ପେରିତ 16
16
ପାଉଲଲା ମାରି ସିଲାଲାବୁରଂ ତିମତିଲା ଉଇଡେନ୍
1ମାରି ମାଇପା ଦର୍ବି ଉଂଗମ୍ବକ୍ ସାକ୍ସେକ୍ ଉନ୍ତ୍କୁରୁଂ ଲୁସ୍ତ୍ରା ଉଂଗମ୍ବକ୍ ଉଇଗା' । ଆତା ତିମତିଲା ଡ'କୁନୁଂଆଁ ମୁଇନ୍ଡା ଆଜିସୁ ବିସ୍ବାସ୍ ଡେମ'ସେକ୍ ଡୁକୁଗା' । ମାଇନା ୟଂ ମୁଇନ୍ଡା ଜିଉଦିରେମ ଆଜିସୁ ବିସ୍ବାସ୍ ଡେମ'ସେ'ଗା ଡୁକୁ ମାତର୍ ମାଇନା ବା ଗିରିକ୍ ରେମ ଡୁକୁ । 2ଲୁସ୍ତ୍ରା ମାରି ଇକନିୟ ଉଂଗମ୍ବକ୍ ଆଜିସୁ ବିସ୍ବାସ୍ ଡେମ'କୁନୁଂ ରେମଲେ ଆତିମତିଲା ବଲ୍ରେମ୍ ଡ'ସେକ୍ ସାକି ସୁନ'କୁ । 3ପାଉଲଲା ଆତିମତିଲାସା ମାଇବୁରଂ ରିଂଅଁ' ଉଇପୁଲେଇ ମୁନ୍ଡେଂଗା' । ମାଇନା ବା ମୁଇନ୍ଡା ଗିରିକ୍ ରେମ ଡ'ସେକ୍ ଆତୁନ୍ ଦେସ୍ନା ଜିଉଦିରେମଲେ ଗୁଲାଇର ମାଗ'ତାସା' ପାଉଲଲା ଆତିମତିଲା ସୁନତ୍ ଅ'ଡେମ' । 4ମାରି ଜିରୁସାଲମ୍ ମୁନା'ଉଂଗମ୍ବକ୍ ପେରିତଲେ ମାରି ମୁନା'ରେମଲେ ଗୁଲାଇର ଅଇଁୟ'ସେକ୍ ରେମଲେ ମି ଡୁକୁଡୁତା ଡ'ସେକ୍ ସୁନ'କୁନୁଂ ଗୁଲାଇ ମି ମାନ୍ସେକ୍ ଡୁକୁନା ଡେନ୍ତା ଡ'ସେକ୍ ଗୁଲାଇ ଉଂଗମ୍ ଉଂଗମ୍ ବୁଲ୍ଲ'ସେକ୍ ମା'ଏ ସୁନ' । 5ସା' ଆଜିସୁ ବିସ୍ବାସ୍ ଡେମ'କୁନୁଂ ରେମଲେ ମାରି ଅଦିକ୍ ଅଦିକ୍ ବିସ୍ବାସ୍ ଡିନ୍ଡେମ୍ ଗଂଗା' ମାରି ଅବୁଦିର ଆଜିସୁଲା ବିସ୍ବାସ୍ ଡେମ' ।
ମାକିଦନିଆ ଉଂଗମ୍ବକ୍ ସାକ୍ସେକ୍ ସାନ୍ଡୁଂ ଡ'ସେକ୍ ଆପାଉଲଲା ୱାୟ'ତା
