସ୍ନା ? 2ଇନାକି ଅବ୍ରାହାମ ଜଦି ତା କିତି କାମାତାୱାଟି ଦାର୍ମିକ ଆନ୍ନେଞ୍ଜିମା ଇଚ୍ଚେସି, ତାନୁ ଗର୍ବ କିଅନ୍ ମୁନେଞ୍ଜିମା; ମତ୍ର ମୁଲାପେନୁ ନକେସି ଆଃଏ । 3#ଗାଲା ୩:୬ଇନାକି ଦର୍ମପୁତି ଇନ୍ନା ୱେସ୍ପିଞ୍ଜାନେ ? ଅବ୍ରାହାମ ମୁଲାପେନୁନିକି ମାଞ୍ଜାଡ଼ି କିତେଞ୍ଜି, ଆଟେ ଏଦି ତା ବାଗାଟି ଦାର୍ମିକ ଇଞ୍ଜାନ୍ ଲେକା ଆତେ, 4ଏମ୍ୱେନାଞ୍ଜି କାମା କିନ୍ନେଞ୍ଜି, ଏୱାଞ୍ଜି ତା କୁଲି ପାଁନ୍ବନ୍ତି ହକ ମାନ୍ନେ, ଏଦି ତା ବାଗା ଦାନ ଆଃଏ । 5ଏମ୍ୱେନାଞ୍ଜି ୱାଡ଼େ କାମାତାୱାଟି ଦାର୍ମିକ ଆଏହେଃଲ୍ଲେଞ୍ଜି, ମତ୍ର ଅଦାର୍ମିକନିକି ଦାର୍ମିକ କିନ୍ନି ମୁଲାପେନୁନିକି ମାଞ୍ଜାଡ଼ି କିନ୍ନି ବାଗାଟି, ଏୱାଞ୍ଜ୍ତି ମାଞ୍ଜାଡ଼ି ଏୱାଞ୍ଜିକି ଦାର୍ମିକ ଇଞ୍ଜାନ୍ ଲେକା କିନ୍ନେ । 6ଇହିଙ୍ଗିସି ମୁଲାପେନୁ ଇନ୍ଦାରିକି କାମାତାୱାଟି ଆଃଏ, ମତ୍ର ମାଞ୍ଜାଡ଼ିତାୱାଟି ଦାର୍ମିକ ଇଞ୍ଜାନ୍ ୱେସ୍ପିନ୍ନେଞ୍ଜି, ଦର୍ମପୁତିତାୱା ଦାଉଦ ରାଜେଞ୍ଜି ୱାଡ଼େ ଏହେଙ୍ଗ୍ତାରିନିକି ଦନ୍ୟ ଇଞ୍ଜାନ୍ ୱେସ୍ପିନ୍ନେଞ୍ଜି, 7“ମୁଲାପେନୁ ଇନ୍ଦାର୍ତି ଅଦର୍ମ କାମାତିଦି ମାକ୍ସାଡ଼ି କିଆନ୍ନେଞ୍ଜି, ଆଟେ ଇନ୍ଦାର୍ତି ପାପ ହାବେ ମୁଚ୍ଚିକିଆନ୍ନେଞ୍ଜି, ଏୱାରି ଦନ୍ୟ । 8ଦାର୍ମୁ ଇନ୍ଦାର୍ତି ପାପ ଲେକା କିଃଏଞ୍ଜି, ଏୱାଞ୍ଜି ଦନ୍ୟ ।” 9ଏହେଙ୍ଗ୍ ଆତେସି ଦାଉଦ ଇନ୍ଦାରିକି ଦନ୍ୟ ଇଞ୍ଜାନ୍ ୱେସ୍ପିନ୍ନେଞ୍ଜି, ଏୱାରି ଇନ୍ନା ୱାର୍ରି ସୁନତ ଦାଲ୍ଲା ମାଚ୍ଚେରି ? କି ଅସୁନତ ଦାଲ୍ଲା ୱାଡ଼େ ମାଚ୍ଚେରି ? ଇନାକି ମାରୁ ୱେସ୍ପିନ୍ନା, ଅବ୍ରାହାମତି ମାଞ୍ଜାଡ଼ି ତା ବାଗାଟି ଦାର୍ମିକ ଇଞ୍ଜାନ୍ ଲେକା ଆତେ । 10ଏହେଙ୍ଗ୍ ଆତେସି, ଏଦି ଇମ୍ୱିନ୍ ତୁକାତାୱା ଆଚ୍ଚେ ? ଅବ୍ରାହାମ ସୁନତ ଆହେଃଲ୍ଲାତ୍ କାହେ ନା ସୁନତ ଆତି ଡେଗ୍ଗା ? ସୁନତ ଆତି ଡେଗ୍ଗା ଆଃଏ, ମତ୍ର ସୁନତ ଆହେଃଲ୍ଲାତ୍ କାହେ । 