ପେରିତ 7
7
ବିସାର୍ନା ଡିନ୍ଡେମ୍ପୁଲେଇ ଲେଇ'କୁନୁଂ ରେମଲେବକ୍ ସ୍ତିପାନ୍ଲା ସୁଁସୁଡେନ୍
1ସା' ମୁନା'ପୁଜାରିଲେନ୍ ମୁନା'ପୁଜାରିଲା ଆସ୍ତିପାନ୍ଲା “ନନା ବାଗ୍ବକ୍ ମା'ଏ ସୁନ'କୁନୁଂ ଗୁତୁନ୍ ଗୁଲାଇ ସତ୍ ଇ?” ଡ'ସେକ୍ ଅ'ଗଁସ୍ଲା'ଗା' ।
2ସା' ସ୍ତିପାନ୍ଲା ଡି'କେନ୍ ସୁନ', “ଅ ନିଂନା ବୁୟାଂଏଁ ମାରି ବାଲେ, ପେ ଗୁଲାଇର ବଲ୍ ଅଂ । ଇନ୍ତେ ନେ'ନ୍ତୁତା ଅବ୍ରାଆମ୍ଲା ଆରନ୍ ଉଂଗମ୍ବକ୍ ଡୁକୁ ସିଁସେଇଁଉ ମାଇ ମେସପଟାମିଆ ଡ'ସେକ୍ ମୁଇ ଦେସ୍ବକ୍ ଡୁକୁଗା' । ଆତା ଡୁକୁନୁଂବେଲା ଅବୁଦି ବପୁ ଡୁକୁନୁଂ#7:2 ଅବୁଦି ବପୁ ଡୁକୁନୁଂ ମଇମା ବାଂକୁନୁଂ ମାପ୍ରୁ ଆମାଇ ଅ'ତୁନାଗା' । 3ଅ'ତୁନାକ୍ସେକ୍ ଆମାଇ ସୁନ', ‘ନ ନନା ଉଂଗମ୍ ମାରି ଆନନ୍ ରେମଲେ ଆଗୁଲାଇର ଅଡକ୍ସୁଂଅଁ'ସେକ୍ ତୁରା । ମାରି ନିଂ ଆନ ଇମ୍ବ'ନା ରାଜି ଅସୁଇ'ତିଂ ଗୁତୁନ୍ବକ୍ ଉୟା’ ଡ'ସେକ୍ ସୁନ' ।
4ସା' ମାଇ କଲ୍ଦିୟ ରେମଲେନା ଦେସ୍କୁରୁଂ ତୁର୍ସେକ୍ ଆରନ୍ ଉଂଗମ୍ବକ୍ ସାକ୍ସେକ୍ ବାସାଗା' । ମାଇନା ବା ଗୁଇ'ଗା'ସା' ତିର୍ଗି' ମାପ୍ରୁ ଆମାଇ ଆତାକୁରୁଂ ଆ'ନା ପେ ଡୁକୁନୁଂ କେନ୍ ଦେସ୍ବକ୍ ରିଂଅଁ' ସା'ଗା' । 5ମାପ୍ରୁ ଆମାଇ ଆତା ନନା ଡ'ସେକ୍ ମାସା ଆବେ'ତ ମାରି ଇ'କି ଜଗ'ସେକ୍ ତୁନ୍ତପୁଲେଇସା ଜାଗା ଆବେ'ତ । ମାତର୍ ଆଇ'ତୁନ୍ବେଲା ମାଇନା ଉଁ'ଉଁ ମୁଇସା ଆଡୁତା ଡ'ନାସା' ମାପ୍ରୁ ଆମାଇ କେନ୍ ରାଜି ନିଂ ଆନ ମାରି ଆନନା ଉଁ'ଉଁନେ ଇସାଉପୁଲେଇ ବେ'ତିଂ ଡ'ସେକ୍ ତିତିବାଡ'ସେକ୍ ସୁନ' । 6ମାପ୍ରୁ ଆମାଇ ଡି'କେନ୍ ସୁନ', ‘ନନ୍ ଉଁ'ଉଁନେ ପାଲ୍ ରେମଲେନା ଦେସ୍ବକ୍ ଉଇସେକ୍ ବାସାତା । ଗୁତୁନ୍ ଦେସ୍ନା ରେମଲେ ସାର୍ସ ବରସ୍ ଆନନ୍ ଉଁ'ଉଁନେ ଗତି ଡେମ'ସେକ୍ ଅବୁଦି କସ୍ଟ କାମ୍ ଅ'ଡେମ'ସେକ୍ ଅ'ଲାକାର୍ତ । 7ମାତର୍ ଇମ୍ବ'ନ୍ ଦେସ୍ନା ରେମଲେ ଆମା'ଏ ଗତି କାମ୍ ଅ'ଡେମ୍ତ ଆତୁନ୍ ଦେସ୍ନା ରେମଲେ ନିଂ ଡନ୍ଡ୍ ବେ'ତିଂ । ତିର୍ଗି' ନନ୍ ଉଁ'ଉଁନେ ଗୁତୁନ୍ ଦେସ୍କୁରୁଂ ତୁର୍ସେକ୍ କେନ୍ ଦେସ୍ବକ୍ ସାପ୍ତା ମାରି ଆକେ ଆନିଂ ସୁନ୍ଡ୍ରତା’ ଡ'ସେକ୍ ମାପ୍ରୁ ସୁନ' । 