ପେରିତ 22
22
1ପାଉଲଲା ସୁନ', “ଅ ନିଂନା ବୁୟାଂଏଁ ମାରି ବାଲେ, ଆନିଂ ଜାଜା ନିନ୍ଦାଲ'ତା ଆମା'ଏ ନିଂ ମାମା ସୁଁସୁ ଡୁତା ଗୁତୁନା ପେ ଆ'ନା ବଲ୍ ଅଂ” ଡ'ସେକ୍ ସୁନ' ।
2ମାଇ ଆମା'ଏ ଏବ୍ରିସାମ୍ବକ୍ ସୁନ'କୁନୁଂ ମା'ଏ ଅଂଅଁ'ସେକ୍ ଅଦିକ୍ ଜୁ'ଜା' ଡିନ୍ଡେଂଆର୍ ଉଇଗା' ।
3 #
ପେରିତ 5:34–39
ସା' ପାଉଲଲା ଆମା'ଏ ସୁନ', “ନିଂ କିଲିକିଆ ଦେସ୍ନା ତାର୍ସ ଉଂଗମ୍ବକ୍ ଜନମ୍ ଡେଂକୁନୁଂ ମୁଇନ୍ଡା ଜିଉଦିରେମ, ମାତର୍ ନିଂ କେନ୍ ଜିରୁସାଲମ୍ ମୁନା'ଉଂଗମ୍ବକ୍ ଇଂଗେର୍ଗୁତିଂ । ନେଇ'ନା ଜିଉଦିରେମଲେନା ମାମା ନିୟମ୍ ଡୁତା ଗୁତୁନ୍ ଗୁଲାଇ ଗମାଲିୟେଲ୍ଲା ଆନିଂ ଅବୁଦି ବଲ୍ ଅମାଗ' । ମାରି ପେ ଆ'ନା ଆମାପ୍ରୁ ମାନ୍ସେ'ଗା ଡୁକୁପୁଲେଇ ମି ଗୁତୁନ୍ ନିୟମ୍ ଗୁଲାଇ ବଲ୍ ମାନ୍ଗୁତୁପେ ଡୁ'ତୁନ୍ଉ ନିଂସା ଆମାପ୍ରୁ ମାନ୍ସେ'ଗା ଡୁକୁପୁଲେଇ ଗୁତୁନ୍ ନିୟମ୍ ଗୁଲାଇ ଅବୁଦି ବଲ୍ ମାନ୍ସେକ୍ ଡୁକୁନିଂ । 4#ପେରିତ 8:3; 26:9–11ପ୍ରବୁନା କେନ୍ କୁରୁଂବକ୍ ବିସ୍ବାସ୍ ଡେମ'ସେକ୍ ଉଇଡେଂକୁନୁଂ ରେମଲେବକ୍ ଗୁଗୁଇ'ପନ୍ତେ'କା ନିଂ ଅବୁଦି କସ୍ଟ ବେଡ'କୁନିଂ ମାରି ଆଇଂଗେରେ ଆସେଲାନେ ସବ'ସେକ୍ ବନ୍ଦିବକ୍ ସୁରୁଂଅଁ'କୁନିଂ । 5ନିଂ ସୁନ'କୁନୁଂ ସତ୍ ଡ'ସେକ୍ ମୁନା'ପୁଜାରିଲେନ୍ ମୁନା'ପୁଜାରିଲା ମାରି ନେଇ' ଜିଉଦିରେମଲେନା ମୁନା'ରେମଲେ ନିଂନା ସାକି ଡୁତା । ଦମେସକବକ୍ ଡୁକୁନୁଂ ମା'ଏନା ରେମଲେବକ୍ ବିବେ'ପୁଲେଇ ମା'ଏନ୍କୁରୁଂ ନିଂ ସିଟି ରିଂଅଁ' ଉଇସେକ୍ ଆତା ଆଜିସୁଲା ବିସ୍ବାସ୍ ଡେମ'ସେକ୍ ଡୁକୁନୁଂ କେନ୍ ରେମଲେବକ୍ ସବ'ସେକ୍ ଜିରୁସାଲମ୍ ମୁନା'ଉଂଗମ୍ବକ୍ ରିଂଅଁ' ସାକ୍ସେକ୍ ଡନ୍ଡ୍ ବିବେ'ପୁଲେଇ ଉଇଡେଂକୁନିଂ ।
ପାଉଲଲା ମାଇନା ଜିବନ୍ ବାଦ୍ଲି ଡେଂକୁନୁଂ ସୁଁସୁଡେନ୍
