ରୁମିୟ 3
3
ମୁଲାପେନୁତି ଦାର୍ମିକତାତି ଅର୍ତ
1ଏହେଙ୍ଗ୍ ଆତେସି ଜିହୁଦି ଆଅନ୍ତି ଲାବ ଇନାଦି ? ଆଟେ ସୁନତ ଆଅନ୍ତାଦି ଇନ୍ନି ଲାବା ? ହାଁ, ଏଦିମ୍ୱା ଗାପ୍ଚି ଲାବା ମାନ୍ନେ । 2ମୁଲାପେନୁତି ବାକ୍ୟ ହାବେତାୱାଟି କାହେ ଜିହୁଦି ଦାଲ୍ଲାନିକି ହିୱା ଆଚ୍ଚେ । 3ମତ୍ର ଜିହୁଦିଙ୍ଗ୍ ତାୱାଟି ତୁଲ୍ଲେ ଦାଲ୍ଲା ମୁଲାପେନୁ ନକେସ୍ ଅବିସ୍ୱସ୍ତ ଆତେରି, ଏଦାବାଗା ଇଞ୍ଜାନ୍ ମୁଲାପେନୁ ଇନ୍ନା ତା ଦିବ୍ବା ଲେର୍ ଇସ୍ପନ୍ ମୁଃଏଞ୍ଜିମା ? 4ଏଦି ଏଚ୍ଚେକ୍ୱାଡ଼େ ଆଃଆକାଦି, ମତ୍ର ହାବେତାରି କଲଗାଟାରି ଆତେସ୍ ଆନେରି, ମତ୍ର ମୁଲାପେନୁ ନିଜ୍ଜାଗାଟାଞ୍ଜି । ଇନିମିଡି ଦର୍ମପୁତିତାୱା ୱ୍ରିଗାଆନ୍ନେ, “ନିନୁ ନି ବାକ୍ୟତାୱା ଦାର୍ମିକଗାଟାଞ୍ଜି ଇଞ୍ଜାନ୍ ପଙ୍ଗିଦି, ଆଟେ ଏଚ୍ଚିକିଃଆ ନି ବିଚାର ଆନେ ଏଚିତୁକାତାୱା ନିନୁ ଜିତି ଆଦି ।” 5ମତ୍ର ମା ଅଦର୍ମ କାତା ମୁଲାପେନୁତି ଦାର୍ମିକତା ତସ୍ପିନ୍ନେ ଇଚ୍ଚେସି, ମାରୁ ଇନ୍ନା ୱେସ୍ନା ? ଇମ୍ୱିନ୍ ମୁଲାପେନୁ ତରୁଟି ଦଣ୍ଡ ହିଞ୍ଜାନେଞ୍ଜି, ଏୱାଞ୍ଜି ଇନ୍ନା ଅଦାର୍ମିକଗାଟାଞ୍ଜି ? ଏଦା ନାନୁ କୁଏଞ୍ଜ୍ତି ଏଲୁ ଡେହେଙ୍ଗ୍ ୱେସ୍ପିଞ୍ଜା । 6ଏଦି ଏଚ୍ଚେକ୍ୱାଡ଼େ ଆଃଆକାଦି; ଇନାକି ଏହେଙ୍ଗ୍ ଆତେସି ମୁଲାପେନୁ ଇନିମିଡି ପୁର୍ତିତି ବିଚାର କିନେଞ୍ଜି ? 7ଜଦି ନା କଲତାୱାଟି ମୁଲାପେନୁତି ନିଜ୍ଜା ତା ଗଉରବ ବାଗାଟି ଏଗେଲ୍ ଗାମିତେ, ଏହେଙ୍ଗ୍ ଆତେସି ଆଟେ ଇନାକିଅନ୍ ହାଦାଡ଼ି ୱାଡ଼େ ନାନୁ ପାପିଗାଟାଞ୍ଜି ଡେହେଙ୍ଗ୍ ବିଚାର ଆଇମାଃଇ ? 8ମାରୁ ଇନାବାଗା ୱେଃସାସୁ, ୱାଦୁ ଡ଼ଃଆନ୍ କାମା କିନା, ଏମ୍ବାଟିଆଟି ମାରୁ ନେହି ପଲ ପାଁନା ? ନାନୁ ଇହିଙ୍ଗ୍ ୱେସ୍ପିମାଃଇ ଇଞ୍ଜାନ୍ ଏଚ୍ଚେ ଦାଲ୍ଲା ଅଡ୍ଡାନାହି ଲେଜ୍ଜା କିଞ୍ଜାନେରି । ଇ କାତା ବାଗାଟି ଏୱାରି ନିଜ୍ଜାନେଃଏ ଦଣ୍ଡ ପାଁନେରି ।
