ରମିୟ 1
1
1ନିଂ ପାଉଲଲା, କିରିସ୍ଟ ଜିସୁନା ମୁଇନ୍ଡା ଗତିରେମ୍, କେନ୍ ସିଟି ରମିୟ ଦେସ୍ବକ୍ ଆଜିସୁଲା ବିସ୍ବାସ୍ ଡେମ'ସେକ୍ ଡୁକୁନୁଂ ଗୁଲାଇ ରେମଲେପୁଲେଇ ଲେକ୍ଲ'ତିଂ । ମାପ୍ରୁନା ବଲ୍କବର୍ ଆରେମଲେ ସୁଁସୁପୁଲେଇ ମାପ୍ରୁ ଆନିଂ ମୁଇନ୍ଡା ପେରିତ ଡ'ସେକ୍ ସିରେଲ' ବୁଂଅଁ'ତା । 2ମାଇନା କେନ୍ ବଲ୍କବର୍ ରେମଲେ ଗୁଲାଇର ଅଂତ ଡ'ସେକ୍ ମାପ୍ରୁ ତିତିବାଡ'ସେକ୍ ପର୍ମାନ୍ ସବ'କୁନୁଂ ସିଁସେଇଁଉ ମାଇନା ବାବବାଦିଲେନ୍କୁରୁଂ ମାପ୍ରୁନା ପବିତ୍ର ଉଲାକ୍ବକ୍ ଲେକ୍ଲ'ବୁଂଅଁ'ତା । 3ଗୁତୁନ୍ ବଲ୍କବର୍ ମା ଡ'ନା ମାପ୍ରୁନା ଉଁ'ଉଁନା ବିସୟଉ । ମାଇ ଦାଉଦ୍ ରାଜାନା କୁଲ୍ବକ୍ ରେମ ଏଗ୍ସେକ୍ ଜନମ୍ ଡେଂଗା' । 4ମାରି ପବିତ୍ର ଆତ୍ମାନା ବପୁବୁରଂ ମାପ୍ରୁ ଆମାଇ ଗୁଇ'କୁନୁଂକୁରୁଂ ବ'ରଲ'ସା' ଆମାଇ ମାପ୍ରୁନା ଉଁ'ଉଁ ଡ'ସେକ୍ ଆଗୁଲାଇର ଅସୁୟ' । ମାଇଉ ନେଇ'ନା ପ୍ରବୁ ଜିସୁ କିରିସ୍ଟଲା । 5କିରିସ୍ଟନ୍କୁରୁଂ ମାପ୍ରୁ ଆନିଂ ଦୟା ଡେମ'ସେକ୍ ମାଇନା ପେରିତ ଡ'ସେକ୍ ଅଦିକାର୍ ବେଡ'ତା । ଡୁ'ତୁନ୍ ଡ'ନା, ମାପ୍ରୁ ରେମଲେପୁଲେଇ ମାମା ଡେମ'ତା ଡ'ସେକ୍ ମାଇନା ବପୁବୁରଂ ଆଗୁଲାଇ ଜାତିନ୍ ରେମଲେ ସୁଁସୁ ଗଂତିଂ ମାରି ଗୁତୁନ୍ ଅଂଅଁ'ସେକ୍ ରେମଲେ ଆମାଇ ବିସ୍ବାସ୍ ଡେମ'ସେକ୍ ଆମାଇ ମାନ୍ତା, ଡୁ'ତୁନ୍ଉ ଜିସୁନା ଇମି ମଇମା ଡେନ୍ତା । 6ସା' ଆତା ରମିୟ ଦେସ୍ବକ୍ ଆଜିସୁ କିରିସ୍ଟଲା ବିସ୍ବାସ୍ ଡିନ୍ଡେମ୍ପୁଲେଇ ଆଜାଆଜା ମାପ୍ରୁ ସିରେଲ' ବୁଂଅଁ'ତା ମା'ଏବୁରଂ ଆପେସା ମାପ୍ରୁ ସିରେଲ'ତା ।
7ମାପ୍ରୁ ଆପେ ଆଲାତ୍ ଡେମ'ତା ମାରି ମାଇନା ପବିତ୍ରବାଇ' ରେମ ଡ'ସେକ୍ ସିରେଲ' ବୁଂଅଁ'ତା । ସା' ନିଂ ରମିୟ ଦେସ୍ବକ୍ ଡୁକୁନୁଂ ପେପୁଲେଇ କେନ୍ ସିଟି ଲେକ୍ଲ'ତିଂ ।
