ପେରିତ 28
28
ମେଲିତି ଡ'ସେକ୍ ଇମିକୁନୁଂ ଦିପ୍ବକ୍ ପାଉଲଲା
1ନେଇ ଗୁତୁନ୍ ସମ୍ଦର୍କିନ୍ଡାକ୍ ପାଲି ବଲ୍ ଡେଲ'ନେଇସା' କେନ୍ ଦିପନା ଇମି ମେଲିତି ଡ'ସେକ୍ ମାଗ'ନେଇ । 2ସା' ଆତା ଡୁକୁନୁଂ ରେମଲେ ଆନେଇ ଅବୁଦି ଦୟା ଡେମ' । ମାସା'ଡ'ନା ଆଇ'ତୁନ୍ବେଲା ଡାଗ୍ ଗୁର'କୁ ମାରି ଅବୁଦି ରୁଂଅଁକୁଗା'ସା' ମା'ଏ ସୁଂଅଁ ଅ'ଡଲ'ସେକ୍ ଆନେଇ ଅ'ସୁଗୁର୍ପୁଲେଇ ୱାୟ' । 3ପାଉଲଲା ଆ'ଇସୁଗ ସୁଂଅଁ ଜୁଗ'ସେକ୍ ଡ'ତୁଂବେଲା ଞା'ସଂଅଁ'ସା' ମୁଇ ଅବୁଦି ବିସ୍ ଡୁକୁନୁଂ ବୁବୁ' ତୁର୍ସେକ୍ ଆପାଉଲନା ତିତି ଅବ'ସେକ୍ ସୁଗ'କୁ । 4ସା' ଆତା ଡୁକୁନୁଂ ରେମଲେ ଆମାଇନା ତିତି ବୁବୁ' ଅବ'ସେକ୍ ଜୁଲ୍କୁନୁଂ ଜୁଲ'ସେକ୍ ମା'ଏ ମା'ଏନ୍ ବିତ୍ରେ ଅଇଁୟ': “ଜୁ, କେନ୍ ରେମ ସତଇସା ଆପାଲ୍ ରେମଲେ ଅଡାବ'କୁନୁଂ ରେମ; ଡୁ'ତୁନ୍ସା'ଉ ମାଇ ସମ୍ଦର୍ କିନ୍ଡାକ୍କୁରୁଂ ରକ୍ୟା ବାଂଗା'ସା'ଏସା ଅଲିରାକ୍ବାଇ' ରେମଲେବକ୍ ଜା ଡନ୍ଡ୍ ବେ'ତ ଗୁତୁନ୍ ମାପ୍ରୁବୁଇ' ମାଇ ଗୁଇ'ନାଉ ଡେନ୍ତା ଡ'ସେକ୍ ଡୁତା” ଡ'ସେକ୍ ମା'ଏ ଅଇଁୟ'। 5ମାତର୍ ପାଉଲଲା ଆତୁନ୍ ବୁବୁ' ସୁଂଅଁବକ୍ ଉର୍ସିଡ'ବେଡ' । ମାରି ଆମାଇ ମାସା ଆଡେନ୍ତା । 6ରେମଲେ ମାଇନା ତିତି ପୁଲ୍ଉଇତା ଆରାକ୍ନା ମାଇ ଆଲୁଂ ଲଗ୍ଡାଇସେକ୍ ଗୁଇ'ଉଇତାବେ ଡ' ଏତ୍ସେକ୍ ଜାଗ୍ଲ'କୁ । ମାତର୍ ଆମାଇ ମାଏସା ଡେନ୍ତା ଡ'ସେକ୍ ମା'ଏ ଅବୁଦି ଜାଗ୍ଲ'ସେକ୍ ଜୁଲ'ସା'ଏସା ଆମାଇ ମାସା ଆଡେନ୍ତା । ସା' ମା'ଏ ନିଜର୍ ନିଜର୍ନା ଏତ୍ ବାଦ୍ଲି ଡେଂସେକ୍ ମାଇ ମୁଇନ୍ଡା ମାପ୍ରୁ ଡ'ସେକ୍ ସୁନ' ।
