ରୁମିୟ 2
2
ମୁଲାପେନୁତି ନିୟେବିଚାର
1 #
ମାତି ୭:୧; ଲୁକ ୬:୩୭ ଏଦାବାଗା ଏ କୁଇଙ୍ଗ୍ନାତେରି, ମିରୁ ଜେ ବିଚାର କିଞ୍ଜେରି, ମିରୁ ଏମ୍ବେନାତେରି ୱାଡ଼େ ଆଦୁ, ମିରୁ ଜ୍ଡିଅନ୍ ମୁଃଏରି, ଇନାକି ମିରୁ ରଃଅଞ୍ଜିକି ଇମ୍ୱିନ୍ କୁଲାଟି ବିଚାର କିଞ୍ଜେରି, ଏ କୁଲାଟି ମିରୁ ମି ଗାଣ୍ଡି ଦୁସି କିଞ୍ଜେରି, ଇନାକି ମିରୁ ବିହି ଦାଲ୍ଲାନିକି ବିଚାର କିଞ୍ଜେରି । ମତ୍ର ମିରୁ ୱାଡ଼େ ଏହେଙ୍ଗ୍ତି ବୁଲ୍ କାମା କିଞ୍ଜେରି । 2ଆଟେ ଏମ୍ୱେନାରି ଇହିଙ୍ଗ୍ତି କାମା କିନ୍ନେରି, ଏୱାରିକି ମୁଲାପେନୁ ତା ନିୟେଟି ନିଜ୍ଜାନେଃଏ ଦଣ୍ଡ ହିନେଞ୍ଜି, ଇଦା ମାମୁ ପୁଞ୍ଜିନ୍ନାମୁ । 3ଆଟେ ଏ କୁଏଞ୍ଜ୍ତି, ଏମ୍ୱେନାରି ଇହିଙ୍ଗ୍ତି ବୁଲ୍ କାମା କିନ୍ନେରି, ନିନୁ ଏୱାର୍ତି ବିଚାର କିଞ୍ଜି ଆଟେ ନିନୁ ୱାଡ଼େ ଏହେଙ୍ଗ୍ତି କାମା କିଆନ୍, ମୁଲାପେନୁତି ଦଣ୍ଡଟି ଜ୍ଡିଃଇ ଇଞ୍ଜାନ୍ ଇନ୍ନା ଏଲୁ କିଞ୍ଜି ? 4ମୁଲାପେନୁତି ପାପୁଅଲ୍ପନ୍ ଜେ ମିଙ୍ଗେ ଏଲୁୱ୍ଡେପି କିଅନ୍ତିକି ସେସ୍ଟା କିନ୍ନେ, ଇଦା ପୁନ୍ନେଟେଃଏ ନିନୁ ଇନ୍ନା ତା ପାପୁଅଲ୍ପନ୍, ଦର୍ଜ୍ୟ ଅଟେ କାଲେଙ୍ଗ୍କାଲା ସହି ଆନ୍ ମାନ୍ବନ୍ତି ଦନତିଦି ହାବେ ନିଗାଡ଼୍ ହୁଡ଼େଏଞ୍ଜି ? 5ମତ୍ର ନିନୁ ନି ଆଣ୍ଟ ଅଟେ ଏଲୁ ୱ୍ଡେପ୍ଚ୍ଚାହେଃଲ୍ଲାନ୍ ହଡାଙ୍ଗ୍ତାୱାଟି ଇମ୍ୱିନ୍ ଦିନା ମୁଲାପେନୁ ନିଜ୍ଜାଟି ନିୟେ କିନେଞ୍ଜି, ଏ ତରୁତି ଦିନାତାୱା ନିନୁ ନି ବାଗା ଆଚ୍ଚିତି ଦଣ୍ଡ ଉହି କିଞ୍ଜି; 6ମୁଲାପେନୁ ହାବେତାରିନିକି ବିଚାର କିଆନ୍ ତା ତା କିଆନି କାମା ଡେହେଙ୍ଗ୍ ପୁରସ୍କାର ହିନେଞ୍ଜି; 7ଏମ୍ୱେନାରି ଦର୍ଜ୍ୟ ଡ଼ାହି ନିଗ୍ଗା କାମା କିଏସ୍ନା ମୁଲାପେନୁତାୱାଟି ଗଉରବ, ସନ୍ମାନ୍ ଅଟେ ହାବେଦିନାତି ପରନ୍ ଦାହ୍ପିନ୍ନେରି, ଏୱାରିକି ମୁଲାପେନୁ ଟାକ୍କିଡ଼ହ୍ନାତି ପରନ୍ ହିନେଞ୍ଜି, 8ମତ୍ର ଏମ୍ୱେନାରି ସାର୍ତପର ଆନ୍, ଆଟେ ନିଜ୍ଜାତିଦି ମାନି ଆଏହେଃଲ୍ଲେରି, ମତ୍ର ଅଦର୍ମଟି ତାକେନ୍ନେରି, ଏୱାର୍ କୁଃଏଟି ମୁଲାପେନୁତି ଗାପ୍ଚି ରାଗା ଅଟେ ତରୁ ଗଟିଆନେ । 