ନେଇ'ନା ବା ମାପ୍ରୁଲା ମାରି ପ୍ରବୁ ଜିସୁ କିରିସ୍ଟଲା ଆପେ ଦୟା ଡେମେଇ' ମାରି ପେନ୍ ଜିବନ୍ବକ୍ ସାନ୍ତିସାର୍ଦା ବେଡେଇ' ।
ରମିୟ ଦେସ୍ବକ୍ ଉଇପୁଲେଇ ପାଉଲଲା ଅବୁଦି ମୁନ୍ ଡେଂଗୁତା
8ପେ ଆଜିସୁଲା ବିସ୍ବାସ୍ ଡେମ'ତୁପେ ଡ'ସେକ୍ ଗୁଲାଇ ଦେସ୍ଦୁନିଆନା ରେମଲେ ଅଂଅଁ'ତାସା' ଜିସୁ କିରିସ୍ଟଲା ପେପୁଲେଇ ଡେମ'କୁନୁଂ ଗୁଲାଇ ଏତ୍ସେ'ଗା ପେପୁଲେଇ ନିଂ ଆମାପ୍ରୁ ସିଁସେଇଁଉ ସୁନ୍ଡ୍ରଗୁତିଂ । 9ମାରି ନିଂ ଇସାଉ ପାର୍ତନା ଡିନ୍ଡେମ୍ବେଲା, ଆପେ ଏତ୍ସେ'ଗା ପାର୍ତନା ଡେମ'ତିଂ । ଗୁତୁନା ସତ୍ ଡ'ସେକ୍ ମାପ୍ରୁ ସାକି ଡୁତା । ମାରି ମାଇନା ଉଁ'ଉଁନା ବଲ୍କବର୍ ଆଗୁଲାଇର ସୁଁସୁପୁଲେଇ ନିଂ ନିଂନା ଜିବନ୍କୁରୁଂ ଅ'ତୁର୍ସେକ୍ ଆମାଇଉ ସେବା ଡେମ'ତିଂ । 10ପେନ୍ବକ୍ ସାକ୍ସେକ୍ ଆପେ ଜୁଜୁପୁଲେଇ ଆନିଂ ଅବୁଦି ମୁନ୍ ଡେଂଗୁତାସା' ମାପ୍ରୁନା ମୁନ୍ ଡୁକୁନା ଆନିଂ ମୁସିଂ ପେନ୍ବକ୍ ବେନ୍ଟାଇ ଡ'ସେକ୍ ମାପ୍ରୁନ୍ବକ୍ ଇସାଉ ପାର୍ତନା ଡେମ'ତିଂ ।
11ମାସା' ନିଂ ପେନ୍ବକ୍ ସୁସାପ୍ପୁଲେଇ ଅବୁଦି ମୁନ୍ ଡେଂଗୁତିଂ ଡ'ନା ନିଂ ପେନ୍ବକ୍ ସାକ୍ନା ମାପ୍ରୁନା ପବିତ୍ର ଆତ୍ମା ଆନିଂ ଆସିର୍ବାଦ୍ ଡେମ'ସେକ୍ ଅମାଗ'କୁନୁଂ ନିଂ ଆପେସା ଅମାକ୍ ଗଂତିଂ ମାରି ପେ ଗୁତୁନ୍ ମାଗ'ସେକ୍ ଆଜିସୁ ବିସ୍ବାସ୍ ଡେମ'କୁନୁଂବକ୍ ଅଦିକ୍ ବପୁ ବାମ୍ତୁପେ । 12ନିଂ ମା ଡ'ସେକ୍ ସୁନ'ତିଂ ଡ'ନା, ନିଂ ପେନ୍ବକ୍ ସାକ୍ନା ଆପେ ଅ'ବପୁତିଂ ମାରି ପେ ଆମାପ୍ରୁ ବିସ୍ବାସ୍ ଡେମ'କୁନୁଂ ଜୁଲ'ସେକ୍ ନିଂସା ବପୁ ବାମ୍ତିଂ, ଡି'କେନା ନେଇ' ଅ'ବପୁଆର୍ତୁନେଇ' ।
13 #
ପେରିତ 19:21
