ପେରିତ 23
23
1ମାରି ପାଉଲଲା ବିସାର୍ନା ଡିନ୍ଡେମ୍ପୁଲେଇ ଲେଇ'କୁନୁଂ ଆରେମଲେ ବଲ୍ ଜୁଲ'ସେକ୍ ସୁନ', “ଅ ନିଂନା ବୁୟାଂଏଁ! ନିଂ ଆ'ନ୍ପନ୍ତେକ୍ ନିଂନା ଜିବନ୍ବକ୍ ଆମାପ୍ରୁ ମାନ୍ସେ'ଗାଉ ଡୁତିଂ ମାରି ଇମ୍ବ'ନା ବଲ୍ ଇମ୍ବ'ନା ଆସାର୍ ଡ' ମାଗ'ସେକ୍ ନିଂ ମାଏସା ବୁଲ୍କାମ୍ ଡେମ' ଆଡୁତିଂ” ଡ'ସେକ୍ ସୁନ' ।
2ମାଇ ଡି'କେନ୍ ସୁନ'ସା' ମୁନା'ପୁଜାରିଲେନ୍ ମୁନା'ପୁଜାରି ଆନାନ ଡ'ସେକ୍ ଇମି ଡୁକୁନୁଂଆଁ ଅଂଅଁ'ସେକ୍ ପାଉଲନା ଉନ୍ତୁ' ତଂକୁନୁଂ ରେମଲେବକ୍ ଆମାଇନା ଟମ୍ନା ବୁଗ୍ବୁଗ୍ପୁଲେଇ ସୁନ' । 3#ମାତିଉ 23:27,28ଆଇ'ତୁନ୍ବେଲା ପାଉଲଲା ଆମାଇ ସୁନ', “ଜୁ, ମାପ୍ରୁ ଆନ ବୁକ୍ତ, ନ ମୁଇ ତୁଲୁଇବାଇ' ତୁବୁକ୍ ରିକିଡ'କୁନୁଂ କନ୍ତିସୁଗ ଡୁତୁନ! ନ ଆନିଂ ନିୟମ୍ ଅନୁସାରେ ବିସାର୍ନା ଡିନ୍ଡେମ୍ପୁଲେଇ ଲେଇ'ଗୁତୁନ, ମାତର୍ ନ ନିୟମ୍ ମମାନ୍ବାର୍ ଡୁତୁନ ମାସା'ଡ'ନା ନ ଆନିଂ ବୁଗ୍ବୁଗ୍ପୁଲେଇ ସୁନ'ତୁନ” ଡ'ସେକ୍ ସୁନ' ।
4ଆଇ'ତୁନ୍ବେଲା ପାଉଲନା ଇନ୍ତୁ' ତଂକୁନୁଂ ରେମଲେ ଆପାଉଲଲା ସୁନ' “ଆମାପ୍ରୁ ସେବା ଡେମ'କୁନୁଂ ମୁନା'ପୁଜାରିଲେନ୍ ଆମୁନା'ପୁଜାରିଲା ମାସା' ନ ଡି'କେନା ନିନ୍ଦାଲ'ସେକ୍ ସୁନ'ତୁନ ନ ଆବୁତୁଂତୁନ ଇ?” ଡ'ସେକ୍ ସୁନ' ।
5ସା' ପାଉଲଲା ଆମା'ଏ ସୁନ', “ଅ ବୁୟାଂଏଁ, ନିଂ ଆମାଇ ମୁନା'ପୁଜାରିଲେନ୍ ମୁନା'ପୁଜାରିଲା ଡ'ସେକ୍ ମାଗ' ଆଡୁତିଂ । ମାସା'ଡ'ନା ମାପ୍ରୁନା ଉଲାକ୍ବକ୍ ଲେକ୍ଲ'ତା: ‘ପେନ୍ ରେମଲେନ୍ ମୁନା'ରେମେନ୍ ବାଗ୍ବକ୍ ଅଲିରାକ୍ବାଇ' ଆସୁନ'’ ଡ'ସେକ୍ ଲେକ୍ଲ'ତା” ଡ'ସେକ୍ ସୁନ' ।
6 #