9କାହେ ଜିହୁଦିଙ୍ଗ୍ ଡେଗ୍ଗା ଗ୍ରିକ୍ ଦାଲ୍ଲା, ହାବେତ୍ ଡ଼ଃଆନ୍ କାମା କିନ୍ନି ଦାଲ୍ଲାତି କୁଃଏଟି ବିହା ଅଟେ ଜୁଗ୍ଗା ୱାନେ, 10ମତ୍ର ଏମ୍ୱେନାରି ହାବେତ୍ ନେହି କାମା କିନ୍ନେରି ଇଚ୍ଚେସି, କାହେ ଜିହୁଦିଙ୍ଗ୍ ଡେଗ୍ଗା ଅନଜିହୁଦିଙ୍ଗ୍, ମୁଲାପେନୁତାୱାଟି ଜୁଙ୍ଗନ୍, ସନ୍ମାନ୍ ଅଟେ ଲତୁ ପାଁନେରି । 11ଇନାକି ମୁଲାପେନୁ ଇନ୍ଦାରିକି ମ୍ରୁମ୍ୱୁ ହୁଡ଼ାନ୍ ବିଚାର କିଃଏଞ୍ଜି ।
ମସାତି ହାଜୁ ଅଟେ ମୁଲାପେନୁତି ବିଚାର
12ଏଦାକି ଏଚ୍ଚେ ଦାଲ୍ଲା ମସାତି ହାଜୁ ପୁନ୍ନେଟେଃଏ ପାପ କିଆନ୍ନେରି, ଏୱାରି ମସାତି ହାଜୁ ପୁନ୍ନେଟେଃଏ ନାହେଡ୍ ଆନେରି; ଆଟେ ଏଚ୍ଚେ ଦାଲ୍ଲା ହାଜୁ ପୁଞ୍ଜାନ୍ ପାପ କିଆନ୍ନେରି, ଏୱାରି ଏ ହାଜୁ ଡେହେଙ୍ଗ୍ ବିଚାର ଆନେରି । 13ଇନାକି ମସାତି ହାଜୁ ୱେନ୍ବନ୍ତାରି ମୁଲାପେନୁ ନକେସ୍ ଦାର୍ମିକଗାଟାରି ଆଇହେଃଲ୍ଲେରି, ମତ୍ର ହାଜୁ ପାଲ୍ନି ଆଇନାରି ଦାର୍ମିକଗାଟାରି ଇଞ୍ଜାନ୍ ଲେକା ଆଇନ୍ନେରି । 14ଏଦାକି ଅନଜିହୁଦିଙ୍ଗ୍ ପାଟ୍ଟି ମସାତି ହାଜୁ ହେଃଲ୍ଲାତେସି ୱାଡ଼େ, ଏୱାରି ନିଜ୍ଜାନେଃଏ ଏ ହାଜୁତିଦି ପାଲ୍ନି ଆଇନ୍ନେରି । ଏଦି ଏୱାର୍ ବାଗା ଏ ହାଜୁ ଡେହେଙ୍ଗ୍; 15ଇନାକି ଏୱାରି ହାଜୁତି କାମା ତା ତା ହଡାଙ୍ଗ୍ତାୱା ୱ୍ରିଗାନ୍ ମାନ୍ନେ ଇଞ୍ଜାନ୍ ତସ୍ପିନ୍ନେରି, ଏୱାର୍ତି ନେହି ପୁନ୍ବାଏଲୁ ୱାଡ଼େ ଏମ୍ୱାତି ସାକି ହିନେ, ଆଟେ ଏୱାର୍ତି ମନତି ବିଚାର ଏୱାରିକି ଦୁସି କିନ୍ନେ ଆଃଆତେସି ଦୁସି କିହେଃଲ୍ଲେ । 16ଇମ୍ୱିନ୍ ଦିନାତାୱା ମୁଲାପେନୁ ନାନୁ ପ୍ରଚାର କିନ୍ନି ସୁସମାଚାର ଡେହେଙ୍ଗ୍ ଜିସୁ କ୍ରିସ୍ଟ ତାୱାଟି କୁଇଙ୍ଗ୍ତି ମ୍ରାଗାନ୍ ମାନ୍ନି କୁଲାଟି ବିଚାର କିନେଞ୍ଜି, ଏଚିୱେଲା ଏଦି ପଙ୍ଗିନେ ।