8ମାରି ମାପ୍ରୁ ଆଅବ୍ରାଆମ୍ଲା ନୁରିଂନା ଇସା ଅଗ' ଡୁତା ଡ'ସେକ୍ ପର୍ମାନ୍ ସବ'। ସା' ଅବ୍ରାଆମ୍ଲା ମାଇନା ଉଁ'ଉଁ ଇସାକ୍ଲା ଜନମ୍ ଡେଂସେକ୍ ଆଟ୍ଦିନ୍ ଡେଂଗା'ସା' ମାପ୍ରୁ ସୁନ'କୁନୁଂସୁଗ ନୁରିଂନା ଇସା ଅଗଡ' । ଡୁ'ତୁନା ଇସାକ୍ଲା ଆମାଇନା ଉଁ'ଉଁ ଆଜାକୁବ୍ଲାସା ମାରି ଜାକୁବଲା ଆମାଇନା ବାରଟା ଉଁ'ଉଁନେସା ଡୁ'ତୁନ୍ଉ ସୁନତ୍ ଡେମ' । ମା'ଏଉ ନେ'ନ୍ ଜିଉଦିରେମଲେନା ବୁସାଁନେ ।
9ମା'ଏନ୍ ବିତ୍ରେ ମୁଇନ୍ଡା ଜସେପ୍ ଡ'ସେକ୍ ଡୁକୁ, ଆମାଇ ବୁୟାଂଡେଇଁଏ ଆଂକାର୍ ଡେଂସେକ୍ ମିସର୍ ଦେସ୍ବକ୍ ଗତିପୁଲେଇ ସୁଂଅଁ' । ମାତର୍ ମାପ୍ରୁ ମାଇବୁରଂ ତିରେତିରେ ଡୁକୁଗା' । 10ମାଇ ଗୁଲାଇ କସ୍ଟକୁରୁଂ ଆମାଇ ରକ୍ୟା ଡେମ' ମାରି ଆମାଇ ବଲ୍ ବୁଦିଗିୟାନ୍ ବେଡ' । ସା' ଆଜସେପ୍ଲା ଜୁଲ'ସେକ୍ ମିସର୍ ଦେସ୍ନା ରାଜା ପାରଲା ଅବୁଦି ସାର୍ଦା ଡେଂଗା' । ସା' ରାଜାଲା ଆମାଇ ମିସର୍ ଦେସ୍ନା ମୁଇନ୍ଡା ମୁନା'ରେମ୍ ଅ'ଏଲ' ମାରି ରାଜାନା ଡିଂଅଁବକ୍ ଡୁକୁନୁଂ ଗୁଲାଇ ଦନ୍ସମ୍ପତି ଜୁଜୁପୁଲେଇ ଆମାଇ ଦାଇତ୍ ବେଡ' ।
11ଆଇ'ତୁନ୍ବେଲା ଗୁଲାଇ ମିସର୍ ଦେସ୍ବକ୍ ମାରି କିନାନ୍ ଦେସ୍ବକ୍ ସୁସୁମ୍ନା ବାସ୍ ମାସା ମବୁନାମ୍ବାଇ' ଡୁକୁନୁଂ ମୁଇ ବେଲା ସା'ଗା' । ରେମଲେ ସୁସୁମ୍ପୁଲେଇ ମାସା ଆବାମ୍ତାସା' ଅବୁଦି କସ୍ଟ ବାଂଗା' । ମାରି ଆନେ'ନ୍ ୟା'ତୁତାଲେସା ସୁସୁମ୍ପୁଲେଇ ବାସ୍ ଆବାମ୍ତା ଡେଂକୁ । 12ସା' ମିସର୍ ଦେସ୍ବକ୍ କାଦି ଡୁତା ଡ'ସେକ୍ ଜାକୁବ୍ଲା ଅଂଅଁ'ସେକ୍ ଆନେ'ନ୍ ୟା'ତୁତାଲେ ଆତା କାଦି ଇନ୍ଡ୍ରିଂପୁଲେଇ ମାଇ ବେନ୍ଟାୟ' । 13ମାରି ମୁସନ୍ବକ୍ନା ମା'ଏ ସୁସପ୍ପୁଲେଇ ଉଇଗା'ସା' ଜସେପ୍ଲା ନିଜେ ନିଂ ଜା ଡ'ସେକ୍ ଆମାଂଡେଏଁ ଅସମ'ଗା', ସା' ମାଂଡେଇଁଏ ଗୁଲାଇର ଆମାଇ ସମଡ' । ମାରି ପାର ରାଜାଲାସା ଜସେପ୍ନା ଡିଂଅଁନ୍ ରେମଲେ ଜା ଡ'ସେକ୍ ମାଗ' । 14ତିର୍ଗି' ଜସେପ୍ଲା ଆମାଇନା ବା ଆଜାକୁବ୍ଲା ମାରି ଆମାଇନା ରେମଲେ ଆଗୁଲାଇର ମିସର୍ ଦେସ୍ବକ୍ ୱାୟ'ସା'ବା ଡ'ସେକ୍ ୱାଇ ବେନ୍ଟାୟ' । ମା'ଏ ଗୁଲାଇର ମିସ୍ସେକ୍ ତିନ୍କଡି ପନ୍ଦରଲକ୍ ଡୁକୁଗା' । 