ରମିୟ 10
10
1ଅ ନିଂନା ବୁୟାଂଏଁ ତୁନାଲେ, ଆଗୁଲାଇ ଜିଉଦିରେମଲେ ମାପ୍ରୁ ରକ୍ୟା ଡେମେଇ' ଡ'ସେକ୍ ନିଂନା ଜିବନ୍ ବିତ୍ରେ ଅବୁଦି ମୁନ୍ ଡେଂଗୁତିଂ ମାରି ମାପ୍ରୁନ୍ବକ୍ ମା'ଏପୁଲେଇ ପାର୍ତନାସା ଡେମ'ତିଂ । 2ମା'ଏ ଡ'ନା ମାପ୍ରୁନା ମୁନ୍ସୁଗ ଡୁକୁପୁଲେଇ ଅବୁଦି ମୁନ୍ ଡେଂଗୁତା ମାତର୍ ମାପ୍ରୁନ୍ବକ୍ ମି ଉଇ ଡୁତା ଗୁତୁନ୍ ମା'ଏ ଆମାକ୍ତ ଡ'ସେକ୍ ନିଂ ଆପେ ସାକି ସୁଁସୁ ଗଂତିଂ । 3ମାସା'ଡ'ନା ମାପ୍ରୁଲା ଆରେମଲେ ମି ଦରମ୍ରେମ୍ ଅ'ଏତ ଡ'ସେକ୍ ମା'ଏ ମାଗ' ଆଡୁତା । ସା' ମା'ଏ ମା ଡେମ' ଡ'ନା ଦରମ୍ରେମ୍ ଏପୁଲେଇ ନିୟମ୍ ମାନ୍ସେକ୍ ଡୁକୁ ମାରି ନିଜର୍ନା ମୁନ୍ସୁଗ ବଲ୍କାମ୍ ଡେମ'ସେକ୍ ଡୁକୁ ମାତର୍ ମାପ୍ରୁନା ମୁନ୍ସୁଗ ମା'ଏ ଆଡେମ୍ତ । 4ମାସା'ଡ'ନା କିରିସ୍ଟଲା ସୁସାପ୍ ସିଁସେଇଁଉ ମସାଲା ବେଡ'କୁନୁଂ ନିୟମ୍ ମାନ୍ସେକ୍ ଡୁକୁନା ରେମଲେ ଦରମ୍ରେମ୍ ଏତା ଡ'ସେକ୍ ନିୟମ୍ ଡୁକୁ । ମାତର୍ ଜିସୁଲା ଗୁଲାଇରପୁଲେଇ ଗୁଇ'ଗା'ସା' ଆ'ନା ଗୁତୁନ୍ ନିୟମ୍ ମାନ୍ସେକ୍ ମାରି ଡୁକୁ ଦର୍କାର୍ ଆରାକ୍ । ମାତର୍ ଆ'ନା ଆଜିସୁଲା ଜା ବିସ୍ବାସ୍ ଡେମ୍ତ ଆମା'ଏ ମାପ୍ରୁ ଦରମ୍ରେମ୍ ଅ'ଏତ ।
ମାପ୍ରୁ ଆଗୁଲାଇର ରକ୍ୟା ଡେମ୍ତ
5ମାପ୍ରୁ ବେଡ'କୁନୁଂ ଗୁଲାଇ ନିୟମ୍ ମୁଇନ୍ଡା ମାନ୍ସେକ୍ ଡୁକୁନା ମାପ୍ରୁ ଆମାଇ ବଲ୍ରେମ୍ ଅ'ଏତ ଡ'ସେକ୍ ମସାଲା ଡି'କେନା ଲେକ୍ଲ'ତା, ମା ଲେକ୍ଲ'ତା ଡ'ନା, “ଜାଜା ମାପ୍ରୁନା ନିୟମ୍ ଗୁଲାଇଉ ବଲ୍ ମାନ୍ସେକ୍ ଡୁତା ମା'ଏ ଜିବନ୍ ବାମ୍ତା” ଡ'ସେକ୍ ଲେକ୍ଲ'ତା । 