ପେରିତ 26
26
ପାଉଲଲା ଆଗ୍ରିପାଲାବୁରଂ ଅଇଁଡେନ୍
1ସା' ଆଗ୍ରିପା ରାଜା ଆପାଉଲଲା, “ନ ନିଜର୍ ବିସୟ ଆ'ନା ସୁଁସୁ ଗଂତୁନ” ଡ'ସେକ୍ ସୁନ' ।
ସା' ପାଉଲଲା ମାଇନା ତିତି ଅସୁୟ'ସେକ୍ ରେମଲେ ଆମାଇ ନିନ୍ଦାଲ'କୁନୁଂ ବିସୟନା ବାଗ୍ବକ୍ ସୁଁସୁ ମୁଲାୟ' । 2“ଅ ଆଗ୍ରିପା ରାଜା, ଜିଉଦିରେମଲେ ନିଂନା ବାଗ୍ବକ୍ ମାମା ଗୁଲାଇ ସୁନ'ବୁଂଅଁ' ଗୁତୁନ୍ ବିସୟରେ ନନା ସାର୍ମ'କନ୍ଡେକ୍ ତଂସେକ୍ ନିଂ ଆନ ନିଂନା ନିଜର୍ନା ବିସୟରେ ସୁଁସୁପୁଲେଇ ମୁଇ ବଲ୍ ସୁଜଗ ବାଂଗୁତିଂସା' ନିଂ ମୁଇନ୍ଡା କପାଲ୍ବାଇ' ରେମ ଡ'ସେକ୍ ଏତ୍ଗୁତିଂ । 3ମାସା'ଡ'ନା ଜିଉଦିରେମଲେନା ନିୟମ୍କାନମ୍ନା ମାରି ମା'ଏ ମା'ଏନ୍ ବିସୟବକ୍ ଅଇଁୟ'ସେକ୍ କିରକୁନୁଂ ଗୁତୁନ୍ ତୁମ' ଗୁଲାଇ ନ ବଲ୍ ମାଗ'ତୁନ । ଡୁ'ତୁନ୍ସା' ନ ଦୟା ଡେଂସେକ୍ ନିଂ ସୁନ'କୁନୁଂ ତୁମ' ବଲ୍ ଅଂ ଡ'ସେକ୍ ସୁନ'ତିଂ ।
4ନିଂ ଡାଉବାଂସା' ନିଜର୍ନା ଦେସ୍ବକ୍ ମାରି ଜିରୁସାଲମ୍ ମୁନା'ଉଂଗମ୍ବକ୍ ମି ଡୁକୁନିଂ ଡ'ସେକ୍ ଗୁଲାଇ ଜିଉଦିରେମଲେ ନିଂନା ବିସୟ ବଲ୍ ମାଗ'ତା । 5#ପେରିତ 23:6; ପିଲିପି 3:5ମା'ଏ ଆନିଂ ଅବୁଦି ଦିନ୍ ସିଁସେଇଁବାଂସା' ମାଗ'ତାସା' ନିଂ ଜିଉଦିରେମଲେନ୍ ଗୁଲାଇ ନିୟମ୍ ଅବୁଦି ବଲ୍ ମାନ୍ସେକ୍ ଡୁକୁନୁଂ ମୁଇନ୍ଡା ପାରୁସିଦଲ୍ନା ରେମସୁଗ ଡୁକୁନିଂସା' ମା'ଏ ମୁନ୍ ଡେଂଗୁତା ଡ'ନା ଗୁତୁନ୍ ବିସୟରେ ସାକି ସୁଁସୁ ଗଂତା । 6ଆ'ନା ଜୁ, ନେଇନା ୟା'ତୁତାଲେନ୍ବକ୍ ମାପ୍ରୁ ମା ଡ'ସେକ୍ ତିତି ବାଡ'ବୁଂଅଁ'କୁ ଗୁତୁନ୍ବକ୍ ନିଂ ଆସ୍ସେକ୍ ଡୁତିଂସା' ନିଂ ଆ'ନା ବିସାର୍ ଡିନ୍ଡେମ୍ନା ଜାଗାବକ୍ ଆକେ ତଂଗୁତିଂ । 