7ଗୁତୁନ୍ ଜାଗା କନ୍ଡେକ୍ ପୁବ୍ଲିୟ ଡ'ସେକ୍ ଇମିକୁନୁଂ ମୁଇନ୍ଡା ଗୁତୁନ୍ ଦିପନା ମୁନା'ରେମ୍ ଡୁକୁ । ମାଇନା ଡିଂଅଁ ମାରି ଜମିସା ଆତା ଡୁକୁ; ମାଇ ଆନେଇ ୱାୟ'ସେକ୍ ତିନ୍ ଦିନ୍ସୁଗ କିଲମ୍ରେମ୍ସୁଗ ବଲ୍ ଜୁଲ' । 8ଆଇ'ତୁନ୍ବେଲା ପୁବ୍ଲିୟନା ବା ସିବାଂସେକ୍ ମାରି ସୁଲଇ' ସିକ୍ସେକ୍ ଡିରିକ୍ସେକ୍ ଡୁକୁ । ସା' ପାଉଲଲା ଆମାଇ ଜୁଜୁ ଉଇସେକ୍ ମାଇପୁଲେଇ ପାର୍ତନା ଡେମ' ମାରି ମାଇନା ବାଗ୍ବକ୍ ତିତି ବୁଂଅଁ'ସେକ୍ ଆମାଇ ବାନି ଡେମ' । 9ଡି'କେନା ଡେଂକୁଗା'ସା' ଗୁତୁନ୍ ଜାଗାବକ୍ ସିକ୍ସେକ୍ ଡୁକୁନୁଂ ରେମଲେସା ମାଇନ୍ବକ୍ ସା'ଗା', ସା' ପାଉଲଲା ଆମା'ଏସା ବାନି ଡେମ' । 10ମା'ଏସା ଆନେଇ ଅବୁଦି ପୁରାସ୍ ବେଡ'ସେକ୍ ଅବୁଦି ମାନ୍ସେକ୍ ଡୁକୁ । ମାରି ନେଇ ଗୁତୁନ୍ ଜାଗାକୁରୁଂ ମୁନା' ଡଂଗାବକ୍ ଲେଇ'ସେକ୍ ଉଇବେଲା ଆନେଇ ଦର୍କାର୍ ଡୁକୁନୁଂ ସାମାନ୍ଲେସା ମା'ଏ ରିଂଅଁ' ବେଡ' ।
ପାଉଲଲା ମେଲିତିକୁରୁଂ ରମିୟ ଦେସ୍ବକ୍ ଉଇଡେନ୍ତା
11ତିନ୍ମାସ୍ ତିର୍ଗି' ଆଲେକ୍ଜାନ୍ଡ୍ରିଆ ଉଂଗମ୍କୁରୁଂ ସାକ୍ସେକ୍ ରୁଂଅଁବେଲାସା' ଗୁତୁନ୍ ଦିପବକ୍ଉ ଡୁକୁନୁଂ ମୁଇ ମୁନା' ଡଂଗାବକ୍ ଲେଇ'ସେକ୍ ନେଇ ଉଇନେଇ । ଗୁତୁନ୍ ଡଂଗାନା ସାର୍ମ'କନ୍ଡେକ୍ ମିତୁନ୍ ଡ'ସେକ୍ ଇମିକୁନୁଂ ଇମ୍ବାର୍ ମାପ୍ରୁନା ବ'ବ୍ସୁଗ ଅ'ରଇଁୟ' ବୁଂଅଁ'କୁନୁଂ ସିନ ଡୁକୁ । 12ନେଇ ସୁରାକୁସା ଡ'ସେକ୍ ଇମିକୁନୁଂ ମୁଇ ଜାଗାବକ୍ ଡେଲ'ସେକ୍ ଆତା ତିନ୍ଦିନ୍ ଡୁକୁନେଇ । 13ଗୁତୁନ୍ ଜାଗାକୁରୁଂ ତୁର୍ସେକ୍ ନେଇ ରେଗିୟ ଡ'ସେକ୍ ମୁଇ ଉଂଗମ୍ବକ୍ ଡେଲ'ନେଇ । ମାରି ଆତା ମୁସିଂ ଡୁକୁନେଇସା' ଗୁରାଇମ'କୁରୁଂ ଉଇଡାକ୍ ସା'ଗା'ସା' ସେଟ୍ଟ' ନେଇ ଦୁଇଦିନ୍ବକ୍ ପୁତେଅଲି ଉଂଗମ୍ବକ୍ ଡେଲ'ନେଇ । 14ଆତା ନେଇ ଆ'ଇରସୁଗ ବିସ୍ବାସି ବୁୟାଂଏଁବକ୍ ଜୁଲ'ନେଇ ମାରି ଆତା ଆଟେକ୍ସୁଗ ଡୁକୁଲା ଡ'ସେକ୍ ମା'ଏ ଆନେଇ ସୁନ' । ତିର୍ଗି' ନେଇ ରମିୟ ଦେସ୍ବକ୍ ସାକ୍ନେଇ । 