6ମାରି ଆସିଆ ଦେସ୍ବକ୍ ଉଇସେକ୍ ବଲ୍କବର୍ ଆସୁନ' ଡ'ସେକ୍ ପବିତ୍ର ଆତ୍ମା ଆମା'ଏ ପିଟାୟ'ସା' ମା'ଏ ପୁର୍ଗିଆ ମାରି ଗାଲାତିୟ ଦେସ୍କୁରୁଂ ଉଇଗା' । 7ମାରି ମା'ଏ ମୁସିଆ ଦେସ୍ ଉନ୍ତୁ' ସାକ୍ସେକ୍ ବିତୁନିଆ ଦେସ୍ବକ୍ ଗାଇତୁନେଇ ଡ'ସେକ୍ ଏତ୍ଗା' । ମାତର୍ ଜିସୁନା ଜିବନ୍ ଆମା'ଏ ଆତା ଆଉଇଗା' ଡ'ସେକ୍ ପିଟାୟ' । 8ସା' ମା'ଏ ମୁସିଆ ଦେସ୍ ମନ୍ଜା ଗାଇସେ'ଗା ତ୍ରୟା ମୁନା'ଉଂଗମ୍ବକ୍ ସା'ଗା' । 9ସା' ଉନ୍ତା ତୁମୁଂଗ ଆପାଉଲଲା ମୁଇ ମୁସୁକ୍ଡିମ୍ସୁଗ ଅସୁୟ' । ଗୁତୁନ୍ ମୁସୁକ୍ଡିମ୍ବକ୍ ମାଇ ମା ଜୁଲ' ଡ'ନା ମାକିଦନିଆ ଦେସ୍ନା ମୁଇନ୍ଡା ମାଇନ୍ବକ୍ ସାକ୍ସେକ୍ “ନ ମିଏସା ମାକିଦନିଆବକ୍ ସା'ବା ମାରି ଆନେଇ ସାନ୍ଡୁଂବେ” ଡ'ସେକ୍ ସୁନ'କୁନୁଂ ମାଇ ଜୁଲ' । 10ପାଉଲଲା ଡି'କେନା ମୁସୁକ୍ଡିମ୍ ଜୁଲ'ସା' ଆତା ଉଇସେକ୍ ଜିସୁନା ବଲ୍କବର୍ ସୁଁସୁପୁଲେଇ ମାପ୍ରୁ ଆନେଇ ସୁନ'ତା ଡ' ବିସ୍ବାସ୍ ଡେମ'ସେକ୍ ନେଇ ଗୁଲାଇର ସୁରୁଇ' ମାକିଦନିଆ ଦେସ୍ବକ୍ ଉଇତୁନେଇ ଡ'ସେକ୍ ସେସ୍ଟା ଡେମ'ନେଇ ।
ପିଲିପି ଉଂଗମ୍ବକ୍ ଲୁଦିଆ ଡ'ସେକ୍ ମୁଇନ୍ଡା ସେଲାନ୍ଲା ଆଜିସୁ ବିସ୍ବାସ୍ ଡିନ୍ଡେମ୍ଡେନ୍
11ତ୍ରୟାକୁରୁଂ ନେଇ ମୁଇ ମୁନା' ଡଂଗାବକ୍ ଲେଇ'ସେକ୍ ସିଦା ସାମତ୍ରାକି ଡ'ସେକ୍ ମୁଇ ଉଂଗମ୍ବକ୍ ପ'ଗ୍ନେଇ ମାରି ବେରା ଉନ୍ତାକୁରୁଂ ଡଂଗାବକ୍ ଲେଇ'ସେକ୍ ନିୟାପଲି ଡ'ସେକ୍ ମୁଇ ମୁନା'ଉଂଗମ୍ବକ୍ ଡେଲ'ନେଇ । 12ଉନ୍ତାକୁରୁଂ ମାକିଦନିଆ ଜିଲାନା ପିଲିପି ଡ'ସେକ୍ ମୁଇ ମୁନା'ଉଂଗମ୍ବକ୍ ଉଇକୁନେଇ । ଆତା ରମିୟ ରେମଲେ ଅବୁଦିର ଡୁକୁ । ଆତା ନେଇ ଆ'ଇଦିନ୍ସୁଗ ଡୁକୁନେଇ । 