7ନେଇନା ଇସ୍ରାଏଲ୍ ରେମଲେନା ବାରଟା କୁଲ୍ନା ଗୁଲାଇ ରେମଲେ, ଗୁଲାଇ ତୁମୁଂଗ ଗୁଲାଇ ସିମି'ଇ ମାପ୍ରୁନା ସେବାକାମ୍ ଡେମ'ସେକ୍ ଡୁତା । ମାରି ମାପ୍ରୁ ତିତି ବାଡ'ସେକ୍ ସୁନ'କୁନୁଂ ଗୁତୁନ୍ ବୁମ୍ବାମ୍ପନ୍ତେ'କା ମା'ଏ ଆସ୍ସେକ୍ ଡୁତା । ଅ ରାଜା, ନିଂସା ଗୁତୁନା ବୁମ୍ବାମ୍ପୁଲେଇ ଆସ୍ସେକ୍ ଡୁତିଂସା' ଜିଉଦିରେମଲେ ଆନିଂ ନିନ୍ଦାଲ'ତା । 8ମାପ୍ରୁ ଗୁଇ'କୁନୁଂ ରେମଲେବକ୍ ମାରି ମୁସ ବ'ରତ ଡ'ସେକ୍ ମାସା' ପେ ବିସ୍ବାସ୍ ଡିନ୍ଡେମ୍ ଆଗଂତୁପେ?
9 #
ପେରିତ 8:3; 22:4,5 ନାଜରିତ୍ ଉଂଗମ୍ବକ୍ ଡୁକୁନୁଂ ଜିସୁନା ବାଗ୍ବକ୍ ମାମା କସ୍ଟ ଡିନ୍ଡେମ୍ ଡୁତା ଗୁତୁନ୍ ଗୁଲାଇ ଡେମ'ନାଉ ଡେନ୍ତା ଡ'ସେକ୍ ନିଂସା ମୁଲ୍ ଏତ୍କୁନିଂ । 10ସତଇସା ଜିରୁସାଲମ୍ ମୁନା'ଉଂଗମ୍ବକ୍ ନିଂ ଡୁ'ତୁନାଉ ଡେମ'ସେକ୍ ଡୁକୁନିଂ । ମାରି ମୁନା'ପୁଜାରିଲେ ଆନିଂ ଅଦିକାର୍ ବେଡ'ସା', ଆତା ଆମାପ୍ରୁ ବିସ୍ବାସ୍ ଡେମ'ସେକ୍ ଡୁକୁନୁଂ ଅବୁଦି ରେମଲେବକ୍ ସବ'ସେକ୍ ବନ୍ଦି ଡିଂଅଁବକ୍ ବୁଂଅଁ'କୁନିଂ । ମାରି ଆମା'ଏ ଆ'ଇବେଲା ଅଗୁଇ'ନା ଡନ୍ଡ୍କସ୍ଟ ବୁଂଅଁ'କୁ, ଆଇ'ତୁନ୍ବେଲା ଆମା'ଏ ଡୁ'ତୁନା ଡେମ୍ ଡ'ସେକ୍ ନିଂସା ରାଜି ଡେଂକୁନିଂ । 11ମାରି ନିଂ ମା'ଏନା ଗୁଲାଇ ପାର୍ତନା ଡିଂଅଁବକ୍ ଉଇସେକ୍ ଆମା'ଏ ଅବୁଦି କସ୍ଟ ବେଡ'ସେକ୍ ଆଜିସୁଲା ନିନ୍ଦାଲ'ସେକ୍ ସୁଁସୁପୁଲେଇ ଅବୁଦି ଜବର୍ଦସ୍ ଡେମ'କୁନିଂ । ମାରି ନିଂ ମା'ଏନା ବାଗ୍ବକ୍ ଅବୁଦି ଗିସେକ୍ସେକ୍ ଡୁକୁନିଂସା' ପାଲ୍ପାଲ୍ ଉଂଗମ୍ବକ୍ସା ଉଇସେକ୍ ଆମା'ଏ ସବ'ସେକ୍ ଅବୁଦି କସ୍ଟ ବେଡ'କୁନିଂ ।