15ରମିୟ ମୁନା'ଉଂଗମ୍ବକ୍ ଡୁକୁନୁଂ ବିସ୍ବାସି ବୁୟାଂଏଁ ନେଇ ସୁସାପ୍ଡେଂକୁନୁଂ ଅଂଅଁ'ସେକ୍ ମା'ଏ ଏନ୍ତୁକ୍ର ଆପ୍ପିୟ ଡ'ସେକ୍ ଇମିକୁନୁଂ ଆଟ୍ବକ୍ ମାରି ଏନ୍ତୁକ୍ର ତିନିସରେଇ ଡ'କୁନୁଂ ଡିଂଅଁପନ୍ତେ'କା ଆନେଇ ଜୁଜୁପୁଲେଇ ସା'ଗା' । ସା' ପାଉଲଲା ଆମା'ଏ ଜୁଲ'ସେକ୍ ଅବୁଦି ସାର୍ଦା ଡେଂସେକ୍ ଆମାପ୍ରୁ ସୁନ୍ଡ୍ରଗା' ।
ପାଉଲଲା ରମିୟ ଦେସ୍ବକ୍ ଉଇସେକ୍ ଅଇଁୟ'କୁନୁଂ
16ତିର୍ଗି' ନେଇ ରମିୟ ଦେସ୍ବକ୍ ଡେଲ'ନେଇସା' ଆପାଉଲଲା ମୁଇ ଡିଂଅଁବକ୍ ମାଇନା ମୁନ୍ସୁଗ ଡୁକୁପୁଲେଇ ସୁନ' । ମାରି ଆମାଇ ଜାଗ୍ବାର୍ପୁଲେଇ ଆମୁଇ ସଇନିକସା ମାଇବୁରଂ ବୁଂଅଁ'।
17ତିନ୍ଦିନ୍ ତିର୍ଗି' ପାଉଲଲା ଆଜିଉଦିରେମଲେନା ମୁନା'ରେମେବକ୍ ୱାୟ'ସା' ମା'ଏ ଗୁଲାଇର ମୁନ୍ଡକ୍ବକ୍ ରୁନ୍ଗା' । ସା' ମାଇ ଆମା'ଏ ସୁନ', “ଅ ବୁୟାଂଏଁ, ନିଂ ନେଇ'ନା ରେମଲେନ୍ ବାଗ୍ବକ୍ କି ନେଇ'ନା ୟା'ତୁତାଲେନ୍ ନିୟମ୍ନା ବାଗ୍ବକ୍ସା ମାସା ଡେମ' ଆଡୁତିଂ ଡ'ନାସା ଜିରୁସାଲମ୍ ମୁନା'ଉଂଗମ୍ବକ୍ ଡୁକୁନୁଂବେଲା ଆନିଂ ନେଇ'ନା ମୁନା'ରେମଲେ ସବ'ସେକ୍ ରମିୟ ଦେସ୍ନା ରେମଲେନ୍ ତିତିବକ୍ ଅସବ' ବେଡ' । 18ସା' ଗୁତୁନ୍ ରମିୟ ରେମଲେ ଆନିଂ ଅବୁଦି ଅ'ଗଁସ୍ଲା'ଗା' । ମାତର୍ ମା'ଏ ଆନିଂ ଡନ୍ଡ୍ ବେଡ'ସେକ୍ ଅଗୁଇ'ପୁଲେଇ ଡୁକୁନୁଂ ମାସା ଅଲିରାକ୍ବାଇ' ନିଂ ସୁନ'କୁନୁଂ ନିଂକୁରୁଂ ଆବାମ୍ତା । ଡୁ'ତୁନ୍ସା' ମା'ଏ ଆନିଂ ଅନ୍ତୁର' ବିବେ'ପୁଲେଇ ଏତ୍ଗା' । 19#ପେରିତ 25:11ମାତର୍ ଜିଉଦିରେମଲେ ଡି'କେନା ଆଡେମ' ଡ'ସେକ୍ ସୁନ'ସା' ଆନିଂ କାଇସର୍ବକ୍ ବିସାର୍ନା ଡିନ୍ଡେମ୍ପୁଲେଇ ନିଂ ସୁନ'ନିଂ । ମାତର୍ ନିଂ ନିଂନା ନିଜର୍ନା ରେମଲେନ୍ ବାଗ୍ବକ୍ ମାମା ସୁନ୍ତିଂ ଡ'ସେକ୍ ଡି'କେନା ଡେମ' ଆଡୁତିଂ । 