ପେରିତ 26:5; ପିଲିପି 3:5 ଗୁତୁନ୍ ବିସାର୍ ଡିନ୍ଡେମ୍ନା ଜାଗାବକ୍ ଡୁକୁନୁଂ ରେମଲେବକ୍ ଏନ୍ତୁକ୍ର ପାରୁସିଦଲ୍ନା ରେମଲେ ମାରି ଏନ୍ତୁକ୍ର ସାଦୁକି ଦଲ୍ନା ରେମଲେ ଡୁତା ଡ'ସେକ୍ ପାଉଲଲା ମାଗ'ସେକ୍ ଅବୁଦି କିରକ୍ସେକ୍ ସୁନ', “ଅ ନିଂନା ବୁୟାଂଏଁ, ନିଂସା ମୁଇନ୍ଡା ପାରୁସିଦଲ୍ନା ରେମ ମାରି ନିଂନା ୟା'ତୁତାଲେସା ପାରୁସିଦଲ୍ନା ରେମଲେ ଡୁକୁ । ମୁସିଂ ରେମଲେ ଗୁଇ'ସେକ୍ ମାରି ବୁର'ତା ଡ'ସେକ୍ ନିଂ ଆସ୍ସେକ୍ ଡୁତିଂ ସା' ନିଂ କେନ୍ ବିସାର୍ ଡିନ୍ଡେମ୍ନା ଜାଗାବକ୍ ଆ'ନା ତଂଗୁତିଂ” ଡ'ସେକ୍ ସୁନ' । 7ପାଉଲଲା ଡି'କେନା ସୁନ'ସା' ପାରୁସିଦଲ୍ନା ରେମଲେ ମାରି ସାଦୁକି ଦଲ୍ନା ରେମଲେ ମା'ଏ କିରକ୍ସେକ୍ ବିସାର୍ ଡିନ୍ଡେମ୍ପୁଲେଇ ଡୁକୁନୁଂ ଗୁଲାଇର ପାଲ୍ପାଲ୍ ଦଲ୍ ଡେଂଉଇଗା' । 8#ମାତିଉ 22:23; ମାର୍କ 12:18; ଲୁକ 20:27ମାସା'ଡ'ନା ଗୁଇ'କୁନୁଂ ରେମଲେ ମାରି ଆବୁରତା ମାରି ସରଗ୍ବକ୍ ଦୁତଲେସା କି ଆତ୍ମାଲେସା ଜାଏସା ବାସ୍ ଆଡୁତା ଡ'ସେକ୍ ସାଦୁକି ଦଲ୍ନା ରେମଲେ ବିସ୍ବାସ୍ ଡେମ'ତା । ମାତର୍ ପାରୁସିଦଲ୍ନା ରେମଲେ କେନ୍ ଗୁଲାଇ ଡୁତା ଡ'ସେକ୍ ବିସ୍ବାସ୍ ଡେମ'ତା ।
9ଡୁ'ତୁନ୍ସା' ମା'ଏ ଅବୁଦି କିରଗା' ମାରି ପାରୁସିଦଲ୍ନା ରେମଲେବକ୍ ଡୁକୁନୁଂ ଆଇ'ରସୁଗ ନିୟମ୍ ଅମାକ୍ରେମେ ତଂସେକ୍ ଅବୁଦି କିରଗା' ମାରି ସୁନ', “ନେଇ କେନ୍ ରେମନ୍କୁରୁଂ ମାଏସା ବୁଲ୍କାମ୍ ଡେମ'କୁନୁଂ ଜୁଲ' ଆଡୁତୁନେଇ । କେନ୍ ରେମବୁରଂ ଆତ୍ମା ଆରାକ୍ନା ସରଗ୍ ଦୁତ ଅଇଁୟ'ବୁଂତ” ଡ'ସେକ୍ ସୁନ' । 10ଡି'କେନା ଅବୁଦି କିରମରକ୍ସେକ୍ ଇନ୍ଡ୍ରିମ୍ସୁଗ ଡେଂକୁସା' ରେମଲେ ଆପାଉଲଲା ସିସିଡ'ଲୁଲାର'ସୁଂତ ଡେ ମାଡେ ଡ'ସେକ୍ ଗୁତୁନ୍ ଅଜାର୍ଟା ସଇନିକ୍ ରେମଲେନା ମୁନା' ରେମ ବୁତୁଂଗା' । ସା' ଆପାଉଲଲା ମା'ଏନ୍କୁରୁଂ ଜବର୍ଦସ୍ ଅ'ତୁର'ସେକ୍ ସଇନିକଲେ ଡୁକୁନୁଂ ଡିଂଅଁବକ୍ ରିଂଅଁ'ସୁସାପ୍ପୁଲେଇ ଗୁତୁନ୍ ମୁନା'ରେମ୍ ଆସଇନିକଲେ ସୁନ'।