ଜିସୁନା ବିସୟରେ ପାଉଲଲା ସୁଁସୁଡେନ୍
12ଡୁ'ତୁନା ମୁସିଂ ମୁନା'ପୁଜାରିଲେ ଆନିଂ ଅଦିକାର୍ ବେଡ'ସେକ୍ ବେନ୍ଟାୟ'ସା' ନିଂ ଦମେସକ ମୁନା'ଉଂଗମ୍ବକ୍ ଉଇଡେଂକୁନିଂ । 13ସା' ଅ ଆଗ୍ରିପା ରାଜା ନ ଅଂ! ନିଂ ସିମି'ଇ କୁରୁଂବକ୍ ଉଇଡେଂକୁନୁଂବେଲା ମନ୍ଜାକୁରୁଂ ସେଟ୍ଟ' କି'ତୁଂକୁରୁଂ ତାରା' ସା'ଗା' । ଗୁତୁନ୍ ତାରା' ସିଂଇଁନା ତାରା'କୁରୁଂ ଅଦିକ୍ ତାର୍କୁଗା', ଗୁତୁନା ନିଂନା ବାଗ୍ବକ୍ ମାରି ନିଂବୁରଂ ସୁସାପ୍ଡେଂକୁନୁଂ ରେମଲେନ୍ ବାଗ୍ବକ୍ ସାର୍ବେର୍ତି ତାର୍କୁନୁଂ ଜୁଲ'ନିଂ । 14ମାରି ନେଇ ଗୁଲାଇର ଆଲୁଂ ଲକ୍ଉଇନେଇ, ଆଇ'ତୁନ୍ବେଲା ଏବ୍ରିସାମ୍ବକ୍ ‘ସାଉଲ୍, ଅ ସାଉଲ୍, ଆନିଂ ମାସା' କସ୍ଟ ବେଡ'ତୁନ? ନ ଡେମ'କୁନୁଂ ଗୁଲାଇ ଜୁଲ'ନା ଆଗୁରାଇ' ତାୟାଗ'ନା ମି ନିଜେ କସ୍ଟ ବାମ୍ତା ଡୁ'ତୁନ୍ସୁଗଉ ଡୁତା’ ଡ'ସେକ୍ ଆନିଂ ସୁନ'କୁନୁଂ ନିଂ ଅଂଅଁ'ନିଂ ।
15ସା' ନିଂ ଆମାଇ ‘ପ୍ରବୁ ନ ଜା?’ ଡ'ସେକ୍ ଅ'ଗଁସ୍ଲାଗ୍ନିଂସା'
ମାଇ ଆନିଂ ସୁନ', ‘ନ ଆମ୍ବନ୍ ଜିସୁଲା କସ୍ଟ ବେଡ'ତୁନ ଗୁତୁନା ନିଂ । 16ମାତର୍ ନ ତନା, ନିଂନା କାମ୍ରେମ୍ ଏପୁଲେଇ ମାରି ନିଂନା ସାକି ସୁଁସୁପୁଲେଇ ନିଂ ଆନ ଅ'ତୁନାକ୍ନିଂ । ସା' ନିଂନା ବିସୟରେ ମାମା ଜୁଲ'ତୁନ ମାରି ମାମା ନିଂ ଆନ ଅସୁଇ'ତିଂ ଗୁତୁନ୍ ଗୁଲାଇ ନ ଆଗୁଲାଇର ସୁନ୍ତୁନ । 17ନିଂ ଆନ ନନା ନିଜର୍ନା ରେମଲେନ୍ ତିତିକୁରୁଂ ମାରି ଜାଜା ଜିଉଦିରେମ ଆରାକ୍ ମା'ଏନ୍ ତିତିକୁରୁଂ ରକ୍ୟା ଡେମ୍ତିଂ । ଜୁ, ନିଂ ଆନ ଜାଜା ଜିଉଦିରେମଲେ ଆରାକ୍ ଡୁ'ତୁନ୍ବାଇ' ରେମଲେନ୍ବକ୍ ବେନ୍ଟାଇତିଂ । 