ପୁର୍ତିତାୱା ରଃଅଞ୍ଜି ୱାଡ଼େ ଦାର୍ମିକ ହେଃଲ୍ଲେଞ୍ଜି
9ଏହେଙ୍ଗ୍ ଆତେସି ମାରୁ ଜିହୁଦିଙ୍ଗ୍ନାସୁ ଇନ୍ନା ଅନଜିହୁଦିଙ୍ଗ୍ ତାୱାଟି ଗାପ୍ଚି ନେହାତାସୁ ? ଏଚ୍ଚେକ୍ୱାଡ଼େ ଆଃଏ; ନାନୁ କାହେଟେଃଏ ୱେସାମାଃଇ ଜେ, ଜିହୁଦି ଅଟେ ଅନଜିହୁଦିଙ୍ଗ୍ ପାପତି ହକତ୍ତାୱା ମାନ୍ନେରି । 10ଇନିସ୍ ଦର୍ମପୁତିତାୱା ୱ୍ରିଗାଆନ୍ନେ, ଦାର୍ମିକ ଏମ୍ୱେନାଞ୍ଜି ହେଃଲ୍ଲେଞ୍ଜି; ରଃଅଞ୍ଜି ୱାଡ଼େ ହେଃଲ୍ଲେଞ୍ଜି; 11ମୁଲାପେନୁନିକି ପୁନ୍ବନ୍ତାଞ୍ଜି ଏମ୍ୱେନାଞ୍ଜି ୱାଡ଼େ ହେଃଲ୍ଲେଞ୍ଜି; ଏହେଙ୍ଗିସି କି ମୁଲାପେନୁନିକି ଦାହ୍ପନ୍ତାଞ୍ଜି ରଃଅଞ୍ଜି ୱାଡ଼େ ହେଃଲ୍ଲେଞ୍ଜି, 12ହାବେତାରି ମୁଲାପେନୁତାୱାଟି ଦେହା ଆନ୍ନେରି ଅଟେ ହାବେତାରି ବାଃଏ ଆନ୍ନେରି, ନେହି କାମା କିଅନ୍ ବାଗା ଏମ୍ୱେନାରି ହେଃଲ୍ଲେରି, ଏୱାର୍ତାୱାଟି ରଃଅଞ୍ଜି ୱାଡ଼େ ପାପୁଅଲ୍ପନ୍ତାଞ୍ଜି ହେଃଲ୍ଲେଞ୍ଜି । 13ଏୱାର୍ତି ଗର୍ନ ଏଗାନ୍ନି ଗ୍ରିପାଙ୍ଗୁଟି ଡେହେଙ୍ଗ୍, ଏୱାରି ତା ୱାଙ୍ଗେସ୍କା ଡ଼ାହି ଟକ୍କି କିନ୍ନେରି, ଏୱାର୍ତି ଗୁତିତାୱା ବିସଗାଟି ରାଚୁତି ବିସ ମାନ୍ନେ, 14ଏୱାର୍ତି ଗୁତି ୱ୍ଲିପା ଅଟେ କୁଟୁ କାତାଟି ନେଞ୍ଜାନ୍ନେ; 15ଏୱାରି ଦାଲ୍ଲାନିକି ପାଗନ୍ ବାଗାଟି ଗାପ୍ଚି ମନ କିଆନ୍ ହାବେ ୱେଲା ହାମ୍ୱେର୍ ଆନ୍ ମାଞ୍ଜିନ୍ନେରି, 16ଏୱାର୍ ଇମ୍ୱିନ୍ଇନ୍ଦା ହାଜ୍ଜିନ୍ନେରି, ଏଦିମ୍ୱା ବିହା ଅଟେ ନାହେଡ୍ ପିଲ୍ପିନ୍ନେରି । 17ଆଟେ ଏୱାରି ଇନ୍ଦାର୍ ଡ଼ାହି ୱାଡ଼େ ଲତୁଟି ବାସା ଆଅନ୍ ପୁଞ୍ଜେହେଃଲ୍ଲେରି । 18ଏୱାର୍ ମୁଲାପେନୁନିକି ହିତେ ୱାଡ଼େ ଆଜ୍ଜେହେଃଲ୍ଲେରି । 