15ସା' ଜାକୁବ୍ଲା ମିସର୍ ଦେସ୍ବକ୍ ସାକ୍ସେକ୍ ଆତା ଡୁକୁଗା' । ଆତା ଡୁକୁନୁଂବେଲା ଜାକୁବ୍ଲା ମାରି ନେଇ'ନା ୟା'ତୁତାଲେ ଗୁଲାଇର ଗୁଇ'ଉଇଗା' । 16ସା' ତିର୍ଗି' ମା'ଏନ୍ ମଟ୍ ଆକେ ନେ'ନ୍ ଦେସ୍ବକ୍ ରିଂଅଁ' ସାକ୍ସେକ୍ ସିକିମ୍ ଉଂଗମ୍ବକ୍ ଡୁକୁନୁଂ ଅମର୍ନା ଉଁ'ଉଁନେନା ତିତିକୁରୁଂ ଅବ୍ରାଆମ୍ଲା ଆ'ଇସୁଗ ରୁପା ବେଡ'ସେକ୍ ସବ'ବୁଂଅଁ'କୁନୁଂ ମଟ୍ ବୁଂବୁଂନା ମୁଇ ଲାଗ୍ଲାଗ୍ବକ୍ ବୁଂଅଁ'ବୁଂଅଁ' ।
17ମାତର୍ ମାପ୍ରୁ ଡେମ୍ତିଂ ଡ'ସେକ୍ ଅବ୍ରାଆମ୍ଲାବୁରଂ ତିତି ବାଡ'ସେକ୍ ପର୍ମାନ୍ ସବ'କୁନୁଂ ଡିନ୍ଡେମ୍ନା ବେଲା ଉନ୍ତୁ' ସା'ଗା'ସା' ନେ'ନ୍ ରେମଲେ ମିସର୍ ଦେସ୍ବକ୍ ଅବୁଦି ଅବୁଦି ଲାୟଁ' । 18ତିର୍ଗି' ଆଜସେପ୍ଲା ମମୁନାକ୍ବାଇ' ପାଲ୍ ମୁଇନ୍ଡା ମିସର୍ ଦେସ୍ନା ରାଜା ଏଗା' । 19ମାଇ ଆନେ'ନ୍ ରେମଲେ ଅବୁଦି ନାଡାୟ' ମାରି ଆମା'ଏ ମାଇ ଅବୁଦି କସ୍ଟ ବେଡ' । ମାରି ମା'ଏନ୍ ଉଁ'ଉଁନେ ଗୁଇ'ଏଇ' ଡ'ସେକ୍ ଆପେନ୍ ଗୁବୁଲେ ବାଇରି ରାନ୍ଡେଲ'ସୁଂ ଡ'ସେକ୍ ମାଇ ଆନେ'ନ୍ ରେମଲେ ଜବର୍ଦସ୍ ଡେମ'।
20ଆଇ'ତୁନ୍ବେଲା ମସାଲା ଜନମ୍ ଡେଂଗା' । ମାପ୍ରୁ ଜୁଲ'ନା ମାଇ ଅବୁଦି ବ'ରେବାଇ' ଡୁକୁ । ୟଂଡେଇଁ ବାଡେଇଁପା ଆମାଇ ତିନ୍ମାସ୍ ଡିଂଅଁବକ୍ ବୁଂଅଁ'ସେକ୍ ବଲ୍ ଜୁଲ'କୁ । 21ତିର୍ଗି' ଆମାଇ ଡିଂଅଁକୁରୁଂ ଅ'ତୁର'ସେକ୍ ଅଡକ୍ସୁଂସୁଂବେଲା ପାର ରାଜାନା ଉଁ'ଉଁ ସେଲାନ୍ଲା ମୁଇନ୍ଡା ଆମାଇ ରିଂସେକ୍ ମାଇନା ନିଜର୍ନା ଉଁ'ଉଁସୁଗ ବ'ରଲ' । 22ମାରି ମିସର୍ ଦେସ୍ବକ୍ ଆରେମଲେ ମାମା ଅମାକ୍ତ ଗୁତୁନ୍ ଗୁଲାଇ ବୁଦିଗିୟାନ୍ ଆମସାଲାସା ଅମାଗ'ବେଡ' । ସା' ମାଇ ଗୁଲାଇ ମାଗ'ସେକ୍ ମୁଇନ୍ଡା ଅଦିକାର୍ ଡୁକୁନୁଂ ମୁନା'ରେମ୍ସୁଗ ଗୁଲାଇ ଅଇଁୟ' ମାରି ଗୁଲାଇ ଡେମ' ।