13ବିସ୍ରାମ୍ଦିନ୍ବକ୍ ଗୁତୁନ୍ ଉଂଗମ୍ନା ମୁନା' ଡାନ୍ଡର୍ ବାଇରି ତୁର୍ସେକ୍ ମୁଇ କିନ୍ଡାକ୍ ପାଲି ଉଇକୁନେଇ । ମାସା'ଡ'ନା ଆତା ରେମଲେ ପାର୍ତନା ଡିନ୍ଡେମ୍ପୁଲେଇ ସାପ୍ତା ଡ'ସେ'ଗା ଏତ୍କୁନେଇ । ସା' ଆତା ଏନ୍ତୁକ୍ ସେଲାନେ ପାର୍ତନା ଡିନ୍ଡେମ୍ପୁଲେଇ ରୁନ୍କୁଗା'ସା' ନେଇସା ଆତା ଲେଇ'ସେ'ଗା ମା'ଏବୁରଂ ଅଇଁୟ'ନେଇ । 14ସା' ତୁୟାତିରା ମୁନା'ଉଂଗମ୍ନା ଲୁଦିଆ ଡ'କୁନୁଂ ମୁଇନ୍ଡା ସେଲାନ୍ଲା ନେଇ ଅଇଁୟ'କୁନୁଂ ଅଂଅଁ'ସେ'ଗା ଆତା ଲେଇ'କୁଗା' । ମାଇ ଅବୁଦି ଦାମ୍ବାଇ'ନା କିଲୁଂବେଇଁ ରଂଗବାଇ' ଇମ୍ପ' ସୁଂଅଁ'ସେ'ଗା ଡୁକୁଗା' । ମାରି ମାଇ ଆମାପ୍ରୁ ସୁନ୍ଡ୍ରସେ'ଗା ଡୁକୁଗା' । ପାଉଲଲା ସୁନ'କୁନୁଂ ତୁମ' ମାଇ ବଲ୍ ଅଂଅଁ'ସେକ୍ ବିସ୍ବାସ୍ ଡିନ୍ଡେମ୍ପୁଲେଇ ମାଇନା ଜିବନ୍ବକ୍ ପ୍ରବୁ ବପୁ ବେଡ' । 15ସା' ମାଇ ମାରି ମାଇନା ଡିଂଅଁନ୍ରେମ୍ ଗୁଲାଇର ବାପ୍ତିସ୍ମା ରିଂସେ'ଗା “ପେ ଆନିଂ ମାଇ ଆପ୍ରବୁଲା ବଲ୍ ବିସ୍ବାସ୍ ଡେମ'କୁନୁଂ ମୁଇନ୍ଡା ରେମ ଡ'ସେକ୍ ଜୁତୁପେ ଡ'ନା ନିଂନା ଡିଂଅଁ'ବକ୍ କିଲମ୍ରେମ୍ସୁଗ ସାକ୍ସେକ୍ ପେ ଡୁକୁଲା” ଡ'ସେକ୍ ମାଇ ଆନେଇ ସୁନ' । ଡୁ'ତୁନ୍ଉ ମାଇନା ଡିଂଅଁବକ୍ ଡୁକୁପୁଲେଇ ମାଇ ଅବୁଦି ଜବର୍ଦସ୍ ଡେମ'ସା' ନେଇ ଆତା ଡୁକୁପୁଲେଇ ଏତ୍ନେଇ।
ଆପାଉଲଲା ମାରି ଆସିଲାଲା ପିଲିପି ଉଂଗମ୍ନା ବନ୍ଦିବକ୍ ସୁରୁଂଡେନ୍