11ସା' ଉନ୍ତା ତୁମୁଂଗ ପ୍ରବୁଲା ପାଉଲନା ଉନ୍ତୁ' ତଂସେକ୍ ସୁନ', “ନ ଅ'ବପୁକ୍ସେକ୍ ଡୁକୁଲା! ମାସା'ଡ'ନା ନ ନିଂନା ବିସୟରେ ଜିରୁସାଲମ୍ ମୁନା'ଉଂଗମ୍ବକ୍ ମି ସାକି ସୁନ'ତୁନ ଡୁ'ତୁନ୍ସୁଗ ରମ୍ ଦେସ୍ବକ୍ସା ସାକି ସୁଁସୁ ଡୁତା” ଡ'ସେକ୍ ସୁନ' ।
ଆପାଉଲଲା ଅଗୁଇ'ପୁଲେଇ ଏତ୍ଗୁତା
12ଆଇ'ବେରା ଜିଉଦିରେମଲେ ଆ'ଇରସୁଗ ମିସ୍ସେକ୍ ଅଇଁୟ'; ମାରି ଆପାଉଲଲା ଅଗୁଇ'ପନ୍ତେ'କା ମାଏସା ଆସୁମ୍ନେଇ' କି ଆଇ'ନେଇ' ଡ'ସେକ୍ ମା'ଏ ପର୍ମାନ୍ ସବ' । 13ଆମାଇ ଅଗୁଇ'ପୁଲେଇ ଡି'କେନା ପର୍ମାନ୍ ସବ'କୁନୁଂ ଆରେମଲେ ଜୁଲ'ନା ସାଲିସ୍ଲକ୍ ବାଗ୍ବକ୍ ଡୁକୁ । 14ମା'ଏ ମୁନା'ପୁଜାରିଲେନ୍ବକ୍ ମାରି ମୁନା'ରେମେନ୍ବକ୍ ଉଇସେକ୍ ସୁନ', “ନେଇ ଆପାଉଲଲା ଅଗୁଇ'ପନ୍ତେକ୍ ମାଏସା ଆସୁମ୍ ଆଇ'ତୁନେଇ ଡ'ସେକ୍ ପର୍ମାନ୍ ସବ'ତୁନେଇ । 15ଡୁ'ତୁନ୍ସା' ପେ ମାରି ବିସାର୍ନା ଡିନ୍ଡେମ୍ ରେମଲେ ଗୁଲାଇର ମିସ୍ସେକ୍ ଗୁତୁନ୍ ଅଜାର୍ଟା ସଇନିକ୍ ରେମଲେନା ମୁନା' ରେମବକ୍ ଉଇସେକ୍ ନ ଆପାଉଲଲା ବାରେ ନେନ୍ବକ୍ ରିଂଅଁ'ବେ', ମାସା'ଡ'ନା ଆମାଇ ମାରି ଅବୁଦି ଅ'ଗଁସ୍ଲାଗ୍ସେକ୍ ବିସାର୍ନା ଡିନ୍ଡେମ୍ ଡୁତା ଡ' ନାଡାୟ'ସେକ୍ ପେ ସୁଁ । ମାତର୍ ପାଉଲଲା ପେନ୍ବକ୍ ସୁସାପ୍ ସିଁସେଇଁଉ ନେଇ ଆମାଇ ମନ୍ଜାକୁରୁଂ ଅଗୁଇ'ପୁଲେଇ ଅଜାକ୍ସେକ୍ ଡୁତୁନେଇ” ଡ'ସେକ୍ ସୁନ' ।
16ମାତର୍ ମା'ଏ ଆପାଉଲଲା ଅଗୁଇ'ପୁଲେଇ କଲେକଲେ ଅଇଁୟ'କୁନୁଂ ଗୁଲାଇ ପାଉଲନା ମାସଁ ଅଂଅଁ'ସେକ୍ ସଇନିକଲେ ଡୁକୁନୁଂ ଡିଂଅଁବକ୍ ଗାଇସେକ୍ ଆପାଉଲଲା କେନା ବିସୟ ସୁନ'ବେଡ' ।