23ଆମସାଲା ସାଲିସ୍ ବରସ୍ ଡେଂକୁନୁଂବକ୍ ନିଂ ଆନିଂନା ଇସ୍ରାଏଲ୍ ରେମଲେ ଜୁଜୁ ଉଇତିଂ ଡ'ସେକ୍ ମାଇ ଏତ୍ଗା' । 24ସା' ଆତା ମିସର୍ ଦେସ୍ନା ମୁଇନ୍ଡା ରେମ ଆଇସ୍ରାଏଲ୍ ରେମ ଅବୁଦି କସ୍ଟ ବିବେ'ଡେଂକୁନୁଂ ମସାଲା ଜୁଲ' । ଜୁଲ'ସେକ୍ ମାଇ ଆଇସ୍ରାଏଲ୍ ରେମ ସାଡାଇବାର୍ ଉଇସେକ୍ ଆମିସର୍ ଦେସ୍ନା ରେମ ଅଡାବ'ସୁଂଅଁ' । ମାଇ ଡୁ'ତୁନାଉ ଆମାଇ ଡନ୍ଡ୍ ବେଡ' । 25ସା' ଆନେଇ' ରକ୍ୟା ଡିନ୍ଡେମ୍ପୁଲେଇ ମାପ୍ରୁ ଆମସାଲା ବେନ୍ଟାୟ'ତା ଡ'ସେକ୍ ନେନ୍ ରେମଲେ ମାକ୍ତ ଡ'ସେକ୍ ମସାଲା ଏତ୍ଗା' । ମାତର୍ ମା'ଏ ଗୁତୁନ୍ ଆମାକ୍ତ । 26ବେରା ଇମ୍ବାୟ ଇସ୍ରାଏଲ୍ ରେମ ଅବୁନୁ'କୁନୁଂ ମସାଲା ଜୁଲ' । ସା' ମାଇ ଆମାଇପା ସୁତ୍ରାଇବାର୍ ଉଇତିଂ ଡ' ଉଇସେକ୍ ‘ଅ ମେ', ପା ଇମ୍ବାୟ ବୁନୁୟାଂ ମାସା' କିରମରଗୁତୁପା’ ଡ'ସେକ୍ ସୁନ' ।
27ମାତର୍ ଜା ମୁଇନ୍ଡା ଇନ୍ଡ୍ରିମ୍ ମୁଲାୟ' ମାଇ ଆମସାଲା ତୁଂସାଂଅଁ'ସେକ୍ ସୁନ' ‘ଆନ ଜା ବେନ୍ଟାୟ'ସା' ଆନେଇ ସାସନ୍ ଡେମ'ସେକ୍ ବିସାର୍ନା ଡିନ୍ଡେମ୍ ସା'ଗୁତୁନ? 28ତୁଗଲ୍ ଆତୁନ୍ ମିସର୍ ଦେସ୍ନା ରେମ ଅଡାବ'କୁନୁଂସୁଗ ଆନିଂସା ଅଡାପ୍ତିଂ ଡ'ସେକ୍ ଏତ୍ଗୁତୁନ ଇ?’ ଡ'ସେକ୍ ସୁନ' । 29ସା' ମସାଲା ଗୁତୁନ୍ ଅଂଅଁ'ସେକ୍ ମିସର୍ ଦେସ୍କୁରୁଂ ଉର' ଡୁଂସେକ୍ ମିଦିୟନ୍ ଦେସ୍ବକ୍ ଉଇସେକ୍ ପାଲ୍ ଦେସ୍ନା ରେମସୁଗ ବାସାଗା' । ମାରି ଆତା ମାଇ ସେଲାମ୍ବୁଇ' ରିଂଅଁ'ସେକ୍ ଇମ୍ବାରୁ ଉଁ'ଉଁ ବାଂଗା' ।
30ସାଲିସ୍ ବରସ୍ ତିର୍ଗି' ମୁସିଂ ମାଇ ସିନୟ କୁନ୍ଡା ଉନ୍ତୁ' ମୁଇ ଟାଂରାବାଟାପାଦାବକ୍ ଡୁକୁନୁଂବେଲା ମୁଇ ଗୁମ୍ରାବକ୍ ଗର୍ଜାଇସେକ୍ ଡକୁନୁଂ ସୁଂଅଁବକ୍ ମାପ୍ରୁନା ଦୁତ ଆମାଇ ଅ'ତୁନାଗା' । 31ସା' ଗୁତୁନ୍ ଜୁଲ'ସେକ୍ ମସାଲା କାବାକାବା ଡେଂଉଇଗା' । ସା' ମା ଡେଂଗୁତା ଡ'ସେକ୍ ବଲ୍ ଜୁତିଂ ଡ'ସେକ୍ ଉନ୍ତୁ' ଉଇଗା'ସା' ପ୍ରବୁ ଆମାଇ ଗୁତୁନ୍କୁରୁଂ ସୁନ'କୁନୁଂ ମାଇ ଅଂଅଁ' । ପ୍ରବୁ ଆମାଇ ସୁନ': 32‘ଅବ୍ରାଆମ୍ଲା, ଇସାକ୍ଲା, ଜାକୁବ୍ଲା ଡି'ତା ନନ୍ ତୁତାଲେବୁସାଁନେ ଗୁଲାଇର ସୁନ୍ଡ୍ରକୁନୁଂ ମାପ୍ରୁ ନିଂ’ ଡ'ସେକ୍ ସୁନ' । ସୁନ'ସା' ଗୁତୁନ୍ ଅଂଅଁ'ସେକ୍ ମସାଲା ଅବୁଦି ବୁତୁଂସେକ୍ ଜୁର୍ଜାଗ୍ ଉଇଗା' । ମାରି ଆତୁନ୍ ଜୁଜୁପୁଲେଇ ମାଇ ଅବୁଦି ବୁତୁଂଉଇଗା' ।