6ମାତର୍ ନିଂ ଡୁ'ତୁନା ଉଇସେକ୍ ମୁନ୍ଡେବେଲା ଦମେସକ ମୁନା'ଉଂଗମ୍ ତାଇ'ଡେବେଲା ସେଟ୍ଟ' କି'ତୁଂକୁରୁଂ ଅବୁଦି ତାର୍କି'ବାଇ' ତାରା' ଆନିଂ ସାର୍ବେର୍ତି ବାଂବେଡ' । 7ସା' ନିଂ ତୁବୁକ୍ବକ୍ ଲକ୍ନିଂ ମାରି ଆଇ'ତୁନ୍ବେଲା ମୁଇନ୍ଡା ଆନିଂ ସୁନ'କୁନୁଂ ତୁମ' ଅଂଅଁ'ନିଂ, ମାଇ ମା ଡ'ସେକ୍ ସୁନ' ଡ'ନା, ‘ସାଉଲ୍! ଅ ସାଉଲ୍! ନ ଆନିଂ ମାସା' କସ୍ଟ ବେଡ'ତୁନ’ ଡ'ସେକ୍ ସୁନ'କୁନୁଂ ଅଂଅଁ'ନିଂ । 8ସା' ନିଂ ଆମାଇ, ‘ଅ ପ୍ରବୁ, ନ ଜା?’ ଡ'ସେକ୍ ସୁନ'ନିଂସା' ମାଇ ଆନିଂ ସୁନ', ‘ନିଂ ନାଜରିତ୍ ଉଂଗମ୍ନା ଜିସୁଲା, ନ ଆଜା କସ୍ଟ ବିବେ'ଡେନ୍ତୁନ ଗୁତୁନା ନିଂଉ’ ଡ'ସେକ୍ ସୁନ' । 9ନିଂବୁରଂ ଡୁକୁନୁଂ ରେମଲେ ଆତୁନ୍ ତାର୍କି'ବାଇ' ତାରା' ଜୁଜୁ ଗଂଗା' । ମାତର୍ ଆନିଂ ସୁନ'କୁନୁଂ ତୁମ' ମା ଡ'ସେକ୍ ମା'ଏ ଆମାକ୍ତ ।
10ମାରି ନିଂ, ‘ଅ ପ୍ରବୁ, ନିଂ ମା ଡିନ୍ଡେମ୍ ଡୁତା?’ ଡ'ସେକ୍ ଅ'ଗଁସ୍ଲାକ୍ନିଂ ।
ସା' ପ୍ରବୁ ଆନିଂ ସୁନ', ‘ନ ତନା, ମାରି ନ ଦମେସକ ମୁନା'ଉଂଗମ୍ବକ୍ ଉୟା । ଆତା ଉଇନା ନ ମାମା କାମ୍ ଡିନ୍ଡେମ୍ ଡୁତା ଡ'ସେକ୍ ନିଂ ମା ଏତ୍ଗୁତିଂ ଗୁତୁନ୍ ଗୁଲାଇ ଆନ ମୁଇନ୍ଡା ସୁନ୍ତ’ ଡ'ସେକ୍ ସୁନ' । 11ନିଂବୁରଂ ଡୁକୁନୁଂ ରେମଲେ ଆନିଂ ତୁଂତୁଂଅଁ'ସେକ୍ ଦମେସକ ଉଂଗମ୍ବକ୍ ରିଂଅଁ' ଉଇଗା' । ମାସା'ଡ'ନା ଗୁତୁନ୍ ତାରା' ଅବୁଦି ତାର୍କିକ୍ସେକ୍ ଆନିଂ ବାଂବେଡ'ସା' ନିଂନା ମ' ଆତାର୍ତା ଡେଂକୁ ।
12ଗୁତୁନ୍ ଉଂଗମ୍ବକ୍ ଅନନିୟ ଡ'ସେକ୍ ଇମିକୁନୁଂ ମୁଇନ୍ଡା ଡୁକୁ । ମାଇ ମାପ୍ରୁନା ମୁନ୍ସୁଗ ଗୁଲାଇ ଡେମ'ସେକ୍ ମାରି ଜିଉଦିରେମଲେନା ଗୁଲାଇ ନିୟମ୍ ବଲ୍ ମାନ୍ସେକ୍ ଡୁକୁ । ମାରି ଆତା ଡୁକୁନୁଂ ଗୁଲାଇ ଜିଉଦିରେମଲେ ମାଇ ମୁଇନ୍ଡା ଦରମ୍ବାଇ' ରେମ ଡ'ସେକ୍ ସାକି ସୁନ'କୁ । 13ଗୁତୁନ୍ ରେମ ନିଂବକ୍ ସାକ୍ସେକ୍ ନିଂନା ଇନ୍ତୁ ତଂସେକ୍ ସୁନ', ‘ଅ ବାଇଲକ୍ ସାଉଲ୍, ନନା ମ' ତାରେଇ'’ ଡ'ସେକ୍ ସୁନ'ସା' ଆଇ'ତୁନ୍ବେଲାଉ ନିଂ ଆମାଇ ଆଇ'କୁ ଜୁଜୁ ଗଂନିଂ ।