ଅ ବୁୟାଂଏଁ ତୁନାଲେ, ନିଂ ମା ସୁନ'ତିଂ ଗୁତୁନ୍ ପେ ମାଗ'ନାଉ ଡେନ୍ତା ଡ'ସେକ୍ ଏତ୍ଗୁତିଂ । ଗୁତୁନ୍ ମା ଡ'ନା ନିଂ ପେନ୍ବକ୍ ସାପ୍ତିଂ ଡ'ସେକ୍ ଅବୁଦି ପାଲି ଏତ୍କୁନିଂ ମାତର୍ ଆଇ'ତୁନ୍ବେଲା ମାମା କସ୍ଟ ସା'ଗା'ସା' ନିଂ ଆ'ନ୍ପନ୍ତେକ୍ ସୁସାପ୍ ଆଗଂତିଂ । ପାଲ୍ ଉଂଗମ୍ବକ୍ ଉଇସେକ୍ ନିଂ ମାପ୍ରୁନା ବଲ୍କବର୍ ଅମାଗ'ନିଂସା' ପାଲ୍ ଜାତିନ୍ ରେମଲେ ଆମାଇ ବିସ୍ବାସ୍ ଡେମ'କୁନୁଂସୁଗ ଆତା ମାପ୍ରୁନା ବଲ୍କବର୍ ଅମାଗ'ନା ପେନ୍ବକ୍ସା ଏନ୍ତୁକ୍ର ଆମାପ୍ରୁ ବିସ୍ବାସ୍ ଡେମ୍ତ ଡ'ସେ'ଗାଉ ନିଂ ପେନ୍ବକ୍ ସାପ୍ତିଂ ଡ'ସେକ୍ ଏତ୍କୁନିଂ ।
14ନିଂ ମା ଡ'ତିଂ ଡ'ନା, ଗିରିକ୍ ରେମଲେବକ୍ସା ଗିରିକ୍ ଆରାକ୍ବାଇ' ରେମଲେବକ୍ସା, ମାରି ବୁଦିରେମ୍ବକ୍ସା ବୁଦି ଆରାକ୍ବାଇ' ରେମଲେବକ୍ସା ଆଗୁଲାଇର ମାପ୍ରୁନା ବାନିକବର୍ ସୁଁସୁନା କାମ୍ ନିଂ ଡେମ'ନାଉ ଡେନ୍ତା । 15ସା' ଆତା ରମିୟ ଦେସ୍ବକ୍ ପେ ଡୁତୁପେସା' ଆପେ ଆଗୁଲାଇର ମାପ୍ରୁନା ବାନିକବର୍ ସୁଁସୁପୁଲେଇ ଅବୁଦି ମୁନ୍ ଡେଂସେକ୍ ଡୁତିଂ ।
ବାନିକବର୍ବକ୍ ବପୁଡୁତା
16 #
ମାର୍କ 8:38
ସା' କେନ୍ ବାନିକବର୍ ଆରେମଲେ ସୁଁସୁପୁଲେଇ ଆଗେୱାତିଂ; ମାସା'ଡ'ନା କେନ୍ ବାନିକବର୍ ଅଂଅଁ'ସେକ୍ ବିସ୍ବାସ୍ ଡେମ'କୁନୁଂ ରେମଲେବକ୍ ରକ୍ୟା ଡିନ୍ଡେମ୍ପୁଲେଇ ମାପ୍ରୁନା ବପୁ କେନ୍ ବାନି କବର୍ବକ୍ ଡୁତା । ଜୁ, କେନ୍ ବାନିକବର୍ ଜିଉଦିରେମଲେ ବିସ୍ବାସ୍ ଡେମ'ସା' ଆମା'ଏ ସିଁସେଇଁଉ ମାପ୍ରୁ ରକ୍ୟା ଡେମ' ମାରି ତିର୍ଗି' ଜାଜା ଜିଉଦିରେମଲେ ଆରାକ୍ ଆମା'ଏସା ରକ୍ୟା ଡେମ' । 17ଗୁତୁନ୍ ବାନିକବର୍ବକ୍ ମାପ୍ରୁ ଆରେମଲେ ମି ଦରମ୍ରେମ୍ ଅ'ଏତ ଡ'ସେକ୍ ଅସୁୟ'ତା । ଗୁତୁନ୍ ମି ଡେନ୍ତା ଡ'ନା ରେମଲେ ଆମାପ୍ରୁ ବିସ୍ବାସ୍ ଡେମ'ତାସା' ମାରି ବିସ୍ବାସ୍ବୁରଂଉ ଡେନ୍ତା । ମାସା'ଡ'ନା ମାପ୍ରୁନା ଉଲାକ୍ବକ୍ ଲେକ୍ଲ'ତା, “ମାପ୍ରୁ ଜୁଲ'ନା ବଲ୍ ରେମ ଡ'କୁନୁଂ ମୁଇନ୍ଡା ଆମାପ୍ରୁ ବିସ୍ବାସ୍ ଡେମ'ତାସା' ବୁରତା ।”