33ମାରି ପ୍ରବୁ ଆମାଇ ସୁନ', ‘ନନ୍ ତିକ୍ସୁଂନା ପନ୍ଡଇଁ ତଗ'ସୁଂ, ମାସା'ଡ'ନା ନ ତଂକୁନୁଂ ଜାଗା ମୁଇ ପବିତ୍ର ଜାଗା । 34ନିଂନା ରେମଲେ ମିସର୍ ଦେସ୍ବକ୍ ଆ'ଇ କସ୍ଟ ବାଂସେକ୍ ଡୁତା ଗୁତୁନ୍ ଗୁଲାଇ ନିଂ ଜୁଲ'ତିଂ । ମା'ଏନା ଉକ୍ସେ' ୱାଇସେ'କୁନୁଂ ନିଂ ଅଂଅଁ'ତିଂ । ଆମା'ଏ ଆତାକୁରୁଂ ଅ'ତୁର୍ପୁଲେଇ ନିଂ ଆ'ନା ଜର୍ଗୁତିଂ । ନ ଲବେ, ଆନ ନିଂ ମିସର୍ ଦେସ୍ବକ୍ ବେନ୍ଟାଇତିଂ’ ଡ'ସେକ୍ ସୁନ' ।
35‘ଆନ ଜା ବେନ୍ଟାୟ'ସା' ଆନେଇ ସାସନ୍ ଡେମ'ସେକ୍ ବିସାର୍ନା ଡିନ୍ଡେମ୍ ସା'ଗୁତୁନ’ ଡ' ସୁନ'ସେକ୍ ଆମାଇ ଦର୍କାର୍ ଆରାକ୍ ଡ' ଇନ୍ତେ ମା'ଏ ସୁନ'କୁଗା' । ଆକେନ୍ ଆମସାଲାଉ ମାପ୍ରୁନା ଦୁତ ମୁଇ ଗର୍ଜାଇକୁନୁଂ ଗୁମ୍ରାବକ୍ ଅ'ତୁନାକ୍ସେକ୍ ଆମା'ଏ ସାସନ୍ ଡେମ'ସେକ୍ ବିସାର୍ନା ଡିନ୍ଡେମ୍ପୁଲେଇ ମାରି ଆମା'ଏ ଗତି କାମ୍କୁରୁଂ ଅ'ତୁର'ସେକ୍ ରକ୍ୟା ଡିନ୍ଡେମ୍ପୁଲେଇ ମାପ୍ରୁଉ ଆମାଇ ମା'ଏନ୍ବକ୍ ବେନ୍ଟାୟ' । 36କେନ୍ ମସାଲାଉ ମିସର୍ ଦେସ୍କୁରୁଂ ଆମା'ଏ ଅ'ତୁର'ସେକ୍ ମିସର୍ ଦେସ୍ବକ୍ ମାରି ସୁପ୍ ସମ୍ଦର୍କିନ୍ଡାକ୍ବକ୍ କାବାକାବା ଡିନ୍ଡେମ୍ବାଇ' କାମ୍ ଡେମ' ମାରି ଟାଂରାବାଟାପାଦାବକ୍ ସାଲିସ୍ ବରସ୍ ଆମା'ଏ ଡୁ'ତୁନ୍ଉ କାବାକାବା ଡିନ୍ଡେମ୍ବାଇ' କାମ୍ ଡେମ'ସେକ୍ ରିଂଅଁ' ଉଇଗା' ।
37‘ମାପ୍ରୁ ଆନିଂ ଅ'ଏଲ'କୁନୁଂସୁଗ ପେନ୍ ରେମଲେନ୍କୁରୁଂ ଆମୁଇନ୍ଡା ବାବବାଦିସା ପେପୁଲେଇ ଅ'ଏତ’ ଡ'ସେକ୍ କେନ୍ ମସାଲାଉ ଆଇସ୍ରାଏଲ୍ରେମଲେ ସୁନ'କୁ । 38କେନ୍ ମସାଲାଉ ଟାଂରାବାଟାପାଦାବକ୍ ଇସ୍ରାଏଲ୍ ରେମଲେ ଗୁଲାଇର ମୁନ୍ଡକ୍ ରୁନ୍କୁନୁଂବକ୍ ମା'ଏବୁରଂ ଡୁକୁ, ମାରି ମାପ୍ରୁନା ମୁଇନ୍ଡା ଦୁତ ସିନୟ କୁନ୍ଡା ବାଗ୍ବକ୍ ମାଇବୁରଂ ଅଇଁୟ'ସା' ମାଇ ଗୁତୁନା ଆନେଇ'ନା ୟା'ତୁତାଲେ ଆଗୁଲାଇର ସୁନ'କୁ । ଆତା ମାପ୍ରୁ ଜିବନ୍ ବିବେ'ନା ତୁମ' ଆମାଇ ବେଡ'ସା' ମାଇ ଆନେଇ' ଗୁତୁନା ବେଡ' ।