ଜିହୁଦି ଦାଲ୍ଲା ଅଟେ ମସାତି ହାଜୁ
17ଜଦି ମିରୁ ମାମୁ ଜିହୁଦିଙ୍ଗ୍ନ୍ନାମୁ ଇଞ୍ଜାନ୍ ମସାତି ହାଜୁତାୱା ନାର୍ରା ଇଟ୍ଟେଞ୍ଜେରି ଅଟେ ମୁଲାପେନୁତି ଦାଲ୍ଲା ଇଞ୍ଜାନ୍ ଗର୍ବ କିଞ୍ଜେରି, 18ଆଟେ ମସାତି ହାଜୁଟି ଗ୍ରାମ୍ବାନାହି ମୁଲାପେନୁତି ଇଚ୍ଚା ପୁଞ୍ଜିଞ୍ଜେରି । ଆଟେ ଇମ୍ୱିନାଦି ଟିକ୍ ଅଟେ ଇମ୍ୱିନାଦି ବୁଲ୍ ଇଞ୍ଜାନ୍ ପୁଞ୍ଜିଞ୍ଜେରି । 19ଆଟେ ମସାତି ହାଜୁତାୱା ଇମ୍ୱିନ୍ ନିଜ୍ଜା ଅଟେ ଗ୍ୟାଁନ ନିଜ୍ଜାନେଃଏ ମାନ୍ନେ, ଏଦା ପାଁଣ୍ଡାନ୍ନି ବାଗାଟି, 20ମିରୁ ଏଲୁ କିଞ୍ଜେରି ମାମୁ କାଡ଼ାଙ୍ଗ୍ଗାଟାରିକି ପାହେର୍ ତସ୍ପନ୍ତାମୁ, ଆନ୍ଦେର୍ତାୱା ମାନ୍ନି ଦାଲ୍ଲାତି ଅଲା ଅଟେ ମୁର୍କଗାଟାରିକି ଉପଦେସ ହିଅନ୍ତାମୁ ଅଟେ ବଦାଙ୍ଗ୍ତି ଗ୍ରାପନ୍ତାମୁ ଇନାକି ମିରୁ ମସାତି ହାଜୁତାୱାଟି ହାବେ ଗ୍ୟାଁନ ଅଟେ ନିଜ୍ଜା ପାଁଣ୍ଡାନାମୁ ଇଞ୍ଜାନ୍ ମାଞ୍ଜାଡ଼ି କିଞ୍ଜେରି, 21ଜଦି ମିରୁ ବିହି ଦାଲ୍ଲାନିକି ଗ୍ରାପେଞ୍ଜେରି, ଏହେଙ୍ଗ୍ ଆତେସି ଇନ୍ନା କିଅନ୍ ମିରୁ ମି ଗାଣ୍ଡି ଗ୍ରାପେହେଃଲ୍ଲେରି ? ମ୍ଡାମି କିଃଆଟୁ ଇଞ୍ଜାନ୍ ପ୍ରଚାର କିଞ୍ଜେରି, ମିରୁ ଇନ୍ନା ମ୍ଡାମି କିହେଃଲ୍ଲେରି ? 22ଦାରି ଆଃଆଟୁ ଇଞ୍ଜାନାହି ୱେସାନ୍ ମିରୁ ଇନ୍ନା ଦାରି ଆଇଞ୍ଜେରିମା ? ମୁର୍ତିଙ୍ଗ୍ତିଦି ସ୍ରିଞ୍ଜେଞ୍ଜେରି, ମିରୁ ଇନ୍ନା ମନ୍ଦିରତି କୁଲା ମ୍ଡାମି କିହେଃଲ୍ଲେରି ? 23ମିରୁ ମସାତି ହାଜୁ ମାନ୍ନେ ଇଞ୍ଜାନ୍ ଗର୍ବ କିଞ୍ଜେରି । ମତ୍ର ହାଜୁତିଦି ମାନି ଆଃଏଟେଃଏ ମିରୁ ଇନ୍ନା ମୁଲାପେନୁନିକି ଲେଜ୍ଜା କିହେଃଲ୍ଲେର୍ମା ? 24ଇନିମିଡି ଦର୍ମପୁତିତାୱା ୱ୍ରିଗାଆନ୍ନେ, “ମି ବାଗାଟି ଅନଜିହୁଦିଙ୍ଗ୍ ମାଦ୍ଦେ ମୁଲାପେନୁତି ପାରୁ ଲେଜ୍ଜା ପାଁଣ୍ଡିନ୍ନେ ।”