ଗୁଲାଇର ପାପ୍ ଡେମ'ତା
18ସା' ରେମଲେ ଜାଜା ଗୁଲାଇ ପାପ୍ ମାରି ଗୁଲାଇ ଅଲିରାକ୍ବାଇ'କାମ୍ ଡେମ'ତା ଆମା'ଏ ଡନ୍ଡ୍କସ୍ଟ ବେ'ତିଂ ଡ'ସେକ୍ ମାପ୍ରୁ ସରଗ୍କୁରୁଂ ମାଇନା ଗିସେ' ଅସୁୟ'ତା । ମାସା'ଡ'ନା ମା'ଏ ଡୁ'ତୁନ୍ ପାପ୍କାମ୍ ଅଲିରାକ୍ବାଇ'କାମ୍ ଡେମ'ସେକ୍ ମାପ୍ରୁନା ସତ୍ ବିସୟବକ୍ ବିଡ୍କାୟ'ତା । 19ମାସା'ଡ'ନା ମାପ୍ରୁନା ବିସୟ ଗୁଲାଇ ମାଇ ନିଜେ ଆରେମଲେ ଅମାଗ' ବେଡ'ତାସା' ମାପ୍ରୁନା ଗୁଲାଇ ବିସୟ ରେମଲେ ମାଗ'ତା । 20ମାପ୍ରୁନା ଗୁନ୍ ମିବାଇ' ଡ'ସେକ୍ ରେମଲେ ଜୁଜୁ ଆଗଂତା ମାତର୍ ଇନ୍ଡଇ'ୟା ମାପ୍ରୁ ଦେସ୍ଦୁନିଆ ମାରି କି'ତୁଂ ଅ'ରଇଁୟ' ଉନ୍ତ୍ବାଂସା' ମାପ୍ରୁ ମିବାଇ' ମାରି ମାଇନା ଇସାଉ ଡୁକୁନୁଂ ବପୁ ମିବାଇ' ଡ'ସେକ୍ ମାଇ ଡେମ'କୁନୁଂ ଗୁଲାଇ କାମ୍ ଜୁଲ'ନା ରେମଲେ ମାକ୍ମାକ୍ ଗଂତା । ସା' ରେମଲେ “ମାଇ ମିବାଇ' ମାରି ମାଇନା ବପୁ ମିବାଇ'ଡେ', ନେଇ ଆମାକ୍ତୁନେଇ” ଡ'ସେକ୍ ଇନ୍ଡଇ'ଏସା ସୁଁସୁ ଆଗଂତା । 21#ଏପିସି 4:17,18ମା'ଏ ଆମାପ୍ରୁ ମାଗ'କୁନାସା ଆମାଇ ମାପ୍ରୁ ଡ'ସେକ୍ ଆମାନ୍ତା ମାରି ମାଇ ମା'ଏପୁଲେଇ ଡେମ'କୁନୁଂ ଗୁଲାଇ ଏତ୍ସେକ୍ ଆସୁନ୍ଡ୍ରତା । ମା'ଏନ୍ ଜିବନ୍ ବାଦ୍ଲି ଡେଂଉଇଗା'ସା' ଇମ୍ବ'ନା ସତ୍ବାଇ' ମାପ୍ରୁ ଡ'ସେକ୍ ମା'ଏ ଏତ୍ବାର୍ ଆଗଂତା ଡେଂଉଇଗା' ମାରି ମା'ଏନା ଜିବନ୍ ଞୁର୍ସେକ୍ ଡୁକୁ । 22ମା'ଏ ନିଜେ ନେଇ ବୁଦିବାଇ' ରେମଲେ ଡ'ସେକ୍ ସୁନ'ତା ମାତର୍ ମା'ଏ ଇ'କିସା ବୁଦି ଆରାକ୍ବାଇ' ରେମଲେ । 