16ମୁସିଂ ନେଇ ପାର୍ତନା ଡିଂଅଁବକ୍ ଉଇରେମ୍ ଆମୁଇନ୍ଡା ଗୁପାମ୍ବୁଇ' ଅଲିକ୍ନେଇ । ଆତୁନ୍ ଗୁପାମ୍ବୁଇ' ବୁତ୍ ସବ'କୁସା' ଗୁତୁନ୍ ବୁତ୍ନା ବପୁବୁରଂ ସିଂସାଟ୍ ଜୁଲ'ସେକ୍ ଆରେମଲେ ତିର୍ଗି'ସୁମଂ ମା ଡେନ୍ତା ଡ'ସେ'ଗା ସୁଁସୁ ଗଂକୁ । ସା' ମାଇ ଡି'କେନ୍ କାମ୍ ଡେମ'ସେ'ଗା ଆମାଇନା ସାକାର୍ ଅବୁଦି ଡାବୁ ରିଂଅଁ' ବେଡ'କୁ । 17ମାଇ ଆପାଉଲଲା ମାରି ଆନେଇ ଜୁଲ'ସେ'ଗା ତେଂଗି'ତେଂଗି' ସାକ୍ସେ'ଗା ସୁନ', “କୁନୁଂଏଁ ଡ'ନା ଇମ୍ବ'ନ୍ ମାପ୍ରୁ ଅବୁଦି ମୁନା'ବାଇ' ଡୁତା ଗୁତୁନ୍ ମାପ୍ରୁନା କାମ୍ ଡିନ୍ଡେମ୍ରେମ୍, ମାପ୍ରୁ ଆରେମଲେ ମି ରକ୍ୟା ଡେମ୍ତ ଡ'ସେକ୍ ମା'ଏ ଆପେ ସୁଁସୁ ଡେନ୍ତା” ଡ'ସେ'ଗା ମାଇ ଡକ୍ତି'ତା ସୁନ' । 18ମାଇ ଅବୁଦି ଦିନ୍ ଡୁ'ତୁନ୍ଉ ଇସାଉ ସୁନ'ସେକ୍ ଡୁକୁ, ସା' ଆପାଉଲଲା ଅବୁଦି ବିଜାର୍ ଡେଂଗା'ସା' ମାଇ ଆନ୍ଡେଇଁକିକ୍ସେକ୍ ଆତୁନ୍ ସେଲାନ୍ଲା ସବ'କୁନୁଂ ଆବୁତ୍ ସୁନ' “ନିଂ ଜିସୁ କିରିସ୍ଟନା ଇମିବକ୍ ଆନ ସୁନ'ତିଂ ନ ମାଇନା ଞେରିକୁରୁଂ ତୁର୍ଡୁଂଆଁ” ଡ'ସେକ୍ ସୁନ'ସା' ଗୁତୁନ୍ ବୁତ୍ ଆଇ'କୁ ଡୁଂଗା' ।
19ନେଇ' ଡାବୁ ବାମ୍ତୁନେଇ' ଡ'ସେକ୍ ଆସ୍କୁନୁଂ ଆ'ନା ମାରି ବୁମ୍ବାମ୍ ଆଗଂତୁନେଇ' ଡ'ସେକ୍ ମାଇନା ସାକାରେ ମାଗ' । ସା' ମା'ଏ ଆପାଉଲଲା ମାରି ଆସିଲାଲା ସବ'ସେକ୍ ଆଟ୍ବକ୍ ବିସାର୍ନା ଡିନ୍ଡେମ୍ପୁଲେଇ ମୁନା'ରେମ୍ବକ୍ ୱାନ' ରିଂଗା' । 20ମା'ଏ ଆମାଇପା ରମିୟ ରେମଲେନା ମୁନା'ରେମେନ୍ବକ୍ ରିଂସେକ୍ “କୁନୁଂପା ଡ'ନା ଜିଉଦିରେମ, କେନ୍ ଉଂଗମ୍ବକ୍ ମାଇପା ସାକ୍ସେକ୍ ଅବୁଦି ଅଲିରାକ୍ବାଇ' କାମ୍ ଡେମ'ତା । 21ମାରି ନେଇ' ରମିୟ ରେମଲେନା ନିୟମ୍ବକ୍ ଇମ୍ବ'ନା ବଲ୍ ଆରାକ୍ ମାରି ମାମା ଆଡେମ' ଡ'ସେକ୍ ଡୁତା ଗୁତୁନା ମାଇପା ଡେମ୍ ଡ'ସେକ୍ ଆରେମଲେ ଅମାଗ'ତା” ଡ'ସେକ୍ ସୁନ' । 22ସା' ମା'ଏବୁରଂ ରେମଲେସା ଅବୁଦିର ମିସ୍ସେ'ଗା ଆମାଇପା ଗିସେକ୍ସେ'ଗା ବୁଗ୍ବୁକ୍ ମୁଲାୟ'।