17ସା' ସଏଟା ସଇନିକଲେନ୍ ଆମୁନା'ରେମ୍ ଆମୁଇନ୍ଡା ପାଉଲଲା ୱାୟ'ସେକ୍ ସୁନ', “ଆକେନ୍ ଇଂଗେର୍ଗୁଲା ଗୁତୁନ୍ ଅଜାର୍ଟା ସଇନିକ୍ ରେମଲେନା ମୁନା' ରେମବକ୍ ରିଂଅଁ' ଉୟା । ମାଇ ଆମାଇ ମାମା ସୁଁସୁ ଡୁତା” ଡ'ସେକ୍ ସୁନ' । 18ସା' ମାଇ ଆମାଇ ଅଜାର୍ଟା ସଇନିକଲେନ୍ ମୁନା'ରେମ୍ବକ୍ ରିଂଅଁ' ଉଇଗା' ।
ମାରି ଆମାଇ ସୁନ', “ବନ୍ଦିବକ୍ ଡୁକୁନୁଂ ପାଉଲଲା ଆନିଂ ୱାୟ'ସେକ୍ କେନ୍ ଗୁଲା ଆନ ମାମା ସୁଁସୁ ଡୁତା ଡ'ସେକ୍ ଆମାଇ ନନ୍ବକ୍ ୱାୟ' ଉଇପୁଲେଇ ଆନିଂ ସୁନ' ” ଡ'ସେକ୍ ସୁନ'।
19ସା' ଗୁତୁନ୍ ଅଜାର୍ଟା ସଇନିକ୍ ରେମଲେନା ମୁନା' ରେମ ଆତୁନ୍ ଇଂଗେର୍ଗୁନା ତିତି ସବ'ସେକ୍ ଇ'କି ଡଗ୍ରି'ତା ରିଂଅଁ'ଉଇସେକ୍ “ନ ଆନିଂ ମା ସୁଁସୁ ଡୁତା?” ଡ'ସେକ୍ ଅ'ଗଁସ୍ଲା'ଗା' ।
20ସା' ମାଇ ସୁନ', “ବେରା ଏନ୍ତୁକ୍ ଜିଉଦିରେମଲେ ଆପାଉଲଲା ମାରି ଅବୁଦି ଅ'ଗଁସ୍ଲାଗ୍ସେକ୍ ବିସାର୍ନା ଡିନ୍ଡେମ୍ ଡୁତା ଡ' ନାଡାୟ'ସେକ୍ ବିସାର୍ ଡିନ୍ଡେମ୍ନା ଜାଗାବକ୍ ଆମାଇ ରିଂଅଁ'ବେଡେଇ' ଡ'ସେକ୍ ଆନ ସୁଁସୁପୁଲେଇ ମା'ଏ ଏତ୍ଗୁତା । 21ଡୁ'ତୁନ୍ସା' ନ ମା'ଏନା ତୁମ' ଆସବ' । ମାସା'ଡ'ନା ମା'ଏ ଆପାଉଲଲା ଅଡାପ୍ପୁଲେଇ ସାଲିସ୍ ଲକ୍କୁରୁଂ ଅଦିକ୍ ରେମଲେ ଆମାଇ ଇନ୍ଡ୍ରିଂନା କୁରୁଂବକ୍ ତିପାକ୍ସେକ୍ ଜାଗ୍ତୁନେଇ ଡ'ସେକ୍ ଡୁତା । ମାରି ମା'ଏ ଆମାଇ ଅଡାପ୍ପନ୍ତେ'କା ମାସା ଆସୁମ୍ତୁନେଇ କି ମାସା ଆଇ'ତୁନେଇ ଡ'ସେକ୍ ପର୍ମାନ୍ସା ସବ'ତା । ଆ'ନା ନନା ତୁମ' ଅଂପୁଲେଇ ମା'ଏ ଜାଗ୍ଲ'ସେକ୍ ଡୁତା” ଡ'ସେକ୍ ସୁନ' ।
22ସା' ଗୁତୁନ୍ ଅଜାର୍ଟା ସଇନିକ୍ ରେମଲେନା ମୁନା' ରେମ ଆମାଇ ସୁନ', “ନ କେନା ଗୁଲାଇ ତୁମ' ଆମାଇ ସୁନ'ତିଂ ଡ' ଆଜାଏସା ଆସୁନ' ” ଡ'ସେକ୍ ସୁନ' ବେନ୍ଟାୟ' ବେଡ' ।