23ଇମ୍ବ'ନ୍ ମାପ୍ରୁ ଇନ୍ଡଇ'ଏସା ଆନାସ୍ତା ଆମାଇ ରେମଲେ ଆସୁନ୍ଡ୍ରତା ମାତର୍ ନାସ୍ଉଇବାଇ' ରେମଲେନା, ପୁରି'ସୁରଇ'ଏନା, ଗୁଇ'ତାଂବୁଂତେନା ମାରି ବୁବୁ'ଗୁଡାଂଏଁନା ମୁର୍ତି ଅ'ରଇଁୟ'ସେକ୍ ଆତୁନ୍ ଗୁଲାଇ ମାପ୍ରୁ ଡ'ସେକ୍ ମା'ଏ ସୁନ୍ଡ୍ରଗା' ।
24ଡୁ'ତୁନ୍ସା' ମାପ୍ରୁ ଆମା'ଏ ମା'ଏନ୍ ମୁନ୍ସୁଗ ଅଲିରାକ୍କାମ୍ ଡିନ୍ଡେମ୍ପୁଲେଇ ଅନ୍ତୁର'ବେଡ'ସା' ମା'ଏ ମା'ଏନ୍ ବିତ୍ରେ ମୁଇନ୍ଡା ମୁଇନ୍ଡାନ୍ ଞେରିବୁରଂ ଅବୁଦି ଜାଲିବାଇ' କାମ୍ ଅଲିରାକ୍କାମ୍ ଡିନ୍ଡେମ୍ ମୁଲାୟ' । 25ମାସା'ଡ'ନା ମା'ଏ ସତ୍ବାଇ' ମାପ୍ରୁ ଇମ୍ବ'ନା ଡ'ସେକ୍ ମାଗ'ସେକ୍ସା ପଲୁବାଇ'ବକ୍ ଉଇଗା' । ଇମ୍ବ'ନ୍ ମାପ୍ରୁ ଗୁଲାଇ ଅ'ରଇଁୟ'ତା ଆମାଇ ମସୁନ୍ଡ୍ର ମାପ୍ରୁ ଅ'ରଇଁଆର'କୁନୁଂବକ୍ ମା'ଏ ମାପ୍ରୁ ଡ'ସେକ୍ ସୁନ୍ଡ୍ରଗୁତା ମାରି ସେବା ଡେମ'ତା । ଆମାଇଉ ରେମଲେ ସୁନ୍ଡ୍ରଲେଇ' । ଆମେନ୍ ।
26ଡୁ'ତୁନ୍ସା' ମା'ଏନ୍ ମୁନ୍ସୁଗ ଜାଲିବାଇ' କାମ୍ ଅଲିରାକ୍କାମ୍ ଡିନ୍ଡେମ୍ପୁଲେଇ ମାପ୍ରୁ ଆମା'ଏ ଅନ୍ତୁର'ବେଡ' । ସା' ସେଲାନେ ଇମ୍ପର୍ବୁରଂ ଲେମ'ନା ବାଦୁଲ୍ ସେଲାନେ ସେଲାନେବୁରଂ ଗିୟାସୁପ୍ବାଇ'ନା ଗୁଲାଇ ଡେମ' । 27ଡୁ'ତୁନ୍ଉ ଇଂଗେରେସା ମା'ଏନା ଜିବନ୍ବକ୍ ଜାଲିବାଇ'ନା ଗୁଲାଇ ଏତ୍ ସାକ୍ସେକ୍ କୁନୁଇ'ବୁରଂ ଲେମ'ନା ବାଦୁଲ୍ ଇଂଗେରେ ଇଂଗେରେବୁରଂ ଗିୟାସୁପ୍ବାଇ'ନା ଗୁଲାଇ ଡେମ' । ମା'ଏ ଡୁ'ତୁନା ଇଂଗେରେ ଇଂଗେରେବୁରଂ ଗିୟାସୁପ୍ବାଇ'ନା ଅବୁଦି ଅଲିରାକ୍ବାଇ' କାମ୍ ଡେମ'ତାସା' ନିଜର୍ନା ଞେରିବକ୍ ଗୁତୁନ୍ନା ଡନ୍ଡ୍କସ୍ଟ ବାଂଗା' ।