ରମିୟ ରାଜିନା ମୁନା'ରେମ୍ ମାଇପାନା ଇମ୍ପ' ଗୁଲାଇ ଗାର' ସୁଂଅଁ'ସେକ୍ ଆମାଇପା ବୁ'ଡୁଂବୁରଂ ବୁଗ୍ ଡ'ସେକ୍ ସୁନ'। 23ସା' ମା'ଏ ଆମାଇପା ଅବୁଦି ବୁଗ'ସେ'ଗା ବନ୍ଦିବକ୍ ସୁରୁଂଅଁ' । ମାରି ମାଇପା ଡୁଂ ଡାଂତା ନ ଆମାଇପା ବଲ୍ ଜୁଲ'କୁଲା ଡ'ସେକ୍ ଆତୁନ୍ ବନ୍ଦି ଡିଂଅଁ ଜାଗ୍ବାରା ସୁନ' । 24ଆମାଇପା ବଲ୍ ଜୁଲ'କୁଲା ଡ'ସା' ଗୁତୁନ୍ ବନ୍ଦି ଜାଗ୍ବାରା ବନ୍ଦି ଡିଂଅଁ ବିତ୍ରେନ୍ ବାଂକ୍ରାବକ୍ ଅ'ଗାୟ'ସେକ୍ ମାଇପାନା ତିକ୍ସୁଂବକ୍ ବୁଡାଲେ'କା କନ୍ଟ୍ଲାଲେ ତୁଲ'ବୁଂଅଁ' ।
25ମାତର୍ ପାଉଲଲା ମାରି ସିଲାଲା ମୁଇ'ସାଂତକ୍ କନ୍ଡେକ୍ ଆମାପ୍ରୁ ପାର୍ତନା ଡିନ୍ଡେମ୍ ଡେଂକୁ ମାରି ସିସେର୍ ସେର'ସେକ୍ ସୁନ୍ଡ୍ରକୁ । ସା' ଆତା ଡୁକୁନୁଂ ବନ୍ଦିରେମ୍ ଗୁଲାଇର ଗୁତୁନା ଅଂଅଁ'ସେକ୍ ଡୁକୁ । 26ଆଇ'ତୁନ୍ବେଲା ଆଇ'କୁ ଦର୍ତନି ଅବୁଦି ଲୁନ୍ଡୁର୍ଗା' । ସା' ଗୁତୁନ୍ ବନ୍ଦି ଡିଂଅଁସା ଗୁଲାଇ ଲୁନ୍ଡୁର୍ଗା' ଡ'ନା ଗୁତୁନ୍ ବନ୍ଦି ଡିଂଅଁନା ମୁଲ୍ନା କନ୍ତିସା ଲୁନ୍ଡୁର୍ଗା' । ମାରି ଗୁତୁନ୍ ବନ୍ଦି ଡିଂଅଁନା ଡାନ୍ଡର୍ ଗୁଲାଇ ସୁରୁଇ' ରୁଗ୍ଉଇଗା' । ମାରି ଆଗୁଲାଇର ତୁଲ'କୁନୁଂ ସିଂକ୍ଲିସା ତଗ୍ପୁର୍ ଉଇଗା' । 