18ମାପୁଲେଇ ଡ'ନା, ମା'ଏନ୍ ମ' ଅ'ତାର୍ପୁଲେଇ ନ ସାନ୍ଡୁଂତୁନ । ଡୁ'ତୁନ୍ ଡ'ନା ମା'ଏ ଞୁର୍କୁରୁଂ ତାରା'ବକ୍ ସୁସାପ୍ ଗଂତା ମାରି ସଇତାନ୍ନା ବପୁକୁରୁଂ ମାପ୍ରୁନ୍ବକ୍ ସୁସାପ୍ ଗଂତା । ଡୁ'ତୁନ୍ ଡେମ'ନା ମାପ୍ରୁ ମା'ଏନା ପାପ୍ କେମା ଡେମ୍ତ ମାରି ଆନିଂ ବିସ୍ବାସ୍ ଡେମ'ସେକ୍ ପବିତ୍ରବାଇ' ଡେଂକୁନୁଂ ରେମଲେବୁରଂ ଆମା'ଏ ମିସାଇତିଂ’ ଡ'ସେକ୍ ଜିସୁଲା ଆନିଂ ସୁନ' ।
ପାଉଲଲା ନିଜର୍ନା କାମ୍ ବିସୟରେ ସୁଁସୁଡେନ୍
19ଡୁ'ତୁନ୍ସା', ଅ ଆଗ୍ରିପା ରାଜା, ଜିସୁଲା ଆନିଂ ମାମା ଡେମ୍ ଡ'ସେକ୍ ସରଗ୍କୁରୁଂ ସୁନ' ଗୁତୁନ୍ ଗୁଲାଇ ନିଂ ମାନ୍ଗୁତିଂ । 20#ପେରିତ 9:20,28,29ନିଂ ମୁଲ୍ ଦମେସକ ଡ'ସେକ୍ ଇମିକୁନୁଂ ଉଂଗମ୍ନା ରେମଲେବକ୍ ସୁନ'ନିଂ, ତିର୍ଗି' ଜିରୁସାଲମ୍ ମୁନା'ଉଂଗମ୍ବକ୍, ମାରି ଗୁଲାଇ ଜିଉଦା ଦେସ୍ବକ୍, ମାରି ଜାଜା ଜିଉଦିରେମ ଆରାକ୍ ଡୁ'ତୁନ୍ବାଇ' ରେମଲେବକ୍ସା ଉଇସେକ୍ ମା'ଏ ମାମା ପାପ୍ ଡେମ'ତା ଗୁତୁନ୍ ଗୁଲାଇ ଅଡକ୍ସୁଂଅଁ'ସେକ୍ ମାପ୍ରୁନ୍ବକ୍ ଆନ୍ଡେଇଁ ସୁସାପ୍ପୁଲେଇ ମାରି ନେଇ ସତଇସା ପାପ୍ ଅଡକ୍ସୁଂଅଁ'ସେକ୍ ମାପ୍ରୁନ୍ବକ୍ ଆନ୍ଡେଇଁ ସା'ଗୁତୁନେଇ ଡ'କୁନୁଂସୁଗ ଗୁଲାଇ କାମ୍ବକ୍ ପେ ଅସୁଇ' ଡୁତା ଡ'ସେକ୍ସା ଆମା'ଏ ନିଂ ସୁନ'ନିଂ । 21ଡୁ'ତୁନ୍ସା' ନିଂ ମନ୍ଦିର୍ବକ୍ ଡୁକୁନୁଂବେଲା ଏନ୍ତୁକ୍ ଜିଉଦିରେମଲେ ଆନିଂ ସବ'କୁଗା', ମାରି ମା'ଏ ଆନିଂ ଅଡାପ୍ପୁଲେଇ ସେସ୍ଟା ଡେମ'କୁଗା' । 