6-7ମାତର୍ ମାରି ମୁଇବକ୍ ଆମାପ୍ରୁ ବିସ୍ବାସ୍ ଡେମ'ନା ରେମଲେ ମି ବଲ୍ରେମ୍ ଏତା ଡ'ସେକ୍ ମସାଲା ଲେକ୍ଲ'ତା, ମା ଲେକ୍ଲ'ତା ଡ'ନା “ଆକିରିସ୍ଟଲା ୱାୟ' ଅ'ଜର୍ପୁଲେଇ ଜା କି'ତୁଂବାଗ୍ବକ୍ ଡୁଡାଇ' ଗଂତା ଡ'ସେକ୍ ମାରି କିରିସ୍ଟଲା ଜିବନ୍ ବାମେଇ' ଡ'ସେକ୍ ଆକିରିସ୍ଟଲା ଗୁଇ'କୁନୁଂ ରେମଲେ ଡୁକୁନୁଂ ଜାଗାକୁରୁଂ ବାଗ୍ବକ୍ ୱାୟ' ଅ'ତୁର୍ପୁଲେଇ ଜା ଆଲୁଂ ଜୁଜର୍ ଗଂତା ଡ'ସେକ୍ ପେନ୍ ଜିବନ୍ବକ୍ ଇନ୍ଡଇ'ଏସା ଆଏତ୍ଗା'#10:6–7 ଗୁତୁନ୍ ଅର୍ତ ମା ଡ'ନା ଆନେଇ ବଲ୍ରେମ୍ ଅ'ଏପୁଲେଇ ଆଜିସୁଲା ମାରି କି'ତୁଂକୁରୁଂ ଅ'ଜର୍ ଦର୍କାର୍ ଆରାକ୍ ମାସା'ଡ'ନା ଜିସୁଲା ନେନ୍ବକ୍ ମୁସଉ ଜର୍କୁ ମାରି ଗୁଇ'କୁନୁଂ ରେମଲେ ଡୁକୁନୁଂ ଜାଗାବକ୍ସା ଜୁଜର୍ ଦର୍କାର୍ ଆରାକ୍ ମାସା'ଡ'ନା ଆନେଇ' ବଲ୍ ଡିନ୍ଡେମ୍ପୁଲେଇ ଜିସୁଲା ରେମଲେ ଗୁଇ'ସେକ୍ ଡୁକୁନୁଂ ଜାଗାକୁରୁଂ ବୁରଗୁତା । ” ଡ'ସେକ୍ ଲେକ୍ଲ'ତା । 8ମାତର୍ ମାପ୍ରୁନା ବଲ୍କବର୍ ଅଂପୁଲେଇ ଆମ୍ବ'ଏସା ପାଲ୍ ଜାଗାବକ୍ ଉଇ ଦର୍କାର୍ ଆରାକ୍ ମାସା'ଡ'ନା ମାପ୍ରୁନା ଉଲାକ୍ବକ୍ ଡି'କେନା ଲେକ୍ଲ'ତା:
“ଗୁତୁନ୍ ବଲ୍କବର୍ ନନ୍ ତିରେ ଡୁତା
ନନ୍ ଜିବନ୍ବକ୍ ଡୁତା
ନନା ଟମ୍ନାବକ୍ ଡୁତା ।”
ଗୁତୁନ୍ ବିସ୍ବାସ୍ ଡିନ୍ଡେମ୍ନା ବଲ୍କବର୍ଉ ନେଇ ଆପେ ସୁଁସୁ ଡେନ୍ତୁନେଇ । 9ଗୁତୁନ୍ ମା ଡ'ନା, ଜିସୁଲାଉ ନିଂନା ପ୍ରବୁ ଡ'ସେକ୍ ନନା ତୁମ'ବୁରଂ ସୁନ'ନା ମାରି ମାପ୍ରୁ ଆଜିସୁଲା ଗୁଇ'କୁନୁଂକୁରୁଂ ବ'ରଲ' ଡ'ସେକ୍ ନନା ଜିବନ୍ ବିତ୍ରେ ବିସ୍ବାସ୍ ଡେମ୍ତୁନ ଡ'ନା ମାପ୍ରୁ ଆନ ପାପ୍ନା ଡନ୍ଡ୍କୁରୁଂ ରକ୍ୟା ଡେମ୍ତ । 10ମାସା'ଡ'ନା ପେନ୍ ଜିବନ୍ବକ୍ ଆମାପ୍ରୁ ବିସ୍ବାସ୍ ଡେମ'ନା ମାପ୍ରୁ ଆପେ ବଲ୍ରେମ୍ ଡ'ସେକ୍ ଜୁତ ମାରି ପେନ୍ ଟମ୍ନାବୁରଂ ନିଂ ଆମାପ୍ରୁ ବିସ୍ବାସ୍ ଡେମ'ତିଂ ଡ'ସେକ୍ ସୁନ'ନା ମାପ୍ରୁ ଆପେ ରକ୍ୟା ଡେମ୍ତ । 11ସା' ମାପ୍ରୁନା ଉଲାକ୍ବକ୍ ଡି'କେନା ଲେକ୍ଲ'ତା,
“ଜାଜା ଆମାଇ ବିସ୍ବାସ୍ ଡେମ୍ତ ମା'ଏ ଇନ୍ଡଇ'ଏସା ଆଗେୱାତା ।”