39ମାତର୍ ନେ'ନ୍ ୟା'ତୁତାଲେ ମସାନା ତୁମ' ମାନ୍ବାର୍ପୁଲେଇ ମୁନ୍ ମଡିନେମ୍ ମାଇ ନେଇନା ମୁନା'ରେମ୍ ଡୁକୁ ଦର୍କାର୍ ଆରାକ୍ ଡ'କୁ, ମାରି ମିସର୍ ଦେସ୍ବକ୍ ଆନ୍ଡେଇଁସେକ୍ ଡୁକୁପୁଲେଇ ଅବୁଦି ମୁନ୍ଡେଂକୁ। 40ସା' ମା'ଏ ଆଆରନ୍ଲା ସୁନ', ‘ଆନେଇ ଉଇନା କୁରୁଂ ଅସୁଇ'ପୁଲେଇ ଦେବ୍ତାଲେ ଅ'ରଇଁୟ' ବେ' । ମାସା'ଡ'ନା ଆନେଇ ମିସର୍ ଦେସ୍କୁରୁଂ ଅ'ତୁର' ରିଂଅଁ' ସା'କୁନୁଂ ଆତୁନ୍ ମସାଲା ମା ଡେଂଗା' ଡ'ସେକ୍ ନେଇ ଆମାକ୍ତୁନେଇ’ ଡ'ସେକ୍ ସୁନ' । 41ସା' ଉନ୍ତା ମା'ଏ ଉଁ'ଉଁଗୁଇ'ସୁଗ ମୁଇ ମୁର୍ତି ଅ'ରଇଁୟ'ସେକ୍ ନେଇ ମୁଇ ମୁର୍ତି ଅ'ରଇଁ ଗଂନେଇ ଡ'ସେକ୍ ଅବୁଦି ସାର୍ଦାକୁସି ଡେଂସେକ୍ ଆତୁନ୍ ମୁର୍ତି ଅବୁଦି ଗିଗେ ଗେଲ' । 42ସା' ମାପ୍ରୁ ମା'ଏନ୍କୁରୁଂ ଡୁଂଗା' ମାରି ମା'ଏ ଆସିଂଇଁ, ଆଆର୍କେ, ଆମୁମର୍ତକ୍ ସୁନ୍ଡ୍ରକ୍ସେକ୍ ଡୁକୁଲେଇ' ଡ' ମାଇ ଆମା'ଏ ଅନ୍ତୁର'ବେଡ' । ବାବବାଦିଲେ ଉଲାକ୍ବକ୍ ଲେକ୍ଲ'କୁନୁଂ ଆ'ନା ସତଇସା ଡେଂଗା' । ମା'ଏ ମା ଲେକ୍ଲ'ବୁଂଅଁ'କୁ ଡ'ନା:
‘ଅ ଇସ୍ରାଏଲ୍ ରେମଲେ, ପେ ଟାଂରାବାଟାପାଦାବକ୍ ସାଲିସ୍ ବରସ୍ ଡୁକୁନୁଂବେଲା
ଆନିଂ ଗିଗେ ଗେଲ'ସେକ୍ ମାମା ବିବେ' ଡୁକୁନୁଂ ବେଡ'କୁପେ ଇ?
43ମାତର୍ ଗୁତୁନ୍ ମଲକନା ମୁର୍ତି ବୁଂଅଁ'କୁନୁଂ ବାଲ୍ସା
ମାରି ରେମ୍ପାନ୍ ଡ'କୁନୁଂ ଗୁତୁନ୍ ମୁମର୍ତକ୍ନା ମୁର୍ତି
ଡି'କେନା ପେ ସୁନ୍ଡ୍ରପୁଲେଇ ଅ'ରଇଁୟ'କୁନୁଂ ଆମୁର୍ତିଲେ ପେବୁରଂ ରିଂଅଁ' ଉଇକୁପେ ।
ସା' ପାଲ୍ ରେମଲେ ସାକ୍ସେକ୍ ଆପେ ପେନ୍ ଦେସ୍କୁରୁଂ ବାବିଲନ୍ ଦେସ୍ନା ଇନ୍ଡ୍ରି ରିଂଅଁ' ଉଇଏଇ' ଡ'ସେକ୍ ନିଂ ବେ'ତିଂ’ ଡ'ସେକ୍ ଲେକ୍ଲ'ତା ।
44ନେ'ନ୍ ୟା'ତୁତାଲେ ଗୁଲାଇର ଟାଂରାବାଟାପାଦାବକ୍ ଡୁକୁନୁଂବେଲା ମା'ଏନ୍ବକ୍ ସାକି ବାଲ୍ସା ଡୁକୁ । ମାପ୍ରୁ ଆମସାଲା ସୁନ'କୁନୁଂ ସମାନ୍ ମାରି ଅସୁୟ'ବେଡ'କୁନୁଂ ସମାନ୍ଉ ମା'ଏ ଗୁତୁନ୍ ବାଲ୍ସା ଅ'ରଇଁୟ' । 