11ଆଟେ ଅବ୍ରାହାମ ଅସୁନତ ମାଚ୍ଚି ତୁକାତାୱା ମାଞ୍ଜାଡ଼ିତାୱାଟି ଦାର୍ମିକ ଲେକା ଆନ୍ ଏଦିମ୍ବାତି ତୁର୍ରି ଡେହେଙ୍ଗ୍ ସୁନତ ଆତେଞ୍ଜି । ଏଦାକି ଏମ୍ୱେନାରି ସୁନତ ଆଃଏଟେଃଏ ୱାଡ଼େ ମାଞ୍ଜାଡ଼ିତାୱାଟି ଦାର୍ମିକ ଲେକା ଆଇନ୍ନେରି, ଅବ୍ରାହାମ ଆଇନ୍ନେଞ୍ଜି ଏୱାର୍ତି ଆବା । 12ଅବ୍ରାହାମ ଏ ସୁନତ ଆନ୍ନାର୍ତି ଆବା, ମତ୍ର ଏୱାଞ୍ଜି ୱାର୍ରି ଏ ଦାଲ୍ଲା ବାଗା ଆଃଏ, ଅସୁନତ ମାଚ୍ଚି ତୁକାତାୱା ଇନିସ୍ ମାଞ୍ଜାଡ଼ି କିଚ୍ଚେଞ୍ଜି, ଇହିଙ୍ଗିସି ଏମ୍ବେନାରି ଏୱାଞ୍ଜ୍ ଡେହେଙ୍ଗ୍ ମାଞ୍ଜାଡ଼ି କିନେରି, ଏୱାର୍ ବାଗା ୱାଡ଼େ ଏୱାଞ୍ଜି ଆବା ଆନେଞ୍ଜି ।
ମାଞ୍ଜାଡ଼ି ତାୱାଟି ମୁଲାପେନୁତି ଦିବ୍ବା ପାଁନ୍ବନ୍
13 #
ଗାଲା ୩:୨୯
ଇନାକି ଅବ୍ରାହାମ ଅଟେ ତା ଆଙ୍ଗାତାଙ୍ଗା ପୁର୍ତିତି ହକତ୍ଗାଟାଞ୍ଜି ଆଅନ୍ତି ଦିବ୍ବା, ମସାତି ହାଜୁତାୱାଟି ହିୱାଆହେଃଲ୍ଲାତେ, ମତ୍ର ମାଞ୍ଜାଡ଼ିତାୱାଟି ଦାର୍ମିକ ଆଚି ବାଗାଟି ହିୱାଆଚ୍ଚେ । 14#ଗାଲା ୩:୧୮ଜଦି ମସାତି ହାଜୁ ପାଲ୍ନିଆଅନ୍ତାରି ଏ ଦିବ୍ବାତି ହକତ୍ଗାଟାରି ଆଇନ୍ନେରି ଇଚ୍ଚେସି ମାଞ୍ଜାଡ଼ି ବାଃଏ ଆନେ ଅଟେ ଦିବ୍ବା ୱାଡ଼େ ବାଃଏ କିୱାଆନ୍ନେ । 15ଇନାକି ମସାତି ହାଜୁ ମୁଲାପେନୁତି ତରୁ ପିଲ୍ପିନ୍ନେ, ମତ୍ର ଇମ୍ୱିନାୱା ମସାତି ହାଜୁ ହେଃଲ୍ଲେ, ଏଦିମ୍ୱା ମସାତି ହାଜୁ ମାନି ଆଅନ୍ତାଦି ୱାଡ଼େ ହେଃଲ୍ଲେ ।
16 #
ଗାଲା ୩:୭
ଏଦାକି ଇ ଦିବ୍ବା ମାଞ୍ଜାଡ଼ି ତାୱାଟି ପାଁନ୍ବନ୍ ଆଇନେ, ଇନିସ୍ ଏଦି ଅନୁଗ୍ରହ ଡେହେଙ୍ଗ୍ ଆନ୍ନେ, ଆଟେ ଏଦାବାଗା ୱାର୍ରି ମସାତି ହାଜୁ ପାଲ୍ନି ଆଇନି ଆଙ୍ଗାତାଙ୍ଗା ବାଗାଟି ଆଃଏ, ମତ୍ର ଅବ୍ରାହାମ ଡେହେଙ୍ଗ୍ ମାଞ୍ଜାଡ଼ି କିନ୍ନି ତା ହାବେତ୍ ଆଙ୍ଗାତାଙ୍ଗା ବାଗାଟି ୱାଡ଼େ ଏ ଦିବ୍ବା ମାଞ୍ଜା ବାସାଆନେ; ଇନାକି ଅବ୍ରାହାମ ମାଞ୍ଜାଡ଼ି କିନ୍ନି ହାବେତାରିତି ଆବା । 