28ଆମାପ୍ରୁ ମାନ୍ସେ'ଗା ମାଇନା ବିସୟ ମାଗ'ସେକ୍ ଡୁକୁପୁଲେଇ ମା'ଏ ମୁନ୍ ଆଡେନ୍ତାସା' ବୁଦି ମବୁନାମ୍ରେମ୍ସୁଗ ଏଗ୍ସେକ୍ ଅବୁଦି ଅଲିରାକ୍ବାଇ'କାମ୍ ଡେମେଇ' ଡ'ସେକ୍ ମାପ୍ରୁ ଆମା'ଏ ଅନ୍ତୁର'ବେଡ' । 29ଗୁତୁନ୍ ରେମଲେନା ଜିବନ୍ବକ୍ ମି ଡୁତା ଡ'ନା ମାପ୍ରୁ ଜୁଲ'ନା ଇମ୍ବ'ନା ବଲ୍ ଆରାକ୍ ଗୁତୁନ୍ ଡିନ୍ଡେମ୍ନା, ଅଲିରାକ୍ବାଇ' କାମ୍ ଡିନ୍ଡେମ୍ନା, ଲାଡ୍ସି ଡିନ୍ଡେମ୍ନା ମାରି ଆଂକାର୍ ଡିନ୍ଡେମ୍ନା, ଅଡାପ୍ନା, ଇନ୍ଡ୍ରିମ୍ନା, ନାଡାଇବାର୍ନା ଗୁଲାଇ ଡୁତା । ମା'ଏ ଅଇଁସାମ୍ବାଇ' ରେମଲେ । 30ମା'ଏ ଆପାଲ୍ ରେମଲେ ନିନ୍ଦାଲ'ସେକ୍ ମା'ଏନା ଅଲିରାକ୍ବାଇ'ନା ଅଇଁସାମ୍ତା, ଆମାପ୍ରୁ ଗୁମୁଇତ, ଆପାଲ୍ ରେମଲେ ଆମାନ୍ତା, ପାଲ୍ ରେମଲେନ୍କୁରୁଂ ନେଇଉ ବଲ୍ରେମ୍ ଡ'ସେକ୍ ମା'ଏନ୍ ଜିବନ୍ବକ୍ ଏତ୍ତା ମାରି ମା'ଏ ବଡ୍ପୁନ୍ ଡେନ୍ତା । ପାଲ୍ପାଲ୍ ଅଲିରାକ୍ବାଇ' କାମ୍ ମା'ଏ ଅ'ତୁର୍ତ । ମା'ଏ ଆନିଜର୍ନା ୟଂବା ଆମାନ୍ତା । 31ମା'ଏ ଇ'କିସା ବୁଦି ଆରାକ୍ବାଇ' ରେମଲେ, ମା'ଏ ଡେମ୍ତୁନେଇ ଡ'ସେକ୍ ସୁନ'କୁନୁଂସୁଗ ଆଡେମ୍ତ, ଆପାଲ୍ ରେମଲେ ଆଲାତ୍ ଆଡେମ୍ତ ମାରି ଆଲିବିସୁପ୍ତା । 32ଜାଜା ଡି'କେନ୍ବାଇ' ଅଲିରାକ୍ବାଇ'କାମ୍ ଡେମ'ସେକ୍ ଡୁତା ଆମା'ଏ ବିସାର୍ନା ଡେମ'ସେକ୍ ଅଗୁଇ' ଡୁତା ଡ'ସେକ୍ ଡୁକୁନୁଂ ମାପ୍ରୁନା ନିୟମ୍ ମା'ଏ ମାଗ'ସେକ୍ସା ଡୁ'ତୁନ୍ବାଇ' ଅଲିରାକ୍କାମ୍ ଡେମ'ସେକ୍ଉ ଡୁତା । ଗୁତୁନାଉ ଡ'ସେକ୍ ଆରାକ୍ ଜାଜା ଡୁ'ତୁନ୍ବାଇ' ଅଲିରାକ୍ବାଇ'କାମ୍ ଡେମ'ତା ଆମା'ଏ ଜୁଲ'ସେକ୍ ମା'ଏ ସାର୍ଦା ଡେଂସେକ୍ ଡୁ'ତୁନ୍ବାଇ' କାମ୍ ମାରି ଅ'ଡେମ୍ତ ।
Currently Selected:
ରମିୟ 1: BFW
Highlight
Copy
Compare
Share
Want to have your highlights saved across all your devices? Sign up or sign in
CC BY-NC-ND 4.0