ଆପାଉଲଲା କାଇସରିଆ ଉଂଗମ୍ବକ୍ ରିଂଅଁ' ଉଇଡେନ୍
23ତିର୍ଗି' ମାଇ ସଏଟା ସଇନିକ୍ ରେମଲେନା ଆମୁନା'ରେମ୍ ଆଇମ୍ବାୟ ୱାୟ'ସେକ୍ ସୁନ' “ଆ'ନା ତୁମୁଂଗ ନଟାବେଲା କାଇସରିଆ ଉଂଗମ୍ବକ୍ ଉଇପୁଲେଇ ଦୁଇସ ସଇନିକ୍ଲେବକ୍, ତିନ୍କଡି ଦସ୍ଟା ଗଡା ସଲାଇବାର୍ ରେମଲେବକ୍, ମାରି ଦୁଇସ କାନ୍ଦା ସ'କୁନୁଂ ରେମଲେବକ୍ ଅଜାଗେଇ' । 24ମାରି ରମିୟ ସର୍କାର୍ବକ୍ କାମ୍ ଡେମ'କୁନୁଂ#23:24 ସର୍କାର୍ବକ୍ କାମ୍ ଡେମ'କୁନୁଂ ରାଜ୍ୟ ପାଲକ ଡ'ସେକ୍ ଅଡିଆ ସାମ୍ବକ୍ ଡୁତା । ପେଲିକ୍ସ୍ ଡ'କୁନୁଂ ରେମନ୍ବକ୍ ଆପାଉଲଲା ବଲ୍ ରିଂଅଁ' ଉଇପୁଲେଇ ଆ'ଇସୁଗ ଗଡାଲେ ବେଡ'ବୁଂ” ଡ'ସେକ୍ ସୁନ' ।
25ମାରି ଗୁତୁନ୍ ସଇନିକଲେନ୍ ମୁନା'ରେମ୍ ଆପେଲିକ୍ସ୍ଲା ବିବେ'ପୁଲେଇ ମୁଇ ସିଟି ଡି'କେନା ଲେକ୍ଲ' ବେଡ':
26ନିଂନା ଇମି କ୍ଲାଉଦିଅ ଲୁସିୟା,
ଗୁଲାଇର ମୁନା'ରେମ୍ ଡ'ସେକ୍ ମାନ୍ସେକ୍ ଡୁକୁନୁଂ
ରମିୟ ସର୍କାର୍ନା ଆମୁନା' ରେମ ଆପେଲିକ୍ସ୍ଲା
ନିଂ ସୁନ୍ଡ୍ରଗୁତିଂ ।
27ଜିଉଦିରେମଲେ ଆକେନ୍ ରେମ ସବ'ସେକ୍ ଅଡାପ୍ପୁଲେଇ ସେସ୍ଟା ଡେମ'କୁନୁଂବେଲା ମାଇ ମୁଇନ୍ଡା ରମିୟ ଦେସ୍ନା ରେମ ଡ' ମାଗ'ସେକ୍ ନିଂ ସଇନିକଲେବୁରଂ ଉଇସେକ୍ ଆମାଇ ରକ୍ୟା ଡେମ'ନିଂ । 28ମାଇ ମା ଡେମ'ସା' କେନ୍ ଜିଉଦିରେମଲେ ଆକୁନା ନିନ୍ଦାଲ'ତା ଡ' ନିଂ ମାଗ୍ମାକ୍ପୁଲେଇ ମୁନ୍ ଡେଂସେକ୍ ଜିଉଦିରେମଲେ ବିସାର୍ନା ଡିନ୍ଡେମ୍ନା ଜାଗାବକ୍ ରିଂଅଁ' ଉଇନିଂ । 