ଡ'ସେକ୍ ଲେକ୍ଲ'ତା ।
12ଡୁ'ତୁନ୍ ଡ'ନା ଜିଉଦିରେମ ଡ'ନାସା' ଜିଉଦିରେମ ଆରାକ୍ ଡ'ନାସା' ଗୁଲାଇରନା ମୁଇଉ ପ୍ରବୁ ଡୁତା । ମାଇ ଆଜାଏସା ପାଲ୍ପାଲ୍ ଆଜୁତ । ମାରି ଜା ଆନିଂ ସାନ୍ଡୁଂ ଡ'ସେକ୍ ଆମାପ୍ରୁ ୱାଇତ ଆମାଇ ମାପ୍ରୁ ଆଲାତ୍ ଡେଂସେକ୍ ଅବୁଦି ବଲ୍ ଜୁତ । 13ମାସା'ଡ'ନା ମାପ୍ରୁନା ଉଲାକ୍ବକ୍ ଲେକ୍ଲ'ତା,
“ପ୍ରବୁନା ଇମି ସବ'ସେକ୍ ଜାଜା ଆମାଇ ୱାଇତ ମା'ଏ ଗୁଲାଇର ରକ୍ୟା ବାମ୍ତା”
ଡ'ସେକ୍ ଲେକ୍ଲ'ତା ।
14ମାତର୍ ମା'ଏ ଆମାଇ ବିସ୍ବାସ୍ ଡେମ' ଆଡୁତା ଡ'ନା ମି ଆନେଇ ସାନ୍ଡୁଂ ଡ'ସେକ୍ ମା'ଏ ଆମାଇ ୱାୟ'ସେକ୍ ପାର୍ତନା ଡିନ୍ଡେମ୍ ଗଂତା? ମାପ୍ରୁ ଜା ଡ'ସେକ୍ ମା'ଏ ଅଂଅଁ' ଆଡୁତା ଡ'ନା ମି ମା'ଏ ବିସ୍ବାସ୍ ଡିନ୍ଡେମ୍ ଗଂତା? ମାପ୍ରୁନା ବଲ୍କବର୍ ସୁଁସୁରେମ୍ ଆରାକ୍ ଡ'ନା ମା'ଏ ମି ମାପ୍ରୁନା ବଲ୍କବର୍ ଅଂ ଗଂତା? 15ମାପ୍ରୁନା ବଲ୍କବର୍ ସୁଁସୁପୁଲେଇ ଆରେମଲେ ଆବେନ୍ଟାଇତ ଡ'ନା ମି ମାପ୍ରୁନା ବଲ୍କବର୍ ସୁନ୍ତ? ଗୁତୁନ୍ସା'ଉ ମାପ୍ରୁନା ଉଲାକ୍ବକ୍ ଡି'କେନ୍ ଲେକ୍ଲ'ତା, ମା ଡ'ନା:
“ରେମଲେ ମାପ୍ରୁନା ବଲ୍କବର୍ ସୁଁସୁ ସୁସାପ୍ ଡେଂକୁନୁଂବକ୍ ଜୁଜୁପୁଲେଇ ଅବୁଦି ବଲ୍ ।”
ଡ'ସେକ୍ ଲେକ୍ଲ'ତା ।
16ମାତର୍ ଗୁତୁନ୍ ବଲ୍କବର୍ ଏନ୍ତୁକ୍ରଉ ବିସ୍ବାସ୍ ଡେମ'ତା । ସା' ବାବବାଦି ଜିସାୟଲା ଉଲାକ୍ବକ୍ ଡି'କେନ୍ ଲେକ୍ଲ'ତା, ମା ଡ'ନା:
“ଅ ପ୍ରବୁ, ନେଇ ସୁନ'କୁନୁଂ ବଲ୍କବର୍ ମୁଇନ୍ଡାସା ବିସ୍ବାସ୍ ଆଡେମ୍ତ”
ଡ'ସେକ୍ ଲେକ୍ଲ'ତା । 17ଡୁ'ତୁନ୍ ଡ'ନା କିରିସ୍ଟନା ବାନିକବର୍ ସୁନ'ନାଉ ରେମଲେ ଗୁତୁନ୍ ଅଂତ ମାରି ଗୁତୁନ୍ ଅଂଅଁ'ନାଉ ମା'ଏ ବିସ୍ବାସ୍ ଡିନ୍ଡେମ୍ ଗଂତା । 18ମାତର୍ ନିଂ ଆପେ ମୁଇ ଅ'ଗଁସ୍ଲାକ୍ତିଂ, ମା'ଏ ଇସ୍ରାଏଲ୍ ରେମଲେ ମାପ୍ରୁନା ବଲ୍କବର୍ ଅଂଅଁ'ତାକି ଆରାକ୍? ଅଁ'ଅଁ, ମା'ଏ ଅଂଅଁ'ତା । ମାପ୍ରୁନା ଉଲାକ୍ବକ୍ ଡି'କେନା ଲେକ୍ଲ'ତା:
“ମା'ଏ ସୁନ'କୁନୁଂ ତୁମ' ଦର୍ତନିବକ୍ ଗୁଲାଇ କୁନ୍ଡା ରେମଲେ ଅଂଅଁ'ତା ।
ମାରି ମା'ଏ ମାପ୍ରୁନା ବଲ୍କବର୍ ଗୁଲାଇ ଦେସ୍ଦୁନିଆବକ୍ ସୁନ'ସା' ରେମଲେ ଗୁଲାଇର ଅଂଅଁ'ତା ।”
19ନିଂ ମାରି ଆପେ ଅଗଁସ୍ଲାକ୍ତିଂ: ମାପ୍ରୁନା ବଲ୍କବର୍ ଇସ୍ରାଏଲ୍ ରେମଲେ ଅଂଅଁ'ସେକ୍ସା ମା'ଏ ଗୁତୁନ୍ ଆମାକ୍ତ ଇ? ଆରାକ୍, ମା'ଏ ମାଗ'ତା । ମାପ୍ରୁ ସୁନ'କୁନୁଂ ମସାଲା ଉଲାକ୍ବକ୍ ମୁଲ୍ ଡି'କେନା ଲେକ୍ଲ'ତା, ମା ଡ'ନା:
“ଜାଜା ଜିଉଦିରେମଲେ ଆରାକ୍ ଆମା'ଏ ପେ ଜୁଲ'ନା ପେନା ଜିବନ୍ବକ୍ ଆଂକାର୍ ସୁସାପ୍ବାଇ' ନିଂ ଆପେ ଅ'ଡେମ୍ତିଂ ।
ମାରି ଜାଜା ମୁର୍କବାଇ' ଡୁତା ଆମା'ଏ ପେ ଜୁଲ'ନା ପେନ୍ ଜିବନ୍ବକ୍ ଗିସେ' ସୁସାପ୍ବାଇ' ନିଂ ଆପେ ଅ'ଡେମ୍ତିଂ” ଡ'ସେକ୍ ଲେକ୍ଲ'ତା ।
20ତିର୍ଗି' ମାପ୍ରୁନା ତୁମ' ଅଂଅଁ'ସେକ୍ ଆରେମଲେ ସୁଁସୁରେମ୍ ଜିସାୟଲା ଉଲାକ୍ବକ୍ ମାପ୍ରୁ ସୁନ'କୁନୁଂ ମବୁତୁଂ ଡି'କେନା ଲେକ୍ଲ'ତା, ମା ଡ'ନା:
“ଜାଜା ଆନିଂ ତୁର' ଆଡୁତା ମା'ଏ ଆନିଂ ବାଂଗା' ।
ମାରି ଜାଜା ଆନିଂ ଦର୍କାର୍ ଡ'ତା ଆମା'ଏ ନିଂ ନିଜେ ଅ'ତୁନାକ୍ ବେଡ'ନିଂ” ଡ'ସେକ୍ ଲେକ୍ଲ'ତା ।
21ମାତର୍ ଇସ୍ରାଏଲ୍ ରେମଲେନ୍ ବିସୟ ମାପ୍ରୁ ଡି'କେନା ସୁନ'ତା,
“ଇସ୍ରାଏଲ୍ ରେମଲେ ନିଂବକ୍ ସାପ୍ତାବେ ଡ'ସେକ୍ ଆମା'ଏ ଇସାଉ ଜାଗ୍ଲ'ସେକ୍ ଡୁକୁନିଂ
ମାତର୍ ମା'ଏ ଆନିଂ ମମାନ୍ବାର୍ବାଇ' ମାରି ନିଂନା ତୁମ' ମଉନଂବାଇ' ରେମଲେ” ଡ'ସେକ୍ ଲେକ୍ଲ'ତା ।
Currently Selected:
ରମିୟ 10: BFW
Highlight
Copy
Compare
Share
Want to have your highlights saved across all your devices? Sign up or sign in
CC BY-NC-ND 4.0