27ସା' ଗୁତୁନ୍ ବନ୍ଦି ଜାଗ୍ବାର୍ରେମ୍ ମୁରାକ୍ସେକ୍ ଜୁଲ'ସା' ବନ୍ଦି ଡିଂଅଁନା ଗୁଲାଇ ଡାନ୍ଡର୍ ରୁଗ୍ଉଇକୁନୁଂ ଜୁଲ' । ସା' ବନ୍ଦିରେମେ ଗୁଲାଇର ଡୁଂଗା'ବେ ଡ' ଏତ୍ସେ'ଗା ମାଇ ନିଜର୍ନା କାନ୍ଦା ଜୁଗ'ସେକ୍ ଗୁଇ'ତିଂ ଡ'ସେକ୍ ପୁକ୍ବର୍ ଡେଂକୁ । 28ମାତର୍ ପାଉଲଲା ଆମାଇ ୱାୟ'ସେକ୍ “ନେଇ ଗୁଲାଇର ଆକେ ଡୁତୁନେଇ! ନ ଆପୁକ୍ବର୍ଗା'!” ଡ'ସେକ୍ ଡକ୍ତି'ତା ସୁନ' । 29ସା' ଗୁତୁନ୍ ଜାଗ୍ବାରା ମୁଇ ବତି ରିଂଅଁ' ସା'ବା ଡ'ସେକ୍ ଆରେମଲେ ସୁନ' । ମାରି ମାଇ ବିତ୍ରେ ଉର' ସାକ୍ସେକ୍ ଅବୁଦି ବୁତୁଂସେ'ଗା ଜୁର୍ଜାକ୍ସେକ୍ ପାଉଲନା ମାରି ସିଲାନା ତିକ୍ସୁଂକନ୍ଡେକ୍ ଏନ୍ଡିଗା'। 30ତିର୍ଗି' ମାଇ ଆମାଇପା ବାରେ ଅ'ତୁର'ସେକ୍ “ଅ ବାବୁଲେ, ରକ୍ୟା ବୁମ୍ବାମ୍ପୁଲେଇ ନିଂ ମା ଡିନ୍ଡେମ୍ ଡୁତା” ଡ'ସେକ୍ ଅ'ଗଁସ୍ଲା'ଗା' ।
31ସା' ମାଇପା ଆମାଇ ସୁନ', “ଆପ୍ରବୁ ଜିସୁ ବିସ୍ବାସ୍ ଡେମ୍ , ଡୁ'ତୁନ୍ ଡେମ'ନା ନ ମାରି ପେନ୍ ଡିଂଅଁନ୍ରେମ୍ ଗୁଲାଇର ରକ୍ୟା ବାମ୍ତୁପେ” ଡ'ସେକ୍ ସୁନ' । 32ମାରି ମାଇପା ଆମାଇ ମାରି ଆମାଇନା ଡିଂଅଁନ୍ରେମ୍ ଆଗୁଲାଇର ପ୍ରବୁନା ତୁମ' ସୁନ' । 33ସା' ଉନ୍ତା ତୁମୁଂଗ ଗୁତୁନ୍ ବନ୍ଦି ଜାଗ୍ବାରା ଆମାଇପା ରିଂଅଁ' ଉଇସେକ୍ ମାଡ୍ ଡେଂକୁନୁଂ ଗୁଲାଇ ବଲ୍ ଗୁଇଡାଗ' । ତିର୍ଗି' ମାଇ ମାରି ମାଇନା ଡିଂଅଁନ୍ରେମ୍ ଗୁଲାଇର ସୁରୁଇ' ବାପ୍ତିସ୍ମା ରିଂଗା' । 34ମାରି ଆମାଇପା ମାଇନା ଡିଂଅଁବକ୍ ୱାୟ'ରିଂସେକ୍ ସୁସୁମ୍ପୁଲେଇ ବେଡ' । ମାଇ ମାରି ମାଇନା ଡିଂଅଁନ୍ରେମ୍ ଆମାପ୍ରୁ ବିସ୍ବାସ୍ ଡେମ'ସା' ମା'ଏ ଗୁଲାଇର ଅବୁଦି ସାର୍ଦା ଡେଂଗା' ।