29ସା' ଜିଉଦିରେମଲେନା ନିୟମ୍ ବାଗ୍ବକ୍ ଆପାଉଲଲା ଅ'ଗଁସ୍ଲା'ଗା'ସା' ମାଇ ମାମା ସୁନ'କୁନୁଂ ନିଂ ଅଂଅଁ'ତିଂ; ସା' ମାଇ ମା'ଏନ୍ ନିୟମ୍ ବାଗ୍ବକ୍ ମାମା ନିନ୍ଦାଲ'ସେକ୍ ସୁନ'ତା ଡ'ସେକ୍ ନିଂ ମାଗ'ତିଂ। ମାତର୍ ଜୁଲ'ନା ଆମାଇ ଅଗୁଇ'ନା କି ଆରା'ଗେ ବନ୍ଦିବକ୍ ସୁରୁଂନାସା ଡନ୍ଡ୍ ବିବେ'ସୁଗ ମାନ୍ସା ମାଇ ଅଲିରାକ୍କାମ୍ ଡେମ' ଆଡୁତା । 30ମାରି ଆକୁନା ଅଡାପ୍ପୁଲେଇ ଏନ୍ତୁକ୍ର ଏତ୍କୁନୁଂ କବର୍ ସୁଂତମ୍ ଅଂଅଁ'ନିଂସା' ନିଂ ନନ୍ବକ୍ ଆମାଇ ଆଇ'କୁ ବେନ୍ଟାୟ'ନିଂ । ମାରି ମାଇନା ବାଗ୍ବକ୍ ନିନ୍ଦାଲ'କୁନୁଂ ରେମଲେବକ୍ସା ନନ୍ବକ୍ ସାକ୍ସେକ୍ ସୁଁସୁପୁଲେଇ ସୁନ'ନିଂ ।
ଡି'କେନା ମୁଇ ସିଟି ଲେକ୍ଲ' ବେନ୍ଟାୟ' ।
31ସା' ମାଇ ସୁନ'କୁନୁଂସୁଗ ସଇନିକଲେ ଆପାଉଲଲା ଉନ୍ତ୍ ତୁମୁଂଗ ଆନ୍ତିପାତ୍ରି ଡ'ସେକ୍ ଇମିକୁନୁଂ ଉଂଗମ୍ ପନ୍ତେକ୍ ରିଂଅଁ' ଉଇଗା'। 32ଆଇ'ବେରା ଆପାଉଲଲା କାଇସରିଆ ଉଂଗମ୍ବକ୍ ରିଂଅଁ' ଉଇପୁଲେଇ ଗଡା ବାଗ୍ବକ୍ ଲେଇ'ସେକ୍ ଉଇଡେଂକୁନୁଂ ସଇନିକ୍ ରେମଲେବକ୍ ସୁନ' ବେନ୍ଟାୟ'ସେକ୍ ମା'ଏ ସଇନିକଲେ ଡୁକୁନୁଂ ଡିଂଅଁବକ୍ ଆନ୍ଡେଇଁ ସା'ଗା' । 33ଗଡା ବାଗ୍ବକ୍ ଲେଇ'ସେକ୍ ଉଇଡେଂକୁନୁଂ ସଇନିକ୍ ରେମଲେ କାଇସରିଆ ମୁନା'ଉଂଗମ୍ବକ୍ ସାକ୍ସେକ୍ ଗୁତୁନ୍ ସିଟି ଗୁତୁନ୍ ମୁନା'ରେମ୍ବକ୍ ବେଡ', ମାରି ଆପାଉଲଲାସା ମାଇନା ତିତିବକ୍ ବେଡ' । 34ଗୁତୁନ୍ ମୁନା'ରେମ୍ ସିଟି ପଡ୍ସେକ୍ ପାଉଲଲା ଇମ୍ବ'ନ୍ ଦେସ୍ନା ରେମ ଡ'ସେକ୍ ଅ'ଗଁସ୍ଲା'ଗା' । ସା' ମାଇ କିଲିକିଆନା ରେମ ଡ'ସେକ୍ ମାଇ ମାଗ' । 35ମାଗ'ସେକ୍ ମାଇ ଆପାଉଲଲା ସୁନ', “ନନା ବାଗ୍ବକ୍ ନିନ୍ଦାଲ'କୁନୁଂ ରେମଲେସା ଆକେ ଡେଲ'ନା ନନା ବିସୟ ଅଂତିଂ” ଡ'ସେକ୍ ସୁନ' । ମାରି ଆପାଉଲଲା ଏରଦ୍ ରାଜାନା ଡିଂଅଁବକ୍ ବୁଂଅଁ'ସେକ୍ ଜୁଲ'କୁଲା ଡ'ସେକ୍ ମାଇ ସୁନ' ।
CC BY-NC-ND 4.0