17ଇନିସ୍ ଦର୍ମପୁତିତାୱା ୱ୍ରିଗାଆନ୍ନେ, ନାନୁ ନିଙ୍ଗେ ଏଗେଲ୍ ଜାତିଙ୍ଗ୍ତି ଆବା କିଆଞ୍ଜା । ଇମ୍ୱିନ୍ ମୁଲାପେନୁନିକି ଏୱାଞ୍ଜି ମାଞ୍ଜାଡ଼ି କିତେଞ୍ଜି, ଏମ୍ୱେନାଞ୍ଜି ହାନ୍ନାରିକି ନିପେନ୍ନେଞ୍ଜି ଅଟେ ହେଃଲ୍ଲାନ୍ କୁଲାତିଦି ମାନ୍ନି କୁଲା ଡେହେଙ୍ଗ୍ ଆର୍ପିନ୍ନେଞ୍ଜି, 18ଇହିଙ୍ଗିସି “ମି ଆଙ୍ଗାତାଙ୍ଗା ସୁକାଙ୍ଗ୍ ଡେହେଙ୍ଗ୍ ଏଗେଲ୍ ଆନେରି ଜେ ଲେକା କିଅନ୍ ମୁପନ୍ ଆଃଏ” ଇ ଇମ୍ୱିନ୍ କାତା ୱେସ୍ପା ଆଚ୍ଚେ, ଏହେଙ୍ଗିସି ଏୱାଞ୍ଜି ଏଗେଲ୍ ଜାତିତି ଆବା ଆନେଞ୍ଜି, ଇ କାତାତାୱା ଆସା ହେଃଲ୍ଲାତେସି ୱାଡ଼େ ଆସା ଇଟ୍ଟାନ୍ ମାଞ୍ଜାଡ଼ି କିତେଞ୍ଜି । 19ତାଙ୍ଗେ ଏଚିତୁକାତାୱା ସେଙ୍ଗୁଡ଼ି ଅଁଣ୍ଡୁ ଆଚ୍ଚେ । ଏଦାକି ଏୱାଞ୍ଜି ତା ଗାଣ୍ଡି ହାନ୍ନି ଡେହେଙ୍ଗ୍ ଏଲୁ କିଆନ୍ ଅଟେ ସାରା ୱାଡ଼େ ଗାପ୍ଚି ବୁଡ୍ଡା ଆଚ୍ଚି ବାଗାଟି ବଦା ମାରନ୍ ମୁଃଏ ଇଞ୍ଜାନ୍ ପୁଞ୍ଜାଚ୍ଚେସ୍ ୱାଡ଼େ ଏୱାଞ୍ଜି ମାଞ୍ଜାଡ଼ି କିଆନ୍ ମାଞ୍ଜାଟି ବାସାଆତେଞ୍ଜି, 20ଏୱାଞ୍ଜି ମୁଲାପେନୁତି ଦିବ୍ବାତିଦି ମାଞ୍ଜାଡ଼ି ବାଗାଟି ଏଚ୍ଚେକ୍ ସନ୍ଦେହ କିଃଆତେଞ୍ଜି । ମତ୍ର ମାଞ୍ଜାଡ଼ିତାୱା ଆଣ୍ଟ ଆନ୍ ମୁଲାପେନୁନିକି ଜୁଙ୍ଗିତେଞ୍ଜି । 21ମତ୍ର ମୁଲାପେନୁ ଇମ୍ୱିନ୍ ଦିବ୍ବା କିଆନ୍ନେଞ୍ଜି, ଏଦା ଲେର୍ କିଅନ୍ ମୁନେଞ୍ଜି ଇଞ୍ଜାନ୍ ତା ଆଣ୍ଟ ମାଞ୍ଜାଡ଼ି ମାଚ୍ଚେ । 22ଇଦାବାଗା ଅବ୍ରାହାମ ମାଞ୍ଜାଡ଼ିତାୱାଟି ଦାର୍ମିକ ଇଞ୍ଜାନ୍ ଲେକା ଆତେଞ୍ଜି, 23ମାଞ୍ଜାଡ଼ିତାୱାଟି ଏୱାଞ୍ଜି ଦାର୍ମିକ ଲେକା ଆତେଞ୍ଜି, ଇ କାତା ୱାର୍ରି ଅବ୍ରାହାମ ବାଗାଟି ଦର୍ମପୁତିତାୱା ୱ୍ରିଗାଆହେଃଲ୍ଲେ, 24ମତ୍ର ମା ବାଗାଟି ୱାଡ଼େ ୱ୍ରିଗାଆନ୍ନେ । ଇନାକି ଏମ୍ୱେନାଞ୍ଜି ମା ଦାର୍ମୁ ଜିସୁନିକି ହାନ୍ନାରିଆଟି ରିହିକ୍ ନିପ୍ଚ୍ଚାନ୍ନେଞ୍ଜି, ତାଙ୍ଗେ ମାରୁ ମାଞ୍ଜାଡ଼ି କିନ୍ନି ବାଗାଟି ମାରୁ ୱାଡ଼େ ଦାର୍ମିକ ଲେକା ଆନା; 25ଏ ଜିସୁ ମା ପାପ ବାଗାଟି ସର୍ପି ଆତେଞ୍ଜି, ଆଟେ ମାଙ୍ଗେ ଦାର୍ମିକ କିଅନ୍ ବାଗାଟି ମୁଲାପେନୁ ଏୱାଞ୍ଜିକି ନିପ୍ତେଞ୍ଜି ।
Currently Selected:
ରୁମିୟ 4: DWK
Highlight
Copy
Compare
Share
Want to have your highlights saved across all your devices? Sign up or sign in
© 2023 NLCI CC BY-NC-ND 4.0