22ମାତର୍ ଆ'ନ୍ପନ୍ତେ'କା ମାପ୍ରୁ ଆନିଂ ରକ୍ୟା ଡେମ'ତାସା' ଆଗୁଲାଇର ଡ'ନା ଡାଉରେମେନ୍ବକ୍ସା ମାରି ମୁନା'ରେମେନ୍ବକ୍ସା ଜିସୁଲା ଜା ଡ'ସେକ୍ ସାକି ସୁଁସୁ ଗଂଗୁତିଂ । ମାରି ମାଏସା ପାଲ୍ ତୁମ' ନିଂ ସୁନ' ଆଡୁତିଂ ମାତର୍ ଆମାଇ ମାମା ଡେନ୍ତା ଡ'ସେକ୍ ବାବବାଦିଲେ ମାରି ମସାଲା ସୁନ'ତା ଗୁତୁନ୍ ଗୁଲାଇ ନିଂ ସୁନ'ତିଂ । 23#1 କରି 15:20ମା'ଏ ମା ଡ'ସେକ୍ ସୁନ'ତା ଡ'ନା: କିରିସ୍ଟଲା କସ୍ଟ ବାଂସେକ୍ ଗୁଇ'ତା, ମାରି ଗୁଇ'କୁନୁଂ ରେମଲେନ୍କୁରୁଂ ମୁଲ୍ ବୁର'କୁନୁଂ ରେମ ମାଇଉ ଡେନ୍ତା । ସା' ମାଇ ଆଜିଉଦିରେମଲେ ମାରି ଜିଉଦି ଆରାକ୍ବାଇ'ନା ରେମଲେବକ୍ ମାପ୍ରୁନା ତାରା' ଅସୁଇ'ତ ଡ'ସେକ୍ ସୁନ'ତା ।”
24ପାଉଲଲା ଡି'କେନା ନିଜର୍ନା ବିସୟ ଗୁଲାଇ ସୁଁସୁବେଲା ପେସ୍ଟସ୍ଲା ଅବୁଦି ଡକ୍ତି'ତା କିରକ୍ସେକ୍ ସୁନ', “ଅ ପାଉଲ, ନ ମୁଇନ୍ଡା ବାୟାରେମ୍ । ନ ଅବୁଦି ପାଟ୍ ପଡ୍ଗୁତୁନସା' ନ ବାୟାକ୍ ଉଇଗୁତୁନ” ଡ'ସେକ୍ ସୁନ' । 25ମାତର୍ ପାଉଲଲା ଆମାଇ ସୁନ', “ଅ ମୁନା' ଆଗିୟା ପେସ୍ଟସ୍, ନିଂ ବାୟାରେମ୍ ଆରାକ୍, ନିଂ ସୁନ'କୁନୁଂ ତୁମ' ଗୁଲାଇ ନିଂ ବଲ୍ ଜୁଲ'ମାଗ'ସେକ୍ ସତ୍ ସୁନ'ତିଂ । 26ନିଂ ସୁନ'କୁନୁଂ କେନ୍ ଗୁଲାଇ ବିସୟ ଆଗ୍ରିପା ରାଜାଲା ମାଗ'ତା ମାରି ନିଂ ମାଇନ୍ବକ୍ ମବୁତୁଂ ସୁଁସୁ ଗଂଗୁତିଂ । ମାସା'ଡ'ନା କେନ୍ ଗୁଲାଇ ବିସୟବକ୍ ଗୁଲାଇ ରେମଲେ ମାଗ'ତାସା' କେନ୍ ବିସୟବକ୍ ମୁଇସା ମାଇ ମମୁନାକ୍ବାଇ' ଆଡୁତା ଡ'ସେକ୍ ନିଂ ବିସ୍ବାସ୍ ଡେମ'ତିଂ । 27ଅ ଆଗ୍ରିପା ରାଜା, ବାବବାଦିଲେ ଲେକ୍ଲ'କୁନୁଂ ନ ବିସ୍ବାସ୍ ଡେମ' ଆଡୁତୁନ ଇ? ଆରାକ୍, ନ ବିସ୍ବାସ୍ ଡେମ'ତୁନ ଡ'ସେକ୍ ନିଂ ମାଗ'ତିଂ” ଡ'ସେକ୍ ସୁନ' । 