20ଡୁ'ତୁନ୍ସା' ନିଂ ପେବୁରଂ ଅ'ଜୁନୁପୁଲେଇ ମାରି ଅଇଁପୁଲେଇ ୱାୟ'ନିଂ । ମାସା'ଡ'ନା ନେଇ' ଇସ୍ରାଏଲ୍ ରେମଲେ ମା ଆସ୍ସେକ୍ ଡୁତୁନେଇ' ଗୁତୁନ୍ ବିସୟନା ବାଗ୍ବକ୍ ଆନିଂ ଆ'ନା କେନ୍ ସିଂକ୍ଲିବୁରଂ ତୁଲ'ସେକ୍ ବୁଂଅଁ'ତା” ଡ'ସେକ୍ ସୁନ' ।
21ସା' ଜିଉଦିରେମଲେନା ମୁନା'ରେମେ କେନା ଅଂଅଁ'ସେକ୍ ଆପାଉଲଲା ସୁନ', “ନେଇ ନନା ବିସୟରେ ଜିଉଦା ଦେସ୍କୁରୁଂ ମାସା ସିଟି ବାଂ ଆଡୁତୁନେଇ । ମାରି ଜିରୁସାଲମ୍କୁରୁଂ ସା'କୁନୁଂ ବୁୟାଂଏଁସା ଜାଏସା ନନ୍ ବାଗ୍ବକ୍ ମାସା ଅଲିରାକ୍ବାଇ' ତୁମ' ସୁନ' ଆଡୁତା । 22ମାତର୍ ନ ବିସ୍ବାସ୍ ଡେମ'କୁନୁଂ କେନ୍ ଦଲ୍ନା ରେମଲେନ୍ ବାଗ୍ବକ୍ ଗୁଲାଇ କୁନ୍ଡାନ୍ ରେମଲେ ନିଦାଲ'ତା ଡ'ସେକ୍ ନେଇ ମାଗ'ତୁନେଇସା' କେନ୍ ବିସୟ ବାଗ୍ବକ୍ ନ ମା ଏତ୍ଗୁତୁନ ଡ'ସେକ୍ ନେଇ ନନ୍କୁରୁଂ ଅଂପୁଲେଇ ମୁନ୍ ଡେଂଗୁତୁନେଇ” ଡ'ସେକ୍ ସୁନ' ।
23ଡୁ'ତୁନ୍ସା' ମା'ଏ ଇମ୍ବ'ନ୍ ଦିନ୍ ସୁସାପ୍ ଡୁତା ଡ'ସେକ୍ ମାଇବୁରଂ ଅଇଁୟ'ସେକ୍ ଉନ୍ତା ସାପ୍ତୁନେଇ ଡ'ସେକ୍ ସୁନ' । ସା' ଉନ୍ତ୍ଦିନ୍ ଅବୁଦି ରେମଲେ ପାଉଲଲା ଡୁକୁନୁଂ ଜାଗାବକ୍ ସା'ଗା' । ସା' ଇନ୍ଜୁର୍ବାଂସା' ଞନ୍ଡିପ୍ପନ୍ତେ'କା ଆମା'ଏ ମାପ୍ରୁନା ରାଜି ବିସୟରେ ମାରି ମସାନା ନିୟମ୍ବକ୍ ମାରି ବାବବାଦିଲେ ଲେକ୍ଲ'କୁନୁଂବକ୍ ଜିସୁନା ବିସୟରେ ଡୁକୁନୁଂ ଗୁଲାଇ ଆମା'ଏ ବଲ୍ ଅମାଗ'ସେକ୍ ଆଜିସୁ ବିସ୍ବାସ୍ ଅ'ଡେମ୍ପୁଲେଇ ସେସ୍ଟା ଡେମ' । 24ସା' ଏନ୍ତୁକ୍ର ପାଉଲନା ତୁମ' ସବ'ସେକ୍ ବିସ୍ବାସ୍ ଡେମ' ମାତର୍ ଏନ୍ତୁକ୍ର ବିସ୍ବାସ୍ ଆଡେମ୍ତ । 25ମା'ଏ ମା'ଏନ୍ ବିତ୍ରେ ଅଇଁୟ'ସେକ୍ ପାଲ୍ପାଲ୍ ଡେଂସେକ୍ ମାଇନ୍କୁରୁଂ ଡୁଂଡୁଂବେଲା ପାଉଲଲା ଆମା'ଏ ସୁନ': “ଆବାବବାଦି ଆଜିସାୟଲା ପବିତ୍ର ଆତ୍ମା ସାନ୍ଡୁଂଅଁସା' ଆପେନା ୟା'ତୁତାଲେ ସତ୍ବାଇ' ତୁମ' ସୁନ'ବୁଂଅଁ' । ମାଇ ମା ଡ'ସେକ୍ ସୁନ' ଡ'ନା:
26‘ପେ କେନ୍ ରେମଲେନ୍ବକ୍ ଉଇସେକ୍ ସୁଁ,
ପେ ମାପ୍ରୁନା ତୁମ' ଅଂଅଁ'ତୁପେ ମାତର୍ ଅର୍ତ ମା ଡ'ସେକ୍ ଆମାକ୍ତୁପେ,
ମାରି ମାପ୍ରୁ ମାମା ଡିନ୍ଡେମ୍ ଡେନ୍ତା ଗୁତୁନ୍ ପେ ଜୁଜୁ ଗଂତୁପେ, ମାତର୍ ଗୁତୁନା ମା ଡ'ସେକ୍ ସମ' ଆଗଂତୁପେ
27ମାସା'ଡ'ନା କେନ୍ ରେମଲେନା ଜିବନ୍ ଅବୁଦି ସୁ'ଡଂଅଁ' ଉଇଗୁତା ।
ମା'ଏନା ଲୁନ୍ତୁର୍ବୁରଂ ବଲ୍ ଅଂ ଆଗଂତା,
ମାରି ମା'ଏ ମ' ଅ'କାନିଆର୍ସୁଂଅଁ'ତା ।
ଆରାକ୍ନା ମା'ଏ ମ'ବୁରଂ ଜୁଜୁ ଗଂଆଁନା,
ମାରି ମା'ଏ ଲୁନ୍ତୁର୍ବୁରଂ ଅଂ ଗଂଆଁନା,
ମାରି ମା'ଏ ମାଗ୍ମାକ୍ ଗଂଆଁନା ।
ଡୁ'ତୁନ୍ଉ ମା'ଏ ନିଂବକ୍ ଆନ୍ଡେଇଁ ସାକ୍ନା, ନିଂ ଆମା'ଏ ବାନି ଡେମ୍ନିଂ ।’
28ଡୁ'ତୁନ୍ସା' ମାପ୍ରୁ ଆରେମଲେ ରକ୍ୟା ଡିନ୍ଡେମ୍ନା ବିସୟ ଆମାପ୍ରୁ ମମୁନାକ୍ବାଇ' ରେମଲେନ୍ବକ୍ ଉଇସେକ୍ ସୁନ'ତା ମାରି ମା'ଏ ଗୁତୁନା ଅଂତ ।” 29#28:29 ପାଉଲଲା କେନ୍ ଗୁଲାଇ ତୁମ' ସୁନ'ସା', ଜିଉଦିରେମଲେ ମା'ଏ ମା'ଏନ୍ ବିତ୍ରେ କିରକ୍ସେକ୍ ଡୁଂଗା' । 30ପାଉଲଲା ଦୁଇ ବରସ୍ପନ୍ତେ'କା ଆତା ମୁଇ ବାଡା ଡିଂଅଁ ଡେମ'ସେକ୍ ଡୁକୁଗା' । ମାରି ଆମାଇ ଜୁଜୁ ସା'କୁନୁଂ ଆଗୁଲାଇ ରେମଲେ ମାଇ ଡିଂଅଁବକ୍ ୱାୟ'ସେକ୍ 31ମବୁତୁଂ ମାପ୍ରୁନା ରାଜିନା ବିସୟ ସୁନ'କୁ, ମାରି ପ୍ରବୁ ଜିସୁ କିରିସ୍ଟନା ବିସୟ ଅମାଗ'କୁ । ଆଇ'ତୁନ୍ବେଲା ଆମାଇ ଜାଏସା ପିଟାଇବାର୍ପୁଲେଇ ସେସ୍ଟା ଆଡେମ୍ତ ।
Currently Selected:
ପେରିତ 28: BFW
Highlight
Copy
Compare
Share
Want to have your highlights saved across all your devices? Sign up or sign in
CC BY-NC-ND 4.0