19ଆଟେ ମାରୁ ତ ପୁଞ୍ଜିନ୍ନା ଜେ, ମସାତି ହାଜୁ ଇନ୍ନା ଇନ୍ନା ୱେସ୍ପିନ୍ନେ, ଏ ହାବେ ମସା ହାଜୁତି ହକତ୍ତାୱା ମାନ୍ନି ଦାଲ୍ଲାନିକି ୱେସ୍ପିନ୍ନେ, ଇନିସ୍ ହାବେତାରିତି ଗୁତିଙ୍ଗ୍ ଡାମ୍ ଇସ୍ପନ୍ ଆନେ ଅଟେ ପୁର୍ତିତି ହାବେତାରି ମୁଲାପେନୁତି ବିଚାରତାୱା ଦଣ୍ଡ ପାଁନେରି; 20#ଗାଲା ୨:୧୬ଇନାକି ହାଜୁ ପାଲ୍ନି ଆନ୍ ଇମ୍ୱିନ୍ କୁଏଞ୍ଜି ୱାଡ଼େ ମୁଲାପେନୁ ନକେସି ଦାର୍ମିକ ଆଅନ୍ ମୁଃଏଞ୍ଜି, ଏଦାକି ହାଜୁତାୱାଟି ମାରୁ ପାପିଗାଟାସୁ ଇଞ୍ଜାନ୍ ପୁଞ୍ଜିନ୍ନା ।
ମାଞ୍ଜାଡ଼ିତାୱାଟି ମୁଲାପେନୁତି ଦାର୍ମିକତା
21ମତ୍ର ହାଦାଡ଼ି ମସାତି ହାଜୁ ପିହାନ୍ ମୁଲାପେନୁ ମାଙ୍ଗେ ଦାର୍ମିକ କିଞ୍ଜାନେଞ୍ଜି, ଆଟେ ଏ କୁଲାଟି ମସାତି ହାଜୁ ଅଟେ ବାବବାଦିଙ୍ଗ୍ତି ଦର୍ମପୁତିତାୱା ମୁଲାପେନୁ ୱେସାନ୍ନେଞ୍ଜି, 22#ଗାଲା ୨:୧୬ୱାର୍ରି ଜିସୁ କ୍ରିସ୍ଟନିକି ମାଞ୍ଜାଡ଼ି କିନ୍ନାରିକି ମୁଲାପେନୁ ଦାର୍ମିକ କିନେଞ୍ଜି, ଇନାକି ମୁଲାପେନୁ ଇନ୍ଦାରିକି ୱାଡ଼େ ମ୍ରୁମ୍ବୁ ହୁଡ଼େଟେଃଏ ୱାର୍ରି କ୍ରିସ୍ଟନିକି ମାଞ୍ଜାଡ଼ି କିନ୍ନି ହାବେତାରିନିକି ଇ ସୁଜଗ ହିନେଞ୍ଜି । 23ହାବେତାରି ତ ପାପ କିଆନ୍ନେରି ଅଟେ ମୁଲାପେନୁତି ଗଉରବତାୱାଟି ଦେହା ଆନ୍ନେରି, 24ଆଟେ ଏୱାରି ଇନ୍ନା ହିଃଏଟେଃଏ ମୁଲାପେନୁତି ଅନୁଗ୍ରହଟି କ୍ରିସ୍ଟ ଜିସୁତାୱା ଇମ୍ୱିନ୍ କୁଲ୍ପା ମାନ୍ନେ, ଏଦା ଡ଼ାହି ଦାର୍ମିକ ଇଞ୍ଜାନ୍ ଲେକା ଆଇନ୍ନେରି । 25ମୁଲାପେନୁ ଜିସୁ କ୍ରିସ୍ଟନିକି ପାପତି ବଲି ଡେହେଙ୍ଗ୍ ହିଆତେଞ୍ଜି । ଇନିସ୍କି ଜିସୁ କ୍ରିସ୍ଟତି ରାକ୍କାତାୱା ମାଞ୍ଜାଡ଼ି କିନ୍ନାରିତି ପାପ ମାକ୍ସାଡ଼ି ଆଅନ୍ ମୁନେ, ଇନାକି ମୁଲାପେନୁ ସହିଆନ୍, ଦାଲ୍ଲା କାହେ କିଆଚ୍ଚି ପାପ ହାବେ ମାକ୍ସାଡ଼ି କିତେଞ୍ଜି । ଆଟେ ତାଙ୍ଗେ ଦାର୍ମିକ ଇଞ୍ଜାନ୍ ଲେକା କିତେଞ୍ଜି । 