14ମାରି ମାଇ ସୁନ', ‘ନେଇ'ନା ୟା'ତୁତାଲେ ସୁନ୍ଡ୍ରକୁନୁଂ ମାପ୍ରୁ ଆନ ମାଇନା ମୁନ୍ ମା ଗୁତୁନା ମାଗ୍ମାକ୍ପୁଲେଇ ମାରି ଜା ମୁଇନ୍ଡା ମାଇନା ଦରମ୍ବାଇ' ଗୁପାମ୍ରେମ୍ ଡୁତା ଆମାଇ ଜୁଜୁପୁଲେଇ ମାରି ମାଇ ନିଜେ ସୁନ'କୁନୁଂ ତୁମ' ଅଂପୁଲେଇ ଆନ ସିରେଲ'ତା । 15ମାସା'ଡ'ନା ନ ମାମା ଜୁଲ'ତୁନ ମାରି ମାମା ଅଂଅଁ'ତୁନ ଗୁତୁନ୍ ଗୁଲାଇ ରେମଲେନ୍ବକ୍ ସାକି ସୁନ୍ତୁନ । 16ସା' ନ ଆ'ନା ଡେରି ଆଡେଂଗା', ନ ସେଟ୍ଟ' ତଗ୍ଡାକ୍ସେକ୍ ବାପ୍ତିସ୍ମା ରିଂଆଁ ମାରି ଜିସୁନା ଇମି ସବ'ସେକ୍ ପାର୍ତନା ଡେମ'ସେକ୍ ନନା ପାପ୍ ଗୁଲାଇ ଗୁଇଡାଗ'ସୁଂ ।’”
ଜିଉଦି ଆରାକ୍ବାଇ' ରେମଲେବକ୍ ଉଇସେକ୍ ବାନିକବର୍ ସୁଁସୁପୁଲେଇ ଆପାଉଲଲା ସିରେଡେନ୍
17“ତିର୍ଗି' ନିଂ ଜିରୁସାଲମ୍ ମୁନା'ଉଂଗମ୍ବକ୍ ଆନ୍ଡେଇଁସେକ୍ ମନ୍ଦିର୍ ବିତ୍ରେ ପାର୍ତନା ଡିନ୍ଡେମ୍ବେଲା ମାପ୍ରୁ ଆନିଂ ଅମାକ୍ପୁଲେଇ ମାମା ମୁସୁକ୍ଡିମ୍ ଅସୁୟ'କୁନୁଂସୁଗ ଡେଂଗା'। 18ସା' ନିଂ ମା ଜୁଲ'ନିଂ ଡ'ନା, ପ୍ରବୁ ଆନିଂ ସୁନ'ତା ‘ନ ସେଟ୍ଟ' ଜିରୁସାଲମ୍କୁରୁଂ ତୁର୍ସେକ୍ ଡୁଂଆଁ । ମାସା'ଡ'ନା ନ ନିଂନା ବିସୟରେ ମା ସାକି ସୁନ'ନାସା ମା'ଏ ନନା ତୁମ' ଆଅଂତ’ ଡ'ସେକ୍ ସୁନ'କୁନୁଂ ଜୁଲ'ନିଂ ।
19ମାତର୍ ଆମାଇ ନିଂ ସୁନ'ନିଂ, ‘ଅ ପ୍ରବୁ, ଜିଉଦିରେମଲେନା ପାର୍ତନା ଡିଂଅଁବକ୍ ଉଇସେକ୍ ଆନ ବିସ୍ବାସ୍ ଡେମ'ସେକ୍ ଡୁକୁନୁଂ ଆଗୁଲାଇ ରେମଲେ ସବ'ସେକ୍ ବନ୍ଦିବକ୍ ସୁରୁଂଅଁ'ବୁଂଅଁ'କୁନିଂ ମାରି ଆମା'ଏ ବୁଗ୍ସଲ'ତିସଲ' ବୁଂଅଁ'କୁନିଂ ଡ'ସେକ୍ ମା'ଏ ମାଗ'ତା । 20#ପେରିତ 7:58ସ୍ତିପାନ୍ଲା ନନା ବିସୟ ଆରେମଲେ ସାକି ସୁନ'ସା' ରେମଲେ ଆମାଇ ଅଗୁଇ' ଡେଂକୁନୁଂବେଲା ନିଂସା ଆତା ତଂସେକ୍ ଆମାଇ ଅଗୁଇଏଇ' ଡ'ସେକ୍ ମୁନ୍ ଡେଂକୁନିଂ । ମାରି ଆସ୍ତିପାନ୍ଲା ଅଡାପ୍ଡେଂକୁନୁଂ ରେମଲେନା ସକାବାନ୍ଦାବକ୍ ନିଂ ଜାଗ୍ଲ'ସେକ୍ ଡୁକୁନିଂ ଡ'ସେକ୍ସା ମା'ଏ ମାଗ'ତା’ ଡ'ସେକ୍ ସୁନ'ନିଂ ।