25ଜଦି ମିରୁ ମସାତି ହାଜୁ ପାଲ୍ନି ଆଇଞ୍ଜେରି, ଇଚ୍ଚେସି ନିଜ୍ଜାନେଃଏ ମି ସୁନତ ଆନ୍ନି ଲାବା ମାନ୍ନେ, ମତ୍ର ଜଦି ମସାତି ହାଜୁ ମାନି ଆଇହେଃଲ୍ଲେରି ଇଚ୍ଚେସି ମି ସୁନତ ଆନ୍ନାଦି ଅସୁନତଗାଟି ଅନଜିହୁଦିଙ୍ଗ୍ ଡ଼ାହି ସମାନ୍ । 26ଏଦାବାଗା ଜଦି ଅସୁନତଗାଟାଞ୍ଜି ମସାତି ହାଜୁ ପାଲ୍ନି ଆଇନ୍ନେଞ୍ଜି ଇଚ୍ଚେସି, ଏ ଅସୁନତଗାଟାଞ୍ଜିକି ଇନ୍ନା ସୁନତ#୨:୨୬ ତା ନିଜ ଦାଲ୍ଲା ଇଞ୍ଜାନ୍ ଇନ୍ବନ୍ତାଦି ଗାଟାଞ୍ଜି ଇଞ୍ଜାନ୍ ମୁଲାପେନୁ ଲେକାକିଃଏଞ୍ଜି ? 27ଆଟେ ନିଜ୍ଜାନେଃଏ ଅସୁନତଗାଟାଞ୍ଜି ଜଦି ମସାତି ହାଜୁ ପାଲ୍ନି ଆଇନ୍ନେଞ୍ଜି ଏହେଙ୍ଗ୍ ଆତେସି, ୱ୍ରିଗାନ୍ନି ମସାତି ହାଜୁ ପାଁଣ୍ଡାନ୍ ଅଟେ ସୁନତ ଆନ୍ ୱାଡ଼େ ଏ ହାଜୁତିଦି ମିରୁ ମାନି ଆଇହେଃଲ୍ଲେରି, ଏଦାକି ମିଙ୍ଗେ ଅସୁନତଗାଟାଞ୍ଜି ଦୁସି କିଆନେଞ୍ଜି । 28ଇନାକି ଏମ୍ୱେନାଞ୍ଜି ଜିହୁଦି ଇଜ୍ଜା ପ୍ଲିଆନ୍ନେଞ୍ଜି, ଏୱାଞ୍ଜି ନିଜ୍ଜା ଜିହୁଦି ଆଃଏ ଅଟେ ଗାଣ୍ଡିଟି ସୁନତ ଆନ୍ନାଞ୍ଜି, ନିଜ୍ଜା ସୁନତ ଆହେଃଲ୍ଲେଞ୍ଜି; 29ମତ୍ର ନିଜ୍ଜା ଜିହୁଦି ଏୱାଞ୍ଜି, ଏମ୍ୱେନାଞ୍ଜି ହଡାଙ୍ଗ୍ଟି ଜିହୁଦି, ନିଜ୍ଜା ସୁନତ ଆଇନେ ମସାତି ହାଜୁତାୱାଟି ଆଃଏ । ମତ୍ର ଏଦି ହଡାଙ୍ଗ୍ତି ଏଲୁୱ୍ଡେପନ୍ତାୱାଟି ଅଟେ ପିର୍ନି ଡିଙ୍ଗାଟି । ଇହିଙ୍ଗ୍ତାଞ୍ଜି କୁଇଙ୍ଗ୍ତାୱାଟି ଆଃଏ, ମତ୍ର ମୁଲାପେନୁତାୱାଟି ଜୁଙ୍ଗନ୍ ପାଁଣ୍ଡିନ୍ନେଞ୍ଜି ।
Currently Selected:
ରୁମିୟ 2: DWK
Highlight
Copy
Compare
Share
Want to have your highlights saved across all your devices? Sign up or sign in
© 2023 NLCI CC BY-NC-ND 4.0