45ଡୁ'ତୁନା ଗୁତୁନ୍ ବାଲ୍ସା ନେ'ନ୍ ୟା'ତୁତାଲେନ୍ ତିତିବକ୍ ବାଂଗା'ସା', କେନ୍ ଦେସ୍ବକ୍ ଡୁକୁନୁଂ ଆପାଲ୍ ରେମଲେ ମାପ୍ରୁ ଞନ'ସେ'ଗା ଗୁତୁନ୍ ଦେସ୍ ଆଇସ୍ରାଏଲ୍ରେମଲେ ବେଡ'ସା' ଗୁତୁନ୍ ଦେସ୍ବକ୍ ଜିଅସୁୟଲା ଆଇସ୍ରାଏଲ୍ରେମଲେ ରିଂଅଁ' ସା'କୁନୁଂବେଲା ମା'ଏ ଗୁତୁନ୍ ବାଲ୍ସାସା ରିଂଅଁ' ସା'କୁଗା' । ସା' ଗୁତୁନ୍ ବାଲ୍ସା ଦାଉଦ୍ଲା ରାଜା ଏଗ୍ସେକ୍ ଡୁକୁନୁଂ ପନ୍ତେକ୍ ଆତୁନ୍ ଦେସ୍ବକ୍ ଡୁକୁଗା' । 46ଦାଉଦ୍ଲା ଆମାପ୍ରୁ ଅ'ସାର୍ଦାଲ'ସେକ୍ ଡୁକୁ । ସା' ନେ'ନ୍ ତୁତା ଜାକୁବ୍ଲା ସୁନ୍ଡ୍ରକ୍ସେକ୍ ଡୁକୁନୁଂ, ମାପ୍ରୁ ଡୁକୁପୁଲେଇ ନିଂ ମୁଇ ଜାଗା ଅ'ରଇଁନ୍ତିଂ କି? ଡ'ସେକ୍ ଦାଉଦ୍ଲା ଆମାପ୍ରୁ ଅ'ଗଁସ୍ଲା'ଗା' । 47ମାତର୍ ମାଇନା ଉଁ'ଉଁ ସଲମନ୍ ରାଜାଲାଉ ମାପ୍ରୁପୁଲେଇ ମୁଇ ଡିଂଅଁ ଅ'ରଇଁୟ' ।
48ମାତର୍ ଜୁ, ଗୁଲାଇନା ବାଗ୍ବକ୍ ଡୁକୁନୁଂ ମାପ୍ରୁ ରେମଲେ ଅ'ରଇଁୟ'କୁନୁଂ ଡିଂଅଁବକ୍ ଆବାସାତା । ଜିସାଇୟ ଡ'ସେକ୍ ମୁଇନ୍ଡା ବାବବାଦିଲା ଉଲାକ୍ବକ୍ ଲେକ୍ଲ'ବୁଂଅଁ'ତା:
49‘ପ୍ରବୁ ସୁନ'ତା, ସରଗ୍ ଡ'ନା ନିଂ ଲିଲେଇ'ନା କର୍ଜି ।
ମାରି ଦର୍ତନି ଡ'ନା ନିଂନା ତିକ୍ସୁଂ ବୁଂବୁଂନା ମୁଇ ପାଟା ।
ସା' ପେ ନିଂପୁଲେଇ ମିବାଇ' ଡିଂଅଁ ଅ'ରଇଁତୁପେ?
ଜୁ, ନିଂ ବାସାପୁଲେଇ ପେ ଡିଂଅଁ ଅ'ରଇଁ ଗଂତୁପେ ଇ?
50ଜୁ, କେନ୍ ଗୁଲାଇ ନିଂ ଅ'ରୟଁ'ତିଂ କି ଆରାକ୍?’” ଡ'ସେକ୍ ଲେକ୍ଲ'ତା ।
51ସ୍ତିପାନ୍ଲା ମାରି ସୁନ', “ଅ ଇସ୍ରାଏଲ୍ ରେମଲେ, ପେ ଆମାପ୍ରୁ ମମାନ୍ବାର୍ବାଇ' ରେମଲେ! ପେନା ଏତ୍ ମାଇନ୍କୁରୁଂ ଅବୁଦି ସୁଲୁଂ ଡୁତା ମାରି ମାଇନା ତୁମ' ଅଂପୁଲେଇ ଆପେ ମୁନ୍ ଆରାକ୍ । ପେନ୍ ୟା'ତୁତାଲେ ଗୁଲାଇର ଇନ୍ତେ ଡେମ'କୁନୁଂସୁଗ ପେସା ପବିତ୍ର ଆତ୍ମା ସୁନ'କୁନୁଂସୁଗ ଡିନ୍ଡେମ୍ପୁଲେଇ ମୁନ୍ ଆରାକ୍ ଡେଂସେକ୍ ଇସାଉ ଡୁତୁପେ । 52ପେନ୍ ୟା'ତୁତାଲେ ଆଗୁଲାଇ ବାବବାଦିଲେ ଅବୁଦି କସ୍ଟ ବେଡ'କୁ । ମାରି ଦରମ୍ବାଇ' ରେମ ମୁଇନ୍ଡା ସାପ୍ତା ଡ'ସେକ୍ ଜାଜା ସୁନ'କୁ ଆମା'ଏ ଆଗୁଲାଇରସା ମା'ଏ ଅଡାବ'ସୁଂଅଁ' । ମାରି ଆ'ନା ଜୁ, ଆମାଇଉ ପେ ଆଦାଇରେମେ ଅସୁୟ'ବେଡ'ସେକ୍ ଅଡାବ'ସୁଂଅଁ'ପେ । 53ପେଉ ମାପ୍ରୁନା ଦୁତଲେନ୍ ତିତିବକ୍ ଅ'ରିଂଅଁ'କୁନୁଂ ନିୟମ୍ ବାଂଗୁତୁପେ । ମାତର୍ ପେ ଗୁତୁନ୍ ନିୟମ୍ ଆମାନ୍ତୁପେ” ଡ'ସେକ୍ ସୁନ' ।