21ମାତର୍ ପ୍ରବୁଲା ଆନିଂ ସୁନ', ‘ନ ଉୟା; ମାସା'ଡ'ନା ଆନ ନିଂ ଅବୁଦି ସୁଲୁଂବକ୍ ଜାଜା ଜିଉଦିରେମଲେ ଆରାକ୍ ଡୁ'ତୁନ୍ବାଇ' ରେମଲେନ୍ବକ୍ ବେନ୍ଟାଇତିଂ’ ଡ'ସେକ୍ ସୁନ' ।”
22ପାଉଲଲା କେନ୍ ତୁମ' ସୁଁସୁପନ୍ତେ'କା ରେମଲେ ମାଇନା ତୁମ' ଅଂଅଁ'ସେଗା'ଉ ଡୁକୁ । ତିର୍ଗି' ମା'ଏ ଗୁଲାଇର ଅବୁଦି ଡକ୍ତି'ତା କିରକ୍ସେକ୍ ସୁନ', “ଡି'କେନ୍ବାଇ' ରେମବକ୍ ଅଗୁୟ'ସୁଂ! ମାଇ ବୁରକ୍ସେକ୍ ଡୁକୁ ଦର୍କାର୍ ଆରାକ୍” ଡ'ସେକ୍ ସୁନ' ।
23ମାରି ମା'ଏ ଅବୁଦି କିରକ୍ସେକ୍ ନିଜର୍ ନିଜର୍ନା ସକାବାନ୍ଦାଲେ ତଗ' ଅଡକ୍ସୁଂଅଁ'ସେକ୍ ଡୁଲି ଜୁଗ'ସେକ୍ ବାଗ୍ବକ୍ ଉଇସୁର୍ ଆବଡ୍ଗା' । 24ସା' ଆଇ'ତୁନ୍ବେଲା ସଇନିକଲେ ଡୁକୁନୁଂ ଡିଂଅଁବକ୍ ଆପାଉଲଲା ରିଂଅଁ' ଉଇପୁଲେଇ ଅଜାର୍ଟା ସଇନିକ୍ ରେମଲେନା ମୁନା' ରେମ ସୁନ', ରେମଲେ ମାଇନା ବାଗ୍ବକ୍ ମାସା' ଡି'କେନା କିରକ୍ସେକ୍ ସୁନ'ତା ଡ' ମାଗ୍ମାକ୍ପୁଲେଇ କରଡାବୁରଂ ବୁଗ'ସେକ୍ ଆପାଉଲଲା ଅ'ଗଁସ୍ଲାଗ୍ ଡୁତା ଡ'ସେକ୍ ମାଇ ମାରି ସୁନ' । 25ସା' ମା'ଏ ଆପାଉଲଲା କରଡାବୁରଂ ବୁଗ୍ବୁଗ୍ପୁଲେଇ ତୁଲ'କୁନୁଂବେଲା ଆତା ମାଇନ୍ କନ୍ଡେକ୍ ତଂକୁନୁଂ ଆତୁନ୍ ସଏଟା ସଇନିକ୍ ରେମଲେନା ମୁନା' ରେମ ପାଉଲଲା ସୁନ', “ବୁଲ୍କାମ୍ ଡେମ'ତା କି ଆରାକ୍ ଡ'ସେକ୍ ବିସାର୍ନା ମଡିନେମ୍ ପେ ଆମୁଇନ୍ଡା ରମିୟ ଦେସ୍ନା ରେମ କରଡାବୁରଂ ବୁଗ୍ବୁଗ୍ପୁଲେଇ ନିୟମ୍ ଡୁତା କି?” ଡ'ସେକ୍ ଅ'ଗଁସ୍ଲା'ଗା' ।
26ସା' ଗୁତୁନ୍ ସଏଟା ସଇନିକ୍ ରେମଲେନା ମୁନା' ରେମ କେନା ଅଂଅଁ'ସେକ୍ ଆତୁନ୍ ଅଜାର୍ଟା ସଇନିକ୍ ରେମଲେନା ମୁନା' ରେମବକ୍ ଉଇସେକ୍ ସୁନ', “ନ ମା ଡିନ୍ଡେମ୍ପୁଲେଇ ଏତ୍ଗୁତୁନ? ମାଇତ ରମିୟ ଦେସ୍ନା ରେମ” ଡ'ସେକ୍ ସୁନ' ।