28ସା' ଆଗ୍ରିପା ରାଜା ଆପାଉଲଲା ସୁନ', “ନ ଆନିଂ ଆଇ'କେନ୍ ସେଟ୍ଟ' #26:28 କିରିସ୍ଟାନ୍ ଡ'ନା “ଆଜିସୁ କିରିସ୍ଟଲା ବିସ୍ବାସ୍ ଡେମ'ସେକ୍ ଆମାଇ ତେଂଗି ଉଇଡେଂକୁନୁଂ ମୁଇନ୍ଡା ରେମ” ଡ'ସେକ୍ ଆର୍ତ ଡୁତା ।କିରିସ୍ଟାନ୍ ଅ'ଏତିଂ ଡ'ସେକ୍ ଏତ୍ଗୁତୁନ ଇ?” ଡ'ସେକ୍ ସୁନ' । 29ସା' ପାଉଲଲା ଆଆଗ୍ରିପା ରାଜାଲା ସୁନ', “ସେଟ୍ଟ' ଡେମେଇ' କି ଅବୁଦି ଦିନ୍ ତିର୍ଗି' ଡେମେଇ', କାଲି ନଉ ଡ'ସେକ୍ ଆରାକ୍ ମାତର୍ ଆ'ଇ ରେମ ନିଂନା ତୁମ' ଆ'ନା ଅଂଅଁ'ତା ମା'ଏ ଗୁଲାଇରସା ନିଂସୁଗ ରକ୍ୟା ବାମେଇ' ଡ'ସେକ୍ ନିଂ ମାପ୍ରୁନ୍ବକ୍ ପାର୍ତନା ଡେମ'ତିଂ । ମାତର୍ ଆନିଂ ସିଂକ୍ଲିବୁରଂ ତୁଲ'କୁନୁଂସୁଗ ଆଡୁକୁଲେଇ' ” ଡ'ସେକ୍ ସୁନ' ।
30ତିର୍ଗି' ଆଗ୍ରିପା ରାଜାଲା ମାରି ଗୁତୁନ୍ ଦେସ୍ନା ମୁନା' ରେମ ମାରି ବର୍ନିକିଲା ମା'ଏବୁରଂ ଲେଇ'କୁନୁଂ ଗୁଲାଇ ରେମଲେ ତଂସେକ୍ ବାରେ ତୁର୍ଗା' । 31ମା'ଏ ବିସାର୍ନା ଡିନ୍ଡେମ୍ନା ଡିଂଅଁକୁରୁଂ ତୁର୍ସେକ୍ ମା'ଏ ମା'ଏନ୍ ବିତ୍ରେ ଅଇଁୟ' । ମା'ଏ ମା ଡ'ସେକ୍ ଅଇଁୟ' ଡ'ନା: “ଆକେନ୍ ରେମ ଅଡାପ୍ପୁଲେଇ ଆରା'ଗେ ବନ୍ଦିବକ୍ ବୁଂବୁଂପୁଲେଇ ମାଇ ମାସା ଅଲିରାକ୍କାମ୍ ଡେମ' ଆଡୁତା” ଡ'ସେକ୍ ଅଇଁୟ' । 32ଅଇଁୟ'ସେକ୍ ଆଗ୍ରିପା ରାଜାଲା ଆପେସ୍ଟସ୍ଲା ସୁନ', “କେନ୍ ରେମ କାଇସର୍ବକ୍ ବିସାର୍ନା ଡିନ୍ଡେମ୍ପୁଲେଇ ସୁନ' ଆଡୁକୁନାଏ ନେଇ' ଆମାଇ ଅ'ତୁର୍ ଗଂଆଁନେଇ' ” ଡ'ସେକ୍ ସୁନ' ।
Currently Selected:
ପେରିତ 26: BFW
Highlight
Copy
Compare
Share
Want to have your highlights saved across all your devices? Sign up or sign in
CC BY-NC-ND 4.0