26ମତ୍ର ମୁଲାପେନୁ ହାଦାଡ଼୍ତି ତା ଦାର୍ମିକତା ପପ୍କନ୍ ବାଗାଟି ଇଦା କିଆନ୍ନେଞ୍ଜି, ଇନାକି ଏୱାଞ୍ଜି ତାନୁନେଃଏ ଦାର୍ମିକଗାଟାଞ୍ଜି ଅଟେ ଜିସୁନିକି ମାଞ୍ଜାଡ଼ି କିନ୍ନାରିକି ଦାର୍ମିକଙ୍ଗ୍ ଇଞ୍ଜାନ୍ ଲେକା କିନ୍ନେଞ୍ଜି । 27ମାରୁ ଇନ୍ନି କୁଲା ବାଗା ଗର୍ବ କିନା ? ଏହେଙ୍ଗିସି ଇନ୍ନି କୁଲା ହେଃଲ୍ଲେଏ । ଇନିମିଡିତି ହାଜୁତାୱାଟି ମାରୁ ଦାର୍ମିକ ଲେକା ଆଇନା ? ଇଦି ଇନ୍ନା ମସାତି ହାଜୁତାୱାଟି ? ଆଃଏ, ମତ୍ର ୱାର୍ରି ମାଞ୍ଜାଡ଼ିତି ହାଜୁତାୱାଟି ଆଇନେ । 28ଏହେଙ୍ଗ୍ ଆତେସି ଇଦି ମା ନିସ୍ପୁତି ଜେ, କୁଏଞ୍ଜି ମସାତି ହାଜୁ ପାଲ୍ନି ଆଇନି ବାଗାଟି ଆଃଏ, ମତ୍ର ଜିସୁ କ୍ରିସ୍ଟନିକି ମାଞ୍ଜାଡ଼ି କିନ୍ନି ବାଗାଟି ଦାର୍ମିକ ଆଇନ୍ନେଞ୍ଜି । 29ମୁଲାପେନୁ ଇନ୍ନା ୱାର୍ରି ଜିହୁଦିଙ୍ଗ୍ତି ମୁଲାପେନୁ ? ଏୱାଞ୍ଜି ଇନ୍ନା ଅନଜିହୁଦିଙ୍ଗ୍ତି ମୁଲାପେନୁ ଆଃଏ ? ଏୱାଞ୍ଜି ନିଜ୍ଜାନେଃଏ ଅନଜିହୁଦିଙ୍ଗ୍ତି ମୁଲାପେନୁ ୱାଡ଼େ । 30#ଗାଲା ୩:୨୦ଇନାକି ରଃଅଞ୍ଜେଃଏ ମୁଲାପେନୁ, ଆଟେ ସୁନତ ଦାଲ୍ଲା ଆପାକାରି କି ଅସୁନତ ଦାଲ୍ଲା ଆପାକାରି ମୁଲାପେନୁ ଏୱାରିକି ମାଞ୍ଜାଡ଼ି କିନ୍ନି ବାଗାଟି ଦାର୍ମିକ କିନେଞ୍ଜି । 31ଏହେଙ୍ଗ୍ ଆତେସି, ମାରୁ ଇନ୍ନା ମାଞ୍ଜାଡ଼ିତାୱାଟି ହାଜୁତିଦି ନାହେଡ୍ କିନ୍ନାମା ? ଏଦି ଏଚ୍ଚେକ୍ ୱାଡ଼େ ଆଃଆକାଦି, ମତ୍ର ମାରୁ ମାଞ୍ଜାଡ଼ିତାୱାଟି ହାଜୁତିଦି ରଞ୍ଜି କିନ୍ନା ।
Currently Selected:
ରୁମିୟ 3: DWK
Highlight
Copy
Compare
Share
Want to have your highlights saved across all your devices? Sign up or sign in
© 2023 NLCI CC BY-NC-ND 4.0