27ସା' ଗୁତୁନ୍ ଅଜାର୍ଟା ସଇନିକ୍ ରେମଲେନା ମୁନା' ରେମ ପାଉଲନ୍ବକ୍ ଉଇସେକ୍ “ନ ସତଇସା ରମିୟ ଦେସ୍ନା ରେମ ଇ?” ଡ'ସେକ୍ ଅ'ଗଁସ୍ଲା'ଗା' ।
ସା' ପାଉଲଲା “ଅ'ଅଁ ” ଡ'ସେକ୍ ସୁନ' ।
28ସା' ଗୁତୁନ୍ ଅଜାର୍ଟା ସଇନିକ୍ ରେମଲେନା ମୁନା' ରେମ ସୁନ', “ଜୁ, ନିଂ ରମିୟ ରେମ ଏପୁଲେଇ ଅବୁଦି ଡାବୁ ବେଡ'ସେକ୍ ଏଗୁତିଂ” ଡ'ସେକ୍ ସୁନ' ।
ସା' ପାଉଲଲା ସୁନ', “ନିଂତ ଜନମ୍ବାଂସା' ରମିୟ ରେମ” ଡ'ସେକ୍ ସୁନ' ।
29ସା' ଆମାଇ ଅ'ଗଁସ୍ଲାକ୍ପୁଲେଇ ଡୁକୁନୁଂ ରେମଲେ କେନା ଅଂଅଁ'ସେକ୍ ମାଇନ୍କୁରୁଂ ସେଟ୍ଟ' ତୁର୍ସେକ୍ ଡୁଂଗା' । ଗୁତୁନ୍ ଅଜାର୍ଟା ସଇନିକ୍ ରେମଲେନା ମୁନା' ରେମସା ପାଉଲଲା ମୁଇନ୍ଡା ରମିୟ ଦେସ୍ନା ରେମ ଡ' ମାଗ'ସେକ୍ ଅବୁଦି ବୁତୁଂଉଇଗା' । ମାସା'ଡ'ନା ମାଇ ଆମାଇ ତୁଲ'ସେକ୍ ବୁଗ୍ବୁଗ୍ପୁଲେଇ ସୁନ'କୁ ।
ପାଉଲଲା ଜିଉଦିରେମଲେନା ମୁନା'ରେମଲେବୁରଂ ଅଇଁଡେନ୍
30ପାଉଲଲା ସତଇସା ମା ଡେମ'ବୁଂଅଁ'ସା' ଜିଉଦିରେମଲେ ଆମାଇ ଡି'କେନ୍ ସୁନ'ତା ଡ'ସେକ୍ ଗୁତୁନ୍ ସଇନିକ୍ ରେମଲେନା ମୁନା'ରେମ୍ ମାଗ୍ମାକ୍ପୁଲେଇ ମୁନ୍ଡେଂଗା'ସା' ବେରା ଆପାଉଲଲା ତୁଲ'କୁନୁଂ ତଗ'ସେକ୍ ଆମୁନା'ପୁଜାରିଲେ ମାରି ଆଜିଉଦିରେମଲେନା ମୁନା'ରେମେ ଆଗୁଲାଇର ବିସାର୍ ଡିନ୍ଡେମ୍ନା ଜାଗାବକ୍ ସୁସାପ୍ପୁଲେଇ ସୁନ' । ମାରି ଆପାଉଲଲା ବିସାର୍ ଡିନ୍ଡେମ୍ନା ତାନ୍ବକ୍ ୱାୟ' ରିଂଅଁ'ସେକ୍ ମା'ଏନା ସାର୍ମ'କନ୍ଡେକ୍ ଅ'ତନ'ବେଡ' ।
Currently Selected:
ପେରିତ 22: BFW
Highlight
Copy
Compare
Share
Want to have your highlights saved across all your devices? Sign up or sign in
CC BY-NC-ND 4.0