35ବେରା ଇନ୍ଜୁର୍ ରମିୟ ସର୍କାର୍ନା ମୁନା'ରେମ୍ “ଆମାଇପା ବନ୍ଦିକୁରୁଂ ଅ'ତୁର'ବେ' ” ଡ'ସେକ୍ ସୁଁସୁପୁଲେଇ ଆସଇନିକଲେ ବନ୍ଦି ଜାଗ୍ବାର୍ରେମେନ୍ବକ୍ ବେନ୍ଟାୟ' ।
36ସା' ବନ୍ଦି ଜାଗ୍ବାରା ଆପାଉଲଲା ସୁନ' “ରମିୟ ସର୍କାର୍ନା ମୁନା'ରେମ୍ ଆପା ଅ'ତୁର'ବେ' ଡ'ସେକ୍ କବର୍ ବେନ୍ଟାୟ'ତା, ସା' ପା ତୁର୍ସେ'ଗା ବଲ୍ ଉୟା” ଡ'ସେକ୍ ସୁନ' ।
37ମାତର୍ ପାଉଲଲା ଆମା'ଏ ସୁନ' “ନାଂ ରମିୟ ରେମଲେ ଡ'ନାସା ମା'ଏ ଆନାଂ ବିସାର୍ନା ମଡିନେମ୍ ଗୁଲାଇର ଜୁଲ'କୁନୁଂବକ୍ ସୁମ୍ତମ୍ ବୁଗ'ସେକ୍ ବନ୍ଦିବକ୍ ସୁରୁଂଅଁ' । ଆ'ନା ଆନାଂ ବନ୍ଦିକୁରୁଂ କଲେ ଅ'ତୁର୍ଡେନ୍ତା । ଡୁ'ତୁନା ଆରାକ୍, ରମିୟ ସର୍କାର୍ନା ଗୁତୁନ୍ ମୁନା' ରେମ ଆକେ ସାକ୍ସେ'ଗା ଆନାଂ ଅ'ତୁର'ବେଡେଇ' ” ଡ'ସେକ୍ ସୁନ' । 38ସା' ସଇନିକଲେ ଉଇସେ'ଗା ରମିୟ ଦେସ୍ନା ଆମୁନା'ରେମେ କେନ୍ ଡେଂକୁନୁଂ ଗୁଲାଇ ତୁମ' ବାର୍ସୁନ' । ସା' ମା'ଏ ଗୁତୁନ୍ ଅଂଅଁ'ସେକ୍ ଅବୁଦି ବୁତୁଂଉଇଗା' ।
39ସା' ମା'ଏ ମାଇପାନ୍ବକ୍ ସାକ୍ସେ'ଗା କେନା ନେଇନା ବୁଲ୍ , ଆନେଇ କେମା ଡେମ୍ ଡ'ସେ'ଗା ସୁନ' । ମାରି ଆମାଇପା ବନ୍ଦିକୁରୁଂ ଅ'ତୁର'ସେ'ଗା ପା କେନ୍ ମୁନା'ଉଂଗମ୍କୁରୁଂ ଉୟା ଡ'ସେ'ଗା ସୁନ' । 40ସା' ମାଇପା ଉନ୍ତ୍କୁରୁଂ ତୁର୍ସେ'ଗା ଲୁଦିଆନା ଡିଂଅଁବକ୍ ଉଇଗା' । ଆତା ଆଜିସୁ ବିସ୍ବାସ୍ ଡେମ'ସେକ୍ ଡୁକୁନୁଂ ରେମଲେବକ୍ ଜୁଲ', ମାରି ମାଇପା ଆମା'ଏ ମାପ୍ରୁନା ତୁମ' ସୁନ'ସେକ୍ ଅ'ସୁଗୁର' । ମାରି ମାଇପା ଉନ୍ତ୍କୁରୁଂ ଡୁଂଗା' ।
CC BY-NC-ND 4.0