ଆସ୍ତିପାନ୍ଲା ବୁରେ ତିତିଡେନ୍
54ସା' ବିସାର୍ନା ଡିନ୍ଡେମ୍ପୁଲେଇ ଡୁକୁନୁଂ ଜିଉଦିରେମଲେନା ମୁନା'ରେମେ ଗୁଲାଇର ଗୁତୁନ୍ ଅଂଅଁ'ସେକ୍ ଆସ୍ତିପାନ୍ଲା ଅବୁଦି ଗିସେକ୍ସେକ୍ ଗେନ୍ଡ୍ରେ'ସିକୁ । 55ମାତର୍ ଆସ୍ତିପାନ୍ଲା ପବିତ୍ର ଆତ୍ମାନା ବପୁ ବାଂଗା' । ମାରି ମାଇ ଆକି'ତୁଂ ତାଂଡାୟ' ଜୁଲ'ସା' ମାପ୍ରୁନା ମଇମା ମାଇ ଜୁଲ' । ମାରି ମାପ୍ରୁନା ସୁସୁମ୍ତିକୁରୁଂ ଜିସୁଲା ତଂକୁନୁଂ ମାଇ ଜୁଲ' । 56ସା' ମାଇ ଆମା'ଏ ସୁନ' “ଜୁ, କି'ତୁଂ ରୁଗ'କୁନୁଂ ମାରି ମାପ୍ରୁ ବେନ୍ଟାୟ'ସା' ସା'କୁନୁଂ ରେମନା ଉଁ'ଉଁ ମାପ୍ରୁନା ସୁସୁମ୍ତିକୁରୁଂ ତଂକୁନୁଂ ନିଂ ଜୁଲ'ତିଂ” ଡ'ସେକ୍ ସୁନ' ।
57ସୁନ'ସା' ଗୁତୁନ୍ ଅଂଅଁ'ସେକ୍ ମାଇ ଡି'କେନ୍ ସୁନ'କୁନୁଂ ଅଂପୁଲେଇ ଆନେଇ ମୁନ୍ ଆରାକ୍ ଡ'ସେକ୍ ମା'ଏ ଗୁଲାଇର ଆମା'ଏନା ଲୁନ୍ତୁର୍ ତିତିବୁରଂ ଡାଲୁକ୍ସେକ୍ ଅବୁଦି ଡକ୍ତି'ତା କିରକ୍ସେ'ଗା ମା'ଏ ଗୁଲାଇର ମାଇନ୍ବକ୍ ଉର' ସା'ଗା' । 58ଉର' ସାକ୍ସେକ୍ ଆମାଇ ମା'ଏନ୍ ମୁନା'ଉଂଗମ୍ ବାଇରି ୱାନ' ଅ'ତୁର'ସେକ୍ ବୁରେ ତିତି ଡେଂକୁ । ଆମାଇ ପଲୁ ସାକି ସୁନ'କୁନୁଂ ରେମଲେ ମା'ଏନ୍ ବାଗ୍ବକ୍ ଅଲୁ'କୁନୁଂ ସକା ତଗ'ସେକ୍ ସାଉଲ୍ ଡ'ସେକ୍ ମୁଇନ୍ଡା ଇଂଗେର୍ସେଲାବାଇ' ଇଂଗେରେନ୍ବକ୍ ବୁଂଅଁ'କୁ ।
59ମା'ଏ ଆମାଇ ଅଗୁଇ'ପୁଲେଇ ବୁରେ ତିଲ'କୁନୁଂବେଲା ସ୍ତିପାନ୍ଲା, “ଅ ପ୍ରବୁ ଜିସୁ, ନିଂନା ଜିବନ୍ ନନ୍ବକ୍ ରିଂଅଁ' ଉୟା” ଡ'ସେକ୍ ଆପ୍ରବୁଲା ୱାୟ'ସେକ୍ ପାର୍ତନା ଡେମ' । 60ତିର୍ଗି' ମାଇ ଏନ୍ଡିକ୍ସେ'ଗା, “ଅ ପ୍ରବୁ, ମା'ଏ ଡେମ'କୁନୁଂ କେନ୍ ପାପ୍ ଆମା'ଏ ଆଜୁଲ'” ଡ'ସେକ୍ ଡକ୍ତି'ତା କିରକ୍ସେକ୍ ସୁନ' । ଡୁ'ତୁନ୍ ସୁନ'ସେକ୍ ମାଇ ଗୁଇ'ଉଇଗା' ।
Currently Selected:
ପେରିତ 7: BFW
Highlight
Copy
Compare
Share
Want to have your highlights saved across all your devices? Sign up or sign in
CC BY-NC-ND 4.0